Hechos 23:12 - Chayahuita (Shahui)

¹² Tahuëririnquë aꞌnaquën cotioroꞌsaꞌ chinotopi Paono tëpacaisoꞌ. “Ama huachi caꞌahuasohuëꞌ. Ama oꞌoahuasohuëꞌ. Paono tëpaquë huarëꞌ caꞌahuaꞌ. Co tëparihuarahuëꞌ caꞌpatëhuaꞌ, Yosë anaꞌinchinpoaꞌ,” nitopi.

Hechos 23:12 ပူးပေါင်းရင်းမြစ်များ

Génesis 37:18

Inapitarintaꞌ, áquë quëran Cosi quënanpi. Quënanahuatonaꞌ, coꞌhuara yaꞌcarichátërasohuëꞌ, tëpacaiso marëꞌ aꞌnaroáchin yonquipi.

1 Reyes 19:2

Ina natanahuaton Quisapirasoꞌ, Iniasë shaꞌhuitacaso marëꞌ aꞌnara comision aꞌparin: “Naporin Quisapira: ‘Quëmasoꞌ Paaro marëꞌ pënëntonaꞌpiroꞌsa acorahuësoꞌ, atëpatëran. Napoaton carionta atëpataꞌhuanquënso yaꞌhuërin. Tashiraya ipora pochin atëpatëransopita pochin nitaranquën. Coꞌsoꞌ inapotohuatënquënhuëꞌ, mamanshiroꞌsa chiníquën anaꞌinchinaco,’ tënin,” itërin.

2 Reyes 6:31

Naporoꞌ copirnosoꞌ: “¡Ipora tahuëri Irisio anishitëconotarahuë! ¡Coꞌsoꞌ inapotohuatohuëꞌ, Sinioro chiníquën anaꞌinchinco!” tënin chiníquën nonaton.

Mateo 26:4

Inaquë niyontonahuatonaꞌ, ninontapi Quisoso tëpacaiso marëꞌ. —Ama pita tahuëri chachin maahuasohuëꞌ, piyapiꞌsaꞌ noꞌhuihuachinënpoaꞌ. Quisoso paꞌyatapi niꞌton, ahuëarinënpoaꞌ. Napoaton poꞌoana quëran maahuaꞌ, nitopi.

Mateo 26:74

—¡Coꞌchi iyaroꞌsaꞌ paya! Yosë niꞌsárinco, co carisoꞌ nohuitërahuëꞌ. Nonpintohuatënquëmasoꞌ, Yosë anaꞌinchinco, tënahuë, itërin. Naporo chachin atari përarin.

Mateo 27:25

—Tëhuënchachin quiya yonquirai tëpacaꞌhuaisoꞌ. Yosë yaanaꞌintohuachincoi, huiꞌnahuëipitarëꞌcoi chachin anaꞌinchincoi, topi.

Hechos 23:13

Catapini shoncayaꞌpi pochin napopi.

Hechos 23:14

Naporahuatonaꞌ, paatonaꞌ, cotio huaꞌanoꞌsaꞌ, ansianoꞌsaꞌ, inapita nontopi. —Nani huachi anoyatërai. Co huachi coshataraihuëꞌ. Paono tëpaquë huarëꞌ coshataantarai. Yoscoarëꞌ tëpaarai, tënai.

Hechos 23:21

Nipirinhuëꞌ, ama natëquësohuëꞌ. Catapini shonca naꞌcon piyapiꞌsari chinotopi tëpacaiso marëꞌ. Poꞌoana quëran ninarapi tëpacaiso marëꞌ. Co huachi coshatapihuëꞌ. Co oꞌosapihuëꞌ. Paono tëpai huarëꞌ coshatacaisoꞌ yonquipi. Iporasoꞌ quëma ninarinën nohuantopiso chachin nitamasoꞌ, itërin.

Hechos 23:30

Ina quëran cotioroꞌsaꞌ chinotopi tëpacaisoꞌ, natantërahuë. Napoaton aꞌnaroáchin aꞌpatëranquën. Cotioroꞌsantaꞌ nani shaꞌhuitërahuë yaꞌhuëranquë paatonaꞌ shaꞌhuirapicaiso marëꞌ. Nani huachi,” itërin, ninshitaton.

Hechos 25:3

“Quirosarinquë quënantaquëꞌ, natantaꞌii, topiraihuëꞌ,” itopi. Nani chinotopi naꞌpirahuatonaꞌ, iraquë tëpacaiso marëꞌ.

Hechos 9:23

Napoaton huaꞌqui quëran cotioroꞌsari tëpacaisoꞌ yonquipi.

Hechos 9:24

Yatëpapisoꞌ natanaton, Saono co huachi aꞌninquëchin paacasoꞌ nohuantërinhuëꞌ. Nani tahuëri ninanoꞌ yaꞌcoanaquë cotioroꞌsari ninarapi tëpacaiso marëꞌ. Tashirë chachin ninarápi.

1 Corintios 16:22

Insosona co Sinioro Quisocristo nosorohuachinhuëꞌ, Yosëri anaꞌinchin. ¡Aꞌnaroáchin Sinioro oꞌmantaquëꞌ! tënahuë.

2 Corintios 11:26

Aꞌchinacaꞌhuaso marëꞌ paꞌsárahuë. Iiroꞌsaꞌ panca pamatohuachina, shichimiitërahuë. Ihuatëroꞌsantaꞌ yatëparinaco. Cantaꞌ cotio piyapico nipirahuëꞌ, cotioroꞌsaꞌ noꞌhuitonaco, yaahuërinaco. Nisharoꞌsantaꞌ noꞌhuirinaco. Panca ninanoroꞌsaquë aꞌnaquën yaahuërinaco. Co piyapi yaꞌhuërinquëontaꞌ maꞌsha onporahuë. Marë paꞌtohuatëra, parisitërahuë. Aꞌnaquën: “Quiyantaꞌ imarai,” taponaraihuëꞌ, chiníquën noꞌhuirinaco.

Gálatas 3:13

Co nanitërëhuahuëꞌ noꞌtëquën natëcasoꞌ niꞌton, anaꞌintinpoasoꞌ yaꞌhuërin. Quisocristoso nipirinhuëꞌ nichaꞌërinpoaꞌ. Canpoaꞌ yaꞌhuërënamënpoaꞌ chiminin. Ina, Yosëri anaꞌintërin. Quiricanën quëran naporin: “Piyapi paꞌpi co noyahuëꞌ nipachina, naraquë achinpirahuatëꞌ, chiníquën anaꞌintërëꞌ. Nani Yosëri aꞌporin,” tënin quiricanënquë. Canpoasoꞌ anaꞌintinpoasoꞌ yaꞌhuëpirinhuëꞌ, naraquë chachin Quisocristo apatanantohuachinara, oshanënpoa marëꞌ parisitërin. Inaquë parisitaton, nichaꞌërinpoaꞌ.

1 Tesalonicenses 2:16

Nisha piyapiꞌsaꞌ chaꞌëcaiso marëꞌ yaaꞌchintopiraihuëꞌ, cotioroꞌsasoꞌ co nohuantopihuëꞌ. “Ama aꞌchintocosohuëꞌ,” taꞌtonaꞌ, noꞌhuirinacoi. Ina marëꞌ aquë aquëtëꞌ oshahuanpi. Napoaton Yosëri chiníquën noꞌhuirin. Noꞌtëquën anaꞌintarin huachi.

Josué 6:26

Ina quëran Cosoisoꞌ, iso pochin shaꞌhuirin: “Inso tëranta Quirico ninano anoyataantahuachin, Siniorori chachin ama huachi noya yaꞌhuëcaso marëhuëꞌ shaꞌhuitaton anaꞌinchin. Simintonën acoasoꞌ, huiꞌnin paninatërinsoꞌ chimiin. Ninano pairapipisoꞌ yaꞌcoanaroꞌsanta acoasoꞌ, huiꞌnin huinsho nininsoꞌ yaꞌhuërëꞌ chimiantaꞌin. Yoscoarëꞌ inapoarin,” tënin.

1 Samuel 14:24

Naporo tahuëri israiroꞌsari huiristinoꞌsa canapi. Napoaponahuëꞌ, coꞌhuara ahuëchátërasoihuëꞌ, Saonoso piyapinënpita camairin: “Ipora tahuëri inimiconëhuëpita iꞌhuërëtaꞌhuaso yaꞌhuërin. Coꞌhuara inapochátërasohuëꞌ insosona coshatohuachin, Yosëri anaꞌinchin. Yoscoarëꞌ inapochin,” tënin. Ina tëꞌhuatatona Israiro sontaroꞌsasoꞌ, co coshatopihuëꞌ. Inapo ahuëtatonaꞌ, paꞌpi canotopi.