Hechos 18:24 - Chayahuita (Shahui)

²⁴ Naporoꞌ tahuëriꞌsaꞌ aꞌna cotio quëmapi Ipisoquë paꞌnin, Aporosë itopisoꞌ. Aricantriaquë nasitërin. Noyá nitotërin aꞌchinacasoꞌ. Yosë quiricanën iráca ninshitopisontaꞌ noya nitotërin.

Hechos 18:24 ပူးပေါင်းရင်းမြစ်များ

Esdras 7:12

“Ca Artaquirquisë copirnoco Istrasënquën nontaranquën. Quëmasoꞌ corto huaꞌanquën. Naporahuaton Yosë inápaquë yaꞌhuëaton, pënëntërinsoꞌ, noyá nitotëran. Ina nitotaton aꞌchinaꞌpinquën yaꞌconan.

Esdras 7:6

Istrasësoꞌ, iráca pënëntërinsoꞌ quirica nóya nitotaton, aꞌchinaꞌpi yaꞌconin. Ina quiricaquë Sinioro nohuanton Moisësë ninshitërin. Naporahuaton Siniorori noya catahuarin. Napoaton Artaquirquisë copirnori yaꞌipi nataninsopita catahuacaso marëꞌ quëtërin. Inapoaton inasoꞌ, Papironia quëran Quirosarinquë huëntarin. Aꞌna huëntonaꞌ, israiroꞌsari imaquipi. Inapitasoꞌ aꞌnaquën corto huaꞌanoꞌsaꞌ. Aꞌnaquëntaꞌ, nihuiroꞌsaꞌ. Aꞌnapitasoꞌ, cantanaꞌpiroꞌsaꞌ. Aꞌnapitantaꞌ, yaꞌcoana aꞌpairoꞌsaꞌ. Aꞌnaquënsoꞌ, Yosë chinotacaso pëiquë sacatopisopita. Artaquirquisë nani canchisë piꞌipi copirno yaꞌconinso nisapasoꞌ, Quirosarinquë canquipi. Yaꞌnatiirinso yoquiquë yaꞌnatiirinso tahuëri chachin pipipi. Napoaponaraihuëꞌ, aꞌnatërápo yoqui nisahuaton, aꞌna tahuëri quëran Quirosarinquë canquipi. Siniorori catahuarin niꞌton, noya iratopi.

Éxodo 4:10

Yaꞌipi inapita Yosëri shaꞌhuitopirinhuëꞌ, Moisësësoꞌ: —¡Maꞌcha Sinioro napotaranquën paya! Co caso noya nonaꞌpicohuëꞌ. Icotëmiachinco. Napoaton co insonta yanatërincohuëꞌ. Huaꞌhuatapo quëran huarëꞌ inaporahuë, taantarin.

Mateo 13:52

—Yosë quiricanën nani nitotaramaꞌ. Yosë huaꞌanëntërinsoꞌ aꞌchintëranquëmaꞌ niꞌton, pëiꞌ huaꞌanën pochin nisaramaꞌ. Pëiꞌ huaꞌanën noya nipachina, yaꞌipi pëinënquë yaꞌhuëpisopita noya nocomarin. Nani naꞌcon aꞌchintëranquëmaꞌ Yosë nanamën aꞌchinacamaso marëꞌ. Iráca ninshitopisoꞌ nitotëramaꞌ. Naporahuaton, aꞌnantaꞌ nashamiachin aꞌchintaranquëmaꞌ. Yaꞌipiya nitotatomaꞌ, aꞌchintëraꞌpiaramaꞌ, itërin Quisosori.

Lucas 24:19

—¿Maꞌtaꞌ onpopisoꞌ? itaantarin Quisosori. Napotohuachina: —Coꞌta Quisoso Nasaritoquë yaꞌhuërinsoꞌ tëpapi. Nóya quëmapi nipirinhuëꞌ, tëpapi. Ma noya Yosë nanamën aꞌchintërincoi. Caniaꞌpiroꞌsaꞌ nosoroaton, aꞌnaroáchin anoyatërin. Yosëri nóya niꞌnin. Piyapiꞌsarintaꞌ noya niꞌpirinahuëꞌ.

Hechos 18:19

Ipisoquë canconpachinara, nonshipi. Aquirosoꞌ saꞌinë chachin inaquë quëparitërin. Paonosoꞌ yapaantahuachina, cotio niyontonpiso pëiquë yaꞌconahuaton, aꞌchintërin. Cotioroꞌsarëꞌ ninontopi.

Hechos 18:21

“Aꞌna tahuëri Yosë nohuantohuachin, huëantarahuë,” tënin. Ina quëran nanchaquë yaꞌcoantarahuaton, paantarin.

Hechos 18:28

Piyapiꞌsaꞌ niyontonpachinara, Yosë quiricanën aꞌchinárin. “Iráca quëran huarëꞌ Cristo oꞌmacasoꞌ ninopi. Iporasoꞌ nani oꞌmarin. Inasoꞌ Quisoso,” tënin. Quiricanën quëran anitotërin. Noya noya aꞌchinin niꞌton, cotioroꞌsaꞌ co nanitopihuëꞌ: “Nonpiánin” taꞌcaisoꞌ.

Hechos 19:1

Aporosë Corintoquë yaꞌhuasoꞌ, Paono huancoro ira paꞌtahuaton, Ipisoquë canconin. Inaquë naꞌamiáchin imapisopita quënanconin.

Hechos 27:6

Inaquë capitan aꞌna nancha quënanin, Aricantria quëran huëꞌninsoꞌ. Itaria parti yapaꞌsarin niꞌton, inaquë ichiyaꞌconincoi. Panca nancha inasoꞌ.

Hechos 6:9

Aꞌnaquën cotioroꞌsaso nipirinhuëꞌ, nisha niyontonpiso pëi quëran huëcatonaꞌ, Istipan noꞌhuipi. “Patron quëran pipipisopita,” itopiso quëran huëꞌpi. Inapitasoꞌ Sirini quëran, Aricantëria quëran, Sirisia parti quëran, Asia parti, inaquëranpita huëcatonaꞌ, Quirosarinquë yaꞌhuëpi. Inapitasoꞌ Istipan noꞌhuipi. Huaꞌquiꞌ chiníquën ninontopi.

Hechos 7:22

Iquipito maistroꞌsari noya aꞌchintopi. Yaꞌipi nitotopisoꞌ aꞌchintopi. Napoaton noya noya nonin. Nani maꞌsha nicacasoꞌ nitotërin.

1 Corintios 1:12

Nisha nisha nonamaꞌ: “Paono imarai,” tënamaꞌ aꞌnaquëmaꞌ. “Quiyasoꞌ Aporosë imarai,” tënamaꞌ aꞌnaquëmaꞌ. Aꞌnaquëmantaꞌ: “Pitro imarai,” tënamaꞌ. Aꞌnaquëmaso nipirinhuëꞌ: “Cristo imarai quiyasoꞌ,” tënamaꞌ.

1 Corintios 16:12

Iya Aporosëntaꞌ shaꞌhuitopirahuëꞌ. “Iyaroꞌsaꞌ paꞌpachinaꞌ, quëmantaꞌ paquëꞌ,” itopirahuëꞌ, co ipora nohuantërinhuëꞌ. Nanitohuachin, nicaponquëmaꞌ paꞌsarin.

1 Corintios 4:6

Aꞌchintohuatëinquëmara iyaroꞌsaꞌ, Yosëíchin yonquirai. Aporosërëꞌcoi aꞌchintërainquëmasoꞌ ninshitëranquëmaꞌ canpitantaꞌ quiya pochin yonquicamaso marëꞌ. Yosë quiricanënáchin natëcasoꞌ yaꞌhuërin. Aꞌna quëmapi noya noya aꞌchintohuachinquëmaꞌ, ama inasáchin paꞌyatocosohuëꞌ.

2 Corintios 10:10

Aꞌnaquën itërinënquëmaꞌ: “Paono naꞌcon ninshitatonpoaꞌ, chiníquën pënënpirinpoahuëꞌ. Huëꞌpachinasoꞌ, co chiníquën nanantonaꞌpi pochin nontërinpoahuëꞌ. Sanoanayan quëran aꞌchintërinpoaꞌ niꞌton, co chiníquën nanantërinhuëꞌ,” toconpi.

Colosenses 3:16

Yaꞌipi Quisocristo nanamën yonquirácoꞌ. Naꞌcon ina yonquicoꞌ. Noya nitotatomaꞌ, niaꞌchintocoꞌ, nipënëncoꞌ. Yosë cantanën nisha nisha nininsopita cantacoꞌ. Sarmo quirica nontatomaꞌ, inantaꞌ cantacoꞌ. Canpitaora yonquinëma quëraontaꞌ ocoirahuatomaꞌ, cantacoꞌ: “Ma noyanquëncha Tata niꞌton, catahuarancoi paya,” itatomaꞌ, cancanëma quëran huarëꞌ cantacoꞌ.

Tito 3:13

Sinasë, Aporosë, inapita cantonpachinquën, noya nontëquëꞌ. Sinasësoꞌ coisë catahuanaꞌpi. Yapaꞌpachinaꞌ, catahuaquëꞌ noya paꞌinaꞌ. Maꞌsha pahuantohuachinaꞌ, quëtëquëꞌ ama pahuanchinasohuëꞌ.