Hechos 21:28 - Chayahuita (Shahui)

²⁸ “¡Huëcoꞌ iyaroꞌsaꞌ catahuacoi! Iso quëmapi yaꞌipi parti paaton, nisha aꞌchinarin. ‘Cotioroꞌsasoꞌ co noꞌtëquën aꞌchinpihuëꞌ. Moisësë pënëntërinsoꞌ aꞌpocoꞌ,’ tënin. Naporahuaton, Yosë chinotopiso pëiꞌ co huachi noya niꞌninhuëꞌ. Niꞌcochi. Crico piyapiꞌsaꞌ isëquë chachin ichiyaꞌconin niꞌton, Yosë pëinën tapiarin. Co inapitasoꞌ yaꞌconacasohuëꞌ nipirinhuëꞌ,” toconpi.

Hechos 21:28 ပူးပေါင်းရင်းမြစ်များ

Mateo 24:15

Iráca Naniri ninoton, ninshitërin. ‘Aꞌna tahuëri inimicoroꞌsaꞌ Yosë pëinënquë yaꞌconahuatonaꞌ, tapiaponaꞌ. Paꞌpi co noyahuëꞌ nitatonaꞌ inapotohuachinaꞌ, co huachi inaquë Yosë chinotapihuëꞌ,’ tënin. Noꞌtëquën ninorin niꞌton, ina quirica nontohuatamaꞌ, noya yonquicoꞌ.

Hechos 21:21

Inapitasoꞌ nonpin nanan natantopi. “Paono nisha piyapiꞌsaꞌ yaꞌhuërinquë paaton, cotioroꞌsaꞌ inaquë yaꞌhuëpisopita nisha aꞌchintërin. ‘Moisësë pënëntërinsoꞌ aꞌpocoꞌ. Ama huachi huiꞌnamapita marca acotocosohuëꞌ,’ tënin Paono pënëntaton. Co nohuantërinhuëꞌ iráca napopisoꞌ natëcaisoꞌ,” topi, natantopi.

Hechos 24:18

Iráca pënëntërinsoꞌ natëto, Yosë chinotopiso pëiquë yaꞌconpirahuëꞌ, co mantaꞌ onporahuëꞌ. Co piyapiꞌsaꞌ ayontonahuëꞌ. Co ca nohuanto ninoꞌhuipihuëꞌ. Inaquë cotioroꞌsaꞌ Asia parti yaꞌhuëpisopita quënaninaco.