Hechos 15:19 - Chayahuita (Shahui)

¹⁹ “Napoaton nisha piyapiꞌsaꞌ Yosë imapachinaꞌ, noya niaꞌahuaꞌ, tënahuë. Co yaꞌipi Moisësë pënëntërinsoꞌ aꞌchintacaso yaꞌhuërinhuëꞌ.

Hechos 15:19 ပူးပေါင်းရင်းမြစ်များ

Isaías 55:7

Co noyahuëꞌ nipisopita, co noyahuëꞌ nipisoꞌ aꞌpoinaꞌ. Nitapicancanpisopitantaꞌ, co noyahuëꞌ yonquipisoꞌ aꞌpoinaꞌ. Yosë chachin tahuërëtaantatomaꞌ, natëantacoꞌ. Inaso noya niꞌton, oshanëma inquitarinquëmaꞌ.

Hechos 15:10

Iráca Moisësë nisha nisha pënëntopirinhuëꞌ, shimashonënpoaꞌ co nanitopihuëꞌ yaꞌipiya noꞌtëquën natëcaisoꞌ. Canpoantaꞌ co nanitaparëhuahuëꞌ. ¿Maꞌmarëtaꞌ nipachin nisha piyapiꞌsaꞌ imapachinaꞌ, iráca pënëntopisoꞌ aꞌchinacasoꞌ nohuantëramaꞌ? tënahuë. Yosëri noya niꞌpachina, co canpoari nisha shaꞌhuicasoꞌ yaꞌhuërinhuëꞌ. Quisoso imapisopita tananpitahuaꞌ, Yosë anaꞌintohuachinpoaꞌ.

Hechos 15:24

Iꞌhua aꞌnaquën isëquëran paꞌpachinara, nisha aꞌchintërinënquëmaꞌ. ‘Co Moisësë pënëntërinsoꞌ natëhuatamahuëꞌ, co Yosë huëntonënquë yaꞌconaramahuëꞌ,’ itërinënquëmaꞌ. Co quiyari aꞌpapiraihuëꞌ, paꞌpi. Natanahuatomaꞌ, nisha nisha yonquiramaꞌ. Pirnapi Paonorë chachin huëcaton, nani shaꞌhuitirincoi. Ipora huarëꞌ nitotatoi, ninshitarainquëmaꞌ.

Hechos 15:28

Nani iyaroꞌsaꞌ ninontërai. Ispirito Santontaꞌ noꞌtëquën anitotërincoi. Napopianachin yonquiatoi, ninshitarainquëmaꞌ. Co yaꞌipi Moisësë pënëntërinsoꞌ natëcasoꞌ yaꞌhuërinhuëꞌ, tënai. Piꞌpisha shaꞌhuichinquëmaꞌ natëcamaso marëꞌ.

Hechos 21:21

Inapitasoꞌ nonpin nanan natantopi. “Paono nisha piyapiꞌsaꞌ yaꞌhuërinquë paaton, cotioroꞌsaꞌ inaquë yaꞌhuëpisopita nisha aꞌchintërin. ‘Moisësë pënëntërinsoꞌ aꞌpocoꞌ. Ama huachi huiꞌnamapita marca acotocosohuëꞌ,’ tënin Paono pënëntaton. Co nohuantërinhuëꞌ iráca napopisoꞌ natëcaisoꞌ,” topi, natantopi.

Hechos 21:25

Nisha piyapiꞌsaso nipirinhuëꞌ nani ninshitërai. “Quisocristo imapatamaꞌ, co yaꞌipi iráca pënëntërinsoꞌ natëcamasoꞌ yaꞌhuërinhuëꞌ. Isoíchin shaꞌhuichinquëmaꞌ ama nicacamaso marëhuëꞌ. Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinahuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Cotioroꞌsacoi pënëntëraisoꞌ naꞌcon yaꞌhuëpirinhuëꞌ, inaíchin natëcamasoꞌ yaꞌhuërin,” tënai, nisha piyapiꞌsaꞌ ninshitatoi, itërin Santiacori.

Hechos 26:20

Tamascoquë yaꞌhuëpisoꞌton shaꞌhuitërahuë. Ina quëran Quirosarinquëntaꞌ shaꞌhuiantarahuë. Yaꞌipi Cotia partintaꞌ inachachin shaꞌhuiantarahuë. Nisha piyapiꞌsantaꞌ aꞌchintërahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtaantacoꞌ. Tëhuënchachin imapatamaꞌ, noya nisaramaꞌ,’ itërahuë.

Gálatas 2:4

Aꞌnaquën cotioroꞌsaso nipirinhuëꞌ, “Quiyantaꞌ imarai,” taponaraihuëꞌ, co Quisocristoráchin imapihuëꞌ. Iráca pënëntërinsontaꞌ imapi. Yashaꞌhuirapitonacoi, niyontonpiso pëiquë yaꞌconpi Quisocristo imatoi naporaisopita nicacaiso marëꞌ. “Iráca pënëntërinsontaꞌ natëcasoꞌ yaꞌhuërin,” taꞌtonaꞌ, yaanishacancantërinacoi nisha nisha natëcaꞌhuaiso marëꞌ.

1 Tesalonicenses 1:9

Inapita chachin canpita naporamasoꞌ shaꞌhuiantapi: “Paono niꞌquihuachincoira, noya aꞌchintërincoi. Noya natanatoi, aꞌnaroáchin natërai. Mamanshi aꞌporahuatoi, Tata Yosëíchin chinotërai. Ina imarai huachi. Yosësoꞌ nanpirárin. Inasáchin chinotacasoꞌ yaꞌhuërin.