Isaías 30:18 - Chayahuita (Shahui)

¹⁸ Inapotiimaso shaꞌhuitopirinquëmahuëꞌ, iporaso nosoroinquëmaso marëꞌ ninarinquëmaꞌ. Inasoꞌ, nosororinquëmasoꞌ paꞌpi yaaꞌnotërinquëmaꞌ. Siniorosoꞌ noyasáchin ninaꞌpi. Inaso Yosë niꞌton, inasáchin ninahuatëhuaꞌ, tëhuënchachin capa cancantarihuaꞌ.

Isaías 30:18 ပူးပေါင်းရင်းမြစ်များ

Salmos 2:12

Isonama quëran huiꞌnin chinotocoꞌ. Inapotatomaꞌ, apinorantëcoꞌ. Coꞌhuara noꞌhuiyátërasënquëmahuëꞌ, inapocoꞌ. Noꞌhuihuachinquëmasoꞌ, pahuayanpiramahuëꞌ chiminaramaꞌ. Coꞌsoꞌ chinotohuatamahuëꞌ, aꞌnanaya inaso noꞌhuiarinquëmaꞌ. Ina natëtoma chinotohuatamaso nipirinhuëꞌ, tëhuënchachin noya cancantaramaꞌ.

Salmos 27:14

Napoaton chiníquën cancantato: “¡Siniorosoꞌ onpopionta catahuararinco! Chiníquën cancantato inasáchin ninarahuë. ¡Tëhuënchachin Sinioro catahuarinco!” tënahuë.

Salmos 34:8

Siniorosoꞌ nóya. Tënitoma nitotoco canpitantaꞌ. Ina natëtona chinotopisopitasoꞌ, ¡tëhuënchachin capa cancanchinaꞌ!

Salmos 84:12

Sinioro quëmasoꞌ, yaꞌipi nanitaparan. Chinotërinënquënsopitasoꞌ, tëhuënchachin capa cancantomiatapi.

Éxodo 34:6

Moisësë naꞌhuëtapon pochin chiníquën nonsarin: —¡Caso Sinioroco! ¡Caso Sinioroco! Caso Yosëco noyápiachin cancantërahuë. Aꞌnaroáchin yanosorotërahuë. Co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Noꞌtëquënáchin nonahuë.

Isaías 28:17

Ina pëi nipato, huanirinso ótëinamën pochin noyasáchin nicacaisoꞌ yaꞌhuëapon. Noꞌtëquënáchin nicacaisontaꞌ, tahuaninso tantiatiinan pochin nisarin. Nonpinatoma yachaꞌëramasopitaso nipirinhuëꞌ, panca ihuan paaton pëi atatërinso pochin, paquiiꞌ mëntacontarahuaton quiquitërinso pochin Asiria copirno ataꞌhuantarinquëmaꞌ,” tënin.

Isaías 33:2

Quiyasoꞌ Sinioro quëmasáchin ninarainquën niꞌton, nosorocoi. Nani tashíramiachin catahuarancoi. Maꞌsha onporaiso tahuëriꞌsantaꞌ, nichaꞌëcoi.

Isaías 33:5

Siniorosoꞌ piꞌiroꞌtëquë yaꞌhuërin. Inasoꞌ, chini chiníquën nanantërin. Ina nohuanton Quirosarinquë noꞌtëquën yonquiatona noyasáchin nisapi.

Isaías 40:31

“Sinioro mini catahuarinco,” topisopitaso nipirinhuëꞌ, nashaquëranchin chiniantarëso pochin nicaponaꞌ. Panca onian co sacai quëranhuë yanponinso pochin nicatonaꞌ, co oshataponahuë maꞌsona noya nicacaisoꞌ. Co canotonahuanhuë taꞌarëso pochin co sanpataponahuëꞌ. Co aminahuanhuë iratërëso pochin, Yosë imamiataponaꞌ.

Isaías 42:14

Ina quëran Sinioro taantapon: “Huaꞌqui tahuëri pochin taꞌtërahuë. Noꞌhuípiro nipirinahuëꞌ, ahuantërahuë. Iporaso napoaporahuëꞌ, sanapi yahuaihuachina ‘huiyo,’ tosárinso pochin nisarahuë. ‘Sëco sëcoꞌ,’ taꞌton canotarinso pochin nisarahuë.

Isaías 42:16

Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

Isaías 55:8

Sinioro chachin naporin: “Caso co canpita pochin yonquirahuëꞌ. Maꞌpitaso yanipato, co canpita pochin caso ninahuëꞌ. Piꞌiroꞌtëso isoroꞌpa quëran áquë niꞌton, co nincantochináchinhuëꞌ. Inapochachin canpitanta nisha nisha yonquirama niꞌton, co onporonta ca pochin yonquiaramahuëꞌ. Co ca pochin maꞌsha nisaramahuëꞌ,” tënin.

Isaías 61:8

Ina quëran Sinioro taantarin: “Noꞌtëquënáchin nipisopita nosororahuë. Ihuatopisoꞌ, aꞌnaratipita nicatona tëpatopisoꞌ, inapitaso co quëꞌyarahuëꞌ. Ina pochinco niꞌto piyapinëhuëpitasoꞌ, noꞌtëquënáchin acanapo. Inapitarëꞌco anoyatohuato, anoyatërahuëso yaꞌhuëmiatapon.

Isaías 64:4

Quëmasoꞌ, ninarinënquënsopita catahuacaso marëꞌ nani maꞌsha ninan. Ina pochin aꞌnanta nininsoꞌ, co onporonta natanchinpihuëꞌ. Co niꞌchinpihuëꞌ.

Isaías 8:17

Cacopo quëran pipipisopita, Siniorori co huachi yacatahuarinhuëꞌ. Cariso napoaporahuëꞌ, inasáchin ninarahuë: ‘Catahuarinco mini,’ tënahuë.

Oseas 1:7

Cota huëntonso napoaponahuëꞌ, nosoroarahuë. Cari chachin inapitasoꞌ, nichaꞌësarahuë. Yosënënaco niꞌto, topinan nichaꞌësarahuë. Co ahuëtatona chaꞌësapihuëꞌ. Sahuëni, pëꞌchinan, cahuarioroꞌsaꞌ, sontaroꞌsa cahuarioquë paꞌpisopita, co inapita nohuantarahuëꞌ,” itaantarin.

Oseas 2:14

Inapotopirinacohuëꞌ, nanon nohuantohuachinara noyasha nontopiso pochin, israiroꞌsanta nitarahuë. Inotëro parti quëparëso pochin nitarahuë. Inaquë noya nontato achinicancanarahuë.

Oseas 5:15

Ina quëran huaꞌquimiachin tananpitarahuë: ‘Oshahuanëhua niꞌton, Sinioro poꞌtërinpoaꞌ,’ taꞌcaihuarëꞌ catahuaantarahuë. Parisitatona co napion cancantohuachinaꞌ, oshanëna inquitaꞌhuaso marëꞌ yoníponaco,” tënin.

Malaquías 2:17

Naquëranchin Sinioro shaꞌhuitaantarinquëmaꞌ: “Nonamaso natanatënquëmaꞌ, amiranquëma huachi,” tënin. Napoaponahuë canpitasoꞌ: “¿Maꞌta tënaisoꞌ natanaton Sinioro amirincoi?” toconamaꞌ. Napohuatamara, Sinioroso naporin: “Canpitaso nonpatamara: ‘Co noyahuëꞌ nipisopitantaꞌ, Yosëriso noya niꞌnin. Inapitanta yonquiaton noya cancantërin,’ tënamaꞌ. Napoatoma canpitasoꞌ, noyasáchin ninahuëso co natëramacohuëꞌ,” tënin.

Lucas 15:20

Ina quëran paꞌpin yaꞌhuërinꞌpaꞌ paantarin. Yaꞌcaritëriahuasoꞌ, aquë quëran paꞌpini quënanin. Quënanahuaton, naꞌcon nosoroaton, taꞌaparin. Iporahuaton, apinorin.

Lucas 2:25

Quirosarinquë chachin aꞌna quëmapi yaꞌhuërin, Simion itopisoꞌ. Nóya quëmapi inasoꞌ. Nani tahuëri Yosë chinotërin. “Aꞌna tahuëri Yosë nichaꞌësarinpoaꞌ,” taꞌton, Cristo aꞌpaimacasoꞌ ninarárin. Ispirito Santori noyá yaꞌcoancantërin.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

Romanos 5:20

Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

Romanos 9:22

Aꞌnaquën co natëpihuëꞌ niꞌton, Yosëri noꞌhuirin. Noꞌhuipiroꞌ nipirinhuëꞌ, co aꞌnaroáchin anaꞌintërinhuëꞌ, ninararin. Co aꞌnaroáchin anaꞌintohuachinahuëꞌ, co ina marëꞌ Yosë noꞌhuicasoꞌ yaꞌhuërinhuëꞌ. Oshaquëran anaꞌintarin. Ina niꞌpachinaꞌ, “Tëhuënchachin Yosë noꞌtëquën yonquirin. Huaꞌquiꞌ tananpitopirinhuëꞌ, iporasoꞌ noꞌtëquën anaꞌintërin. Chini chiníquën nanantërin inasoꞌ,” tosapi.

Efesios 1:6

Huiꞌnin naꞌcon nosororin. Ina imapatëhuaꞌ, canpoantaꞌ naꞌcon nosoroarinpoaꞌ. Ina yonquiatëhuaꞌ, “Ma noyacha Tata Yosësoꞌ niꞌton, inaora nohuanton, nosororinpoa paya,” tosarëhuaꞌ.

Efesios 1:8

Nosoroatonpoaꞌ, naꞌcon catahuarinpoaꞌ noꞌtëquën yonquicaso marëꞌ. Yonquinën chachin anitotërinpoaꞌ.

Deuteronomio 32:4

Inasoꞌ, nóya paꞌpoyarinpoaꞌ. Maꞌsha nipachina, co tëhuërinhuëꞌ. Noꞌtëquënáchin nicaton nóya ninin. Inasoꞌ Yosë, noꞌtëquënáchin nonin. Topinansoꞌ co onporonta piyapi maꞌsha onpotërinhuëꞌ. Noꞌtëquënáchin ninin. Inaíchin Yosësoꞌ.

Santiago 5:11

Noya ahuantopi niꞌton, Yosëri nóya niꞌnin, tënëhuaꞌ. Copontaꞌ paꞌpi parisitërin, nitotëramaꞌ. Naꞌcon parisitaponahuëꞌ, chiníquën cancantaton, ahuantërin. Maꞌsha onpoaponahuëꞌ, Yosëri catahuarin noya noya pipicasoꞌ. Ina nohuanton, napoin quëran noya noya yonquirin. Yosë nosoroatonpoaꞌ naꞌcon catahuarinpoaꞌ, tënahuë. Napoaton chiníquën cancantatomaꞌ, ahuantocoꞌ.

2 Pedro 3:15

Nosoroatonpoaꞌ, huaꞌquiꞌ Sinioro ninararin naꞌcon naꞌcon piyapiꞌsari natëcaiso marëꞌ. Ina quëran inapitantaꞌ nichaꞌësarin. Ama ina naniantocosohuëꞌ. Inachachin iya Paonontaꞌ ninshitërinquëmaꞌ. Inasoꞌ iyanpoa pochin niꞌnëhuaꞌ. Yosë nohuanton, noꞌtëquën nitotaton, ninshitërin.

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.

1 Samuel 2:3

Ama inso tëranta nocanchinsohuëꞌ. Ama aquëtëꞌ: ‘Ca tëhuënchinsoꞌ,’ chinasohuëꞌ. Siniorosoꞌ Yosë niꞌton, yaꞌipi naporëhuaso nitotërin. Pëꞌtënatë quiro nitotërëso pochin, naporëhuaso nitotaton, noꞌtëquën shaꞌhuitarinpoaꞌ.