Hechos 18:27 - Chayahuita (Shahui)

²⁷ Ina quëran Acaya parti yapaꞌsarin aꞌchinacaso marëꞌ. “Acaya parti aꞌchinchi, topirahuëꞌ,” topachina: “Noya iyasha. Noya paquëꞌ,” itopi Quisoso imapisopitari. Naporahuatonaꞌ, quirica ninshitopi quëtontacaiso marëꞌ. “Iꞌhuata, iyaroꞌsaꞌ. Aporosë huëꞌpachin, noya nontocoꞌ. Inantaꞌ Quisoso imarin niꞌton, noya natancoꞌ,” itopi ninshitatonaꞌ. Quirica maꞌpatahuaton, Acaya parti paꞌnin. Inaquë Quisoso imapisopita quënanconin. Yosëri catahuarin niꞌton, Quisoso imapi. Inapita quënanconahuaton, noya aꞌchintaton, achinicancanarin.

Hechos 18:27 ပူးပေါင်းရင်းမြစ်များ

Hechos 1:15

Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:

Hechos 11:26

“Huëquëꞌ paꞌa Antioquiaquë yaꞌhuëpisopita aꞌchinta,” itohuachina, “Inta nipachin paꞌa,” taꞌton, imarin. Aꞌna piꞌisaꞌ inaquë yaꞌhuëpi. Imapisopita catahuacaiso marëꞌ yacapatopi. Naꞌa piyapiꞌsaꞌ aꞌchintopi. Inaquë chachin Quisoso imapisopita nisha nininën acoantapi. “Cristo imaroꞌsaꞌ,” itopi.

Hechos 15:34

Sirasëso nipirinhuëꞌ: “Co casoꞌ paꞌshatërapohuëꞌ,” taꞌton, co paꞌninhuëꞌ.]

Hechos 18:12

Ina quëran Cariono Acaya parti huaꞌanëntohuachina, cotioroꞌsari Paono noꞌhuitonaꞌ, niyontonpi. Ina masahuatonaꞌ, huaꞌanoꞌsataquë quëpapi anaꞌintacaiso marëꞌ.

Hechos 18:18

Huaꞌquiꞌ Paono inaquë yaꞌhuantarin. Ina quëran Quisoso imapisopita nontahuaton, paꞌnin huachi. Aquiro saꞌinë chachin paꞌpi antaꞌ. Nanchaquë Siria parti yapantapirinahuëꞌ. Sincriaquë canconahuaton, Paono noyá niyaꞌitërin. Yosë shaꞌhuitërinsoꞌ nanirin niꞌton, naporin. Ina quëran nanchaquë yaꞌconpi.

Hechos 19:1

Aporosë Corintoquë yaꞌhuasoꞌ, Paono huancoro ira paꞌtahuaton, Ipisoquë canconin. Inaquë naꞌamiáchin imapisopita quënanconin.

Hechos 9:27

Pirnapiso nipirinhuëꞌ natërin. Natëton, Saono quëparin caꞌtanoꞌsaꞌ nontacaso marëꞌ. “Saono ira paꞌtasoꞌ, Quisoso quënanin. Nontërinsontaꞌ natanin. Tamascoquë chiníquën cancantaton, Quisoso nanamën shaꞌhuirin,” itërin.

Romanos 1:5

Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi.

1 Corintios 15:10

Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

1 Corintios 16:3

Aꞌnaquëmaꞌ noya niꞌnamasopita huayoncoꞌ coriqui quëpacaiso marëꞌ. Canconpato, quiricatarahuë huayonamasopita nohuitacaiso marëꞌ. Nani quiricatahuato, inarë chachin huayonamasopita aꞌpaarahuë. Quirosarinquë quëparapi pahuantërinsopita quëtacaiso marëꞌ.

1 Corintios 3:6

Niꞌcoꞌ. Iminpatëra, aꞌnasoꞌ shaꞌtërin. Ina quëran aꞌnantaꞌ pacarapiton, iꞌshaquë oporapitërin noya papotacaso marëꞌ. Nipirinhuëꞌ, Yosëriíchin apapotërin. Inapochachin carinquëmaꞌton aꞌchintëranquëmaꞌ. Ina quëran Aporosëntaꞌ aꞌchintantarinquëmaꞌ. Aꞌchintopirainquëmahuëꞌ, Yosësoꞌ anoyacancantërinquëmaꞌ.

2 Corintios 1:24

Co quiyasoꞌ huaꞌan pochin chiníquën pënëntëraihuëꞌ. Sanoanan quëran pënënainquëmaꞌ. Yosë nanamën noya natëramaꞌ. Yacatahuarainquëmaꞌ noya cancantacamaso marëꞌ.

Filipenses 1:25

Napoaton co tëparinacohuëꞌ, tënahuë. Yosë nohuanton nanpihuatosoꞌ, aꞌchiantarahuë. Noya noya Quisocristo imacaso marëꞌ aꞌchinchinquëmaꞌ. Nóya natëtohuatamaꞌ, noya noya cancantaramaꞌ.

Filipenses 1:29

Yosë nosoroatonpoaꞌ, noyasáchin yonquirinpoaꞌ. Ina nohuanton, Quisocristo imarëhuaꞌ. Ina quëran imarëhuaso marëꞌ parisitarëhuaꞌ. “Ca marëꞌ chiníquën parisitërin niꞌton, cantaꞌ imarahuëso marëꞌ parisichi,” taꞌtëhuaꞌ, noya cancantahuaꞌ. Inantaꞌ Yosë nohuantërin.

Colosenses 2:12

Aporihuanpatëhuaꞌ, Quisocristo pochin ninëhuaꞌ. Chiminpachina, paꞌpitopirinahuëꞌ. Yosë nohuanton, nanpiantarin. Inapochachin canpoantaꞌ co noyahuëꞌ yonquirëhuasopita naniantarihuaꞌ. Ina quëran Quisocristo nanpiantarinso pochin ninëhuaꞌ. “Yosë yaꞌipiya nanitaparin,” topatëhuaꞌ, catahuarinpoaꞌ ina pochin nicacasoꞌ.

Colosenses 4:10

Aristarcontaꞌ isëquë yaꞌhuërarin. Quisocristo imarinso marëꞌ tashinan pëiquë poꞌmopi antaꞌ. Inantaꞌ yonquiarinquëmaꞌ, saludos aꞌpatarinquëmaꞌ. Marcontaꞌ saludos aꞌpatarinquëmaꞌ. Inasoꞌ Pirnapi quëmopinën. Canpitataquë paꞌpachin, noya nontatomaꞌ, catahuacoꞌ tënahuë. Nani ina shaꞌhuitëranquëmaꞌ.