Hechos 19:17 - Chayahuita (Shahui)

¹⁷ Yaꞌipi ninanoquë nahuinin. Cotioroꞌsaꞌ, nisha piyapiꞌsaꞌ, inapita natanahuatonaꞌ, paꞌyanpi. “Sinioro Quisoso chini chiníquën nanantërin,” topi.

Hechos 19:17 ပူးပေါင်းရင်းမြစ်များ

2 Samuel 6:9

Naporo tahuëri Tapisoꞌ Sinioro paꞌpi tëꞌhuatërin. Tëꞌhuataton chiníquën nonin: “¡Siniororëꞌquënpoa anoyatërëhuaso caposonën co onporo quëpaꞌhuaso yaꞌhuërinhuëꞌ!” tënin.

Levítico 10:3

Ina quëran Moisësëri Aaron itapon: —Pocamasoꞌ mini apiratatënquëma iꞌhua Sinioro naporin: “Yaꞌcaririnacosopita, noya noya ninahuëso aꞌnotarahuë. Israiroꞌsanta huënaratërahuësoꞌ, aꞌnotarahuë,” tënin. Aaronso nipirinhuëꞌ, co manta tëninhuëꞌ.

Lucas 1:65

Ina niꞌsahuatonaꞌ, piyapiꞌsaꞌ paꞌyanpi. Yaꞌipi Cotia parti nanan nahuinin.

Lucas 7:16

Ina nicatonaꞌ, yaꞌipi piyapiꞌsaꞌ paꞌyanpi. —¡Ma noyacha Tata Yosëso paya! Ma noya quëmapi aꞌpatimarinpoaꞌ pënëinpoaso marëꞌ. Nani maꞌsha nanitaparin, topi. Ina quëran taantapi: —Yosë co naniantërinpoahuëꞌ. Catahuarinpoa huachi, topi.

Hechos 13:12

Huaꞌani niꞌsahuaton, “Yosëri mini napotërin,” taꞌton, natërin. Sinioro nanamën natanahuaton, paꞌyanin. “Inasoꞌ chiníquën nanan,” tënin.

Hechos 18:19

Ipisoquë canconpachinara, nonshipi. Aquirosoꞌ saꞌinë chachin inaquë quëparitërin. Paonosoꞌ yapaantahuachina, cotio niyontonpiso pëiquë yaꞌconahuaton, aꞌchintërin. Cotioroꞌsarëꞌ ninontopi.

Hechos 18:21

“Aꞌna tahuëri Yosë nohuantohuachin, huëantarahuë,” tënin. Ina quëran nanchaquë yaꞌcoantarahuaton, paantarin.

Hechos 19:1

Aporosë Corintoquë yaꞌhuasoꞌ, Paono huancoro ira paꞌtahuaton, Ipisoquë canconin. Inaquë naꞌamiáchin imapisopita quënanconin.

Hechos 19:16

Ina tosahuaton, quëmapi huaꞌyantërinsoari pashitaꞌparin Inapotaton, canchisëyaꞌpi chachin manin. Chiníquën ahuëaton, pëꞌsharaꞌpiarin. Aꞌnayaꞌpiáchin niponahuëꞌ, canchisëyaꞌpi minsërin. Aꞌmopisontaꞌ oshato oshatotërin. Iꞌnanpirapi taꞌapi.

Hechos 19:18

Ina quëran naꞌamiáchin Quisoso imapisopita huëꞌpi. “Quiyantaꞌ pënotopiraihuëꞌ. Co noyahuëꞌ ninaisoꞌ aꞌpoarai,” itopi.

Hechos 2:43

Siniorori catahuahuachina, caꞌtanoꞌsaꞌ nani maꞌsha nanitapapi. Naꞌa piyapiꞌsaꞌ aꞌnaroáchin anoyatopi. Yaꞌipi piyapiꞌsari nicatonaꞌ, paꞌyanpi. “Tëhuënchachin Yosëri catahuarin,” topi.

Hechos 5:11

Yaꞌipi Quisoso huëntonënquë yaꞌconpisopita tëꞌhuatopi. Aꞌnapitantaꞌ natantahuatonaꞌ, “Anaꞌintohuachinpoaꞌ canpoantaꞌ,” taꞌtonaꞌ paꞌpi tëꞌhuatopi.

Hechos 5:13

Imapisopitaráchin inaquë niyontonpi. Aꞌnapitasoꞌ: “Anaꞌintohuachinpoaꞌ,” taꞌtonaꞌ, co inaquë niyontonpihuëꞌ. Napoaponahuëꞌ, “Inapitasoꞌ nóya piyapiꞌsaꞌ,” topi yaꞌipiya.

Hechos 5:5

Ananiasë natanahuaton, aꞌnaroáchin noꞌpaquë anotaton, chiminin. Piyapiꞌsari niꞌpachinara, paꞌyanpi. Aꞌnapitantaꞌ natantahuatonaꞌ, paꞌpi tëꞌhuatopi.

Filipenses 1:20

Co nohuantërahuëꞌ piꞌpian tërantaꞌ Yosë naniantaꞌhuasoꞌ. Inasoꞌ noyasáchin yonquirinpoaꞌ niꞌton, co atapanarincohuëꞌ, tënahuë. Coisë ocoiaponco nimara. Tëpaponco nimara. Co ina nitotërahuëꞌ. Co ina yonquirahuëꞌ. Ocoihuachinco, chiníquën cancantato, aꞌchiantarahuë aꞌnapitantaꞌ imacaiso marëꞌ. Tëpahuachinaco, piyapiꞌsaꞌ nicatonaco, naꞌcon naꞌcon Quisocristo yonquiaponaꞌ, tënahuë. Quisocristo natëcaꞌhuasoráchin yonquirahuë.

2 Tesalonicenses 1:12

Ina quëran aꞌnapitantaꞌ nicatënënquëmaꞌ: “Ma noyacha Sinioro Quisoso niꞌton, ina imatonaꞌ, noya nisapi paya,” tosapi. Canpitantaꞌ ina nohuitëramaꞌ niꞌton, noya noya cancantaramaꞌ. Inaora nohuanton, Yosë nosoroatënquëmaꞌ, catahuarinquëmaꞌ ina pochin cancantacamaso marëꞌ. Sinioro Quisocristontaꞌ catahuarinquëmaꞌ.

2 Tesalonicenses 3:1

Iporasoꞌ iyaroꞌsaꞌ, quiya marëntaꞌ Yosë nontocoꞌ nanamën noya aꞌchinaꞌhuaiso marëꞌ. Yaꞌipi parti nahuinacaso yaꞌhuërin. Canpitasoꞌ natanatomacoi, noya imaramaꞌ. Aꞌnapitantaꞌ aꞌchintohuatoi, noya nohuanchinaꞌ. Canpita pochachin noya imainaꞌ. Ina marëꞌ Yosë nontocoꞌ.

1 Samuel 6:20

Naporoꞌ yonquiatona napopi: “Yosëso noyasáchin ninin. Napoaton tëhuërinsopitasoꞌ, inari anaꞌintëraꞌpiacaso yaꞌhuërin. ¿Intohuacha iporasoꞌ Siniororëꞌquënpoa anoyatërëhuaso caposonën aꞌpaꞌahua nicaya? Coꞌsoꞌ inapohuatëhuahuëꞌ, caposonën tëhuëtaantahuatëhuaꞌ, anaꞌintaantarinpoaꞌ,” topi.