Hechos 26:18 - Chayahuita (Shahui)

¹⁸ Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Hechos 26:18 ပူးပေါင်းရင်းမြစ်များ

Isaías 32:3

Maꞌsona yanipachinaꞌ, noya niꞌsahuatona acoaponaꞌ. Maꞌsona shaꞌhuitahuachinantaꞌ, noya huëratëhuanatona natanaponaꞌ.

Isaías 35:5

Naporoꞌ somarayaroꞌsa quënantaponaꞌ. Nëꞌhuëyaroꞌsanta natantaponaꞌ, nonaponaꞌ. Sonpacharoꞌsantaꞌ, yo pochin niiponaꞌ. Inotërosoꞌ, yaꞌshi yaꞌshin nipirinhuëꞌ, noꞌpa quëran notohuaroꞌ iꞌsharoꞌsa pipirantapon. Sonoroꞌsanta yaꞌhuëapon. Ipora asaniroꞌsa yaꞌhuërinquëntaꞌ, piquiraroroꞌsaꞌ, shiꞌshinamatëroꞌsaꞌ, inapita yaꞌhuëapon. Ina noꞌpanëmataëchin aꞌnara caritira pëntonapon. Co oshanëna inquihuachinahuëꞌ, co nanitapihuë inataëchin paꞌtacaisoꞌ. Naponin yonquipisopitantaꞌ, co inataquëchin paꞌsapihuëꞌ. Ina caritirasoꞌ: “Yosë caritiranën,” itaponaꞌ.

Isaías 42:16

Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

Isaías 42:7

Somarayaroꞌsa anoyarayataran. Sopairi minsëaton huaꞌanëntërinsopita, paꞌpi tashinan pëiquë pochin ichiyaꞌhuërin. Inapitanta ocoiatë pochin nitacaso marëꞌ acoranquën,” itërin.

Isaías 43:8

Piyapinëhuëpitaso yaꞌpirahuanaponaraihuëꞌ, somaraya pochin cancantopi. Huëratëhuanaponaraihuëꞌ, nëꞌhuërinso pochin cancantopi. Ina pochin nipirinahuëꞌ, quëantacoꞌ.

Isaías 49:6

Ina Sinioro chachin shaꞌhuitaantarinco: ‘Cacopo quëran pipipisopita huëntonoꞌsaꞌ, quëmari anoyataantapon. Inimicoroꞌsari quëpapirinahuëꞌ, quëmari ayontoantapon. Napoaponahuëꞌ, co inaíchin nicacaso marëꞌ acoranquënhuëꞌ, nisha piyapiꞌsanta aꞌchintaton, anohuitaancoso marëꞌ acoranquën. Aꞌpintërëso pochin nanamëhuë anitotaran. Yaꞌipi parti piyapiꞌsa chaꞌëcaiso marëꞌ aꞌchintëraꞌpiapon,’ itërinco,” tënin.

Isaías 9:2

Inapitasoꞌ co noyahuëꞌ nicatonaꞌ, tashinanquë iratërëso pochin cancantopi. Inapopirinahuëꞌ, panca aꞌpintërëso pochin noya nicacaiso anitotaponaꞌ. Sinioro quëma chachin capa cancantaꞌhuaisoꞌ, quëshirancoi. Shaꞌnaiso mapatoira, capa cancantërai. Canatatona notohuaroꞌ maꞌsha nipatomatohuachinarantaꞌ, capa cancantopi. Inapochachin quiyantaꞌ, quëma niꞌtonënquë capa cancantomiatarai.

Malaquías 4:2

Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ.

Mateo 4:10

—Inca co nohuantërahuëꞌ. Quëmasoꞌ sopai huaꞌanquën. Patoco huachi. Yosë quiricanën quëran shaꞌhuitërinpoaꞌ: “Sinioroíchin chinotëquëꞌ. Inasáchin natëcasoꞌ yaꞌhuërin,” tënin, itërin Quisosori.

Mateo 4:16

Inapitasoꞌ co Yosë nohuitatonaraihuëꞌ, tashi pochin cancantopi. Chiminpachinaꞌ, parisitomiatacaisoꞌ yaꞌhuëpirinhuëꞌ, Yosëri aꞌpintërinso pochin nanamën anitotarin noya cancantacaiso marëꞌ. Tahuëri pochin aꞌpintarin huachi,” tënin iráca. Naporinso chachin Quisoso inatohuaꞌ paaton, aꞌchinarin.

Lucas 1:77

Yosë piyapinënpita itapon: ‘Oshanëmaꞌ inquitatënquëmaꞌ, Sinioro anoyacancantarinquëmaꞌ,’ itaran.

Lucas 1:79

Tashinan pochin cancantopirëhuahuëꞌ, aꞌpintatë pochin nitarinpoaꞌ noya nanpicaso marëꞌ. Anoyacancantohuachinpoaꞌ, sano cancantarihuaꞌ,” tënin Sacariasë.

Lucas 2:32

Nisha nisha nananquë nonpisopita aꞌpintarin noꞌtëquën yonquicaiso marëꞌ. Israiroꞌsantaꞌ catahuaarin. Piyapinënpita niꞌton, noya noya acorarin,” itërin.

Lucas 24:45

Yosë quiricaquë naporinsopita aꞌchintaantarin. Aꞌchintaton, catahuarin noꞌtëquën yonquicaiso marëꞌ.

Lucas 24:47

Ina nanan chachin shaꞌhuicasoꞌ yaꞌhuërin. “Co noyahuëꞌ yonquiramasopita naniantohuatamaꞌ, oshanëmaꞌ inquitarinquëmaꞌ,” itocoꞌ. Quirosarinquëꞌton shaꞌhuicasoꞌ yaꞌhuërin. Ina quëran nisha nisha nananquë nonpisopita shaꞌhuitacasoꞌ yaꞌhuërin.

Lucas 4:18

“Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

Juan 17:17

Catahuaquëꞌ quëmasáchin cancanchinën. Noꞌtëquën ayonquiquëꞌ noya nicacaiso marëꞌ. Quëma nanamën quëran noꞌtëquën anitotëran.

Juan 3:19

Quisoso isoroꞌpaquë oꞌmaton, aꞌpintërinpoaso pochin oshanënpoaꞌ anitotërinpoaꞌ. Aꞌnaquëniso nipirinhuëꞌ, co nohuantopihuëꞌ Quisoso nohuitacaisoꞌ. Co noyahuëꞌ nicacaisoáchin paꞌyatatonaꞌ, tashi pochin cancantopi. Co yanatëpihuëꞌ niꞌton, Yosëri anaꞌintarin.

Juan 4:10

—Yosë yanicanapirinquënhuëꞌ, co quëmasoꞌ nitotëranhuëꞌ. “Iꞌsha mananso cantaꞌ oꞌoi,” itëranquën nipirinhuëꞌ, co nohuitërancohuëꞌ. Nohuitëranco naporini, quëma nataintoncohuëꞌ. Carinquën nanpirin iꞌsha quëchitënquënhuëꞌ, itërin Quisosori.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 8:12

Ina quëran piyapiꞌsaꞌ aꞌchintantarin. —Casoꞌ aꞌpintatë pochin nicato, yaꞌipi piyapiꞌsaꞌ noꞌtëquën anitotarahuë. Imapatamaco, co huachi tashinan pochin cancantaramahuëꞌ. Tahuëri pochin cancantaramaꞌ. Ina pochin cancantohuatamaꞌ, Yosë nohuitatomaꞌ nanpimiataramaꞌ.

Juan 9:39

Napotohuachina, Quisosori itërin: —Isoroꞌpaquë oꞌmarahuë piyapiꞌsaꞌ noꞌtëquën shaꞌhuitaꞌhuaso marëꞌ. Somarayaroꞌsa nipisopita anoyarayatarahuë. Napoaponahuëꞌ: “Quiyaso noya niꞌtërai topisopitasoꞌ, asomarayatë pochin nitarahuë,” itërin.

Juan 9:5

Isoroꞌpaquë yaꞌhuasoco, aꞌpintërinso pochin yaꞌipi piyapiꞌsaꞌ noꞌtëquën anitotërahuë, itërincoi.

Hechos 10:43

Iráca quëran huarëꞌ pënëntonaꞌpiroꞌsaꞌ Quisoso ninotonaꞌ, shaꞌhuitërinënpoaꞌ ina natëcaso marëꞌ. Cancanënpoa quëran huarëꞌ ina natëcasoꞌ yaꞌhuërin. Oshanënpoa marëꞌ chiminin niꞌton, imapatëhuaꞌ, yaꞌipi oshanënpoaꞌ inquitarinpoaꞌ. “Ca oshanëhuë marëꞌ mini Quisocristo chiminin,” topatëhuaꞌ, inquitarinpoaꞌ, itërin Pitrori.

Hechos 13:47

Sinioro shaꞌhuitërincoi: “Quëmasoꞌ acoranquën nisha piyapiꞌsaꞌ aꞌchintaton anohuitancoso marëꞌ. Aꞌpintërëso pochin nanamëhuë anitotaran. Yaꞌipi parti paaton, piyapiꞌsaꞌ aꞌchintëraꞌpiapon chaꞌëcaiso marëꞌ,” itërincoi, tënin Paono.

Hechos 15:9

Yaꞌipinpoaꞌ napopianachin niꞌninpoaꞌ. Nisha piyapiꞌsantaꞌ nosororin. “Quisocristoíchin imasarahuë,” topachinara, cancanënaꞌ anoyatërin.

Hechos 2:38

Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

Hechos 20:21

Co cotioroꞌsaráchin pënënahuëꞌ. Cricoroꞌsantaꞌ pënënahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Sinioro Quisoso natëco huachi. Inasáchin anoyacancantërinpoasoꞌ,’ itëranquëmaꞌ. Yaꞌipinquëmaꞌ aꞌchintëranquëmaꞌ.

Hechos 20:32

Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ.

Hechos 26:19

Napoaton, sinioro huaꞌan, Quisoso inápa quëran yaꞌnotimarinco niꞌton, aꞌnaroáchin imarahuë. Yaꞌipi shaꞌhuitohuachincora, noꞌtëquën natërahuë.

Hechos 26:23

Yosë nohuanton, Cristo chiminapon. Chiminaponahuëꞌ, Yosëri ananpitaantarin. Inaꞌton nanpiantarin. Ina quëran aꞌchintapon tahuëri pochin cancantacaiso marëꞌ. Co cotioroꞌsaráchin nichaꞌësarinhuëꞌ. Nisha piyapiꞌsantaꞌ nichaꞌësarin, topi ninshitatonaꞌ,” tënin.

Hechos 3:19

Napoaton iyaroꞌsaꞌ yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ oshanëmaꞌ inquichinquëmaꞌ.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

Romanos 8:17

Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

2 Corintios 6:14

Co Yosë imapisopitasohuëꞌ nipirinhuëꞌ, ama inapitarëꞌquëmaꞌ naꞌcon naꞌcon nipayacosohuëꞌ. Co canpita pochin cancantopihuëꞌ. Noya cancantohuatamaꞌ, co nohuantaramahuëꞌ oshahuanacamasoꞌ. Niꞌcoꞌ. Tahuëri, tashiꞌ co inachachinhuëꞌ. Nisha nisha yaꞌnopi.

Gálatas 2:20

Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

Gálatas 3:14

“Yosë noꞌtëquën nontërinco,” tënin Apraan. Ina tëninso marëꞌ Yosëri noya niꞌnin. Nisha piyapiroꞌsarintaꞌ imacaiso marëꞌ Quisocristo chiminin. Ina natëhuachinara, Yosëri noya niꞌnin. Yaꞌipinpoaꞌ Quisocristo imapatëhuaꞌ, Ispirito Santo yaꞌcoancantarinpoaꞌ. Iráca Yosë shaꞌhuirinso pochachin yaꞌcoancantarinpoaꞌ.

Gálatas 3:2

Isoíchin yanitotërahuë. ¿Maꞌtaꞌ imaramaꞌ niꞌton Ispirito Santo yaꞌcoancantërinquëmaꞌ? Iráca pënëntërinsoꞌ natëhuatamaꞌ, ¿Ispirito Santo yaꞌcoancantërinquëmaꞌ ti? ¡Coꞌta, Quisocristo nanamën natanatomaꞌ natëhuatamaꞌ, yaꞌcoancantërinquëmaꞌ! “Noꞌtëquën nontërinpoaꞌ,” taꞌtomaꞌ, natëramaꞌ. Ina imapatamaꞌ, Ispirito Santo yaꞌcoancantatënquëmaꞌ, naꞌcon catahuarinquëmaꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 1:14

Quisocristo imapatëhuaꞌ, Ispirito Santo yaꞌcoancantomiatërinpoaꞌ. Inaꞌton quëtërinpoaꞌ niꞌton: “Tëhuënchachin aꞌna tahuëri Yosëꞌpaꞌ quëpantarinpoaꞌ,” tënëhuaꞌ. Nani Yosë nichaꞌërinpoaꞌ niꞌton, oꞌmantacasoꞌ tahuëri nanihuachin, yaꞌhuërinꞌpaꞌ quëpantarinpoaꞌ. Inaquë noya noya yaꞌhuëcontarihuaꞌ. Ina yonquiatëhuaꞌ: “Ma noyacha Tata Yosëso yonquirinpoa paya,” tënëhuaꞌ.

Efesios 1:18

Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 2:8

Nosoroatonpoaꞌ, inaora nohuanton nichaꞌërinpoaꞌ. “Quisocristoíchin anoyacancantërinpoaꞌ,” topatëhuaꞌ, oshanënpoaꞌ inquitatonpoaꞌ, nichaꞌërinpoaꞌ. Co canpoara nanitërëhuahuëꞌ Yosë imacasoꞌ. Ina catahuarinpoaꞌ cancanënpoa quëran natëcasoꞌ.

Efesios 5:11

Aꞌnaquën tashi pochin cancantatonaꞌ, co noyahuëꞌ nipi. Topinan quëran yaꞌhuërapi niꞌton, ama inapita pochin cancantocosohuëꞌ. Noꞌtëquën shaꞌhuitocoꞌ co noyahuëꞌ nipisopita naniantacaiso marëꞌ.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.

Efesios 5:8

Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ.

Efesios 6:12

Inimiconënpoaꞌ co piyapi pochin quënanëhuahuëꞌ. Sopai huaꞌansoꞌ yaminsërinpoaꞌ. Naꞌa sopairoꞌsantaꞌ inápaquë yaꞌhuatonaꞌ, yacamairinënpoaꞌ. Co quënanpirëhuahuëꞌ, yonquinënpoa quëran yacamairinënpoaꞌ co noyahuëꞌ nicacaso marëꞌ. Iporasoꞌ notohuaroꞌ piyapiꞌsaꞌ tashi pochin cancantatonaꞌ, sopai natëpi. Inari camairin niꞌton, paꞌpi co noyahuëꞌ yonquipi.

2 Timoteo 2:26

Yonquicaiso marëꞌ sanoanan quëran pënëanhuanꞌ. Huënsonquë maꞌsha manëso pochachin sopairi nani manin. Camaihuachina, natëpi. Nipirinhuëꞌ pënënpatëhuaꞌ, sopai quëran chaꞌëponaꞌ nimara.

Hebreos 10:10

Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

Hebreos 10:14

Aꞌnaroíchin chiminaponahuëꞌ, anoyacancantërinpoaꞌ. Yaꞌipi imarëhuasopita oshanënpoaꞌ inquitatonpoaꞌ, noyápiachin cancan quëtërinpoaꞌ.

Hebreos 11:6

Yosë yonquihuatëhuaꞌ, natëtacasoꞌ yaꞌhuërin. “Yosë yaꞌhuárin. Noꞌtëquën nontërinpoaꞌ. Ina nontohuatëhuaꞌ, natanatonpoaꞌ catahuarinpoaꞌ,” topatëhuaꞌ, noya niꞌsarinpoaꞌ. Co ina pochin cancantohuatëhuahuëꞌ, co onporontaꞌ noya niꞌsarinpoahuëꞌ.

Hebreos 9:15

Napoaton nasha quëran anoyatërinso nani shaꞌhuitërinpoaꞌ. Yaꞌnan anoyatërinso naꞌa piyapiꞌsaꞌ imapirinahuëꞌ, co noyahuëꞌ cancantatonaꞌ, oshahuanpi. Co maꞌsharoꞌsaꞌ huënainën quëran oshanënaꞌ inquimiatopihuëꞌ. Nipirinhuëꞌ, Quisocristo chiminin yaꞌipi huayoninsopita oshanënaꞌ inquitacaso marëꞌ. Yaꞌnan anoyatërinso imapisopita oshanënantaꞌ inquitërin.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

1 Pedro 1:4

Yosëꞌpaꞌ nani tapatërinpoaꞌ noya noya yaꞌhuëcontacaso marëꞌ. Inatohuaꞌ co mantaꞌ taꞌhuantarihuahuëꞌ. Co mantaꞌ nitapiarinhuëꞌ. Inaquësoꞌ co yanco pochin ahuirinhuëꞌ. Noya noya nisarin. Canpoa marëꞌ Yosëri acorin. Inari chachin niꞌsarin.

1 Pedro 2:25

Ohuica chihuërinso pochin nicatëhuaꞌ, co Yosë nohuitopirëhuahuëꞌ, iporasoꞌ Quisocristo imarëhuaꞌ. Inasoꞌ ohuicaroꞌsaꞌ huaꞌanën pochin niꞌton, noya aꞌpaiarinpoaꞌ.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.

1 Juan 1:9

Onporosona co noyahuëꞌ nipatëhuaꞌ, Yosë nontahuaꞌ. “Tëhuënchachin co noyahuëꞌ nicato, oshahuanco,” topatëhuaꞌ, Yosë oshanënpoaꞌ inquitarinpoaꞌ. Co nonpintërinpoahuëꞌ. Quisocristo chiminin niꞌton, nanitërin yaꞌipi oshanënpoaꞌ inquitinpoasoꞌ. Noyápiachin cancan quëtarinpoaꞌ.

1 Juan 2:12

Canpitasoꞌ imaramaꞌ niꞌton, ninshitaranquëmaꞌ. Huiꞌnahuëpita pochin nicatënquëmaꞌ, ninshitaranquëmaꞌ. Quisocristo canpoa marëꞌ chiminin. Imapatamaꞌ, oshanëmaꞌ inquitërinquëmaꞌ.

1 Juan 3:8

Nani tahuëri co noyahuëꞌ nipatamaꞌ, sopai imaramaꞌ. Iráca quëran huarëꞌ sopai co noyahuëꞌ cancantaton, oshahuanin. Inasoꞌ nonpintohuachinpoaꞌ, canpoantaꞌ oshahuanarëhuaꞌ. Napoaton Yosë huiꞌnin oꞌmarin sopai minsëaton nichaꞌëinpoaso marëꞌ. Yaꞌipi oshanënpoaꞌ inquitohuachinpoaꞌ, co huachi sopai natëcasoꞌ yaꞌhuërinhuëꞌ.

1 Juan 5:19

Imarëhuasopitasoꞌ Yosë huiꞌninpitanpoaꞌ ninëhuaꞌ. Aꞌnapitaso nipirinhuëꞌ co imapihuëꞌ niꞌton, sopairi huaꞌanëntërin. Camaihuachina, ina natëpi. Ina nitotërëhuaꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Apocalipsis 21:27

Noyasáchin inaquë yaꞌhuaponaꞌ. Co mantaꞌ osha yaꞌhuërarinhuëꞌ. Co noyahuëꞌ nipisopitasoꞌ, co yaꞌconaponahuëꞌ. Aꞌnaquën nonpinatonaꞌ: “Imarai quiyantaꞌ,” topirinahuëꞌ, co inapitasoꞌ yaꞌconaponahuëꞌ. Carniroaꞌhua imarëhuasopitaráchin inaquë yaꞌhuëcontarihuaꞌ. Nanpirin quiricaquë nininënpoapita nani ninshitërinpoaꞌ.