Isaías 33:24 - Chayahuita (Shahui)

²⁴ Quirosarinquë yaꞌhuëpisopitasoꞌ, Siniorori oshanëna inquitarin niꞌton, co huachi aꞌnaya tërantaꞌ, “caniorahuë casoꞌ,” tëcaponahuëꞌ.

Isaías 33:24 ပူးပေါင်းရင်းမြစ်များ

Éxodo 15:26

“Caso Sinioroco. Canpitaso chinotëramaco. Casáchin nanitërahuë anoyatacasoꞌ. Nonahuësopita nóya natancoꞌ. Noya natanatomaꞌ, nohuantërahuëso nicoꞌ. Camaitërahuësopita natëtoma noya nipatamaꞌ, carinquëmanta noya niꞌsaranquëmaꞌ. Noya nicatënquëma canpitasoꞌ, catahuaaranquëmaꞌ. Iquipitoroꞌsasoꞌ, nisha nisha quëran anaꞌintërahuë. Canpitaso co ina pochin anaꞌintaponquëmahuëꞌ,” itërin.

Isaías 1:5

Canpitaso co natantochináchinhuëꞌ cancantëramasoꞌ, co yaaꞌporamahuëꞌ. Ina marëꞌ noꞌhuitënquëma anaꞌintëranquëmaꞌ. Co máquëma tëranta noyatërinso yaꞌhuërinhuëꞌ. Motëma quëran nantëranëmaquë huarëꞌ, piꞌniosáchin pochin, pomato pomato toconinso pochin, taꞌtaráchin niconinso pochin, niconamaꞌ. Naporamasoꞌ, co inso tëranta nonëninquëmahuëꞌ. Co tomaquë tëranta pashitatënënquëma asanorinënquëmahuëꞌ. Inapoatoma co huachi manta chiniramahuëꞌ.

Isaías 40:2

Noyasha nontatoma piyapinëhuëpita catahuaco chiníquën cancanchinaꞌ. Sontaro sirihuitërinso pochin nininsoꞌ, nani nanirin. Tëhuëpiso marëꞌ anaꞌintërahuësoꞌ, nani pahuërëtatë pochin nipi. Oshanëna marëꞌ nani naꞌcon naꞌcon parisitopi,” tënin.

Isaías 44:22

Tëhuëtatomaco oshahuanamasopita inquitëranquëmaꞌ. Chitoro inquirinso pochin inapita ayatërahuë. Carima nichaꞌëranquëma niꞌton, ca chachin tahuërëtaantaco,” tënin.

Isaías 58:8

Napohuatamaꞌ, noya noya yaꞌhuëarama huachi. Tahuërihuachina piꞌi aꞌpininso pochin nicapon. Nisha nisha maꞌsha onporamasopitantaꞌ, co shia noyatarinhuëꞌ. Naporoꞌ noyasáchin ninamasoꞌ, quëchitaton quëpaatë pochin nitarinquëmaꞌ. Huënaratërahuësonta imaatë pochin nitarinquëmaꞌ.

Deuteronomio 7:15

Sinioro paꞌpoyarinquëma niꞌton, co manta canio masarinquëmahuëꞌ. Iquipitoroꞌsasoꞌ, iráca nisha nisha quëran anaꞌintërin. Nani canpita ina nitotëramaꞌ. Co canpitaso ina pochin anaꞌintarinquëmahuëꞌ. Yaꞌipi inimiconëma tëhuënchinsoꞌ ina pochin anaꞌintapon.

Santiago 5:14

Aꞌnaquëmaꞌ caniohuatamaꞌ, ansianoꞌsaꞌ amatocoꞌ Yosë nonchinaꞌ. “Quisocristo catahuainquën,” taꞌtonaꞌ, piꞌpian tomaquë pashichinquëmaꞌ. Ina quëran Yosë nonchinaꞌ anoyatacaso marëꞌ.

Apocalipsis 21:4

Yosëri chachin naꞌnëiꞌ amirayatarin. Co huachi chiminaponahuëꞌ. Co huachi sëtaponahuëꞌ. Co huachi naꞌnëponahuëꞌ. Co piꞌpisha tërantaꞌ iquitaponahuëꞌ. Iráca naꞌcon parisitopirinahuëꞌ, co huachi ina pochin yaꞌhuaponahuëꞌ. Noya noya yaꞌhuaponaꞌ, tënin.

Apocalipsis 22:2

Ninano huáncana iiꞌ paꞌsarin. Cato yonsan quëran chachin nara papotërin. Nanpirin nara itopisoꞌ. Nani yoqui nitarin. Shonca catoroꞌ nitasoꞌ, piꞌipi naniarin. Monoquëontaꞌ yaꞌipi piyapiꞌsa noya yaꞌhuëcaiso marëꞌ yaꞌhuërin. Co huachi canioponahuëꞌ.