Isaías 35:5 - Chayahuita (Shahui)

^5-8 Naporoꞌ somarayaroꞌsa quënantaponaꞌ. Nëꞌhuëyaroꞌsanta natantaponaꞌ, nonaponaꞌ. Sonpacharoꞌsantaꞌ, yo pochin niiponaꞌ. Inotërosoꞌ, yaꞌshi yaꞌshin nipirinhuëꞌ, noꞌpa quëran notohuaroꞌ iꞌsharoꞌsa pipirantapon. Sonoroꞌsanta yaꞌhuëapon. Ipora asaniroꞌsa yaꞌhuërinquëntaꞌ, piquiraroroꞌsaꞌ, shiꞌshinamatëroꞌsaꞌ, inapita yaꞌhuëapon. Ina noꞌpanëmataëchin aꞌnara caritira pëntonapon. Co oshanëna inquihuachinahuëꞌ, co nanitapihuë inataëchin paꞌtacaisoꞌ. Naponin yonquipisopitantaꞌ, co inataquëchin paꞌsapihuëꞌ. Ina caritirasoꞌ: “Yosë caritiranën,” itaponaꞌ.

Isaías 35:5 ပူးပေါင်းရင်းမြစ်များ

Éxodo 4:11

—Coꞌta inaso nani nitotërahuë. Ca nohuanto aꞌnaquën noya nonpi. Ca nohuanton chachin aꞌnaquënsoꞌ, co nonpihuëꞌ. Ca nohuanton aꞌnaquën noya quënantopi. Ca nohuanton chachin aꞌnaquënsoꞌ, somarayapi.

Isaías 42:16

Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

Isaías 42:18

Israiroꞌsa pënënaton Siniorori napotërin: “Canpitaso nëꞌhuëya pochinquëma nipomarahuëꞌ, natancoꞌ. Canpitaso somaraya pochinquëma nipomarahuëꞌ, noya niꞌcoꞌ.

Isaías 43:8

Piyapinëhuëpitaso yaꞌpirahuanaponaraihuëꞌ, somaraya pochin cancantopi. Huëratëhuanaponaraihuëꞌ, nëꞌhuërinso pochin cancantopi. Ina pochin nipirinahuëꞌ, quëantacoꞌ.

Isaías 50:4

Sinioro piyapinën naporin: “Canotërëso pochin cancantopisopita achinicancanacaso marëꞌ, Sinioro aꞌchintërinco. Nani tashiramiachin taꞌtato natantaꞌhuaso marëꞌ catahuarinco.

Isaías 50:5

Yonquínahuan nicaꞌhuaso marëꞌ Sinioro catahuarinco. Anitotohuachincora, natërahuë. Natëtochináchin cancantërahuë.

Mateo 12:22

Ina quëran aꞌna quëmapi quëpi Quisosori anoyatacaso marëꞌ. Sopairi yaꞌcoancantërin niꞌton, co nanitërinhuëꞌ nonacasoꞌ. Co quënantacaso tërantaꞌ nanitërinhuëꞌ. Sopai aꞌparahuaton, aꞌnaroáchin anoyatërin. Noya niꞌtërin. Nonacasontaꞌ nanitërin huachi.

Mateo 21:14

Ina quëran naꞌa caniaꞌpiroꞌsaꞌ Yosë chinotopiso pëiquë yaꞌconpi Quisosori anoyatacaso marëꞌ. Aꞌnaquën somaraya nininsoꞌ. Aꞌnaquëontaꞌ apiaroꞌsaꞌ. Inapita huëꞌpachinara, aꞌnaroáchin anoyatërin.

Lucas 4:18

“Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

Juan 11:37

—Somaraya aꞌnaroáchin anoyarayatërin niꞌquëhuarëꞌ, ¿ina nohuanton Nasaronta co chimiintonhuëꞌ nimara ti? topi aꞌnaquën.

Juan 9:39

Napotohuachina, Quisosori itërin: —Isoroꞌpaquë oꞌmarahuë piyapiꞌsaꞌ noꞌtëquën shaꞌhuitaꞌhuaso marëꞌ. Somarayaroꞌsa nipisopita anoyarayatarahuë. Napoaponahuëꞌ: “Quiyaso noya niꞌtërai topisopitasoꞌ, asomarayatë pochin nitarahuë,” itërin.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.