Isaías 40:26 - Chayahuita (Shahui)

²⁶ Inta nipachin piꞌiroꞌtë nëꞌpëricoꞌ. ¡Nani canpita cari acorahuësoꞌ nitotëramaꞌ! Yaꞌipi inaquë yaꞌhuërinsopita acoato, aꞌnaya aꞌnaya insëquësona nohuantërahuëquë acorahuë. Chini chiníquën nanantato nininëna quëran përapatora, yaꞌipi yaꞌnopi,” tënin.

Isaías 40:26 ပူးပေါင်းရင်းမြစ်များ

Génesis 1:14

Ina quëran Yosë taantarin: “¡Aꞌpininsopita piꞌiroꞌtëquë yaꞌhuëꞌin. Tahuëri, tashi aꞌpintacaso marëꞌ yaꞌhuëꞌin. Inapita aꞌpinpachina, tahuëri, tashiꞌ, nisha nisha acoarin. Naporahuaton yoquiroꞌsaꞌ, piꞌipiroꞌsaꞌ, inapitanta piyapiroꞌsa nitotapi huachi!” tënin. Topachina, inachachin yaꞌhuërin huachi.

Génesis 1:16

Tahuëri aꞌpinacaso marëꞌ panca masho acorahuaton, tashinta aꞌpinacaso marëꞌ huaꞌhuishin miachin acorin. Tayoraroꞌsanta acorin.

Salmos 121:1

Motopiroꞌsa nëꞌpërahuato naporahuë: “¿Incha iporasoꞌ catahuaincoso marëꞌ huëꞌnëpoya?” tënahuë.

Salmos 19:1

Piꞌiroꞌtë nëꞌpëhuatëhuara, nani maꞌsha Yosëri acorinsopita niꞌnëhuaꞌ. Inapita yaꞌhuërin niꞌton, Yosë noya noya nininsoꞌ anitotërinpoaꞌ.

Salmos 66:3

“Nani maꞌsha acoransopitasoꞌ, paꞌyápiro ninan. Chini chiníquën nanantëran niꞌton, inimiconënpita tëꞌhuatatënën, anotatonaꞌ: ‘Tomonca,’ tëcaponaꞌ.

Isaías 42:5

Siniorosoꞌ Yosë niꞌton, piꞌiroꞌtë acorin. Ina acoaton nëꞌmëtë pëi ótënëso pochin nitërin. Isoroꞌpantaꞌ, nani maꞌsha yaꞌhuërinsopitarë chachin acorin. Ina nohuanton piyapiꞌsa inaquë nanpipi. Inari chachin niinta acotërin.

Isaías 44:24

Siniorosoꞌ nichaꞌërinquëmaꞌ. Coꞌhuara nasichátërasënquëmahuëꞌ acorinquëmasoꞌ, naporin: “Ca mini Sinioroco. Yaꞌipi maꞌsha cari acorahuë. Cari piꞌiroꞌtë nëꞌmëtë pëi pochin ótënahuë. Ca nohuanton isoroꞌpanta chinirin. Caoraíchin acorahuë. Co insonta catahuarincohuëꞌ.

Isaías 45:12

Cari isoroꞌpaꞌ ninahuë. Yaꞌipi piyapiroꞌsanta cari ninahuë. Piꞌiroꞌtëntaꞌ, cari nëꞌmëtë pëi ótënatë pochin acorahuë. Ca camaitërahuë quëran yaꞌipi tayoraroꞌsa yaꞌhuërin.

Isaías 45:7

Ca nohuanton tahuëri yaꞌhuërin. Ca nohuanton chachin tashinta yaꞌhuërin. Ca nohuanton noya yaꞌhuëpi. Ca nohuanton chachin maꞌsha onpopi. Ca Sinioroco, yaꞌipi inapita acorahuë.

Isaías 66:2

Ca chachin yaꞌipi maꞌsha ninahuë. ¡Acohuatora, caniaritopi yaꞌhuëcaisoꞌ!” tënin. Ina quëran taantarin: “Napoaporahuëꞌ, caso Sinioroco shaꞌhuitaranquëmaꞌ. Insosona catahuacaꞌhuaso nohuantohuachin, nanamëhuë tëꞌhuataton natëpon. Oshahuaninso marëꞌ co napion cancantapon. Naporahuaton: ‘Caora co nanitërahuë noya nicaꞌhuasoꞌ,’ tëcapon. Naporinsopitaráchin, noya nicato catahuaarahuë,” tënin.

Deuteronomio 4:19

Piꞌiroꞌtënta nëꞌpëhuatamaꞌ, niꞌcona piꞌi, yoqui, tayoraroꞌsaꞌ, inapita quënanatoma moshachináchin cancantotamaꞌ. Inapitasoꞌ yaꞌipi piyapiꞌsa aꞌpintacaso marëꞌ acorin. Canpoaso nipirinhuëꞌ, Yosëíchin chinotacaso yaꞌhuërin.