Isaías 1:18 - Chayahuita (Shahui)

¹⁸ Huëco paꞌahua nonatëhua anoyatahuaꞌ. Quëhuanën quëran aꞌshitërëso pochin naꞌcon oshahuanpiramahuëꞌ, inquitaranquëmaꞌ. Ina inquitatënquëmaꞌ, ocai, piꞌshiro, inapita huiritërinso pochin, anoyacancantaranquëmaꞌ.

Isaías 1:18 ပူးပေါင်းရင်းမြစ်များ

Salmos 51:7

Oshanëhuë inquitoco noyápiachin cancanchi. Paꞌmocancanco huiri huiríchin pochin cancanchi.

Salmos 51:9

Oshahuanpirahuëꞌ, ama huachi ina yonquiquësohuëꞌ. Yaꞌipi co noyahuëꞌ ninahuësoꞌ, inquitoco.

Isaías 1:23

Huaꞌanoꞌsanëma quëran huarëꞌ co natantochináchinhuëꞌ cancantopi. Ihuatëroꞌsarëꞌ nipayapi. Pahuërëhuachinara, co huachi noꞌtëquën anaꞌintopihuëꞌ. Maꞌsha topinan quëtápaisoꞌ nohuantoonpi. Saꞌahuaroꞌsaꞌ, quëyoronoꞌsaꞌ, inapita maꞌsha onpotohuachinara, co paꞌpoyapihuëꞌ.

Isaías 41:1

Naquëranchin Sinioro taantarin: “Marë yonsanquë nacionoꞌsa yaꞌhuëramasopita, taꞌtatoma nontaranquëmasoꞌ natancoꞌ. Chiníquën cancantatoma huëco noanhuaꞌ. Chiníquën nanan yaꞌhuërin niꞌton, niyontonatëhua noanhuaꞌ.

Isaías 41:21

Israiroꞌsa copirnonënasoꞌ, Sinioro chachin. Inari mamanshiroꞌsa përaton: “Mamanshiroꞌsanquëmaꞌ, piyapinëhuëpitaroꞌco nihuëntonahuëquë, huëco canpitanta noncoꞌ. Natëaꞌhuainquëmaso marëꞌ canpitanta chiniatoma noncoꞌ.

Isaías 44:22

Tëhuëtatomaco oshahuanamasopita inquitëranquëmaꞌ. Chitoro inquirinso pochin inapita ayatërahuë. Carima nichaꞌëranquëma niꞌton, ca chachin tahuërëtaantaco,” tënin.

Isaías 50:8

Paꞌpoyarincosoꞌ, ca pirayan nisarin. ¡Co inso tëranta maꞌsha onpotërahuëꞌ! Inso tëranta maꞌsha onpotohuatosoꞌ, napopináchin coisëquë paꞌitoihuëꞌ. ¡Co insonta shaꞌhuirapiincoso yaꞌhuërinhuëꞌ! Yashaꞌhuirapihuachinacosoꞌ, huëꞌsahuatona shaꞌhuichinaco.

Isaías 55:7

Co noyahuëꞌ nipisopita, co noyahuëꞌ nipisoꞌ aꞌpoinaꞌ. Nitapicancanpisopitantaꞌ, co noyahuëꞌ yonquipisoꞌ aꞌpoinaꞌ. Yosë chachin tahuërëtaantatomaꞌ, natëantacoꞌ. Inaso noya niꞌton, oshanëma inquitarinquëmaꞌ.

Ezequiel 18:27

Napoaponahuëꞌ, co noyahuëꞌ nipisopita tërantaꞌ, co noyahuëꞌ nipiso aꞌporahuatona noya nipachinaꞌ, chaꞌësapi.

Ezequiel 33:16

Iporasoꞌ noyasáchin nicaton noꞌtëquën yonquirin niꞌquëhuarëꞌ, nanpipon. Iꞌhua co noyahuëꞌ nicaton oshahuaninsoꞌ, co huachi piꞌpian tëranta yonquiapohuëꞌ.

Miqueas 6:2

Motopiroꞌsaꞌ yaꞌhuërë nontaton, itapon: “Motopiroꞌsaꞌ, canpitaso simintori pëi achinirinso pochin isoroꞌpaꞌ achiniramaꞌ. Piyapi pochin nicatomaꞌ, piyapinëhuëpita shaꞌhuirapiarahuësoꞌ, natancoꞌ. Israiroꞌsaso piyapinëhuëpita nipirinahuëꞌ, shaꞌhuirapiarahuë,” itërin. Ina quëran itaantarinpoaꞌ: “Israiroꞌsanquëmaꞌ. ¿Maꞌta carima onpotatënquëma apiranquëmaꞌ? Shaꞌhuitoco nitochi.

Hechos 17:2

Inachintërin nichinapon chachin cara chinoto tahuëri inaquë Paono Yosë quiricanën aꞌchinin.

Hechos 18:4

Nani chinoto tahuëri cotioroꞌsaꞌ niyontonpiso pëiquë paꞌsahuaton, cotioroꞌsaꞌ aꞌchintërin. Cricoroꞌsantaꞌ aꞌchintaton: “Quisoso natëcoꞌ canpitantaꞌ,” itërin.

Hechos 24:25

Yosë shaꞌhuitërinpoaꞌ noya cancantacaso marëꞌ. Ina catahuarinpoaꞌ co noyahuëꞌ yonquirëhuasopita naniantacasoꞌ. Aꞌna tahuëri coisë pochin nicaton, yaꞌipi piyapiꞌsaꞌ natanarin. Co noyahuëꞌ nipisopita anaꞌintarin,” tënin Paono. Napotohuachina, huaꞌan paꞌpi paꞌyanin. —Nani huachi. Iporasoꞌ paquëꞌ. Aꞌna tahuëri yanontaantahuatënquën, amataantaranquën, itërin.

Romanos 5:20

Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

Apocalipsis 7:14

—Co casoꞌ nitotërahuëꞌ. Quëma nitotëransoꞌ. Shaꞌhuitoco cantaꞌ nitochi, itohuatëra, shaꞌhuitërinco: —Isopitasoꞌ chiníquën parisitaponaraihuëꞌ, co Yosë aꞌpopihuëꞌ. Carniroaꞌhuari huënainën quëran anoyacancantërin niꞌton, huiríchin aꞌmopi.

1 Samuel 12:7

Iporasoꞌ noya natanco: Sinioronta niꞌsárinco niꞌton, noꞌtëquën ayonquiꞌinquëmaꞌ: “Ina catahuaarinpoaꞌ,” taꞌtomaꞌ, co copirno natanamaso nipirinhuëꞌ. Ina natantatomaꞌ, oshahuanamaꞌ. Paꞌa carinquëma Sinioro nosoroatonpoa catahuarinpoasoꞌ, ayonquiꞌinquëmaꞌ. Shimashonënpoapitanta catahuarinsoꞌ ayonquiꞌinquëmaꞌ.