Hechos 2:24 - Chayahuita (Shahui)

²⁴ Yosëri ananpitaantarin. Chimirin quëran nichaꞌërin. Co chimirini minsërinhuëꞌ.

Hechos 2:24 ပူးပေါင်းရင်းမြစ်များ

Salmos 116:16

Caso Sinioro, piyapinënco. Mamahuëntaꞌ, piyapinën chachin. Nisha nisha maꞌsha onpoato chiminchináchin nipirahuëꞌ, nichaꞌëranco.

Isaías 53:10

Sinioro nohuanton parisitaton co napion cancantarin. Piyapiꞌsa oshanëna marëꞌ ina chiminin niꞌquëhuarëꞌ, huaꞌqui tahuëri niꞌsarin. Huiꞌninpita pochin nipisopitanta niꞌsarin. Ina naporin quëran Sinioro yonquirinsopita noya naniarin.

Oseas 13:14

¡Co carima poꞌoroꞌ quëran nichaꞌësaranquëmahuëꞌ! ¡Piyapinëhuëpita nipiramahuëꞌ, co huachi nosoroaponquëmahuëꞌ! Napoaton chimirin përato: ‘Chimirin. Quëmasoꞌ ataꞌhuantonaꞌpinquën. ¿Intohuata iporasoꞌ inapoyantëransoꞌ?’ itërahuë. Poꞌoronta nontato: ‘Poꞌoroꞌ. Quëmantaꞌ naní quëran tëꞌhuachantërinën. ¿Intohuacha iporasoꞌ tëꞌhuachantërinënsoꞌ?’ itërahuë.

Mateo 27:63

—Sinioro huaꞌan, Quisosocosoꞌ nonpintëꞌ, tënai. Nani yonquirai. Coꞌhuara chimiyantëraponhuëꞌ, piyapiꞌsaꞌ shaꞌhuitërin. “Tëpahuachinaco, cara tahuëri quëran nanpiantarahuë,” toconin.

Juan 10:18

Caora nohuanto, imarinacosopita marëꞌ chiminarahuë. Co nohuantërahuëꞌ naporini, co tëpainacosoꞌ nanichitonahuëꞌ. Tatahuë shaꞌhuitërinco niꞌton, chiminaꞌhuasoꞌ nohuantërahuë. Ina nohuanton, nanpiantararahuë huachi, itërin.

Juan 10:35

Yosëri chachin huaꞌanoꞌsaꞌ acorinsoꞌ yonquiaton, napotërin. Yaꞌipi Yosë quiricanënsoꞌ noꞌtëquën. Co piꞌpisha tërantaꞌ nonpininhuëꞌ.

Juan 12:39

Noꞌtëquën ninorin. Napoaton co nanitopihuëꞌ natëtacaisoꞌ. Isaiasë chachin itantarin:

Juan 20:9

Yosë quiricanënquë iráca ninshitatonaꞌ: “Nanpiantararin,” topirinahuëꞌ, co yonquiyátëraraihuëꞌ.

Hechos 1:16

“Shonca catoyaꞌpicoi iyaroꞌsaꞌ Quisoso nani acorincoi aꞌnapita aꞌchintaꞌhuaiso marëꞌ. Cotasëntaꞌ acorin niꞌton, quiyapitarëꞌ Quisoso caꞌtanpirinhuëꞌ, inimiconënpitari yamapachina, shaꞌhuirapirin. Aꞌnotonpachina, mapi. Iráca Ispirito Santo nohuanton, Cotasë napocasoꞌ ninorin. Tapiri ninoton, Yosë quiricanënquë ninshitërin. Iráca ninorinso chachin naporin.

Hechos 13:30

Inaquë poꞌmopirinahuëꞌ, Yosëri ananpitaantarin.

Hechos 13:37

Quisososo nipirinhuëꞌ Yosëri ananpitaantarin. Co nonën chanatërinhuëꞌ. Quisoso nonën chachin ninoton, Tapi iráca ninshitërin.

Hechos 17:31

Aꞌna tahuëri co noyahuëꞌ nipisopita noꞌtëquën anaꞌintarin. Nani Quisoso acorin coisë pochin nicaton, yaꞌipi piyapiꞌsaꞌ noꞌtëquën shaꞌhuitacaso marëꞌ. Inasoꞌ piyapi chachin niꞌton, chiminpirinhuëꞌ, Yosëri ananpitaantarin. Napoaton inasoꞌ, Yosëri acorinsoꞌ, tënëhuaꞌ,” tënin Paono.

Hechos 2:32

Iporasoꞌ Quisoso chachin Yosëri ananpitaantarin. Quiyari niꞌnai.

Hechos 3:15

Quisoso mini ananpirinpoaso nipirinhuëꞌ, atëpatëramaꞌ. Tëpapirinahuëꞌ, Yosëri ananpitaantarin. Quiyasoꞌ niꞌnai.

Hechos 3:26

Canpitaꞌton yonquiatënquëmaꞌ, huiꞌnin ananpitaantarahuaton, aꞌparin catahuainquëmaso marëꞌ. Ina catahuahuachinquëmaꞌ, co noyahuëꞌ ninamasopita naniantaramaꞌ. Ina quëran nóya cancantaramaꞌ. Ina marëꞌ Quisoso aꞌpaimarin,” itërin.

Hechos 4:10

noꞌtëquën shaꞌhuitaranquëmaꞌ, nitotocoꞌ. Yaꞌipi israiroꞌsaꞌ nitochinaꞌ. Quisocristo Nasaritoquë yaꞌhuërinsoꞌ nanan quëtërincoi anoyataꞌhuaisoꞌ. Ina catahuarincoi niꞌton, anoyatërai. Yosëri aꞌpaimapirinhuëꞌ, canpitarisoꞌ corosëquë apatanantëramaꞌ. Tëpapiramahuëꞌ, Yosëri ananpitaantarin. Ina nohuanton iso quëmapi nani noyataton, isëquë huanirarin.

Hechos 5:30

Tëhuënchachin corosëquë patanantatomaꞌ, Quisoso tëpapiramahuëꞌ, shimashonënpoapita chinotërinso Yosëri chachin ananpitaantarin.

Romanos 10:9

Tata Yosë nohuanton, Quisocristo tëhuënchachin nanpiantarin. Ina cancanënpoa quëran natëhuatëhuaꞌ, “Quisocristoíchin imarahuë,” topatëhuaꞌ, Yosë anoyacancantarinpoaꞌ.

Romanos 14:9

Yaꞌipinpoaꞌ huaꞌanëntinpoaso marëꞌ Quisocristo chiminin. Nani chimirin minsërahuaton, chini chiníquën nanantaton, nanpiantarin. Napoaton nanpirëhuasopita, chiminpisopitantaꞌ, yaꞌipinpoaꞌ huaꞌanëntarinpoaꞌ.

Romanos 4:24

Ina pochin cancantohuatëhuaꞌ, Yosë noya niꞌsarinpoaꞌ. Quisocristo chiminpirinhuëꞌ, Yosëri ananpitaantarin. Ina huaꞌanëntërinpoaꞌ, tënëhuaꞌ. Ina marëꞌ Yosë noya niꞌsarinpoaꞌ canpoantaꞌ.

Romanos 6:4

Quisocristo chiminpachina, paꞌpitopi. Aporintohuachinënpoara, canpoantaꞌ paꞌpitërinënpoaso pochin co noyahuëꞌ yonquirëhuasopita naniantërëhuaꞌ. Tata Yosë chiníquën nanantaton, Quisocristo ananpitaantarin. Canpoantaꞌ nasha cancan quëtërinpoaꞌ nasha pochin nanpicaso marëꞌ. Ina yonquiatëhuaꞌ, aporihuanëhuaꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:34

Yosë noya niꞌninpoa niꞌton, co insonta nanitërinhuë anaꞌintinpoasoꞌ. Quisocristo oshanënpoaꞌ inquitinpoaso marëꞌ chiminin. Ina quëran nanpiantarin. Yosë inchinanën quëran yaꞌhuaton, canpoa marëꞌ Yosë nontárin.

1 Corintios 15:12

“Quisocristo nanpiantarin huachi,” itërainquëmaꞌ niꞌton, ¿onpoatomataꞌ aꞌnaquëmasoꞌ co noꞌtëquën yonquiramahuëꞌ? “Co Yosë ananpitaantarinpoahuëꞌ,” toconamaꞌ.

1 Corintios 15:15

Co nanpiantarinhuëꞌ naporini, nani nonpinchitënquëmahuëꞌ. Nipirinhuëꞌ, co iyaroꞌsaꞌ nonpin nanan aꞌchintërainquëmahuëꞌ. “Yosëri chachin ananpitaantarin,” itohuatëinquëmara, noꞌtëquën nontërainquëmaꞌ.

1 Corintios 15:20

Nipirinhuëꞌ, Quisocristo tëhuënchachin nani nanpiantarin. Yaꞌnan cayarinsoꞌ sënarëso pochin inaꞌton nanpiantaton, nanpimiatarin. Ina quëran canpoantaꞌ chiminarihuarahuëꞌ, nanpiantarihuaꞌ.

1 Corintios 15:4

“Chiminpachina, paꞌpitopi huachi. Paꞌpitopirinahuëꞌ, cara tahuëri quëran nanpiantarin,” itëranquëmaꞌ. Quiricanënquë ninorinso chachin nanpiantarin:

1 Corintios 6:14

Yosë nohuanton, Sinioro Quisoso nanpiantarin. Inari chachin chiníquën nanantaton, nonënpoaꞌ ananpitaantarinpoaꞌ.

2 Corintios 4:14

Tëpapirinacoihuëntaꞌ, Quisocristo imarai niꞌtoi, Yosë ananpitaantarincoi, tënai. Iráca Quisocristo ananpitaantarinsoꞌ pochin quiyantaꞌ ananpitaantarincoi. Yosëꞌpaꞌ quëpantarincoi. Canpitaroꞌcoi chachin yaꞌhuëcontarihua huachi.

Gálatas 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristo acorinco nanamën aꞌchinaꞌhuaso marëꞌ. Co piyapiꞌsaꞌ inahuara nohuanton aꞌparinacohuëꞌ aꞌchinaꞌhuaso marëꞌ. Co inapita acorinacohuëꞌ. Tata Yosë chachin acorinco. Ina nohuanton, Quisocristo nanpiantarin huachi. Nani nanpiantohuachina, ina chachin nanan quëtërinco aꞌchinaꞌhuaso marëꞌ.

Efesios 1:20

Iráca chiníquën nanantaton, Quisocristo ananpitaantaran. Inápaquë quëpantarahuaton, inchinan quëran ahuënsëran niꞌton, chini chiníquën nanantarin,” itërahuë, Yosë nontato.

Colosenses 2:12

Aporihuanpatëhuaꞌ, Quisocristo pochin ninëhuaꞌ. Chiminpachina, paꞌpitopirinahuëꞌ. Yosë nohuanton, nanpiantarin. Inapochachin canpoantaꞌ co noyahuëꞌ yonquirëhuasopita naniantarihuaꞌ. Ina quëran Quisocristo nanpiantarinso pochin ninëhuaꞌ. “Yosë yaꞌipiya nanitaparin,” topatëhuaꞌ, catahuarinpoaꞌ ina pochin nicacasoꞌ.

1 Tesalonicenses 1:10

Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Hebreos 2:14

Piyapinpoaꞌ niꞌton, nonënpoaꞌ yaꞌhuëtërinpoaꞌ. Napoaton Quisocristontaꞌ oꞌmahuachina, piyapi chachin nasitimarin. Inantaꞌ nonën yaꞌhuëtërin. Piyapi chachin niquimaton, chiminin. Canpoasoꞌ sopai natëtëhuaꞌ, oshahuanëhuaꞌ niꞌton, chiminarëhuaꞌ. Quisocristoso nipirinhuëꞌ oshanënpoa marëꞌ chiminin. Canpoa marëꞌ chiminaton, sopai minsërin.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

Apocalipsis 1:18

Nanpiárahuë. Chiminaporahuëꞌ, nanpiantarahuë. Casoꞌ chini chiníquën nanantërahuë. Onporosona chiminacaisoꞌ cari shaꞌhuitarahuë. Ca nohuantohuato, nanpiapi. Ca nohuantohuato, chiminaponaꞌ. Co imarinacosopitahuëꞌ chiminpachinaꞌ, parisitopiquë aꞌpararahuë.