Isaías 32:16 - Chayahuita (Shahui)

¹⁶ Yaꞌipi piyapiroꞌsa noꞌtëquënáchin yonquiapi. Inapoatonaꞌ, yaꞌipi yaꞌhuërëhuaso noꞌpaquë noyasáchin nicaponaꞌ.

Isaías 32:16 ပူးပေါင်းရင်းမြစ်များ

Isaías 11:9

Yaꞌipi huaꞌanëntërinquë noyasáchin nicaponaꞌ. Co insonta aꞌnapita maꞌsha onpotaponhuëꞌ. Marë iꞌshari mëntaitërinso pochachin yaꞌipiroꞌpaquënta Sinioro nohuitapi.

Isaías 28:6

Coisëroꞌsa nanan anoyatohuachinara, inari catahuapon noꞌtëquën shaꞌhuitacaisoꞌ. Sontaroꞌsa ninano paꞌpoyapisopitantaꞌ, chiníquën cancantatona paꞌpoyacaiso catahuapon.

Isaías 33:5

Siniorosoꞌ piꞌiroꞌtëquë yaꞌhuërin. Inasoꞌ, chini chiníquën nanantërin. Ina nohuanton Quirosarinquë noꞌtëquën yonquiatona noyasáchin nisapi.

Isaías 42:11

Ninanoroꞌsa inotëroquë yaꞌhuërinsopita, ina chinotatona capa cancanchinaꞌ. Quitaro huënton piyapiroꞌsantaꞌ, nëꞌmëtë pëinënaquë capa cancanchinaꞌ. Sira ninanoquë yaꞌhuëpisopitantaꞌ, capa cancantatona cantainaꞌ. Motopiroꞌsa huiꞌnimotëna quëran huarëꞌ chiníquën cantainaꞌ.

Isaías 42:4

Co amichináchinhuë sacataton, isoroꞌpaquë noya nicatona yaꞌhuëcaiso catahuatapon. Marë yonsanquë yaꞌhuëpisopitantaꞌ, inari aꞌchintacaso ninaponaꞌ,” tënin.

Isaías 60:21

Yaꞌipi inaquë yaꞌhuëramasopita, noya nicatënëmaꞌ, natëponëmaꞌ. Noꞌpanëma huaꞌanëntomiataramaꞌ. Shanëhuë, papoyantërinso pochin nisaramaꞌ. Chini chiníquën nanantërahuësoꞌ aꞌnocaꞌhuaso marëꞌ carima noya noya acoaranquëmaꞌ.

Jeremías 31:23

Siniorosoꞌ, yaꞌipi nanitaparin. Inasáchin israiroꞌsanpoa chinotërëhuaꞌ. Ina huaꞌnarahuëquë nontatonco: “Cota huënton israiroꞌsa naꞌcon parisitapirinahuëꞌ, ca nohuanton noya yaꞌhuëantapi. Yaꞌhuëpiso noꞌpaquë chachin huënantahuatonaꞌ, inahuara ninanonënaquë yaꞌhuëantaponaꞌ. Quirosarinquë huënantahuachinaꞌ, noya yonquirapiantatonaꞌ: ‘¡Quirosarin ninanoquë yaꞌhuëpisopitasoꞌ, Siniorori noya yonquirapiton catahuain! Inari huayonin inaquë chinotacaso pëi acocaiso marëꞌ,’ itaponaꞌ.

Oseas 3:5

Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.