Isaías 30:15 - Chayahuita (Shahui)

¹⁵ Naporahuaton, inaso taantarin: “Canpitaso nisha nisha cancantëramaꞌ. Huëco natëantatomaco sano cancantocoꞌ. Inapohuatamaꞌ, nichaꞌësaranquëmaꞌ. Sano cancantatoma casáchin chinotoco. Inapohuatamaꞌ, chiníquën nisaramaꞌ,” tënin Sinioro. Napopirinhuëꞌ, co canpitaso nohuantëramahuëꞌ.

Isaías 30:15 ပူးပေါင်းရင်းမြစ်များ

Salmos 116:7

Sinioro nosoroatonco catahuarinco niꞌton, sano cancantaantarahuë.

Isaías 28:12

Nani iráca ina shaꞌhuitërinquëmaꞌ: “Cariáchin nanitërahuë asanocancanaꞌhuanquëmasoꞌ. Canotërëso pochin cancantohuatamaꞌ, caquë huëcatomaꞌ, chinotoco,” itërinquëmaꞌ. Napotopirinquëmahuëꞌ, co canpitaso natëramahuëꞌ.

Isaías 32:17

Noyasáchin nicatonaꞌ, sano yaꞌhuëaponaꞌ. “Sinioro catahuarincoi,” tëcatonaꞌ, noya yaꞌhuëmiataponaꞌ.

Isaías 32:18

Sano yaꞌhuëpiquë piyapinëhuëpita yaꞌhuëaponaꞌ. Noyá acopinan pëiroꞌsaquë, nóya yaꞌhuëaponaꞌ. Tananoꞌsa aꞌnëatona tiquipirinahuë tërantaꞌ, ninanonta minsërahuatona taparo nitopirinahuë tërantaꞌ, canpitaso noya yaꞌhuëatomaꞌ, capa cancantomiataramaꞌ. Shaꞌtëramaso oporapitamaso marëꞌ, notohuaroꞌ iꞌsha yaꞌhuëtaponquëmaꞌ. Pastontaꞌ, tororoꞌsaꞌ, moraroꞌsaꞌ, inapita capacaiso marëꞌ co pahuanaponhuëꞌ.

Isaías 40:31

“Sinioro mini catahuarinco,” topisopitaso nipirinhuëꞌ, nashaquëranchin chiniantarëso pochin nicaponaꞌ. Panca onian co sacai quëranhuë yanponinso pochin nicatonaꞌ, co oshataponahuë maꞌsona noya nicacaisoꞌ. Co canotonahuanhuë taꞌarëso pochin co sanpataponahuëꞌ. Co aminahuanhuë iratërëso pochin, Yosë imamiataponaꞌ.

Isaías 42:24

Canpitaso Cacopo shinpitanquëmaꞌ, nani noyá nitotërama insosona nohuanton huëcapairahuatënënquëma minsërinënquëmasoꞌ. Inapotahuatënënquëma quiquirinënquëmasontaꞌ, ¡nani nitotëramaꞌ! ¡Sinioro mini nohuanton napotërinënquëmaꞌ! Co ina natëtomahuëꞌ oshahuanama niꞌton, napotërinquëmaꞌ. Onpopinsona nanpicasoꞌ nani pënënpirinquëmahuëꞌ, co ina pochin ninamaso marëhuëꞌ napotërinquëmaꞌ.

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 7:4

Quënaontarahuaton shaꞌhuitëquëꞌ: “Niyátainpichin yaꞌhuëquëꞌ. Napoaponahuëꞌ, ama paꞌyanquësohuëꞌ. Cato copirnoroꞌsa paꞌpi noꞌhuitënquën huëcapaiarinquënso yonquiaton, ama tëꞌhuatëquësohuëꞌ. Inahuasoꞌ, cato pënamocha yatacopirinso pochin tomontapi. Nisin siriaroꞌsarë chachin huëꞌsarin. Nimariasë huiꞌnionta israiroꞌsarë chachin huëcapaiarinënquën. Inapitasoꞌ nani anoyatopi nicatahuatonaꞌ, maꞌsha onpotiinënquënso marëꞌ. Inapoatonaꞌ:

Mateo 22:3

Napoaton piyapinënpita aꞌparin piyapiꞌsaꞌ shaꞌhuitacaiso marëꞌ. Shaꞌhuitopirinahuëꞌ, co nohuantopihuëꞌ huëcacaisoꞌ.

Mateo 23:37

Ina quëran taantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

Lucas 13:34

Ina quëran itantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

Juan 5:40

Noꞌtëquën ninopirinacohuëꞌ, co yaimaramacohuëꞌ. Ananpimiataꞌhuanquëmasoꞌ yaꞌhuëpirinhuëꞌ, co nohuantëramacohuëꞌ.

Hebreos 12:25

Napoaton Quisocristo nanamën noya natancoꞌ. Ama piꞌpian tërantaꞌ aꞌpocosohuëꞌ. Pënëntërinso nanan shaꞌhuitohuachinara, aꞌnaquën co yanatëtopihuëꞌ niꞌton, aꞌnaroáchin anaꞌintërin. Quisocristo nanamënsoꞌ noya noya niꞌton, ina naniantohuatëhuaꞌ, aquë aquëtëꞌ anaꞌintinpoasoꞌ yaꞌhuërin. Inasoꞌ inápa quëran pënëninpoaꞌ.