Hechos 19:9 - Chayahuita (Shahui)

⁹ Aꞌnaquënso nipirinhuëꞌ co natantochináchinhuëꞌ cancantatonaꞌ, co yanatëpihuëꞌ. Piyapiꞌsaꞌ niyontonpachinara, noꞌhuitopi. Noꞌhuitatonaꞌ, —Co Quisoso nanamën imacasoꞌ yaꞌhuërinhuëꞌ, toconpi. Napoaton Paonori patërin. Quisoso imapisopita quëparahuaton, iscoira pëiquë paꞌnin. Tirano aꞌchininquë paaton, nani tahuëri aꞌchintárin.

Hechos 19:9 ပူးပေါင်းရင်းမြစ်များ

Nehemías 9:29

Quëma pënëntëransopitaráchin natëantatonaꞌ, yaꞌhuëcaiso pënënan. Pënënpiranhuëꞌ: ‘Noya quiyaora yaꞌhuëapoi,’ tënëso pochin cancantatona co natëtopihuëꞌ. Camaitëransopita, shaꞌhuitëransopita, inapita natëhuachina ananpitomiatacaso nipirinhuëꞌ, co natëtochináchinhuëꞌ cancantopi.

Salmos 95:8

“Iráca inotëro parti shimashonëmapita huëcasoiꞌ, Miripaquë, Masaquë, inaquëpita co natërinacohuëꞌ. Ama inapita napopiso pochin nicosohuëꞌ.

Proverbios 8:34

Aꞌpaitonaꞌpisoꞌ, nani tahuëri yaꞌcoana aꞌpairin. Inso tëranta noya natanatonco ina pochin cancantohuachinco, tëhuënchachin capa cancantapon.

Isaías 8:14

Israiroꞌsanquëmasoꞌ, cato huënton yaꞌhuëramaꞌ. Natëhuatamaco, carima catahuaranquëma noꞌtëquën chinotamacosoꞌ. Coꞌsoꞌ natëhuatamacohuëꞌ, pëcotan pochin nisarahuë. Iraquë naꞌpi iꞌpatochináchin yaꞌhuërinso pochin nisarahuë. Huënsonquë maꞌsha mapiso pochin, ritiquë sami mapiso pochin, Quirosarinquë yaꞌhuëpisopita anaꞌintarahuë.

Jeremías 19:15

“Sinioroso yaꞌipi nanitaparin. Inasoꞌ, israiroꞌsanpoa huaꞌanëntatonpoa naporin: ‘Canpitasoꞌ, pënënanquëmasopita co natëtochináchinhuëꞌ cancantëramaꞌ. Napoaton iso ninanoquë yaꞌhuëramasopita, anaꞌintaranquëmaꞌ. Aꞌnapita ninanoquë yaꞌhuëpisopitantaꞌ, anaꞌintarahuë. Yaꞌipi maquëranpitasona anaꞌintaꞌhuanquëmasoꞌ, nani shaꞌhuitëranquëmaꞌ. Shaꞌhuitëranquëmaso chachin nitaranquëmaꞌ,’ tënin Sinioro,” itërahuë.

Jeremías 7:26

Pënënpirinquëmahuëꞌ, co natëramahuëꞌ. Shimashonëmapita co natërinacohuëꞌ. Canpitaso napoaponahuëꞌ, aquë aquëtë co natëtëramahuëꞌ,” itërin.

Mateo 16:4

Ipora yaꞌhuëramasopita co noyahuëꞌ cancantëramaꞌ. Nitëhuananpitopisopita pochin cancantatomaꞌ, co piꞌpisha tërantaꞌ Yosë yanatëramahuëꞌ. ‘Sacaiꞌ nicacaso nininsoꞌ niquëꞌ natëiinquën,’ itopiramacohuëꞌ, co Yosë nohuantërinhuëꞌ ina pochin nicaꞌhuasoꞌ. Isoíchin anitotarinquëmaꞌ. Aꞌna tahuëri canpita nitotacamaso marëꞌ, Conasë pochin nisarahuë” itërin. Ina quëran patërin huachi.

Mateo 26:55

Ina quëran piyapiꞌsaꞌ itapon: —Sahuëni, shonqui, inapita sëꞌquërahuatomaꞌ, huëcapairamaco. Tëpatonaꞌpi pochin cancantatomaco, ¿yamanamaco ti? Coꞌtana nani tahuëri Yosë chinotopiso pëiquë huënsëato, aꞌchinárahuë. Nicapomaracohuëꞌ, co manamacohuëꞌ.

Juan 12:40

“Yosëri tananpitërin niꞌton, tanshirëso pochin cancantatonaꞌ, co natëtochináchinhuëꞌ cancantopi. Huaꞌquiꞌ co yanatëpihuëꞌ niꞌton, napotërin. Noya niꞌpi naporini, quënanchitonahuëꞌ. Noya natanpi naporini, natëchitonahuëꞌ. Imarinaco naporini, anoyacancanchitohuëꞌ,” tënin.

Hechos 11:26

“Huëquëꞌ paꞌa Antioquiaquë yaꞌhuëpisopita aꞌchinta,” itohuachina, “Inta nipachin paꞌa,” taꞌton, imarin. Aꞌna piꞌisaꞌ inaquë yaꞌhuëpi. Imapisopita catahuacaiso marëꞌ yacapatopi. Naꞌa piyapiꞌsaꞌ aꞌchintopi. Inaquë chachin Quisoso imapisopita nisha nininën acoantapi. “Cristo imaroꞌsaꞌ,” itopi.

Hechos 14:4

Yaꞌhuëhuanoꞌsasoꞌ nisha nisha yonquipi. Aꞌnaquën cotioroꞌsa pochin cancantopi. Aꞌnaquënso nipirinhuëꞌ Paono, Pirnapi, inapita natëpi.

Hechos 17:4

Aꞌnaquën natanahuatonaꞌ, natëpi. Natëtonaꞌ, imasapi. Naꞌa Crico piyapiꞌsantaꞌ imasapi. Nisha piyapiꞌsaꞌ niponaraihuëꞌ, Yosë chinotopi. Paono aꞌchininsoꞌ natanahuatonaꞌ, Quisoso imasapi. Naꞌamiachin sanapiꞌsantaꞌ chiníquën nanantopisopita imasapi.

Hechos 19:23

Naporoꞌ naꞌa piyapiꞌsaꞌ Sinioro imasapi niꞌton, mamanshi moshanaꞌpiroꞌsaꞌ noꞌhuitopi.

Hechos 19:30

Paonontaꞌ piyapiꞌsaꞌ nontapon yapaꞌpirinhuëꞌ, Quisoso imapisopitari toꞌshitëatonaꞌ, yaꞌcopipi. “Ama paquësohuëꞌ,” itopi.

Hechos 20:31

Napoaton iyaroꞌsaꞌ, niꞌcona nonpintochinënquëmaꞌ. Cara piꞌipi catahuaranquëmaꞌ. Tahuërirë chachin, tashirë chachin pënënanquëmaꞌ. Naꞌcon nosororanquëmaꞌ niꞌton, naꞌnëto, aꞌnaya aꞌnayanquëmaꞌ pënënanquëmaꞌ. Ina yonquiatomaꞌ, nipënëncoꞌ, nicatahuacoꞌ.

Hechos 22:4

Iráca naꞌa Quisoso imapisopita aparisitërahuë. Yatëparahuë. Quëmapiꞌsaꞌ tonporahuato, tashinan pëiquë poꞌmorahuë. Sanapiꞌsa quëran huarëꞌ inaquë poꞌmorahuë.

Hechos 24:21

Naporoꞌ isoíchin napotërahuë. “Yosë ananpitaantarinpoaꞌ tënahuëso marëꞌ ipora shaꞌhuirapirinaco,” itërahuë, tënin Paono.

Hechos 28:22

Nipirinhuëꞌ, yanatanainquën. “Quisoso imapisopita co noyahuëꞌ,” topi natantërai. Yaꞌipi parti napopi. Napoaton shaꞌhuitocoi. ¿Maꞌtaꞌ quëma aꞌchinan?

Hechos 7:51

Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

Hechos 9:2

“Quirica ninshitoco piyapi macaꞌhuaso marëꞌ. Tamascoquë quëparahuato, niyontonpiso pëiꞌ huaꞌanoꞌsaꞌ quëtarahuë. Inaquë nasha nanan imapisopita quënanpato, masarahuë. Quëmapiꞌsaꞌ tonporahuato, isëquë chachin quësarahuë. Sanapiꞌsaquë huarëꞌ masarahuë,” tënin Saono. Napohuachina, quirica ninshitahuaton, quëtërin.

Romanos 11:7

Napoahuarëꞌ, ¿maꞌtaꞌ nipachin tëcarihuaꞌ? Naꞌa israiroꞌsaꞌ Yosë huëntonënquë yayaꞌconpirinahuëꞌ, co inahuara nanitopihuëꞌ noya cancantacaisoꞌ. Aꞌnaquën huayoninsopitasoꞌ Yosë nohuanton, yaꞌconpi. Aꞌnapitaso nipirinhuëꞌ co natantochináchinhuëꞌ cancantopi.

Romanos 9:18

Inaora nohuanton, aꞌnaquën nosororin. Aꞌnaquënso nipirinhuëꞌ tananpitërin. Tananpitohuachina, co natantochináchinhuëꞌ cancantopi.

1 Corintios 16:9

Yosë nohuanton, naꞌa piyapiꞌsaꞌ isëquë yaimapi niꞌton, aꞌchintárahuë. Aꞌnaquënsoꞌ noꞌhuipirinacohuëꞌ, pënëntárahuë. Naꞌamiachin imasapi.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

2 Timoteo 1:15

Tashinan pëiquë poꞌmohuachinaco, yaꞌipi Asiaquë imapisopita patërinaco. Huiquiro, Imoquinisi, inapita quëran huarëꞌ napotërinaco. Nani nitotëran, tënahuë.

2 Timoteo 3:5

“Quiyantaꞌ Yosë imarai,” topirinahuëꞌ, co tëhuënchachin imapihuëꞌ. Chinotopirinahuëꞌ, co cancanëna quëran huarëꞌ natëpihuëꞌ niꞌton, co Yosëri catahuarinhuëꞌ ina pochin cancantacaisoꞌ. Ama inapita natanquësohuëꞌ. Tananpitëquëꞌ paꞌinaꞌ.

2 Timoteo 4:2

Nanamën aꞌchináquëꞌ. Piyapiꞌsaꞌ yanatanpachinaꞌ, aꞌchintëquëꞌ. Sacaiꞌ aꞌchinacaso nipirinhuëꞌ, onpopiontaꞌ aꞌchináquëꞌ. Aꞌnaquënsoꞌ co yaimapachinahuëꞌ, noꞌtëquën shaꞌhuitëquëꞌ natëinaꞌ. Co noyahuëꞌ nipachinaꞌ, pënënquëꞌ. Noya nontëquëꞌ chiníquën cancantatonaꞌ, imainaꞌ. Yaꞌipi piyapiꞌsaꞌ aꞌchintëquëꞌ noya nicacaiso marëꞌ. Nipirinhuëꞌ, ama noꞌhuiquësohuëꞌ. Sanoanan quëran pënënquëꞌ.

Hebreos 3:13

Napoaton nani tahuëri nipënëncoꞌ. Ipora chachin coꞌhuara ayaroꞌ tahuëri naniyatërasohuëꞌ, nicatahuacoꞌ ama oshahuanacaso marëhuëꞌ. Niꞌcona oshanëmaꞌ anoꞌquihuachinquëmaꞌ. Inapotohuachinquëmaꞌ, oshaquëran Yosë naniantaramaꞌ niꞌton, co natëtochináchinhuëꞌ cancantaramaꞌ.

2 Pedro 2:12

Nisha aꞌchinaꞌpiroꞌsasoꞌ maꞌsharoꞌsa pochin cancantopi. Co mantaꞌ yonquipihuëꞌ. Maꞌsona tërantaꞌ yanipachinara, nipi. Yosë yonquirinsoꞌ co nitotatonaraihuëꞌ pinopi. Niꞌcoꞌ. Maꞌsharoꞌsaꞌ tananquë quënanpatëra, tëparëꞌ, co nosororëhuëꞌ. Ina marëꞌ Yosëri acorin. Inapochachin nisha aꞌchinaꞌpiroꞌsasoꞌ taꞌhuantapi. Oshanëna marëꞌ Yosëri anaꞌintarin.

2 Pedro 2:2

Co noꞌtëquën aꞌchintatonaraihuëꞌ, naꞌa piyapiꞌsaꞌ nonpintapi. “Noya noꞌpicasoꞌ, noya monshihuanacasoꞌ,” taꞌtonaꞌ, co noyahuëꞌ nisapi. Naꞌa piyapi natanahuatonaꞌ, inapita pochin cancantapi. “Imarai quiyantaꞌ,” taponaraihuëꞌ, co noyahuëꞌ nisapi. Ina marëꞌ aꞌnapitari nicatonaꞌ, Quisocristo pinosapi. “Quisocristo nanamën co imacasoꞌ yaꞌhuërinhuëꞌ. Ina imapisopitasoꞌ co noyahuëꞌ nipi,” taꞌtonaꞌ, co noꞌtën nanan yaimasapihuëꞌ.

Judas 1:10

Nisha aꞌchinaꞌpiroꞌsaso nipirinhuëꞌ Yosë yonquirinsoꞌ co nitotatonaraihuëꞌ, tëhuapi. Maꞌsharoꞌsa pochin cancantatonaꞌ, co yonquipihuëꞌ. Maꞌsona tërantaꞌ yanipachinara, nipi. Inapoatonaꞌ, nitapicancanpi. Anaꞌintacasoꞌ yaꞌhuërin.