Hechos 3:2 - Chayahuita (Shahui)

² Inaquë aꞌna quëmapi quënanconpi. Nasitërin quëran huarëꞌ co nanitërinhuëꞌ iratacasoꞌ. Nani tahuëri Yosë chinotopiso pëiquë quëpapi. Aꞌna yaꞌcoanaquë acopi, “Noyápiachin,” itopiquë. Inaquë acopi coriqui maꞌpatacaso marëꞌ. Piyapiꞌsaꞌ Yosë chinotopiso pëiquë yaꞌconpachinara, coriqui maꞌpatërin.

Hechos 3:2 ပူးပေါင်းရင်းမြစ်များ

Lucas 16:20

Aꞌna quëmapintaꞌ inaquë yaꞌhuërin, saꞌahua nininsoꞌ. Nasaro itopi. Apia niꞌton, co nanitërinhuëꞌ sacatacasoꞌ. Maꞌsha topinan maꞌpataton, nanpirin. Maꞌhuan pëinën aipiran acopi. Yaꞌcoanaquë huënsëarin. Tanaton, maꞌhuan pëꞌsotërinso tërantaꞌ nayapirinhuëꞌ, co mantaꞌ quëtopihuëꞌ. Taꞌtaráchin niconin niꞌton, niꞌniraroꞌsari huëcatonaꞌ, irotiipi.

Lucas 18:35

Ina quëran Quiricoquë yaꞌcaritohuachina, aꞌna quëmapi quënanconin. Ira yonsanquë huënsëarin. Somaraya niꞌton, nani tahuëri inaquë huënsëaton, coriqui topinan maꞌpatárin.

Juan 9:8

Yaꞌcariya yaꞌhuëpisopitari quënanahuatonaꞌ, paꞌyanpi. Nani huaꞌquiꞌ huënsëaton, coriqui maꞌpatërin. Somaraya niꞌton, topinan quëtopi. Napoaton naꞌa piyapiꞌsari nohuitopi. Inapitari quënanahuatonaꞌ, ninontopi. —¿Isona quëmapi iꞌhua coriqui maꞌpatërinsoꞌ ti? nitopi.

Hechos 10:31

Yaꞌnotirahuatonco, itërinco: “Cornirio, quëmasoꞌ naꞌcon Yosë nontëran, nataninquën. Saꞌahuaroꞌsaꞌ nosoroaton, maꞌsha quëtëran. Ina marëꞌ Yosë noya yonquirinquën.

Hechos 10:4

Anquëni niꞌsahuaton, paꞌpi tëꞌhuatërin. —¿Maꞌtaꞌ sinioro nohuantëran? itërin. —Quëmasoꞌ naꞌcon Yosë nontëran, nataninquën. Saꞌahuaroꞌsaꞌ nosoroaton, maꞌsha topinan quëtëran. Ina marëꞌ noya yonquirinquën.

Hechos 14:8

Nistraquë apia yaꞌhuërin. Co nanitërinhuëꞌ iratacasoꞌ. Nasitërin quëran huarëꞌ co onporontaꞌ huanirinhuëꞌ.

Hechos 3:10

Niꞌsahuatonaꞌ, piyapiꞌsari nohuitopi niꞌton, paꞌyanpi. “Isosoꞌ quëmapi, Yosë chinotopiso pëiꞌ yaꞌcoananënquë huënsërahuaton, coriqui maꞌpachantërinsoꞌ. ¿Onporahuatoncha noya iratërin nicaya?” nitopi.