Hechos 24:14 - Chayahuita (Shahui)

¹⁴ “Nisha imarin,” topi. Inaíchin noꞌtëquën nonpi. Tëhuënchachin Quisoso nanamën imarahuë. Nipirinhuëꞌ, Yosë noꞌtëquën chinotërahuë. Shimashonëhuëpita chinotopiso chachin chinotërahuë cantaꞌ. Yaꞌipi Yosë quiricanën natërahuë. Iráca pënëntërinsoꞌ, pënëntonaꞌpiroꞌsaꞌ ninshitopisoꞌ, inapita yonquirahuë.

Hechos 24:14 ပူးပေါင်းရင်းမြစ်များ

Amós 8:14

Samariaquë mamanshiroꞌsa chinotatonaꞌ: ‘Noꞌtëquën nontaranquën. Tano mamanshiantaꞌ,’ topi aꞌnaquën. Piirsipaquënta mamanshiroꞌsa yaꞌhuërinso chinotatonaꞌ: ‘Noꞌtëquën nontaranquën. Piirsipa mamanshiantaꞌ,’ topi aꞌnaquëontaꞌ. Napopisopitasoꞌ, ca nohuanton anotërëso pochin nipachinaꞌ, co huachi huënsëaponahuëꞌ,” tënin Sinioro.

Miqueas 4:2

Notohuaroꞌ nisha nisha piyapiꞌsa huëcapona pochin: “Huëco pantatëhua Sion motopiquë Sinioro chinotahuaꞌ. Inaquë pëinën yaꞌhuërin niꞌton, yaꞌipi israiroꞌsari chinotërin. Inasoꞌ nanamën aꞌchintarinpoaꞌ. Onpopinsona nanpicasoꞌ, anitotarinpoaꞌ,” tosapi. Ninapotatonaꞌ, Quirosarinquë paponaꞌ. Inaquë Sinioro nanamën aꞌchinapi niꞌton, paꞌsapi. Inaquë Siniorosoꞌ piyapinënpita nanamën anitotarin.

Mateo 10:32

‘Quisoso imarahuë,’ topatamaꞌ, ayaroꞌ tahuëri carinquëmantaꞌ nohuantaranquëmaꞌ. ‘Imarinaco mini,’ itarahuë Tata Yosë.

Mateo 22:40

Moisësë, pënëntonaꞌpiroꞌsaꞌ, inapitasoꞌ naꞌcon pënëntopirinahuëꞌ, nosorocasoꞌ naꞌcon naꞌcon nohuantopi. Napoaton nosorohuatamaꞌ, Yosë yonquirinso chachin imasaramaꞌ, itërin Quisosori.

Mateo 7:12

Noya ninosorocasoꞌ yaꞌhuërin. Canpitasoꞌ nohuantëramaꞌ aꞌnapita nosoroinënquëmasoꞌ. Napoaton canpita nohuantëramaso chachin inapitantaꞌ nosorocoꞌ. Ninosoroatomaꞌ, nicatahuacoꞌ. Yosë nohuanton, Moisësë, pënëntonaꞌpiroꞌsaꞌ, inapita naꞌcon pënënpirinënquëmahuëꞌ, ninosorocasoꞌ naꞌcon naꞌcon nohuantërin. Ninosorohuatamaꞌ, noya imasaramaꞌ, tënahuë,” itërin Quisosori.

Lucas 1:70

Iráca quëran huarëꞌ pënëntonaꞌpiroꞌsaꞌ ninopi. Yosë nohuanton, shaꞌhuitërinënpoaꞌ:

Lucas 16:16

Ina quëran tantarin: “Iráca Moisësë, pënëntonaꞌpiroꞌsaꞌ, inapita pënëntopi nani maꞌsha natëcasoꞌ. Ina quëran Coansha Paotista huëꞌpachina, noya nanan shaꞌhuirin Yosë huaꞌanëntërinquë yaꞌconacaiso marëꞌ. Yayaꞌconpisopitasoꞌ chiníquën cancantatonaꞌ, yaꞌconapi.

Lucas 16:29

Napotohuachina, Apraani itërin: ‘Coꞌta Yosë quiricanën yaꞌhuëtopi. Inaquë Moisësë, pënëntonaꞌpiroꞌsaꞌ, inapita ninshitopi nontatonaꞌ nitotacaiso marëꞌ. Inapita natëinaꞌ,’ itërin Apraani.

Lucas 24:27

Ina quëran Yosë quiricanënquë ninotona ninshitopisoꞌ, aꞌchintarin. Moisësëꞌton ninoton, Yosë quiricanënquë ninshitërin. Ina piquëran naꞌa pënëntonaꞌpiroꞌsaꞌ ninoantapi. Yaꞌipi Cristo ninopisoꞌ noꞌtëquën aꞌchintarin.

Lucas 24:44

—Nani iꞌhua chachin iyaroꞌsaꞌ shaꞌhuitëranquëmaꞌ. Yosë quiricanënquë naꞌcon ninorinaco. Moisësë, pënëntonaꞌpiroꞌsaꞌ, inapita ninorinaco. Sarmoquëntaꞌ ninshitopi. Yaꞌipi iráca ninorinacosopita nanicasoꞌ yaꞌhuërin niꞌton, iso tahuëriꞌsaꞌ ina pochin ninahuë, itërin.

Juan 1:45

Pinipiri Natanino yonisahuaton, quënanconin. —Nani iyasha Cristo quënanai, Yosë quiricanën quëran ninopisoꞌ. Moisësë, pënëntonaꞌpiroꞌsaꞌ, inapita ninotonaꞌ, inaquë ninshitopi. Inasoꞌ Quisoso, Cosi huiꞌnin. Nasaritoquë yaꞌhuërinsoꞌ, itërin.

Hechos 10:43

Iráca quëran huarëꞌ pënëntonaꞌpiroꞌsaꞌ Quisoso ninotonaꞌ, shaꞌhuitërinënpoaꞌ ina natëcaso marëꞌ. Cancanënpoa quëran huarëꞌ ina natëcasoꞌ yaꞌhuërin. Oshanënpoa marëꞌ chiminin niꞌton, imapatëhuaꞌ, yaꞌipi oshanënpoaꞌ inquitarinpoaꞌ. “Ca oshanëhuë marëꞌ mini Quisocristo chiminin,” topatëhuaꞌ, inquitarinpoaꞌ, itërin Pitrori.

Hechos 13:15

Cotio ansianoꞌsaꞌ quirica nontapi. Moisësë iráca pënëntërinsoꞌ, pënëntonaꞌpiroꞌsaꞌ ninshitopisoꞌ, inapita nani nontohuachinara, itaponaꞌ: —Achinicancanamacoiso marëꞌ yapënënpatamacoi iyaroꞌsaꞌ, shaꞌhuitocoi nataꞌin, itërin.

Hechos 15:5

Ina natanahuatonaꞌ, aꞌnaquën parisioroꞌsaꞌ Quisoso imaponaraihuëꞌ, co noyahuëꞌ natanpi. Napoaton huanirahuatonaꞌ, taponaꞌ: —Nisha piyapiꞌsaꞌ yaimapachinaꞌ, marca acotacasoꞌ yaꞌhuërin. Yaꞌipi Moisësë iráca pënëntërinsoꞌ imacaisoꞌ yaꞌhuërin. Inapita aꞌchintocoꞌ imainaꞌ, itopi.

Hechos 19:23

Naporoꞌ naꞌa piyapiꞌsaꞌ Sinioro imasapi niꞌton, mamanshi moshanaꞌpiroꞌsaꞌ noꞌhuitopi.

Hechos 19:9

Aꞌnaquënso nipirinhuëꞌ co natantochináchinhuëꞌ cancantatonaꞌ, co yanatëpihuëꞌ. Piyapiꞌsaꞌ niyontonpachinara, noꞌhuitopi. Noꞌhuitatonaꞌ, —Co Quisoso nanamën imacasoꞌ yaꞌhuërinhuëꞌ, toconpi. Napoaton Paonori patërin. Quisoso imapisopita quëparahuaton, iscoira pëiquë paꞌnin. Tirano aꞌchininquë paaton, nani tahuëri aꞌchintárin.

Hechos 22:14

Ina quëran itaantarinco: ‘Yosë chinotërëhuasoꞌ nani huayoninquën nohuantërinso chachin nitotamaso marëꞌ. Ina nohuanton, Quisoso yaꞌnotërinquën. Noya noya inasoꞌ. Nontërinquënsoꞌ natanan.

Hechos 24:22

Ina natanahuaton: —Noyahuaꞌ. Nani natananquën. Capitan huaꞌan Nisiasë oꞌmahuachin, iso nanan yonquiantarahuato, shaꞌhuichinquëmaꞌ, tënin huaꞌan. Quisoso nanamën aꞌchinpisoꞌ noya nitotaton, co aquëtëꞌ yanataninhuëꞌ.

Hechos 24:5

Iso quëmapi Paono itopisoꞌ paꞌpi co noyahuëꞌ, tënai. Yaꞌipi parti paaton, piyapiꞌsaꞌ nisha nisha ayonquirin. Aꞌchinpachina, cotioroꞌsaꞌ ninoꞌhuipi. Yaꞌipi parti naporin. Nisha imarin. Nasarinoroꞌsaꞌ itopisoꞌ imaton, naꞌa piyapiꞌsaꞌ aꞌchintarin imacaiso marëꞌ.

Hechos 25:8

Ina quëran Paonori itërin: —Iráca quëran huarëꞌ, sinioro huaꞌan, noya ninahuë. Co mantaꞌ onporahuëꞌ. Moisësë pënëntërinsoꞌ cotioroꞌsari natëhuachinara, co ina marëꞌ noꞌhuirahuëꞌ. Yosë chinotopiso pëintaꞌ co tapirahuëꞌ. Co nisha piyapi ichiyaꞌconahuëꞌ. Noma copirnontaꞌ natërahuë. Co onporontaꞌ piyapiꞌsaꞌ shaꞌhuitërahuëꞌ ina noꞌhuicaisoꞌ. Topinan quëran shaꞌhuirapirinaco, itërin.

Hechos 26:22

Yosësoꞌ catahuarinco, chaꞌërahuë. Napoaton ipora huantaꞌ natëarahuë. Yaꞌipi piyapiꞌsaꞌ huaꞌanoꞌsa quëran huarëꞌ shaꞌhuitarahuë. Moisësë, pënëntonaꞌpiroꞌsaꞌ, inapita ninopiso chachin aꞌchinarahuë:

Hechos 26:27

¿Quëmantaꞌ sinioro huaꞌan, pënëntonaꞌpiroꞌsaꞌ ninshitopisoꞌ natëran paꞌ? Natëran tënahuë casoꞌ, itërin Paonori.

Hechos 26:4

Huaꞌhuatapo quëran huarëꞌ yaꞌhuërahuësoꞌ, Quirosarinquëntaꞌ yaꞌhuërahuësoꞌ, inapita yaꞌipi cotioroꞌsaꞌ nitotopi.

Hechos 26:6

Iráca shimashonënpoapita nontaton, Yosëri itërin: ‘Aꞌna tahuëri nichaꞌësaranquëmaꞌ, nanpimiataramaꞌ,’ itërin. Yaꞌipi cotioroꞌsaꞌ ina ninapi, shonca catoꞌ huënton chachin ninarapi. Nani tahuëri tashirë chachin ina chinotatonaꞌ, naporapi. Cantaꞌ ina ninarahuë. Ina marëꞌ sinioro huaꞌan, cotio huaꞌanoꞌsaꞌ shaꞌhuirapirinaco.

Hechos 28:22

Nipirinhuëꞌ, yanatanainquën. “Quisoso imapisopita co noyahuëꞌ,” topi natantërai. Yaꞌipi parti napopi. Napoaton shaꞌhuitocoi. ¿Maꞌtaꞌ quëma aꞌchinan?

Hechos 28:23

Aꞌna tahuëri huënantahuatoi, shaꞌhuitocoi nitochii, itopi. —Noya iyaroꞌsapaꞌ. Naporoꞌ tahuëri huënantacoꞌ yaꞌipinquëmaꞌ shaꞌhuichinquëmaꞌ, itohuachina, paꞌpi. Ina quëran tahuëri nanihuachina, naꞌayaꞌpi huëꞌpi. Paono yaꞌhuërinquë niyontonpi natanacaiso marëꞌ. Tashiramiachin huëꞌpi. Huëꞌpachinara, Paonori aꞌchintárin. —Yosë yahuaꞌanëntërinpoaꞌ. Naꞌcon nohuantërin huëntonënquë chachin ayaꞌcoinpoasoꞌ. Ina marëꞌ huiꞌnin aꞌpaimarin. Inasoꞌ Quisoso itopi. Quiricanën quëran ina naꞌcon ninopi. Moisësë pënëntërinsoꞌ ninshitaton, ninorin. Pënëntonaꞌpiroꞌsantaꞌ ninopi, itërin. Quiricanën quëran naꞌcon aꞌchintërin. Aꞌchintaton, chiníquën pënënin Quisoso natëcaiso marëꞌ. Aꞌchintochináchin iꞌhuatërin.

Hechos 3:13

Iráca shimashonënpoapita Apraan, Isaco, Cacopo, inapita Yosë chinotopi. Ina Yosëri chachin Quisoso noya noya acorin. Nichaꞌëinpoaso marëꞌ aꞌpaimapirinhuëꞌ, canpitari masahuatomaꞌ, huaꞌanoꞌsaquë yoꞌconamaꞌ. Piratori yaocoipirinhuëꞌ, co canpita nohuantëramahuëꞌ.

Hechos 5:30

Tëhuënchachin corosëquë patanantatomaꞌ, Quisoso tëpapiramahuëꞌ, shimashonënpoapita chinotërinso Yosëri chachin ananpitaantarin.

Hechos 7:32

“Casoꞌ Yosëco. Quëma shimashonënpita chinotërinaco. Apraan, Isaco, Cacopo, inapita chinotërinaco,” itërin. Moisësë tëꞌhuataton, ropa ropátarin. Monshorahuaton, co yaniꞌninhuëꞌ.

Hechos 9:2

“Quirica ninshitoco piyapi macaꞌhuaso marëꞌ. Tamascoquë quëparahuato, niyontonpiso pëiꞌ huaꞌanoꞌsaꞌ quëtarahuë. Inaquë nasha nanan imapisopita quënanpato, masarahuë. Quëmapiꞌsaꞌ tonporahuato, isëquë chachin quësarahuë. Sanapiꞌsaquë huarëꞌ masarahuë,” tënin Saono. Napohuachina, quirica ninshitahuaton, quëtërin.

Romanos 1:9

Yosë niꞌsárinco, noꞌtëquën nontaranquëmaꞌ. Yaꞌipi cancanëhuë quëran huarëꞌ Yosë imarahuë. Huiꞌnin nanamën aꞌchinárahuë. Nani tahuëriya canpita yonquiatënquëmaꞌ,

Romanos 3:21

Iporaso nipirinhuëꞌ Yosë anitotërinpoaꞌ onporahuatësona chaꞌëcasoꞌ. Co iráca pënëntërinsoꞌ natërëhua quëran noya cancantarihuahuëꞌ. Moisësë, pënëntonaꞌpiroꞌsaꞌ, inapita inachachin shaꞌhuitërinënpoaꞌ.

1 Corintios 11:19

Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

Gálatas 5:20

Co noyahuëꞌ yonquihuachinara, mamanshi moshapi, pënotopi, co nanan anoyatopihuëꞌ, co napopianachin yonquipihuëꞌ. Aꞌpitatonaꞌ, aꞌnaroáchin noꞌhuitopi, nipinopi. Aꞌna huënton aꞌna huënton co noyahuëꞌ ninicatonaꞌ yaꞌhuëpi. Nisha nisha yonquiatonaꞌ, yaꞌhuëpi.

2 Timoteo 1:3

Iráca shimashonëhuëpita Yosë chinotopi. Inapochachin cantaꞌ chinotërahuë. Yosë nanamën noꞌtëquën natëto, chinotërahuë. Ina marëꞌ noyápiachin cancantërahuë. Nani tahuëri tashirë chachin Yosë nontato, quëma yonquiranquën. Noya imaranso marëꞌ: “Yosparinquën Sinioro,” itërahuë.

Tito 3:10

Aꞌna piyapi nisha nanan aꞌchinpachin, imapisopita nisha nisha ayonquirin. Inasoꞌ pënënquëꞌ noꞌtëquën aꞌchinchin. Co yanatëhuachinquënhuëꞌ, naquëranchin pënëantaquëꞌ. Ina quëran co yanatëantahuachinquënhuëꞌ, shaꞌhuitëquëꞌ taꞌchin. Ama insoari tërantaꞌ ina natëinasohuëꞌ. Ama huachi imarinso pochin niꞌcosohuëꞌ.

1 Pedro 1:11

Ispirito Santo nohuanton, iráca Cristo ninopi. “Parisitapon. Ina quëran nanpiantarahuaton, noya noya yaꞌhuapon,” topi ninotonaꞌ. Napoatonaꞌ, yonquiapi. “¿Ma quëmapitaꞌ oꞌmaton, parisitapon? ¿Onporotaꞌ parisitaponsoꞌ?” topi.

Apocalipsis 19:10

Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.