Hechos 2:42 - Chayahuita (Shahui)

⁴² Caꞌtanoꞌsa aꞌchinpachinara, paꞌyatopi natanacaisoꞌ. Noya natanatonaꞌ, natëpi. Noya niniꞌtonaꞌ, yaꞌhuërapi. Quisoso chimininsoꞌ yonquiatonaꞌ, coshatapatapi. Naporahuatonaꞌ, apira apira Yosë nontapi.

Hechos 2:42 ပူးပေါင်းရင်းမြစ်များ

Lucas 24:30

Yacoshatohuachinaꞌ, Quisosori pan manin. “Yosparinquën,” Yosë itahuaton, sëꞌpanin. Sëꞌpanahuaton, quëtërin.

Lucas 24:35

Ina quëran catoyaꞌpi canquipisopitarintaꞌ itaponaꞌ: “Quiyantaꞌ niꞌnai. Paasocoi, yaꞌnotërincoi. Huaꞌquiꞌ aꞌchintopirincoihuëꞌ, co nohuitëraihuëꞌ. Ina quëran yacoshatohuatoira, pan sëꞌpanin. Sëꞌpanpachina, aꞌnaroáchin nohuitërai,” itopi.

Hechos 1:14

Inapitasoꞌ nani tahuëri niyontonatonaꞌ, Yosë nontápi. Quisoso iinpitantaꞌ huëꞌpi Yosë nontacaiso marëꞌ. Sanapiꞌsantaꞌ inaquë huëꞌpi. Aꞌnasoꞌ Maria. Quisoso aꞌshin inasoꞌ. Napopianachin yonquiatonaꞌ, inaquë naꞌcon Yosë nontápi.

Hechos 11:23

Inaquë canconahuaton, “Tëhuënchachin nisha piyapiꞌsantaꞌ imasapi. Yosëri naꞌcon catahuarin,” taꞌton, noya cancantërin. Pirnapisoꞌ noya quëmapi. Yosë noya natërin. Ispirito Santori noyá yaꞌcoancantërin niꞌton, piyapiꞌsaꞌ pënënin: “Ama Sinioro aꞌpocosohuëꞌ. Yaꞌipi cancanëma quëran huarëꞌ imamiatocoꞌ,” itërin. Pënënpachina, aꞌnapitantaꞌ Quisoso imapi.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

Hechos 2:46

Nani tahuëri Yosë chinotopiso pëiquë niyontonpi. Quisoso chimininsoꞌ yonquiatonaꞌ, aꞌna pëiquë aꞌna pëiquë coshatapatapi. Co apiratonaraihuëꞌ, noya cancantapi. Nóya cancantatonaꞌ, coshatapatapi.

Hechos 20:11

Ina quëran pëiquë nanpëonantarin. Quisoso chimininsoꞌ yonquiatonaꞌ, coshatopi. Nani coshatohuachinara, ninontatonaꞌ, tahuërianpitopi. Ina quëran paꞌnin.

Hechos 20:7

Tomio tahuëri nanihuachina, niyontonai Quisoso chimininsoꞌ yonquiatoi coshataꞌhuaiso marëꞌ. Naporoꞌ Paonori aꞌchintarin: “Tashiraya paꞌsarai,” taꞌton, yono tashiquë huarëꞌ aꞌchinin.

Hechos 4:23

Nani Pitro, Coansha, inapita aꞌpahuachinara, imapisopitataquë paantarahuatonaꞌ, shaꞌhuiconpi. “Corto huaꞌanoꞌsaꞌ, ansianoꞌsaꞌ, inapita chiníquën pënëninacoi ama aꞌchinaꞌhuaiso marëhuëꞌ,” itopi.

Hechos 4:31

Nani Yosë nontohuachinara, ina nohuanton, pëiꞌ nacon nacontarin. Ispirito Santori yaꞌipiya noyá yaꞌcoancantërin. Chiníquën cancantatonaꞌ, Yosë nanamën shaꞌhuirapi.

Hechos 6:4

Quiyaso nipirinhuëꞌ Yosë nontaꞌhuaisoꞌ, nanamën aꞌchinaꞌhuaisoꞌ, inasáchin yonquiarai, itopi caꞌtanoꞌsari.

Romanos 12:12

“Yosë ananpitaantarinpoaꞌ,” taꞌtomaꞌ, noya cancantocoꞌ. Maꞌsha onpohuatamaꞌ, ama noꞌhuitocosohuëꞌ. Chiníquën cancantatomaꞌ, ahuantocoꞌ. Apira apira Yosë nontocoꞌ.

1 Corintios 10:21

Aꞌnaquën mamanshi moshacaiso marëꞌ pita nipi. Sopairoꞌsaꞌ yonquiatonaꞌ, napopi. Sinioro yonquihuatamaꞌ, co sopairoꞌsaꞌ yonquicamasoꞌ yaꞌhuërinhuëꞌ. Napoaton amatohuachinënquëmaꞌ, ama pacosohuëꞌ. Quisocristo chimininsoꞌ yonquiatomaꞌ, coshatëramaꞌ, oꞌoramaꞌ. Napoaton ama sopairoꞌsaꞌ yonquiatomaꞌ, coshatocosohuëꞌ, oꞌocosohuëꞌ.

1 Corintios 11:2

Ma noyanquëmaꞌ iyaroꞌsaꞌ niꞌton, naꞌcon yonquiramaco. Yosë nanamën aꞌchintohuatënquëmara, noya natëramaco.

1 Corintios 14:6

Yosë aꞌchintohuachincora, inachachin iyaroꞌsaꞌ shaꞌhuitëranquëmaꞌ. Ina anitotohuachincora, nanamën chachin aꞌchintëranquëmaꞌ. Inapotato, catahuaranquëmaꞌ noya noya imacamaso marëꞌ. Nisha nananquë nonpiso pochin nontëranquëmaꞌ naporini, co nataintomacohuëꞌ. Co ina quëran noya noya imaitomahuëꞌ. Canpita nananquë chachin noꞌtën nanan pënënpatënquëmaꞌ, tëhuënchachin catahuaranquëmaꞌ.

Gálatas 1:6

Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Efesios 2:20

Yaꞌipi imarëhuasopita ina naponpoa chachin aꞌna pëi pochin ninëhuaꞌ, naꞌpi quëran nipisoꞌ. Naꞌpi quëran yapëihuatëra, acopoꞌ ihuatahuatëꞌ, simintoꞌton acorëꞌ. Inapochachin canpoantaꞌ Yosë pëinën pochin ninëhuaꞌ. Siminto acopiso pochin, caꞌtanoꞌsaꞌton nanamën aꞌchintërinënpoaꞌ. Ina quëran pënëntonaꞌpiroꞌsantaꞌ noꞌtëquën aꞌchinaꞌpiapi. Naꞌpi quëran yapëihuatëra, pëiꞌ taconorinquë naꞌpi noya noya nininsoꞌ acorëꞌ tantiacaso marëꞌ. Ina acohuatëra, aꞌnapita naꞌpiroꞌsaꞌ noꞌtëquën apanshinëꞌ. Naꞌpi noya noya nininso pochachin Quisocristosoꞌ achinirinpoaꞌ.

Efesios 6:18

Apira apira Yosë nontocoꞌ. Maꞌsha onpohuatamantaꞌ, ina nontocoꞌ catahuainquëmaꞌ. Noya yonquiatomaꞌ, chiníquën nontocoꞌ. Ispirito Santo catahuarinpoaꞌ cancanënpoa quëran huarëꞌ noya nontacasoꞌ. Ama amiatomahuëꞌ, niꞌsácoꞌ ama aꞌnanaya sopai minsëinquëmaso marëhuëꞌ. Yaꞌipi imarëhuasopita marëꞌ Yosë nontocoꞌ.

Filipenses 1:5

Iráca Yosë nanamën aꞌchintohuatënquëmara, aꞌnaroáchin imaramaꞌ. Naporo quëran huarëꞌ catahuaramaco aꞌnapitantaꞌ aꞌchintaꞌhuaso marëꞌ. Iporahuantaꞌ aꞌnapita aꞌchintaramaꞌ Yosë imacaiso marëꞌ. Ina yonquiato, noya cancantërahuë.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 4:2

Nani tahuëri Yosë nontocoꞌ. Ama amiatomahuëꞌ, nontácoꞌ. Ama topinan nontocosohuëꞌ. Yaꞌipi cancanëma quëran huarëꞌ noya yonquiatomaꞌ, nontocoꞌ. “Yosparinquën Sinioro,” itocoꞌ.

2 Timoteo 3:14

Quëmaso nipirinhuëꞌ, Yosë nanamën imamiatëquëꞌ. Nani iráca mama, mama paya, ca, aꞌnapitantaꞌ aꞌchintërainquën, cancanën quëran huarëꞌ natëran. Noya nohuitërancoi niꞌton: “Noꞌtëquën aꞌchintërinacoi,” taꞌton, imamiatëquëꞌ.

Hebreos 10:25

Aꞌnaquën co huachi niyontonpihuëꞌ Yosë chinotacaiso marëꞌ. Ama inapita pochin cancantahuasohuëꞌ. Sinioro oꞌmacasoꞌ tahuëri naniriarin niꞌton, niyontonatëhuaꞌ, naꞌcon naꞌcon nicatahuahuaꞌ chiníquën cancantacaso marëꞌ.

Hebreos 10:39

Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.

1 Juan 1:3

Inápaquë yaꞌhuaponahuëꞌ, oꞌmahuachina, piyapicoi niꞌnai, aꞌchininsontaꞌ natanai. Paꞌpiontaꞌ anohuitërincoi. Huiꞌnin nohuitatoi, nohuitërai. Nipayarëso pochin ninai. Napoaton ninshitaranquëmaꞌ canpitantaꞌ Quisocristo nohuitacamaso marëꞌ. Quiya pochachin Yosë nohuitocoꞌ nipayarëso pochin nicacamaso marëꞌ.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 2:19

“Quiyantaꞌ imarai,” topirinahuëꞌ, nani pipipi. Co tëhuënchachin Yosë huëntonënquë yaꞌconpihuëꞌ. Yaꞌconpi naporini, co pipiitonahuëꞌ. Pipipi quëran nitotërëhuaꞌ. “Co onporontaꞌ cancanëna quëran huarëꞌ imapihuëꞌ,” tënëhuaꞌ.

Judas 1:20

Canpitaso nipirinhuëꞌ iyaroꞌsaꞌ, Yosë nanamën naꞌcon yonquicoꞌ noya noya imacamaso marëꞌ. Inasáchin noꞌtëquën anitotërinpoaꞌ Yosë pochin cancantacasoꞌ. Naporahuaton, Yosë nontácoꞌ. Ispirito Santo catahuarinquëmaꞌ cancanëma quëran huarëꞌ noya nontacasoꞌ.