Hechos 7:35 - Chayahuita (Shahui)

³⁵ Napoaton Moisësë inatohua chachin paantarin. Iráca israiroꞌsaꞌ yacatahuapirinhuëꞌ, co yanatëpihuëꞌ. “¿Intaꞌ huaꞌan acorinquën? Co coisë pochin shaꞌhuitancoisoꞌ yaꞌhuërinhuëꞌ,” itopi. Yosëso nipirinhuëꞌ Moisësë chachin huaꞌan acorin. Naraꞌhuaya quëran anquëniri yaꞌnotasoꞌ, Yosëri shaꞌhuitërin inapita nichaꞌëcaso marëꞌ.

Hechos 7:35 ပူးပေါင်းရင်းမြစ်များ

Éxodo 14:19

Moisësëri camaihuachina, israiroꞌsa Quëhuai marë parti paꞌsapi. Iquipito sontaroꞌsarintaꞌ, aquëran imaquiapi. Naporoꞌ Sinioro anquëninëonta quëchitëraponahuëꞌ, Israiro huënton aquëchitahuaton, piquëran niacorin. Chitoro naporopi nininsonta inapochachin ninin. Inapoatonaꞌ, cato huëntoni chachin huancanapipi. Israiroꞌsasoꞌ, chitorori pën pochin niꞌton, noya pacacaiso marëꞌ aꞌpintërarin. Iquipitoroꞌsaso nipirinhuëꞌ, yaráton chitoro pochin nicaton, co manta aꞌpintërinhuëꞌ. Napoaton yaꞌipi tashi imapirinahuëꞌ, co nanitopihuë israiroꞌsa icantacaisoꞌ.

Éxodo 14:24

Imasapirinahuë tahuëri yaꞌcari nisapasoꞌ, Yosëri iquipitoroꞌsa maꞌsha onpotacaso yonquirin. Naporopi chitoro pën pochin yaꞌnorin quëran, panca maꞌsha onpotërin. Napoaton iquipitoroꞌsa panca paꞌyanpi.

Éxodo 2:14

Napotopirinhuëꞌ, ahuëtonaꞌpiriso itapon: —¡Co insonta camaiancoso marëꞌ nanan quëtërinquënhuëꞌ! Co coisë pochin nicamaso yaꞌhuërinhuëꞌ. Iꞌhuara Iquipito quëmapi tëparanso pochin ¿ca yaꞌhuërëꞌ yatëpaantamaranco ti? itërin. Ina natanahuaton, Moisësë paꞌyanin: “Iquipito quëmapi tëparahuësoꞌ nani yaꞌipi nitotopi,” tënin yonquinënquë.

Números 20:16

Parisitápatoi catahuaincoiso marëꞌ Sinioro nontërai. Chiníquën nontohuatoira natanahuatoncoi catahuarincoi. Anquëninën aꞌpaimarin Iquipito quëran ocoincoiso marëꞌ. Iporasoꞌ Catisë ninanoquë yaꞌhuëarai, canpita noꞌpanëma naniconinquë nisarai.

Marcos 12:26

Chiminpisopita tëhuënchachin nanpiantarapi. ¿Coꞌna ina Moisësë ninshitërinquë nontëramahuëꞌ? Sarsa naraꞌhuaya orotarinsoꞌ nicasoꞌ, Yosëri nontërin. “Casoꞌ Yosëco. Apraan chinotarinco. Isaco, Cacopo, inapitantaꞌ chinotarinaco,” itërin Yosëri.

Lucas 19:14

Piyapinënpitaso nipirinhuëꞌ co nohuantopihuëꞌ. Noꞌhuipi. Napoaton comisionënpita aꞌpapi copirno shaꞌhuitacaiso marëꞌ. ‘Ina quëmapi co nohuantëraihuëꞌ huaꞌanëntiincoisoꞌ. Ama acoquësohuëꞌ,’ itoonpi.

Juan 18:40

Natanahuatonaꞌ, chiníquën aꞌpanitopi: —¡Ama ina ocoiquësohuëꞌ! ¡Parapasë ocoiquëꞌ! itopi. Inasoꞌ matararo nipirinhuëꞌ napotopi.

Juan 19:15

—Co quiyarisoꞌ nohuantëraihuëꞌ. ¡Aꞌnaroáchin atëpatëquëꞌ! ¡Corosëquë apatanantëquëꞌ chimiin! itaantapi huaꞌanoꞌsari. —Copirnonëmaꞌ nipirinhuëꞌ, ¿atëpachi ti? itërin. —¡Noma copirnoíchin natërai quiyantaꞌ! Co aꞌna copirno yaꞌhuëtërincoihuëꞌ, itopi.

Hechos 2:36

Yosë huiꞌnin chachin iyaroꞌsaꞌ, corosëquë apatanantëramaꞌ. Inapotopiramahuëꞌ, Yosëri noya noya niꞌnin. ‘Inasoꞌ Cristo, aꞌpaimarahuësoꞌ. Sinioro niꞌton, natëcasoꞌ yaꞌhuërin,’ tënin. Noꞌtëquën iyaroꞌsaꞌ nani shaꞌhuitëranquëmaꞌ,” itërin.

Hechos 3:22

Iráca Moisësëri ninoton, shimashonënpoapita shaꞌhuitërin: ‘Aꞌna tahuëri Yosë nohuanton, aꞌna pënëntonaꞌpi yaꞌhuapon, ca pochin nininsoꞌ. Inasoꞌ Israiro quëmapi. Pënënpachinquëmaꞌ, yaꞌipi natëcoꞌ.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

Hechos 7:30

Catapini shonca piꞌipi Moisësë inaquë yaꞌhuërin. Ina quëran aꞌna tahuëri inotëroꞌ parti paꞌnin. Sinai motopi yaꞌcariya niꞌsoꞌ, sarsa nara orotarinsoꞌ quënanin. Inaquë chachin anquëniri yaꞌnotimarin.

Hechos 7:51

Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

Colosenses 1:15

Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin.

Hebreos 2:2

Iráca Yosëri anquëniroꞌsaꞌ aꞌpaimarin nanan shaꞌhuitacaiso marëꞌ. Natëcasoꞌ yaꞌhuërin niꞌton, co piyapiꞌsari natëhuachinahuëꞌ, Yosëri noꞌtëquën anaꞌintërin.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

1 Samuel 10:27

Aꞌnaquëniso napoaponahuëꞌ, nocanatona itaponaꞌ: “¡Co onporonta isoso inimiconënpoapita quëran nichaꞌësarinpoahuëꞌ!” topi. Napotatona nocanpi. Naporahuaton co maꞌsha tëranta noya nicatonaꞌ, nicarapihuëꞌ. Saonoso nipirinhuëꞌ, napopisoꞌ natanaponahuëꞌ, co nataninhuë pochin ninin.

1 Samuel 12:8

Cacopo huiꞌninpita, shinpita, inapita iráca Iquipitoquë paꞌpi. Paꞌpachinara, iquipitoroꞌsari chiníquën aparisitopi. Inapotohuachinara shimashonënpoapitasoꞌ, Sinioro nontopi huachi. Inariso natanahuaton, Moisësë, Aaron, inapita acorin catahuacaiso marëꞌ. Inapitari Iquipito quëran ocoirahuatonaꞌ, shimashonënpoapitasoꞌ iso noꞌpaquë yaꞌhuëcaiso marëꞌ quëpi.