Hechos 2:33 - Chayahuita (Shahui)

³³ Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

Hechos 2:33 ပူးပေါင်းရင်းမြစ်များ

Salmos 118:16

¡Sinioro chiníquën nanantërinsosoꞌ, paꞌyapiro! ¡Inasoꞌ chiníquën nanantaton, inimicoroꞌsa minsërin!

Salmos 89:19

Piyapinënpita huaꞌnatopiquë pochin yaꞌnotaton, shaꞌhuitëran: “Piyapinëhuëpita quëran aꞌnara quëmapi chiníquën cancantërinso huayonahuë. Cari catahuarahuë niꞌton, noya noya acorahuë.

Salmos 89:24

Cari nosoroato catahuarápo. Ca nohuanton chini chiníquën nanantapon.

Isaías 52:13

Sinioro chachin naporin: “Niꞌcoꞌ. Piyapinëhuë maꞌpitaso nipachin, noya pipitarin. Cari chachin noya nicato, noya noya acoarahuë.

Isaías 53:12

Napoaton Siniorori, chiníquën nanantopisopitarëꞌ acoapon. Chiníquën nanantopisopitantaꞌ, inari catahuapon canatacaisoꞌ. Canatohuachinara, inanta canatarin. Inaora nohuanton chimininso marëꞌ napoapon. Naporahuaton, “co noyahuëꞌ nininso marëꞌ parisitërin,” itopiso marëꞌ napoapon. Napotopirinahuëꞌ, naꞌa piyapiꞌsa oshanëna marëꞌ inaso parisitërin. Naporahuaton, oshahuanoꞌsa catahuacaso marëꞌ Yosë nontërin.

Mateo 28:18

Quisosori yaꞌcarirahuaton, itapon: —Tata Yosë nohuanton, chini chiníquën nanantërahuë. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntarahuë.

Marcos 16:19

Nani caꞌtanoꞌsanënpita nontohuachina, inápaquë Sinioro Quisoso panantarin. Yosëri quëpantarahuaton, inchinanën quëran ahuënsërin.

Lucas 24:49

Ispirito Santo aꞌpatimaranquëmaꞌ yaꞌcoancantiinquëmaso marëꞌ. Quiricanën quëran tatahuë shaꞌhuitërinquëmaso chachin aꞌpatimaranquëmaꞌ. Napoaton isëquë ninacoꞌ. Ispirito Santo yaꞌcoancantohuachinquëmaꞌ, naporo huarëꞌ nanitaparamaꞌ noya noya nicacamasoꞌ. Nani yaꞌcoancantohuachinquëmaꞌ, noya nanan shaꞌhuitonco huachi, itërin Quisosori.

Juan 14:16

Inápaquë panantahuato, Tata nontarahuë Ispirito Santo aꞌpatimarinquëmaꞌ. Inaso ca pochachin catahuarinquëmaꞌ, achinicancanarinquëmaꞌ. Co onporontaꞌ patarinquëmahuëꞌ.

Juan 14:26

Inápaquë pantahuato, tatahuë nontarahuë, Ispirito Santo aꞌpatimarinquëmaꞌ. Ca yaꞌhuërënamëhuë oꞌmararin. Inasoꞌ achinicancanarinquëmaꞌ. Yaꞌipi Yosë nanamën aꞌchintarinquëmaꞌ. Catahuaarinquëmaꞌ aꞌchintëranquëmasoꞌ ama naniantacamaso marëhuëꞌ. Catahuahuachinquëmaꞌ, nóya yonquiantaramaꞌ.

Juan 15:26

Yosëꞌpaꞌ pantahuato, Ispirito Santo aꞌpatimaranquëmaꞌ. Inasoꞌ achinicancanarinquëmaꞌ. Noꞌtëquënáchin nonin. Yosë quëran oꞌmarahuaton, piyapiꞌsaꞌ ayonquiarin. Nonahuëso chachin noꞌtëquën ayonquiarinquëmaꞌ.

Juan 17:5

Iráca coꞌhuara isoroꞌpaꞌ yaꞌhuëyátërasohuëꞌ, quëmaroꞌco noya noya yaꞌhuëpirahuëꞌ, aꞌpaimaranco. Iporasoꞌ, Tata, quëmataquë naquëranchin acoantaco quëmaroꞌco chachin yaꞌhuantaꞌi.

Hechos 1:4

Aꞌna tahuëri inapitarëꞌ niꞌsoꞌ, shaꞌhuitërin: —Ama aꞌnaroáchin Quirosarin quëran pipicosohuëꞌ. Isëquë ninacoꞌ Ispirito Santo oꞌmain. “Ispirito Santo aꞌpatimaranquëmaꞌ,” tënin Tata Yosë. Iꞌhua chachin shaꞌhuitëranquëmasoꞌ.

Hechos 10:45

Ina nohuanton, nisha nisha nananquë nonsapi. Co nitotaponaraihuëꞌ, Ispirito Santo nohuanton, napoapi. “Ma noyacha Yosëso paya,” tosapi. Natanahuatonaꞌ, cotioroꞌsaꞌ Pitro caꞌtanpisopita paꞌyanpi: “Nisha piyapiꞌsaꞌ niponaraihuëꞌ, Yosë nohuanton, Ispirito Santori yaꞌcoancantërin,” topi.

Hechos 2:17

‘Aꞌna tahuëri ispiritonëhuë aꞌpamarahuë nisha nisha piyapiꞌsaꞌ yaꞌcoancantacaso marëꞌ. Yaꞌcoancantohuachin, huiꞌnamapita nanamëhuë shaꞌhuirapi. Huiꞌnapiꞌsantaꞌ co huëꞌëponaraihuëꞌ, huaꞌnarëso pochin quënanapi. Mashoroꞌsantaꞌ huaꞌnarapi.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

Gálatas 3:14

“Yosë noꞌtëquën nontërinco,” tënin Apraan. Ina tëninso marëꞌ Yosëri noya niꞌnin. Nisha piyapiroꞌsarintaꞌ imacaiso marëꞌ Quisocristo chiminin. Ina natëhuachinara, Yosëri noya niꞌnin. Yaꞌipinpoaꞌ Quisocristo imapatëhuaꞌ, Ispirito Santo yaꞌcoancantarinpoaꞌ. Iráca Yosë shaꞌhuirinso pochachin yaꞌcoancantarinpoaꞌ.

Efesios 1:13

Canpitantaꞌ Yosë nanamën natanamaꞌ. “Quisocristo anoyacancantohuachinquëmaꞌ, nichaꞌësarinquëmaꞌ,” itërainquëmaꞌ. Natanpatamara: “Noꞌtën nanan inasoꞌ,” taꞌtomaꞌ, natëramaꞌ. Quisocristo imapatamaꞌ, huiꞌnin pochin Yosë niꞌninquëmaꞌ. Napoaton Ispirito Santo ayaꞌcoancantërinquëmaꞌ. Sichoquë marca acopiso pochin ayaꞌcoancantërinquëmaꞌ huëntonënquë ayaꞌconinquëmasoꞌ nitotacaso marëꞌ. Iráca shaꞌhuirinso chachin napotërinquëmaꞌ.

Efesios 4:8

Iráca inápaquë nóya yaꞌhuëpirinhuëꞌ, isoroꞌpaquë chachin oꞌmarin. Naꞌcon parisitaton, chiminin. Paꞌpitopirinahuëꞌ, nanpiantaton, inápaquë panantarin. Iráca quiricanënquë naporin: “Yaꞌipi minsërahuaton, inápaquë panantarin huachi. Naporahuaton, maꞌsha topinan nicanarëso pochin piyapinënpita catahuarin nóya nicacasoꞌ. Nisha nisha nicacasoꞌ catahuarin,” tënin.

Tito 3:6

Quisocristo anoyacancantërinpoaꞌ niꞌton, Ispirito Santo aꞌpatimarinpoaꞌ yaꞌcoancantinpoaso marëꞌ. Noyá yaꞌcoancantohuachinpoaꞌ, naꞌcon catahuarinpoaꞌ.

Hebreos 10:12

Quisocristoso nipirinhuëꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarahuaton, Yosë inchinanën quëran huënsëarin.

Hebreos 2:9

Quisososo nipirinhuëꞌ yonquiaꞌahuaꞌ. Inasoꞌ isoroꞌpaquë oꞌmaton, piyapi chachin nasitimarin. Parisitaton, canpoa marëꞌ chiminin. Napoaton Yosëri chiníquën nanan quëtërin yaꞌipi huaꞌanëntacaso marëꞌ. Inaora nohuanton, Yosë nosoroatonpoaꞌ, huiꞌnin aꞌpatimarinpoaꞌ yaꞌhuërëtinpoaso marëꞌ. Yaꞌipi piyapinpoa marëꞌ chiminin.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

1 Pedro 3:22

Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.