Hechos 14:15 - Chayahuita (Shahui)

¹⁵ —¿Onpoaramataꞌ iyaroꞌsaꞌ? Ama moshacoisohuëꞌ. Tëhuënchachin co quiyasoꞌ moshamacoiso yaꞌhuërinhuëꞌ. Quiyantaꞌ piyapicoi, canpita pochachin ninai. Noya nanan shaꞌhuitaꞌhuanquëmaso marëꞌ huëꞌnai. Quisoso nanamën, iyaroꞌsaꞌ, aꞌchinchinquëmaꞌ, natanco. Mamanshi topinan quëran mosharamaꞌ. Yosëso nipirinhuëꞌ nanpirárin. Ama huachi mamanshi moshacosohuëꞌ. Inapita naniantatomaꞌ, Yosë imaco huachi. Isoroꞌpaꞌ, inápaquë yaꞌhuërinsopita, marëroꞌsaꞌ, yaꞌipi maꞌsharoꞌsaꞌ, inapita inari ninin.

Hechos 14:15 ပူးပေါင်းရင်းမြစ်များ

Génesis 1:1

Yosë nani maꞌsha acorinso shaꞌhuichinquëmaꞌ: Iráca co manta yaꞌhuërinhuëꞌ. Yosëíchin yaꞌhuërin. Caniaritapon, piꞌiroꞌtëꞌton acorin. Ina quëran isoroꞌpantaꞌ, acorin.

Génesis 41:16

—Co caora nohuanton nitotërahuëꞌ. Quëma piyapinënco niꞌto, Yosë chachin anitotohuachinco, shaꞌhuitaranquën. Maꞌsona noya nicacaso marëꞌ, shaꞌhuitaranquën, itërin.

2 Reyes 19:16

Asiria copirno ninshitaton pinorinquënsoꞌ natanquëꞌ. Quëmasoꞌ nanpirápiranhuëꞌ, napotërinquën.

2 Reyes 19:4

Sinioroso Yosënën niꞌton, yaꞌipi nitotërin. Asiria copirnori huaꞌanoꞌsa aꞌparinsopita quëran pinorinsontaꞌ, natanin. Maꞌcha ina natanaton anaꞌintërin naporini, noya niitonhuëꞌ. Quëmanta Sinioro nontëquë yaꞌhuëarëhuasoꞌ, catahuainpoaꞌ, tënin Isiquiasë,’ itoncoꞌ,” itërin.

Salmos 115:15

Siniorosoꞌ piꞌiroꞌtë, isoroꞌpaꞌ, inapita acorin. Ina chachin canpitanta catahuainquëmaꞌ.

Salmos 124:8

Sinioroáchin tëhuëchinsoꞌ catahuarinpoaꞌ. Inasoꞌ, piꞌiroꞌtë acorahuaton, isoroꞌpanta acorin.

Salmos 33:6

Sinioro camaitohuachina, piꞌiroꞌtë yaꞌnorin. Inaquë yaꞌhuërinsopitantaꞌ, nonin quëran chachin acorin.

Éxodo 20:11

Saota tahuëri quëran yaꞌipi acorahuësopita tënirahuë. Inápaquë, isoroꞌpaquë, marëquë, inaquëpita yaꞌhuërinso tënirahuë. Tahuëririnquë chinotërahuë. Napoaton, ina tahuëri noya nicato, chinoto tahuëri acorahuë: Naporo tahuëri chinotatomaꞌ, casáchin yonquico.

Isaías 45:18

Siniorosoꞌ Yosë niꞌton, piꞌiroꞌtë acorin. Isoroꞌpanta acohuachina, noyá acorin. Co topinan nicacaso marëꞌ acorinhuëꞌ. Piyapiroꞌsari yaꞌhuëtacaiso marëꞌ acorin. Ina chachin nontatonpoaꞌ: “Caso Sinioroco. Co aꞌninquëchin yaꞌnorahuëꞌ. Co aꞌna ca pochin yaꞌhuërinhuëꞌ.

Isaías 45:20

Naquëranchin Sinioro nontaantarinpoaꞌ: “Canpitaso taꞌhuantamaso nipirinhuëꞌ, chaꞌëramasopita huëcatoma niyontonco shaꞌhuichinquëmaꞌ. Naꞌa piyapi yaꞌhuërin co manta yonquipisohuëꞌ. Inapitasoꞌ nara quëran mamanshi nipiso pitënahuatona ichiconipi. Inapitasoꞌ co piꞌpian tëranta nichaꞌëcasoꞌ nanitopihuëꞌ. Napopirinahuëꞌ, ina chinotatona nontopi.

Isaías 46:7

Ina quëran pitënahuatonaꞌ, acopiquë acocaiso marëꞌ quëpapi. Inapotohuachinara, inaquëranchin yaꞌhuëárin. Chiníquën nontopirinahuëꞌ, co aꞌpanitërinhuëꞌ. Parisitatona co napion ancantopirinahuëꞌ, co nanitërinhuë nichaꞌëcasoꞌ.

Jeremías 14:22

Inpioroꞌsasoꞌ, nisha nisha mamanshiroꞌsa moshapi. Co inapita nohuanton oꞌnaninhuëꞌ. ¡Co piꞌiroꞌtë tëranta nohuanton oꞌnaninhuëꞌ! Quëma Sinioro Yosënëhuëinquën niꞌton, oꞌnan aꞌpaimaran. Quëma nohuanton yaꞌipi inapita yaꞌhuërin. Napoaton quëmasáchin ninarainquën, itërahuë.

Daniel 6:26

Yaꞌipi huaꞌanëntërahuëso noꞌpaquë, Naniriri chinotërinso Yosë tëꞌhuatatomaꞌ, nóya niꞌcoꞌ. Inasáchin Yosë yaꞌhuëmiatërinsoꞌ. Huaꞌanëntërinsoꞌ, co onporonta taꞌhuantaponhuëꞌ. Chiníquën nanantërinsontaꞌ, co nitiquiaponhuëꞌ.

Amós 2:4

Naquëranchin Sinioro taantarin: “Cota huënton israiroꞌsantaꞌ, paꞌpi co noyahuëꞌ nipi. Aꞌchintërahuësopita nocanatonaꞌ, pënëntërahuësopitanta co natëpihuëꞌ. Shimashonëna moshapiso chachin inapitanta moshaantapi. Napoaton inapitanta anaꞌintaꞌhuaso yaꞌhuërin.

Jonás 2:8

Aꞌnaquënsoꞌ, mamanshiroꞌsa moshatonaꞌ, aꞌporinën. Caso nipirinhuëꞌ, ‘Yosparinquën Sinioro,’ itatënquën chinotaranquën. Quëma marëꞌ maꞌsha tëparahuato chinotaranquën. Maꞌsona nicacaꞌhuaso shaꞌhuitëranquënsopitantaꞌ, ananiarahuë. Quëmasáchin Sinioro nanitëran nichaꞌëancoisoꞌ,” itërin.

Mateo 16:16

Simon Pitrori itërin: —Quëmasoꞌ Cristo. Yosë huiꞌnin chachinquën. Ina nanpiton, aꞌpaimarinquën, itërin.

Juan 5:26

Tata Yosë inaora nohuanton, nanpirin. Inari piyapiꞌsaꞌ nanpicasoꞌ quëtërin. Inapochachin cantaꞌ ina nohuanton, nanpirahuë. Naporahuaton, aꞌnapitantaꞌ ananpitaꞌhuasoꞌ nanitaparahuë.

Juan 7:18

Aꞌnaquënsoꞌ inahuara yonquinëna quëran aꞌchinpi. Piyapiꞌsari paꞌyatacaiso marëꞌ napopi. Casoꞌ nipirinhuëꞌ Yosëíchin yonquiato, noꞌtëquën aꞌchinahuë. Inaíchin paꞌyatacaisoꞌ yaꞌhuërin, tënahuë. Co nonpintëranquëmahuëꞌ.

Hechos 10:26

Aꞌnaroáchin Pitrori ahuaniantarin. —Huaniquëꞌ iyasha. Co casoꞌ moshancoso yaꞌhuërinhuëꞌ. Piyapico cantaꞌ, itërin.

Hechos 13:32

Quiyantaꞌ, iyaroꞌsaꞌ, noya nanan shaꞌhuitarainquëmaꞌ. Iráca Yosëri shimashonënpoapita nontaton, shaꞌhuitërin.

Hechos 14:21

Inaquë noya nanan shaꞌhuitohuachinaꞌ, naꞌa piyapiꞌsaꞌ Quisoso imasapi. Nani aꞌchintohuachinara, Nistraquë ayamantapi. Ina quëran Iconioquëntaꞌ paantarahuatonaꞌ, Antioquiaquë cancoantapi.

Hechos 14:7

Inatohuaꞌ paatonaꞌ, noya nanan shaꞌhuiantarapi. Yaꞌcariyantaꞌ aꞌchinapi.

Hechos 16:30

Ina quëran cato chachin ocoirahuaton: —¿Maꞌtaꞌ iyaroꞌsaꞌ onpoꞌi chaꞌëcaꞌhuaso marëꞌ? itërin.

Hechos 27:10

—Ama siniororoꞌsaꞌ paꞌahuasohuëꞌ, maꞌsha onpohuatëhuaꞌ, tënahuë. Paꞌpatëhuaꞌ, nancha tapiarëhuaꞌ. Maꞌsharoꞌsantaꞌ aꞌpaitarihuaꞌ. Piyapinpoantaꞌ chimiitochináchin, itërin.

Hechos 27:21

Nani huaꞌquiꞌ co coshatëraihuëꞌ. Chiníquën ihuan manincoi niꞌton, co nanitëraihuëꞌ. Co huachi chiniraihuëꞌ. Paonosoꞌ huancánachin huanirahuaton, itapon: —Natanco iyaroꞌsaꞌ noꞌtëquën shaꞌhuichinquëmaꞌ. Niꞌcoꞌ. Critaquë quëparitacaso marëꞌ shaꞌhuitopiranquëmahuëꞌ, co natëramacohuëꞌ niꞌton, huëꞌnëhuaꞌ. Co huëꞌnëhuahuëꞌ naporini, co maꞌsha onpoꞌitërihuahuëꞌ. Co maꞌsha ayaꞌitonhuëꞌ.

Hechos 27:25

Napoaton iyaroꞌsaꞌ chiníquën cancantocoꞌ. Tëhuënchachin Yosë natërahuë. Co inasoꞌ nonpintërinpoahuëꞌ. Shaꞌhuitërincoso chachin co aꞌnayanpoa tërantaꞌ chimiitarihuahuëꞌ.

Hechos 4:24

Napotohuachinara, napopianachin yonquiatonaꞌ, Yosë nontopi: “Quëmasáchin Sinioro chini chiníquën nanantëran. Isoroꞌpaꞌ, inápaquë yaꞌhuërinsopita, iiroꞌsaꞌ, yaꞌipi maꞌsharoꞌsaꞌ, inapita acoran.

Hechos 7:26

Tahuëririnquë catoꞌ israiroꞌsa capini niahuërapi, Moisësëri quënanconin. “¿Onpoatomataꞌ canpita capini niahuëaramaꞌ? Nanan anoyatocoꞌ,” itërin.

1 Corintios 8:4

Nosha mamanshi chinotacaiso marëꞌ acopisoꞌ aꞌchinchinquëmaꞌ nitotocoꞌ. Co mamanshi nanpirinhuëꞌ. Co ina chinotacasoꞌ yaꞌhuërinhuëꞌ. Tata Yosëíchin chinotacasoꞌ yaꞌhuërin, tënëhuaꞌ.

Efesios 4:17

Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ.

Deuteronomio 32:21

Mamanshi moshapi niꞌton, aꞌpitato noꞌhuitërahuë. Mamanshisoꞌ co máquënhuëꞌ nipirinhuëꞌ, chinotopi. Nisha piyapiꞌsa catahuarahuë niꞌton, canpitariso aꞌpitaramaꞌ. Inapitaso co yonquipirinacohuëꞌ, catahuarahuë. Ina marëꞌ canpitanta noꞌhuitaramaꞌ.

1 Tesalonicenses 1:9

Inapita chachin canpita naporamasoꞌ shaꞌhuiantapi: “Paono niꞌquihuachincoira, noya aꞌchintërincoi. Noya natanatoi, aꞌnaroáchin natërai. Mamanshi aꞌporahuatoi, Tata Yosëíchin chinotërai. Ina imarai huachi. Yosësoꞌ nanpirárin. Inasáchin chinotacasoꞌ yaꞌhuërin.

Hebreos 3:12

Canpitantaꞌ iyaroꞌsaꞌ aꞌnayanquëma tërantaꞌ co cancanëma quëran huarëꞌ natëhuatamahuëꞌ, co noya cancantaramahuëꞌ. Niꞌcona Yosë chachin aꞌpotamaꞌ. Inasoꞌ, iporahuantaꞌ nanpiton niꞌsárinpoaꞌ.

Santiago 5:17

Niꞌcoꞌ. Iniasë canpoa pochachin niponahuëꞌ, chiníquën Yosë nontohuachina, natanin. “Naꞌa piyapiꞌsaꞌ Sinioro co imarinënquënhuëꞌ. Quëma nohuanton, ama oꞌnainsohuëꞌ,” itohuachina, cara piꞌipi naꞌcon co piꞌpisha tërantaꞌ oꞌnaninhuëꞌ.

Josué 3:10

Yosëso nanpiárin. Ipora napoarin quëran catahuarinpoaso anitotarinpoaꞌ. Canpitaso ahuëta marëꞌ paꞌnamaquë, inimicoroꞌsa minsëraꞌpiapomaꞌ. Yosë catahuarinquëma niꞌton, napotaramaꞌ. Cananoꞌsaꞌ ataꞌhuantaramaꞌ. Itiroꞌsaꞌ, iporoꞌsaꞌ, huirisëroꞌsaꞌ, quiriquiroꞌsaꞌ, amororoꞌsaꞌ, quiposoroꞌsaꞌ, inapitanta napotaramaꞌ.

Apocalipsis 14:7

—Yosë tëꞌhuatatomaꞌ, natëcoꞌ. Anaꞌintacasoꞌ tahuëri nani naniriarin niꞌton, inasáchin imacoꞌ. Yaꞌipi isoroꞌpaꞌ, inápaquë yaꞌhuërinsoꞌ, marë, iiroꞌsaꞌ, yaꞌipiya ninin niꞌton, chinotocoꞌ, itarin anquëniri chiníquën nontaton.

Apocalipsis 19:10

Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.

Apocalipsis 19:19

Ina quëran maꞌsha paꞌpi tëꞌhuatoroꞌ nininsoꞌ quënantarahuë. Naꞌa copirnoroꞌsaꞌ sontaroꞌsanënpitarë chachin niyontonapi. Huiri cahuario aipi huënsërinsoꞌ minsëcaiso marëꞌ quira nisapi. Piyapinënpitantaꞌ yaminsëpirinahuëꞌ.

Apocalipsis 22:9

Yachinotopirahuëꞌ, shaꞌhuitërinco. “Ama chinotocosohuëꞌ. Casoꞌ anquënico. Canpita pochachin cantaꞌ Yosë natërahuë. Iráca quëran huarëꞌ aꞌnaquën Yosë nanamën pënëntërin. Quëmantaꞌ pënëntëran. Aꞌnapita iso quirica natanahuatonaꞌ, natëapi. Yaꞌipinpoaꞌ Yosë natërëhuaꞌ. Napoaton inasáchin chinotëquëꞌ,” itërinco.

Apocalipsis 4:11

“Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.

1 Samuel 12:21

Ama mamanshiroꞌsa moshacosohuëꞌ. Inapitasoꞌ, co catahuainpoaso nanitopihuëꞌ. Co nichaꞌëinpoasoꞌ nanitopihuëꞌ. Nonpin yosëroꞌsa niꞌton, co nanitopihuëꞌ.

1 Samuel 17:26

Napopisoꞌ, co Tapi nataninhuëꞌ. Co natanatonhuëꞌ, aꞌnapita sontaroꞌsa natanin: —Canpoasoꞌ, Yosë nanpiárin nininso imarëhuaꞌ. Ina catahuarinpoa ahuëtarëhuaꞌ. Paso huiristinosoꞌ, co ina chinotërinhuëꞌ. ¡Napoaton co piꞌpian tëranta ina pochin noꞌhuiinpoaso yaꞌhuërinhuëꞌ! Insosona ina tëpaton taparo nitarinpoasoꞌ acopitohuachinaꞌ: ¿Maꞌta copirnori quëtapon? itërin.

1 Samuel 17:36

Paꞌpiniꞌ nisapirinhuëꞌ, tocaniꞌ nisapirinhuëꞌ, inapotato tëparaꞌpiarahuë. Paso huiristinonta co Yosë chinotaponahuëꞌ, naporinso marëꞌ inapotarahuë. Canpoasoꞌ, Yosë nanpiárin nininso imarëhuaꞌ. Ina sontaronënpoapita nipirëhuahuëꞌ noꞌhuirinpoa niꞌton, tëpaarahuë.