Hechos 7:36 - Chayahuita (Shahui)

³⁶ Ina quëran Iquipitoquë paantarahuaton, nani maꞌsha Yosë pochin ninin, sacaiꞌ nininsopita. Inapoaton, Iquipito quëran ocoirahuaton, nichaꞌërin. Inapochachin Quëhuai marëquë, inotëro parti inaquëpita Yosë pochin ninin. Catapini shonca piꞌipi inaporin.

Hechos 7:36 ပူးပေါင်းရင်းမြစ်များ

Nehemías 9:10

Iquipito copirnonta anaꞌintaton, nani maꞌsha paꞌpi huëhuëpiroꞌ nininsopita aꞌnotëran. Piyapinënpitarë chachin anaꞌintaton, napotëran. Israiroꞌsa co quëꞌyatonaraihuëꞌ aparisitapi niꞌton, anaꞌintaton, napotëran. Inapoaton iporasoꞌ, sacóshin nahuinan.

Salmos 95:8

“Iráca inotëro parti shimashonëmapita huëcasoiꞌ, Miripaquë, Masaquë, inaquëpita co natërinacohuëꞌ. Ama inapita napopiso pochin nicosohuëꞌ.

Éxodo 14:21

Moisësë marë parti huaranën ihuërin. Ihuëpachina, Yosë nohuanton naporo tashi piꞌi pipirin parti quëran, panca ihuan huëꞌnin. Yaꞌipi tashi chiníquën ihuantohuachina, marë patomairin huachi. Patomairin niꞌton, panca ira pochin yaniro yaꞌnorin.

Éxodo 16:35

Catapini shonca piꞌi pochin israiroꞌsaꞌ, mana caꞌpi. Cananoꞌsa yaꞌhuëpiquë notënanquë canconai huarëꞌ manasáchin caꞌpi.

Éxodo 3:20

Chiníquën nanantato, maꞌsha paꞌpi huëhuëpiro nininsopita aꞌnoarahuë. Iquipitoroꞌsa ataꞌhuantochináchin anaꞌintarahuë. Naporo huarëꞌ aꞌparinquëma huachi.

Éxodo 33:1

Siniorori naquëranchin Moisësë itaantarin: —Israiroꞌsa Iquipito quëran nani ocoiran. Iporasoꞌ noꞌpaꞌ quëtaꞌhuanquëmasoꞌ nininquë quëpaquë huachi. Inaquësoꞌ, co manta pahuaninhuëꞌ. Nani Apraan, Isaco, Cacopo inapita shaꞌhuitërahuë shinpita ina noꞌpaꞌ quëtaꞌhuasoꞌ. Ina marëꞌ anquëninëhuë aꞌpararahuë noꞌtëquën pacacamaso marëꞌ aꞌnotarinquën. Inaquësoꞌ, cananoꞌsaꞌ, amororoꞌsaꞌ, itiroꞌsaꞌ, huirisiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëapi. Yaꞌhuëapirinahuëꞌ, cari ocoiarahuë.

Juan 4:48

—Canpitasoꞌ co aꞌnaroáchin natëramacohuëꞌ. Coꞌsoꞌ Yosë pochin nipatohuëꞌ, co natëaramacohuëꞌ, itërin inarintaꞌ.

Hechos 13:18

Catapini shonca piꞌipi inotëro parti paꞌpachinara, Yosëri nosoroaton, co ataꞌhuantërinhuëꞌ. Co yanatëpirinahuëꞌ, naꞌcon catahuarin.

Hechos 7:42

Napoaton Yosëri tananpitërin. Tananpitohuachina, maꞌsha inápaquë yaꞌhuërinsopita moshapi. Piꞌi, yoqui, tayora, inapita moshapi. Pënëntonaꞌpi iráca Yosë quiricanënquë ninshitaton, tapon: “Israiroꞌsaꞌ nontaton, Yosëri itërin: ‘Catapini shonca piꞌipi inotëro parti paasëmaꞌ maꞌsha tëpahuatamara, co chinotatomaco naporamahuëꞌ.

Deuteronomio 8:4

Catapini shonca piꞌipi paꞌsápomarahuëꞌ, co aꞌmoramaso mocarinhuëꞌ. Co nantëma tëranta pomatërinhuëꞌ.

Hebreos 3:8

Ama naniantocosohuëꞌ. Iráca Moisësëri israiroꞌsaꞌ quëpahuachina, shimashonënpoaꞌ co natëtochináchinhuëꞌ cancantopi. Inotëro parti yaꞌhuasoiꞌ, naꞌcon catahuapirahuëꞌ, co natërinacohuëꞌ.

Hebreos 3:9

Tënihuachinacontaꞌ, ahuantërahuë. Catapini shonca piꞌipi nani maꞌsha sacaiꞌ nininso nipirahuëꞌ, co yanatërinacohuëꞌ. ‘Co Yosë catahuarinpoahuëꞌ,’ taꞌtonaꞌ, aꞌnaquën aꞌporinaco.

Hebreos 8:9

Iráca inapitasoꞌ Iquipito parti yaꞌhuëpirinahuëꞌ, imiranpo quëran sëꞌquërëso pochin nosoroato, nichaꞌërahuë. Naporoꞌ inapitarëꞌco anoyatopirahuëꞌ, co natantochináchinhuëꞌ cancantopi niꞌton, tananpitërahuë,” tënin Yosë.