Hechos 2:4 - Chayahuita (Shahui)

⁴ Napohuachina, Ispirito Santori yaꞌipiya yaꞌcoancantërin. Ina quëran inari catahuarin nisha nisha nananquë nonacaiso marëꞌ. Co nitotaponaraihuëꞌ, aꞌnaroáchin nonpi huachi.

Hechos 2:4 ပူးပေါင်းရင်းမြစ်များ

2 Samuel 23:2

Sinioro ispiritonën cá quëran nontarinquëmaꞌ. Noninso chachin apira shaꞌhuitaranquëmaꞌ.

Isaías 28:11

Noyapaꞌ. Naporama niꞌquëhuarëꞌ, inimiconëma quëran Sinioro nontarinquëmaꞌ. Nisha piyapiroꞌsa huëcapairahuatënëmaꞌ, nisha nananquë nontarinquëmaꞌ. Maꞌsha onpotarinquëmasoꞌ nicatomaꞌ, naporo huarëꞌ Sinioro yaaꞌchintërinquëmasoꞌ, nitotarama huachi.

Ezequiel 3:11

Israiroꞌsa yaꞌhuëpi quëran quëpisoꞌ, niꞌcontaquëꞌ. Pënënpatan co aꞌna natëponënhuëꞌ nimara. Napoaponahuëꞌ: ‘Sinioro pënënatënquëma naporin,’ itonquëꞌ,” itërinco.

Miqueas 3:8

Caso nipirinhuëꞌ, noꞌtëquën Sinioro marëꞌ pënëntarahuë niꞌto, achinirinco. Catahuarinco noya nicaꞌhuasoꞌ. Chiníquën cancantato, israiroꞌsa pënënarahuë: “Canpitaso co Yosë natëtomarahuëꞌ, naꞌcon oshahuanamaꞌ,” itárahuë.

Mateo 10:19

Inaquëpita quëpahuachinënquëmaꞌ, ama paꞌyancosohuëꞌ. ‘¿Maꞌcha tonoꞌpoya?’ ama tocosohuëꞌ. Naporoꞌ Yosë anitotarinquëmaꞌ noꞌtëquën aꞌpanitacamaso marëꞌ.

Marcos 16:17

Natëhuatamaꞌ, nani maꞌsha nisaramaꞌ piyapiꞌsaꞌ nitotacaiso marëꞌ. Chiníquën nanan quëchinquëmaꞌ sopairoꞌsaꞌ aꞌpacamaso marëꞌ. Nisha nisha nananquë nonsaramaꞌ.

Lucas 1:15

Inasoꞌ nóya quëmapi nipon. Yosëri catahuaarin niꞌton, noya noya nisarin. Naporahuaton, co piꞌpian tërantaꞌ main oꞌoponhuëꞌ. Coꞌhuara nasichátëraponhuëꞌ, Ispirito Santori yaꞌcoancantarin. Inasáchin natëarin.

Lucas 1:41

Ina natanahuaton, huaꞌhuin yoꞌnamënquë toꞌmo toꞌmótarin. Isapirantaꞌ nóya cancantërin. Ispirito Santori noyá yaꞌcoancantërin niꞌton,

Lucas 1:67

Ina quëran Ispirito Santori noyá yaꞌcoancantohuachina, Sacariasëntaꞌ tapon:

Lucas 12:12

Naporoꞌ Ispirito Santo catahuaarinquëmaꞌ noya aꞌpanitacamasoꞌ,” itërin Quisosori.

Lucas 21:15

Catahuaranquëmaꞌ noya nonacamasoꞌ. Ca nohuanto, noya yonquiaramaꞌ. Inimiconënpita co nanitapihuëꞌ aꞌpaniinquëmasoꞌ.

Lucas 4:1

Quisoso Cortani quëran pipirahuaton, huëantarin. Ispirito Santori noyá yaꞌcoancantërin. Inasáchin natërin. Naporoꞌ ina nohuanton, inotëro parti paꞌnin.

Juan 14:26

Inápaquë pantahuato, tatahuë nontarahuë, Ispirito Santo aꞌpatimarinquëmaꞌ. Ca yaꞌhuërënamëhuë oꞌmararin. Inasoꞌ achinicancanarinquëmaꞌ. Yaꞌipi Yosë nanamën aꞌchintarinquëmaꞌ. Catahuaarinquëmaꞌ aꞌchintëranquëmasoꞌ ama naniantacamaso marëhuëꞌ. Catahuahuachinquëmaꞌ, nóya yonquiantaramaꞌ.

Juan 20:22

Ina quëran pihuirahuaton, —Ispirito Santo yaꞌcoancanchinquëma huachi. Ina catahuarinquëmaꞌ noꞌtëquën pënëntacamasoꞌ.

Hechos 1:5

Coanshasoꞌ iꞌquë aporintërinquëmaꞌ. Iporaso nipirinhuëꞌ Ispirito Santo ayaꞌcoancantaranquëmaꞌ catahuainquëmaso marëꞌ. Co huaꞌqui quëranhuëꞌ yaꞌcoancantarinquëmaꞌ, itërin caꞌtanoꞌsanënpita.

Hechos 1:8

Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.

Hechos 10:47

—Isopitantaꞌ canpoa pochin Ispirito Santori yaꞌcoancantërin niꞌquëhuarëꞌ aporihuainaꞌ, tënahuë.

Hechos 11:15

Quisoso nanamën shaꞌhuitasoco chachin, inapitantaꞌ Ispirito Santori yaꞌcoancantërin. Yaꞌnan canpoaꞌ yaꞌcoancantërinpoaso pochachin inapitantaꞌ yaꞌcoancantërin.

Hechos 13:52

Patopirinahuëꞌ, nani aꞌchintopi niꞌton, Quisoso imapisopitasoꞌ noya cancantopi. Ispirito Santori noyá yaꞌcoancantërin.

Hechos 13:9

Saonosoꞌ Noma nananquë Paono itopi. Ispirito Santori noyá yaꞌcoancantërin niꞌton, pënoton niꞌsárin quëran itapon:

Hechos 15:8

Yaꞌipi yonquirëhuasopita Yosë nitotërin. “Inapitantaꞌ cancanëna quëran noya natërinaco,” taꞌton, Ispirito Santo ayaꞌcoancantërin. Canpoaꞌ yaꞌcoancantërinpoaso pochachin inapitantaꞌ yaꞌcoancantërin.

Hechos 19:6

Ina quëran Paonori sëꞌhuamotohuachina, Ispirito Santori yaꞌcoancantimarin. Ina nohuanton, nisha nisha nananquë nonpi. Co nitotopirinahuëꞌ, aꞌnaroáchin nonpi antaꞌ. Naporahuaton, Ispirito Santori catahuarin Yosëri anitotërinso shaꞌhuicaiso marëꞌ.

Hechos 2:11

Aꞌnaquën cotioroꞌsaꞌ, aꞌnaquën nisha piyapiꞌsaꞌ niponaraihuëꞌ, Yosë chinotopi. Critaroꞌsaꞌ, arapiaroꞌsaꞌ, inapitantaꞌ huëcatonaꞌ, natanapi. “Nisha nishanpoaꞌ nicarihuarahuëꞌ, canpoaꞌ nanamënpoaquë chachin nontarinënpoaꞌ. Yosë paꞌyápiro nininsoꞌ shaꞌhuitarinënpoaꞌ, natanëhuaꞌ.

Hechos 2:3

Ina quëran pën nënërinso pochin nininsopita yaꞌnoimarin. Yaꞌipiya aꞌnaya aꞌnaya motoanshirainënaquë chiniimarin.

Hechos 4:31

Nani Yosë nontohuachinara, ina nohuanton, pëiꞌ nacon nacontarin. Ispirito Santori yaꞌipiya noyá yaꞌcoancantërin. Chiníquën cancantatonaꞌ, Yosë nanamën shaꞌhuirapi.

Hechos 4:8

Ispirito Santori noyá yaꞌcoancantërin niꞌton, Pitrori itapon: —Natanco huaꞌanoꞌsanquëmaꞌ ninamasoꞌ.

Hechos 6:3

Napoaton iyaroꞌsaꞌ, canchisë yaꞌpi huayoncoꞌ catahuaꞌinacoiso marëꞌ. Ispirito Santori noyá yaꞌcoancantërinsoꞌ huayoncoꞌ, noya yonquipisoꞌ. Noya quëmapisáchin acoaꞌahuaꞌ cosharoꞌ yocacaiso marëꞌ.

Hechos 6:5

Natanahuatonaꞌ: —Noyapaꞌ. Paꞌahua acoaꞌahuaꞌ, topi yaꞌipiya. Ina quëran Istipan huayonpi. Inasoꞌ Yosë nóya natërin. Ispirito Santori noyá yaꞌcoancantërin. Pinipi, Porocoro, Nicanoro, Timon, Parminasë, Niconasë, inapitantaꞌ huayonpi. Niconasësoꞌ Antioquiaquë huaꞌhuatërin. Co cotio quëmapihuëꞌ niponahuëꞌ, cotioroꞌsa pochin Yosë chinotërin. Iporasoꞌ Quisoso imasarin antaꞌ. Inanapo huayonpi.

Hechos 6:8

“Istipansoꞌ nóya pënëntërin,” topi yaꞌipiya. Ispirito Santori catahuarin niꞌton, sacaiꞌ nininsoꞌ nanitaparin. Caniaꞌpi marëꞌ Yosë nontohuachina, aꞌnaroáchin noyatopi. Napoaton: “Tëhuënchachin Yosëri catahuarin,” topi.

Hechos 7:55

Istipanso nipirinhuëꞌ Ispirito Santori noyá yaꞌcoancantërin niꞌton, inápaquë nëꞌpëtërin. Yosë yaꞌhuërinso chachin niꞌnin. Huënaráchin huënaráchin yaꞌnorin. Quisoso Yosë inchinanën quëran huaniárin, niꞌnin.

Hechos 8:17

Ina quëran sëꞌhuamotohuachinara, Ispirito Santori yaꞌcoancantërin.

Hechos 9:17

Ina natanahuaton, Ananiasë paꞌnin. Cotasë pëinënquë yaꞌconconahuaton, Saono sëꞌhuaconin: —Iya Saono. Sinioro Quisoso iraquë yaꞌnotërinquënso shaꞌhuitërinco niꞌton, huëꞌnahuë. Ina nohuanton, apira noya niꞌtaantaran. Naporahuaton, Ispirito Santo noyá yaꞌcoancantarinquën, itërin.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

1 Corintios 12:10

Ispirito Santo nohuanton, aꞌnaquëontaꞌ nanitërin sacai nininsoꞌ nicacasoꞌ. Aꞌnaquën Yosë yonquirinso chachin cancanën quëran anitotërin aꞌnapita shaꞌhuitacaso marëꞌ. Aꞌnaquëontaꞌ Ispirito Santo nohuanton, macarisona catahuarinsoꞌ nitoninorin. Co Ispirito Santoachin yacatahuarinpoahuëꞌ. Sopairintaꞌ piyapiꞌsaꞌ catahuarin nonpintinpoaso marëꞌ. Napoaton aꞌnapita pënënpachinpoaꞌ, ninocasoꞌ yaꞌhuërin. Nonpin nanan nipachina, shaꞌhuitërinpoaꞌ ama natëcaso marëhuëꞌ. Aꞌnaquëontaꞌ Ispirito Santo nohuanton, nisha nananquë nonpiso pochin nonpi. Aꞌnapitantaꞌ catahuarin maꞌsona nisha nananquë topisoꞌ shaꞌhuicaisoꞌ.

1 Corintios 13:1

Nisha nananquë nonpiso pochin nitononarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nonarihuaꞌ. Anquëni pochachin nonarihuarahuëntaꞌ, co nosorohuatëhuahuëꞌ, huaꞌna, canpana inapita irininso pochin Yosë nataninpoaꞌ.

1 Corintios 13:8

Ipora quëran huarëꞌ ninosoromiatacasoꞌ yaꞌhuërin. Aꞌnaquën ipora Yosë yonquirinso chachin piyapiꞌsaꞌ shaꞌhuitapirinahuëꞌ, aꞌna tahuërisoꞌ co huachi ina shaꞌhuitacasoꞌ yaꞌhuaponhuëꞌ. Aꞌnaquëontaꞌ nisha nananquë nonpiso pochin nonpi. Aꞌna tahuëriso nipirinhuëꞌ co huachi ina pochin nonacasoꞌ yaꞌhuaponhuëꞌ. Iporasoꞌ aꞌnaquën nitotërin aꞌchinacasoꞌ. Aꞌna tahuëri co huachi maꞌsha anitotacasoꞌ yaꞌhuaponhuëꞌ. Inapitasoꞌ co yaꞌhuëmiatarinhuëꞌ. Nipirinhuëꞌ, ninosorocasosoꞌ yaꞌhuëmiatarin.

1 Corintios 14:18

Cantaꞌ nisha nananquë nonpiso pochin nitononahuë. Canpita quëran naꞌcon naꞌcon nitotërahuë. Ina marëꞌ “Yosparinquën” itërahuë Yosë.

1 Corintios 14:5

Nisha nananquë pochin nonacasoꞌ noya nipirinhuëꞌ, Yosë nanamën shaꞌhuicasoꞌ noya noya, tënahuë. Ina naꞌcon naꞌcon Yosë nohuantërin. Nisha nananquë nonpachina, ina piquëran maꞌsona tapon naporinsoꞌ shaꞌhuichinënquëmaꞌ. Imaramasopita natanatomaꞌ, noya yonquicamaso marëꞌ shaꞌhuichinënquëmaꞌ.

Efesios 5:18

Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

Efesios 6:18

Apira apira Yosë nontocoꞌ. Maꞌsha onpohuatamantaꞌ, ina nontocoꞌ catahuainquëmaꞌ. Noya yonquiatomaꞌ, chiníquën nontocoꞌ. Ispirito Santo catahuarinpoaꞌ cancanënpoa quëran huarëꞌ noya nontacasoꞌ. Ama amiatomahuëꞌ, niꞌsácoꞌ ama aꞌnanaya sopai minsëinquëmaso marëhuëꞌ. Yaꞌipi imarëhuasopita marëꞌ Yosë nontocoꞌ.

1 Pedro 1:12

Ina quëran Yosëri anitotërin. “Pahuanarin nanicasoꞌ. Aꞌna tahuëri yaꞌhuëpisopita nitotacaiso marëꞌ ca nohuanton, ninoramaꞌ,” itërin Yosëri. Canpita iyaroꞌsaꞌ nitotacamaso marëꞌ ninopi. Iporasoꞌ ina noya nanan chachin aꞌchintërainquëmaꞌ. Inápa quëran oꞌmaton, Ispirito Santo catahuarincoi noya aꞌchinaꞌhuaiso marëꞌ. Anquëniroꞌsa quëran huarëꞌ yanitotopirinahuëꞌ, co yaꞌipiya nitotopihuëꞌ.

2 Pedro 1:21

Iráca co inahuara nohuanton, ninshitopihuëꞌ. Yosëri acorin nanamën anitotinpoaso marëꞌ. Ispirito Santo nohuanton, Yosë yonquirinso chachin ninshitopi.

1 Samuel 1:14

Ina yonquiaton itapon: —¡Co noꞌpiquë huarëꞌ oꞌocaso yaꞌhuërinhuëꞌ! Tananpitëquë huachi huinosoꞌ, itërin.

1 Samuel 10:10

Ina quëran Saono piyapinënë chachin Quipiaquë canconpi. Canconpachinara, aꞌna huëntonaca pënëntonaꞌpiroꞌsari nacapirin. Yosë yonquirinso shaꞌhuirëꞌnachin, huëꞌsapi nacapirin. Naporoꞌ Yosë ispiritonëni noyá yaꞌcoancantërin. Napoaton Saononta inapita pochachin Yosë yonquirinsoꞌ shaꞌhuirarin.