Hechos 20:32 - Chayahuita (Shahui)

³² Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ.

Hechos 20:32 ပူးပေါင်းရင်းမြစ်များ

Génesis 50:24

Aꞌna tahuëri Cosisoꞌ, iinpita itapon: “Co huaꞌquiya quëranhuëꞌ, chiminapo huachi. Napoaponahuëꞌ, Yosëso catahuainquëmaso marëꞌ oꞌmararin. Iso noꞌpa quëran ocoiarinquëmaꞌ. Apraan, Isaco, Cacopo, inapita quëtacaso marëꞌ shaꞌhuitërinso noꞌpaquë, quëpantarinquëmaꞌ,” itërin.

Marcos 10:17

Ina quëran Quisoso yapaantarapirinhuëꞌ. Aꞌnara quëmapi taꞌaquirahuaton, isonquirin. —Quëmasoꞌ Maistro noyanquën. ¿Maꞌtaꞌ casoꞌ onpoꞌi nanpimiataꞌhuaso marëꞌ? Shaꞌhuitoco cantaꞌ noya nii, itiirin.

Juan 15:3

Carinquëmaꞌ nani anoyacancantëranquëmaꞌ. Aꞌchintëranquëmasoꞌ natëramaꞌ niꞌton, anoyacancantëranquëmaꞌ.

Juan 17:17

Catahuaquëꞌ quëmasáchin cancanchinën. Noꞌtëquën ayonquiquëꞌ noya nicacaiso marëꞌ. Quëma nanamën quëran noꞌtëquën anitotëran.

Hechos 11:23

Inaquë canconahuaton, “Tëhuënchachin nisha piyapiꞌsantaꞌ imasapi. Yosëri naꞌcon catahuarin,” taꞌton, noya cancantërin. Pirnapisoꞌ noya quëmapi. Yosë noya natërin. Ispirito Santori noyá yaꞌcoancantërin niꞌton, piyapiꞌsaꞌ pënënin: “Ama Sinioro aꞌpocosohuëꞌ. Yaꞌipi cancanëma quëran huarëꞌ imamiatocoꞌ,” itërin. Pënënpachina, aꞌnapitantaꞌ Quisoso imapi.

Hechos 14:23

Yapaꞌpachinara, aꞌnaya aꞌnaya Quisoso imapisopitaquë ansianoꞌsaꞌ acoraꞌpiapi. Noya nipisopitaráchin acoraꞌpiapi. Co coshatatonaraihuëꞌ, inapita marëꞌ Yosë nontopi: “Yaꞌipi isopita, Sinioro, noya natërinënquën. Noya aꞌpaiquëꞌ,” itopi. Cara ninanoquë chachin napopi.

Hechos 14:26

Ina quëran nanchaquë huëꞌsahuatonaꞌ, Antioquiaquë canquipi. Aꞌpapi quëran chachin canquiantapi. Canquirahuatonaꞌ, Quisoso imapisopita ayontonahuatonaꞌ, yaꞌipi shaꞌhuitopi. “Iꞌhua chachin aꞌparamacoi. ‘Aꞌna parti yaꞌhuëpisopita noya nanan shaꞌhuitoncoꞌ. Insëquësona paꞌpatamaꞌ, Yosë noya catahuainquëmaꞌ,’ itohuatamacoira, paꞌnai. Nani shaꞌhuirai. Yosë nóya catahuarincoi. Ina nohuanton, nisha piyapiꞌsantaꞌ Quisoso natëtonaꞌ, Yosë huëntonënquë yaꞌconpi,” itopi.

Hechos 14:3

Huaꞌquiꞌ inaquë Paono yacapatërin. Pirnapirë chachin inaquë yaꞌhuëpi. Chiníquën cancantatonaꞌ, Siniorori nosororinsoꞌ shaꞌhuirápi. Noꞌtëquën shaꞌhuipi niꞌton, Siniorori catahuarin caniaꞌpiroꞌsaꞌ aꞌnaroáchin anoyatacaisoꞌ. Ina niꞌsahuatonaꞌ, “Tëhuënchachin Yosë catahuarinquëmaꞌ,” itopi.

Hechos 15:40

Paonoso nipirinhuëꞌ Sirasë nontërin caꞌtanacaso marëꞌ. Yapaꞌpachinara, Quisoso imapisopitari Yosë nontopi: “Isopita paꞌpachinaꞌ Sinioro, aꞌpaiquëꞌ noya paꞌinaꞌ. Nosoroaton, catahuaquëꞌ noya aꞌchiinaꞌ,” itahuatonaꞌ, aꞌpapi.

Hechos 20:24

Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Hechos 9:31

Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

Romanos 8:17

Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

1 Corintios 6:10

Aꞌnaquëontaꞌ maꞌsha ihuatopi, apirapi, noꞌpipi, pinotopi. Aꞌnaquën aꞌnapita ahuëatonaꞌ, maꞌshanënaꞌ matopi. Yaꞌipi co noyahuëꞌ nipisopita co Yosë huaꞌanëntërinquë yaꞌcoanpihuëꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

1 Corintios 6:9

Co noyahuëꞌ nipisopita co Yosë huaꞌanëntërinquë yaꞌcoanpihuëꞌ. ¡Nani ina nitotëramaꞌ ipora! Ama ninonpintocosohuëꞌ. Aꞌnaquën co Yosë natëtonahuëꞌ, monshihuanapi. Mamanshi moshapi. Saꞌinaꞌ yaꞌhuëtopirinahuëꞌ, aꞌna sanapi sëꞌhuapi. Quëmapi capini nisëꞌhuapi. Taparosachin yonquipi. Inapita pochin nipisopitasoꞌ, co Yosëꞌpaꞌ paꞌsapihuëꞌ.

Efesios 1:14

Quisocristo imapatëhuaꞌ, Ispirito Santo yaꞌcoancantomiatërinpoaꞌ. Inaꞌton quëtërinpoaꞌ niꞌton: “Tëhuënchachin aꞌna tahuëri Yosëꞌpaꞌ quëpantarinpoaꞌ,” tënëhuaꞌ. Nani Yosë nichaꞌërinpoaꞌ niꞌton, oꞌmantacasoꞌ tahuëri nanihuachin, yaꞌhuërinꞌpaꞌ quëpantarinpoaꞌ. Inaquë noya noya yaꞌhuëcontarihuaꞌ. Ina yonquiatëhuaꞌ: “Ma noyacha Tata Yosëso yonquirinpoa paya,” tënëhuaꞌ.

Efesios 1:18

Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 4:12

Nisha nisha acorinpoaꞌ noya nicatahuacaso marëꞌ. Inaora nonën pochin niꞌninpoaꞌ niꞌton, yaꞌipi imarëhuasopita catahuarinpoaꞌ noya ina marëꞌ sacatacasoꞌ.

Efesios 4:16

Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.

Efesios 5:5

Monshihuanpatamaꞌ, co Quisocristo huëntonënquë yaꞌconamahuëꞌ. Taparoꞌ nininsoꞌ nipatamaꞌ, co imaramahuëꞌ. Maꞌsharáchin yonquihuatamaꞌ, co tëhuënchachin Yosë yonquiaramahuëꞌ. Nani maꞌsha nohuantohuatamaꞌ, mamanshi moshapiso pochin niconamaꞌ. Ina nitotatomaꞌ iyaroꞌsaꞌ yonquicoꞌ.

Colosenses 1:12

Nani anoyacancantohuachinpoara, huëntonënquë chachin ayaꞌconinpoaꞌ. Huiꞌninpita pochin niꞌsarinpoaꞌ. Iporasoꞌ ina catahuahuachinpoaꞌ, tahuëri pochin cancantarihuaꞌ. Naporahuatëhuaꞌ, yaꞌhuërinquë chachin yaꞌhuëcontarihuaꞌ. Ina marëꞌ noya cancantatëhuaꞌ “Yosparinquën Sinioro,” itarihuaꞌ.

Colosenses 2:7

Niꞌcoꞌ. Maꞌsha shaꞌpatëra, itën acopoꞌ noꞌpaquë paꞌpachina, noya huanirin. Inapochachin canpitantaꞌ Quisocristo noya chinpitocoꞌ. Inasáchin yonquicoꞌ achinicancainquëmaꞌ. Nani iyasha noꞌtëquën aꞌchintërinquëmaꞌ niꞌton, yaꞌipi cancanëma quëran Quisocristo natëcoꞌ. “Yosë naꞌcon nosororinpoaꞌ,” taꞌtomaꞌ, nani tahuëri “Yosparinquën Sinioro,” itocoꞌ.

Colosenses 3:24

Inasoꞌ noꞌtëquën acanaarinpoaꞌ. Inápaquë noya noya acoarinpoaꞌ. Quisocristo tëhuënchinsoꞌ huaꞌanëntërinpoaꞌ. Napoaton noya natëcoꞌ.

Hebreos 10:14

Aꞌnaroíchin chiminaponahuëꞌ, anoyacancantërinpoaꞌ. Yaꞌipi imarëhuasopita oshanënpoaꞌ inquitatonpoaꞌ, noyápiachin cancan quëtërinpoaꞌ.

Hebreos 13:9

Aꞌnaquën nisha aꞌchintohuachinënquëmaꞌ, ama natancosohuëꞌ, nonpintochinënquëmaꞌ. Noꞌtëquën yonquicoꞌ. Nisha nisha nicacasoꞌ pënënpirinënpoahuëꞌ, co ina quëran noya cancantërëhuahuëꞌ. Naꞌa piyapiꞌsaꞌ nisha nisha cosharoꞌ aꞌpoaponaraihuëꞌ, co noya cancantopihuëꞌ. Quisocristoíchin nanitërin anoyacancantinpoasoꞌ. Inaora nohuanton, nosoroatonpoaꞌ, catahuarinpoaꞌ imamiatacasoꞌ.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

Hebreos 9:15

Napoaton nasha quëran anoyatërinso nani shaꞌhuitërinpoaꞌ. Yaꞌnan anoyatërinso naꞌa piyapiꞌsaꞌ imapirinahuëꞌ, co noyahuëꞌ cancantatonaꞌ, oshahuanpi. Co maꞌsharoꞌsaꞌ huënainën quëran oshanënaꞌ inquimiatopihuëꞌ. Nipirinhuëꞌ, Quisocristo chiminin yaꞌipi huayoninsopita oshanënaꞌ inquitacaso marëꞌ. Yaꞌnan anoyatërinso imapisopita oshanënantaꞌ inquitërin.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Judas 1:20

Canpitaso nipirinhuëꞌ iyaroꞌsaꞌ, Yosë nanamën naꞌcon yonquicoꞌ noya noya imacamaso marëꞌ. Inasáchin noꞌtëquën anitotërinpoaꞌ Yosë pochin cancantacasoꞌ. Naporahuaton, Yosë nontácoꞌ. Ispirito Santo catahuarinquëmaꞌ cancanëma quëran huarëꞌ noya nontacasoꞌ.