Isaías 30:10 - Chayahuita (Shahui)

^10-12 Ninotona quënanaꞌpiroꞌsa shaꞌhuitatomaꞌ: ‘Ama huaꞌnarëso pochin quënanatoma pënëncoisohuëꞌ,’ itonamaꞌ. Pënëntonaꞌpiroꞌsantaꞌ: ‘Ama Sinioro noꞌtëquën anitotërinquëmasopita, shaꞌhuitocoisohuëꞌ. Costaraisopita tëhuënchinsoꞌ, shaꞌhuitocoi. “Noya yaꞌhuëapoi,” taꞌtoi huëꞌërai pochin cancantëraisoꞌ, ama quëma huëꞌsahuaton ochinanatë pochin nitocoisohuëꞌ. Yaꞌhuincananpicoi quiyanta nohuantëraisoꞌ nisaꞌi. Sinioro natëramasoꞌ, aꞌpoco huachi. Co huachi nohuantëraihuëꞌ, Sinioro naporinso natanaꞌhuaisoꞌ. Inasoꞌ, noyasáchin ninin. Israirori chinotërin,’ toconamaꞌ. Napoaton inaso shaꞌhuitarinquëmaꞌ: ‘Canpitaso shaꞌhuitëranquëmasopita nocanatomaꞌ, ahuëtonoꞌsaꞌ, co noyahuëꞌ piyapiꞌsaꞌ, inapita catahuaimaso marëꞌ yoniramaꞌ.

Isaías 30:10 ပူးပေါင်းရင်းမြစ်များ

1 Reyes 21:20

Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

1 Reyes 22:27

Inapitaquë quëparahuatomaꞌ, shaꞌhuitoco tashinanpëiquëchinaꞌ. Naporahuaton piꞌpian piꞌpian aꞌcainaꞌ, oꞌshichinaꞌ, napochinaꞌ. Siria sontaroꞌsa minsëato huënantaꞌhuarëꞌ, inapochinaꞌ, itërin.

Copo naporinso' 41:3

Mapatan, co noyasha nontarinquënhuëꞌ. ‘Nosoroatonco aꞌpaco paꞌi,’ co itarinquënhuëꞌ.

Jeremías 23:17

Nanamëhuë nocanpisopita pënënpachinara: ‘Yaꞌipi ninamasopita noya pipitarinquëmaꞌ,’ itopi. Co noyahuëꞌ yonquipiso imapisopita pënënpachinarantaꞌ: ‘Co manta maꞌsha onpoaramahuëꞌ,’ itopi.

Jeremías 26:11

Naporoꞌ corto huaꞌanoꞌsaꞌ, pënëntonaꞌpiroꞌsaꞌ, inapitasoꞌ, huaꞌanoꞌsaꞌ, yaꞌhuëhuanoꞌsa inapita nontatona itaponaꞌ: “Iso quëmapi chiminacaso yaꞌhuërin. Iso ninano taꞌhuantacasoꞌ shaꞌhuirin. Yaꞌipinquëma natanamaꞌ,” topi.

Jeremías 36:29

Aninshitaantarahuaton, inaquë copirnonta shaꞌhuitapon: ‘Sinioro naporin: “Ca nohuanton Irimiasë aninshitërin. Papironia copirno huëcaton, iso noꞌpaꞌ ataꞌhuantapon. Inapotohuachina, piyapiꞌsaꞌ, maꞌsharoꞌsa inapita co acoaponhuëꞌ,” tënin aninshitërinquë. Ina marëꞌ quëmarisoꞌ Irimiasë noꞌhuiran. Naporahuaton soꞌnanpi quirica aninshitërinsontaꞌ, ahuiquitëran. Naporanso marëꞌ ca Sinioroco shaꞌhuitaranquën: Quëmasoꞌ Tapi shinquën niꞌton, israiroꞌsa huaꞌanëntëran. Napoaponahuëꞌ, ca nohuanton quëma huiꞌnansoꞌ, co huachi israiroꞌsa huaꞌanëntarinhuëꞌ. Chiminpatan co paꞌpitaponënhuë niꞌton, nonën tahuëriso piꞌiri acoápon. Tashintaꞌ, sëhuëni quëtápon.

Jeremías 38:4

Inapita huaꞌanoꞌsasoꞌ, copirno nontapona paꞌpi: —Irimiasësoꞌ, yaꞌipi sontaroꞌsa iso ninanoquë yaꞌhuëpiso pënënaton aꞌpayanin. Yaꞌhuëhuanoꞌsanta inapotërin. Inaso co yacatahuarinpoahuëꞌ. Canainënpoaso nohuantaton napoarin niꞌton, chiminacaso yaꞌhuërin, itoonpi.

Amós 2:12

Ina quëran Sinioro taantarin: “Nasarioroꞌsa nipirinahuëꞌ, apisápatoma huino oꞌshitëramaꞌ. Pënëntonaꞌpiroꞌsanta pënëinquëmaso marëꞌ nanan quëtopirahuëꞌ, noꞌhuitoma acopitëramaꞌ.

Amós 7:13

Ama huachi isëquëso pënëntëquësohuëꞌ. Isëquë copirnonta moshatërin. Naporahuaton yaꞌipi Israiro noꞌpaquë yaꞌhuërinsopita quëran, noya noya moshato pëi isëquëso yaꞌhuërin, itërinco.

Miqueas 2:11

Nonpi nanan shaꞌhuitonaꞌ: ‘Naꞌcon huino yaꞌhuëapon. Nisha nisha oꞌoi yaꞌhuëhuachin, oꞌotoma noꞌpirápomaꞌ,’ topisopita tëhuënchinsoꞌ, canpitaso paꞌyatëramaꞌ,” itërin.

Miqueas 2:6

Maꞌhuanoꞌsasoꞌ, nonpi nanan pënëntonaꞌpiroꞌsa taranatonaꞌ, pënëntërahuësoꞌ acopitiinacoso marëꞌ napotërinaco: “Co manta maꞌsha onpoarihuahuëꞌ. Napoaton Sinioro anitotërinquënsoꞌ, co shaꞌhuitápancoiso yaꞌhuërinhuëꞌ.

Juan 7:7

Canpitasoꞌ piyapiꞌsaꞌ co noꞌhuirinënquëmahuëꞌ. Caso nipirinhuëꞌ noꞌhuirinaco. “Co noyahuëꞌ ninamaꞌ,” itërahuëso marëꞌ noꞌhuirinaco.

Juan 8:45

Noꞌtëquën pënënanquëmaꞌ niꞌton, co yanatëramacohuëꞌ.

Hechos 4:17

Nipirinhuëꞌ, ama aquëtëꞌ piyapiꞌsari natëcaiso marëhuëꞌ pënëanhuanꞌ. “Ama huachi Quisoso nanamën shaꞌhuicosohuëꞌ,” itahuaꞌ, nitopi.

Hechos 5:28

—Nani pënënatënquëmaꞌ: “Ama huachi Quisoso nanamën aꞌchincosohuëꞌ,” itopiranquëmahuëꞌ, aquë aquëtëꞌ aꞌchinaramaꞌ. Yaꞌipi Quirosarinquë yaꞌhuëpisopita natanapi. Inapoatomaꞌ, Quisoso chimininso marëꞌ naꞌintaramacoi, itërin.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

Gálatas 4:16

Noꞌtëquën pënënanquëmaꞌ niꞌton, ¿noꞌhuiramaco ti?

2 Timoteo 4:3

Aꞌna tahuëri piyapiꞌsaꞌ co nohuantapihuëꞌ Yosë nanamën natanacaisoꞌ. Nonpin nananoꞌsaꞌ nisha nisha aꞌchinpachinaꞌ, paꞌyatapi. Inahuara costapisorachin yanatanapi.

2 Timoteo 4:4

Yosë noꞌtëquën noninsoꞌ aꞌporahuatonaꞌ, piyapi yonquirinsoꞌ natëapi.

Apocalipsis 11:7

Nani yaꞌipi noyá pënëntohuachinaꞌ, co huachi aquëtëꞌ pënëntacasoꞌ yaꞌhuaponhuëꞌ. Naporoꞌ maꞌsha paꞌpi tëꞌhuatoro nininsoꞌ yaꞌnoarin. Acoporoꞌ quëran huëꞌsarin. Huëꞌsahuaton, cato yaꞌpi ahuëquiarin. Ina quëran minsërahuaton, tëpararin.

1 Samuel 9:9

(Ipora iso quirica ninshitasoco huarëꞌ Samoiro pochin nipisopitasoꞌ pënëntonaꞌpi itërëhuaꞌ. Iráca chachinsoꞌ, co ina pochin nohuitopihuëꞌ. Ninoton shaꞌhuinaꞌpi itopi. Israiroꞌsa maꞌsona Yosëri anitotacaso nohuantohuachinara, ninapotopi: “Huëquë paꞌa ninoton shaꞌhuinaꞌpi natahuan,” niitopi.)