Hebreos 9:24 - Chayahuita (Shahui)

²⁴ Iráca chinotopiso pëiꞌ, piyapiꞌsari ninin. Quisocristosoꞌ, co inaquë yaꞌconinhuëꞌ. Yosë yaꞌhuërinquë chachin pantarahuaton, canpoa marëꞌ Yosë nontárin. “Oshanënaꞌ inquitaꞌhuaso marëꞌ nani chiminahuë,” taꞌton, nontárin.

Hebreos 9:24 ပူးပေါင်းရင်းမြစ်များ

Mateo 18:10

Ina quëran Quisosori itaantarin: “Ama aꞌna huaꞌhuasha tërantaꞌ nocancosohuëꞌ. Inahuantaꞌ Yosëri nosororin. Nani anquëniroꞌsaꞌ shaꞌhuitërin aꞌnaya aꞌnaya aꞌpaicaiso marëꞌ. Tata Yosëꞌpaꞌ yaꞌhuatonaꞌ, Yosë nontapi. [

Marcos 14:58

—Iꞌhua chachin Quisoso naporin, natanai. “Yosë pëinën piyapiꞌsari nipisoꞌ ataꞌhuantahuato, cara tahuëri quëran anoyatantarahuë. Co piyapiꞌsari nipisohuëꞌ acoantarahuë,” toconin, itopi.

Marcos 16:19

Nani caꞌtanoꞌsanënpita nontohuachina, inápaquë Sinioro Quisoso panantarin. Yosëri quëpantarahuaton, inchinanën quëran ahuënsërin.

Lucas 24:51

Nonin quëran chachin inápaquë panantarin.

Juan 16:28

Tatahuë quëran oꞌmato, isoroꞌpaquë yaꞌhuëpirahuëꞌ. Co huaꞌqui quëranhuëꞌ tatahuë yaꞌhuërinꞌpaꞌ panantarahuë,” itërincoi.

Juan 6:62

Yosë quëran quëmapico niꞌto, aꞌna tahuëri Yosë yaꞌhuërinꞌpaꞌ panantararahuë. Ina niꞌpatamaꞌ ¿maꞌtaꞌ yonquiaramaꞌ?

Hechos 3:21

Iráca quëran huarëꞌ Yosë nohuanton, noya pënëntonaꞌpiroꞌsaꞌ ninopi. ‘Aꞌna tahuëri Yosëri yaꞌipiya anoyatarin,’ topi. Anoyataquë huarëꞌ inápaquë Quisoso yaꞌhuantarin.

Romanos 8:33

Yosë huayoninpoaꞌ niꞌquëhuarëꞌ, co insonta nanitërinhuë shaꞌhuirapinpoasoꞌ. Yosë chachin noya niꞌninpoaꞌ.

2 Corintios 5:1

Niꞌcoꞌ. Pëiꞌ nëꞌmëtë quëran nipachinara, co huaꞌquirinhuëꞌ. Inapochachin nonënpoantaꞌ co yaꞌhuëmiatarinhuëꞌ. Chiminpatëhuaꞌ, Yosëꞌpaꞌ paꞌpatëhuaꞌ, nasha nonënpoaꞌ Yosë quëtarinpoaꞌ. Noya noya nininsoꞌ quëtarinpoaꞌ. Inasoꞌ co onporontaꞌ chanatarinhuëꞌ.

Colosenses 3:2

Ama maꞌsharáchin yonquicosohuëꞌ. Yosëꞌpaꞌ yaꞌhuërinsopita yonquirácoꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 12:2

Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

Hebreos 6:20

Quisosoꞌton nani inápaquë panantarin tapatinpoaso marëꞌ. Inaquë yaꞌhuëmiatarin. Corto huaꞌan chini chiníquën nanantërinso pochin niꞌton, canpoa marëꞌ Yosë nontarin. Miriquiso pochin ninin. Co onporontaꞌ pipiarinhuëꞌ.

Hebreos 8:2

Iráca cotioroꞌsaꞌ chinotopiso pëiꞌ nipi Yosë chinotacaiso marëꞌ. Inápaquë yaꞌhuërinso chachin nonanpi. Inaquë corto huaꞌanoꞌsari piyapiꞌsa marëꞌ Yosë nontopi. Quisocristoso nipirinhuëꞌ inápaquë Yosëri acorinquë chachin canpoa marëꞌ ina nontárin. Inaquësoꞌ noya noya catahuarinpoaꞌ.

Hebreos 8:5

Corto huaꞌanoꞌsaso chinotopiso pëiquë Yosë marëꞌ sacatopi. Inasoꞌ, inápaquë yaꞌhuërinso chachin nonanpisoꞌ. Iráca chinotopiso pëiꞌ yanipachinara, Yosëri Moisësë itërin: “Chinotamacoso marëꞌ nëꞌmëtë pëiꞌ nicoꞌ. Motopiquë aꞌnotëranquënso chachin niquëꞌ,” itërin.

Hebreos 9:1

Iráca anoyatërinso shaꞌhuitohuachina, Moisësë nani maꞌsha shaꞌhuitërin onporahuatonsona Yosë chinotacaiso marëꞌ. Ina marëꞌ chinotopiso pëiꞌ nipi.

Hebreos 9:23

Iráca maꞌpitasona inápaquë yaꞌhuërinsopita nonanpisoꞌ, huënai quëran taꞌsatopi anoyatacaso marëꞌ. Maꞌsha inápaquë yaꞌhuërinsopitaso nipirinhuëꞌ, noya noya huënaiꞌ nohuantërin.

Hebreos 9:9

Iporahuantaꞌ ina yonquihuatëhuaꞌ, nitotarihuaꞌ. Iráca pënëntërinsoꞌ co natëhuachinahuëꞌ, maꞌsha tëpapi ama Yosëri anaꞌintacaso marëhuëꞌ. Nipirinhuëꞌ, co ina marëꞌ oshanën inquitërinhuëꞌ.

1 Pedro 3:22

Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.

Apocalipsis 8:3

Coꞌhuara pihuiyatërasoihuëꞌ, aꞌna anquënintaꞌ huëcaton, Yosë chinotopiquë artaroaꞌhuaya notënanquë huaniconin. Aꞌpëtinan oro quëran nininsoꞌ sëꞌquërin. Inaquë naꞌa yonarin pochin pimóchin nininsoꞌ acorin panca tomontacaso marëꞌ. Yosë yaꞌhuërinquë chachin tomontarin. Tomontërinso pochin Yosë imapisopitantaꞌ ina nontápi. “Ma noyanquëncha quëmaso paya. Nani tahuëri catahuacoi, Sinioro,” itohuachinara, noya natanin.