Hechos 5:41 - Chayahuita (Shahui)

⁴¹ Aꞌpahuachinara, pipipi. “Yosë noya niꞌnincoi niꞌtoi, Quisoso marëꞌ parisitërai,” taꞌtonaꞌ, capa cancantopi. Co mantaꞌ sëtopihuëꞌ.

Hechos 5:41 ပူးပေါင်းရင်းမြစ်များ

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Lucas 6:22

Yosë quëran quëmapico niꞌto, imaramaco. Imaramacoso marëꞌ aꞌnaquën noꞌhuiarinënquëmaꞌ. Co huachi quëꞌyarinënquëmahuëꞌ. Pinosarinënquëmaꞌ. Nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëma niꞌton, nóya cancantocoꞌ.

Juan 15:21

Napoaponahuëꞌ, imaramaco niꞌton, naꞌcon naꞌcon piyapiꞌsaꞌ aparisitarinënquëmaꞌ. Tata Yosë aꞌpaimarincosoꞌ co nohuitopihuëꞌ niꞌton, noꞌhuiarinënquëmaꞌ.

Hechos 21:13

—¿Onpoatontaꞌ naꞌnëtomaꞌ asëtaramaco? Ama huachi naꞌnëcosohuëꞌ. Inatohuaꞌ paꞌpato, yatonpoarinaco. Nipirinhuëꞌ, yapaꞌsarahuë. Sinioro Quisoso imarahuëso marëꞌ yatëpapirinacohuëntaꞌ, paꞌsarahuë, itërincoi.

Hechos 5:21

Ina natanahuatonaꞌ, tashiramiachin Yosë chinotopiso pëiquë paꞌpi. Piyapiꞌsaꞌ huëꞌpachinara, aꞌchintapi. Corto huaꞌan chini chiníquën nanantërinsoꞌ, satosioroꞌsaꞌ, inapitasoꞌ co nitotatonahuëꞌ, niyontonahuatonaꞌ, yaꞌipi huaꞌanoꞌsaꞌ, Israiro ansianoꞌsaꞌ, inapita amatopi. Huëꞌpachinara, ponisia aꞌpapi inapita maconacaiso marëꞌ.

Romanos 5:3

Iporasoꞌ parisitarihuarahuëꞌ, noya cancantarihuaꞌ. “Parisitohuatëhuaꞌ, Yosë catahuarinpoaꞌ imamiatacaso marëꞌ,” taꞌtëhuaꞌ, co sëtarihuahuëꞌ. Chiníquën cancantatëhuaꞌ, noya ahuantarihuaꞌ.

2 Corintios 12:10

Napoaton co chiníquën cancantopirahuëꞌ, co paꞌyanahuëꞌ. Pinopachinacora, co noꞌhuitërahuëꞌ. Maꞌsha pahuantopirincohuëꞌ, co ina yonquirahuëꞌ. Quisocristo imarahuëso marëꞌ aparisitohuachinacora, ahuantërahuë. Sacaiꞌ nipirinhuëꞌ, nóya cancantërahuë. “Co caora nanitohuatërahuëꞌ, naꞌcon naꞌcon catahuarinco,” taꞌto, chini chiníquën cancantërahuë.

Filipenses 1:29

Yosë nosoroatonpoaꞌ, noyasáchin yonquirinpoaꞌ. Ina nohuanton, Quisocristo imarëhuaꞌ. Ina quëran imarëhuaso marëꞌ parisitarëhuaꞌ. “Ca marëꞌ chiníquën parisitërin niꞌton, cantaꞌ imarahuëso marëꞌ parisichi,” taꞌtëhuaꞌ, noya cancantahuaꞌ. Inantaꞌ Yosë nohuantërin.

Hebreos 10:34

Tashinan pëiquë poꞌmohuachinara, co tëꞌhuatomarahuëꞌ, nicapomaꞌ paꞌnamaꞌ. Paatomaꞌ, catahuaramaꞌ. Canpitantaꞌ imaramaso marëꞌ maꞌshanëmaꞌ osërëtopirinënquëmahuëꞌ, co sëtëramahuëꞌ. “Yosë chachin nohuitërëhuaꞌ. Nasha cancan quëtërinpoaꞌ. Co insontaꞌ nanitërinhuëꞌ inasoꞌ osërëtinpoasoꞌ,” taꞌtomaꞌ, nóya cancantëramaꞌ.

Hebreos 12:2

Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

Santiago 1:2

Nisha nisha maꞌsha onpoapomarahuëꞌ iyaroꞌsaꞌ, ama sëtocosohuëꞌ. Noya cancantocoꞌ.

3 Juan 1:7

Quisocristo noninsoꞌ aꞌchinápi. Ina marëꞌ paꞌsápi. Co Yosë imapisopitahuëꞌ aꞌchintaponaraihuëꞌ, co mantaꞌ ina marëꞌ maꞌpatopihuëꞌ.