Hechos 9:31 - Chayahuita (Shahui)

³¹ Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

Hechos 9:31 ပူးပေါင်းရင်းမြစ်များ

Proverbios 1:7

Yonquínahuan nicamasoꞌ nohuantohuatamaꞌ, Sinioro noya nicatoma natëcoꞌ. Co yonquínahuanhuëꞌ nipachinara, yonquínahuan yonquipisopita nocanpi. Co aꞌchintacaiso tëranta paꞌyatopihuëꞌ.

Proverbios 8:13

Sinioro noya nicatoma natëhuatamaꞌ, co noyahuëꞌ ninamasopita co quëꞌyamaso yaꞌhuërinhuëꞌ. ‘Caso noya noyaco,’ topachinara, co quëꞌyarahuëꞌ. Nocantohuachinaꞌ, co noyahuëꞌ nipachinaꞌ, nonpinpachinaꞌ, inapohuachinarantaꞌ, co quëꞌyarahuëꞌ.

Isaías 11:10

(-)

Isaías 33:6

Ina nohuanton chachin inaquë noya yaꞌhuëaponaꞌ. Inaquë yaꞌhuëpisopitasoꞌ, yonquínahuan nicatonaꞌ, nitotonoꞌsa nicaponaꞌ. Inapoatona chaꞌëponaꞌ. Sinioro tëꞌhuatatona natëpi niꞌton, maꞌsha paꞌton nininsoꞌ quënanëso pochin nipi.

Hechos 12:24

Yosë nanamënso nipirinhuëꞌ nahuinarin. Nisha nisha parti shaꞌhuirápi niꞌton, naꞌa piyapiꞌsaꞌ natëtonaꞌ imasapi.

Hechos 16:5

Napohuachina, Quisoso huëntonënquë yaꞌconpisopita natëtonaꞌ, noya noya imasapi. Naporahuaton aquë aquëtë naꞌasapi.

Hechos 2:47

“Ma noyacha Yosëso paya,” tosapi. Yaꞌipi piyapiꞌsari noya niꞌpi. Nani tahuëriya aꞌnapitantaꞌ imasapi niꞌton, Yosëri anoyacancantërin. Ina nohuanton, inapitantaꞌ yaꞌconpi.

Hechos 20:32

Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ.

Hechos 5:11

Yaꞌipi Quisoso huëntonënquë yaꞌconpisopita tëꞌhuatopi. Aꞌnapitantaꞌ natantahuatonaꞌ, “Anaꞌintohuachinpoaꞌ canpoantaꞌ,” taꞌtonaꞌ paꞌpi tëꞌhuatopi.

Hechos 6:7

Ina quëran caꞌtanoꞌsaꞌ nani tahuëri pënëntapi. Yosë nanamën aꞌchinapi. Aquë aquëtëꞌ nahuinin. Quirosarinquë naꞌcon naꞌcon piyapiꞌsaꞌ imasapi. Naꞌa corto huaꞌanoꞌsantaꞌ Quisoso nanamën natëpi.

Hechos 8:1

Istipan tëpasoiꞌ, Saonontaꞌ: “Tëpacoꞌ,” tënin. Naporo quëran huarëꞌ cotio huaꞌanoꞌsaꞌ noꞌhuitatonaꞌ, Quisoso imapisopita chiníquën aparisitopi. Quirosarinquë napopi. Aparisitatonaꞌ, ayanquëëpi. Yaꞌipi Cotia parti, Samaria parti, inaquëpita yanquëëpi. Caꞌtanoꞌsaráchin co paꞌpihuëꞌ.

Romanos 14:17

Yosë noya huaꞌanëntërinpoaꞌ. Ina imapatëhuaꞌ, noya nisarëhuaꞌ. Asanocancanarinpoaꞌ niꞌton, co ninoꞌhuicasoꞌ yaꞌhuërinhuëꞌ. Yosësoꞌ, caꞌnëhuasoꞌ, oꞌorëhuasoꞌ, inapita co onpopinchin yonquirinhuëꞌ. Ispirito Santo catahuarinpoaꞌ noya cancantahuasoꞌ. Catahuahuachinpoaꞌ, capa cancantarihuaꞌ.

Romanos 14:19

Napoaton noya ninicatëhuaꞌ, yaꞌhuaꞌahuaꞌ. Nicatahuahuaꞌ noya noya imacaso marëꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

1 Corintios 14:12

Naꞌcon nohuantëramaꞌ Ispirito Santo catahuainquëmasoꞌ. Nisha nisha nicacamasoꞌ nohuantëramaꞌ niꞌquëhuarëꞌ maꞌsona tërantaꞌ nipatamaꞌ, aꞌnapita imapisopita catahuacoꞌ noya noya cancantacaiso marëꞌ.

1 Corintios 14:26

Napoaton iyaroꞌsaꞌ niyontonpatamaꞌ, noyasáchin yonquicoꞌ. Aꞌnaquëmaꞌ cantaramaꞌ. Aꞌnaquëmaꞌ Yosë nanamën aꞌchinaramaꞌ. Aꞌnaquëmaꞌ Yosë anitotërinquëmasoꞌ shaꞌhuitaramaꞌ. Aꞌnaquëmantaꞌ nisha nananquë nonpiso pochin nonsaramaꞌ. Ina piquëran aꞌnaquëmasoꞌ maꞌsona tapon nonamasoꞌ canpita nananquë shaꞌhuitaramaꞌ. Maꞌsona tërantaꞌ nipatamaꞌ, nicatahuacoꞌ yaꞌipinquëmaꞌ noya noya imacamaso marëꞌ.

2 Corintios 10:8

Yosë chachin chiníquën nanan quëtërincoi nanamën aꞌchintaꞌhuainquëmaso marëꞌ, itohuatënquëmara, co ina marëꞌ tapanahuëꞌ. Noya noya imacamaso marëꞌ aꞌchintërainquëmaꞌ. Co nisha cancantamaso marëꞌ aꞌchintërainquëmahuëꞌ.

2 Corintios 12:19

Co noya nicamacoiso marëꞌ ninshitarainquëmahuëꞌ. Aꞌnaquëmaꞌ nimara ina pochin yonquipiramahuëꞌ, co quiyaso naporaihuëꞌ. Nosororainquëmaꞌ iyaroꞌsaꞌ. Noya noya imacamaso marëꞌ ninshitarainquëmaꞌ. Quisocristo imarai niꞌton, Yosëíchin yonquirai. Ina niꞌsárincoi niꞌton, noꞌtëquën ninshitarainquëmaꞌ.

2 Corintios 13:10

Napoaton co inaquë yaꞌhuaporahuëꞌ, ninshitaranquëmaꞌ pënënaꞌhuanquëmaso marëꞌ. Yaꞌipi co noyahuëꞌ yonquiramasopita naniantohuatamaꞌ, canconpato, co anaꞌintaꞌhuanquëmasoꞌ yaꞌhuaponhuëꞌ. Sinioro chachin chiníquën nanan quëtërinco catahuaꞌhuanquëmaso marëꞌ. Co anishacancantaꞌhuanquëmaso marëꞌ napotaranquëmahuëꞌ. Noya noya imacamaso marëꞌ napotaranquëmaꞌ.

2 Corintios 7:1

Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

Efesios 4:12

Nisha nisha acorinpoaꞌ noya nicatahuacaso marëꞌ. Inaora nonën pochin niꞌninpoaꞌ niꞌton, yaꞌipi imarëhuasopita catahuarinpoaꞌ noya ina marëꞌ sacatacasoꞌ.

Efesios 4:16

Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.

Efesios 4:29

Ama taparoꞌ noncosohuëꞌ. Ama maꞌtoma maꞌtoma noncosohuëꞌ. Sano yonquiatomaꞌ, noya noncoꞌ aꞌnapita natanatënquëmaꞌ, Yosë yonquiꞌinaꞌ. Noya noya imacaso marëꞌ catahuacoꞌ.

Efesios 5:21

Quisocristosoꞌ huaꞌanëmaꞌ niꞌton, ina yonquiatomaꞌ, imaramasopita capini nicatahuacoꞌ. Yaꞌipinquëmaꞌ nipënënatomaꞌ, ninatancoꞌ.

Deuteronomio 12:10

Cortaniiꞌ pëntontohuatamaꞌ, Sinioro noꞌpaꞌ quëtarinquëmaquë yaꞌhuëmiataramaꞌ. Yaꞌipi inimicoroꞌsa minsërahuatomaꞌ, sano cancantarama huachi. Naporoꞌ insëquësona Siniorori huayonin niꞌton, ina chinotacaso nëꞌmëtë pëi acoaramaꞌ. Inaquë ipora camairanquëmasopita Sinioro quëshiaramaꞌ. Ina noya nicatoma maꞌsharoꞌsa tëpapomaꞌ. Aꞌnaquën noyá ahuiquitapomaꞌ. Aꞌnaquënsoꞌ, piꞌpian ahuiquitapomaꞌ. Nani maꞌsha quëran diesmoroꞌsantaꞌ, inaquë quëpatapomaꞌ. Catahuatamaso marënta camaitopisoꞌ, quëpapomaꞌ. Maꞌsona Sinioro quëtacasoꞌ shaꞌhuitohuatamaꞌ inanta quëpatapomaꞌ.

Filipenses 2:1

Quisocristo achinicancaninquëmaꞌ. Naꞌcon nosororinquëmaꞌ niꞌton, noya cancantaramaꞌ. Ispirito Santo yaꞌcoancantohuachinquëmaꞌ, catahuarinquëmaꞌ. Catahuahuachinquëmaꞌ, noya ninosoroaramaꞌ.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

1 Tesalonicenses 5:11

Napoaton nani tahuëri nicatahuacoꞌ chiníquën cancantacamaso marëꞌ. Oꞌmantacasoꞌ tahuëri yonquiatomaꞌ, naꞌcon ninontocoꞌ noya noya imacamaso marëꞌ. Nani noya nicatahuaramaꞌ. Aquëtë chachin niachinicancancoꞌ.

1 Timoteo 1:4

Shimashonënpita iráca napopisoꞌ yonquiápi. Inahuara yonquinëna quëraontaꞌ nishaꞌhuitopisoꞌ yonquirápi. Ama huachi inapita yonquicaiso marëhuëꞌ shaꞌhuitëquëꞌ. Ina pochin aꞌchinpachinaꞌ, topinan quëran aꞌchinapi. Piyapiꞌsaꞌ nisha nisha nonsapi. Co catahuapihuëꞌ Yosë nohuitacaisoꞌ. Yosëíchin natëhuatëhuaꞌ, catahuarinpoaꞌ noya noya imacaso marëꞌ.

Hebreos 4:9

Napoaton ipora huantaꞌ Yosë nohuantërin asanocancainpoasoꞌ. Yosë anoyacancantohuachinpoaꞌ, sano cancantarihuaꞌ.

Judas 1:20

Canpitaso nipirinhuëꞌ iyaroꞌsaꞌ, Yosë nanamën naꞌcon yonquicoꞌ noya noya imacamaso marëꞌ. Inasáchin noꞌtëquën anitotërinpoaꞌ Yosë pochin cancantacasoꞌ. Naporahuaton, Yosë nontácoꞌ. Ispirito Santo catahuarinquëmaꞌ cancanëma quëran huarëꞌ noya nontacasoꞌ.