Hebreos 7:25 - Chayahuita (Shahui)

²⁵ Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

Hebreos 7:25 ပူးပေါင်းရင်းမြစ်များ

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 53:12

Napoaton Siniorori, chiníquën nanantopisopitarëꞌ acoapon. Chiníquën nanantopisopitantaꞌ, inari catahuapon canatacaisoꞌ. Canatohuachinara, inanta canatarin. Inaora nohuanton chimininso marëꞌ napoapon. Naporahuaton, “co noyahuëꞌ nininso marëꞌ parisitërin,” itopiso marëꞌ napoapon. Napotopirinahuëꞌ, naꞌa piyapiꞌsa oshanëna marëꞌ inaso parisitërin. Naporahuaton, oshahuanoꞌsa catahuacaso marëꞌ Yosë nontërin.

Isaías 63:1

Aꞌnara huëꞌsarinso nicato: —Itomoroꞌsa copirnonëna yaꞌhuërinso ninanoꞌ, Posora itopi. Inatohuaran aꞌnara quëmapi huëꞌsarin. Quëhuanën quëran aꞌshitahuatë aꞌmorëso pochin huëꞌsarin. Chiníquën nanantonaꞌpi aꞌmorinso pochin aꞌmorin. Co macari tëranta chinitochináchinhuëꞌ, yaꞌnorin. ¿Incha inaso nicaya? tënahuë. Napoasoco chachin: —Ca huëꞌsarahuë. Canatërahuësoꞌ, shaꞌhuitaranquëmaꞌ. Chiníquën nanantato nichaꞌëcaꞌhuasoꞌ nanitaparahuësontaꞌ, shaꞌhuitaranquëmaꞌ, itërinco.

Daniel 3:15

Iporaso nipirinhuëꞌ, moshacamaso yaꞌhuërin. Mosica piꞌnirahuachinaꞌ, mamanshi anitërahuësoꞌ isonama quëran noꞌpaquë huarëꞌ monshorahuatomaꞌ, moshaaramaꞌ. Coꞌsoꞌ inapohuatamahuëꞌ, naporo chachin orno huënaratapaquë tëꞌyatarinënquëmaꞌ. Inapotohuachinquëmaꞌ, ¡co inso yosë tërantaꞌ, nichaꞌëinquëmaso nanitaponhuëꞌ! itërin.

Daniel 3:29

Napoaton inso tëranta isopita huiꞌnapiꞌsa Yosë chinotopiso pinopachin, tëpaꞌinaꞌ. Inapotahuatona yaquiꞌinaꞌ. Pëinëonta amoro tëꞌyatacaiso marëꞌ yaꞌhuëapon. Intohuasona yaꞌhuëpirinahuë tërantaꞌ, inapochinaꞌ. Ma nananquësona nonpachinantaꞌ, inapotacaiso yaꞌhuërin. Co aꞌna yosë ina pochin nichaꞌëcaso nanitërinhuëꞌ niꞌton, inapochinaꞌ,” tënin.

Daniel 6:20

Nani yaꞌcaritohuachina, co napion ancantaton: —¡Naniri. Quëmaso Yosëíchin cancantaton natëran! Inasoꞌ nanpiárin nichinapon chachin, ¿nichaꞌërinquën paꞌpiniroꞌsa quëran to? itërin.

Daniel 9:16

Quëmasoꞌ noyanquën ninansoꞌ nitotërai. Quirosarinquë yaꞌhuëpisopita paꞌpi noꞌhuiton anaꞌintëran. Inapotëranso sanoaton, catahuaantaquëꞌ. Inaso ninanoꞌ, quëma ninanonën. Inaquë chinotiinënquënso marëꞌ pëi acoran. Aꞌnapita nacionoꞌsa ina pirayan yaꞌhuëpisoꞌ, Quirosarinquë yaꞌhuëpisopita yonquiatona tëhuapi. Quiyaora tëhuënëhuëiquë, inapotërinacoi. Shimashonëhuëipitanta tëhuëpi niꞌton, inapotërinacoi.

Juan 14:13

Ca pochin yonquihuatamaꞌ, nanan quëchinquëmaꞌ Tatahuë nontacamaso marëꞌ. “Huiꞌnan chachin nanan quëtërinco,” taꞌtomaꞌ, ina nontocoꞌ. Ca pochin cancantatomaꞌ, maꞌsona nipatamaco acotaranquëmaꞌ. Aꞌnapitantaꞌ Tata Yosë noya noya nicacaiso marëꞌ inapoarahuë. Ina naꞌcon nohuantërahuë.

Juan 14:16

Inápaquë panantahuato, Tata nontarahuë Ispirito Santo aꞌpatimarinquëmaꞌ. Inaso ca pochachin catahuarinquëmaꞌ, achinicancanarinquëmaꞌ. Co onporontaꞌ patarinquëmahuëꞌ.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Romanos 5:10

Iráca oshahuanatëhuaꞌ, Yosë inimicotopirëhuahuëꞌ, huiꞌnin chiminin niꞌton, nanan anoyatërinpoaꞌ. Iporasoꞌ noya nipayarëhuaso pochin ninëhuaꞌ niꞌton, noya noya catahuarinpoaꞌ. Nanpiantarin niꞌton, catahuarinpoaꞌ noya chaꞌëcahuaso marëꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 8:34

Yosë noya niꞌninpoa niꞌton, co insonta nanitërinhuë anaꞌintinpoasoꞌ. Quisocristo oshanënpoaꞌ inquitinpoaso marëꞌ chiminin. Ina quëran nanpiantarin. Yosë inchinanën quëran yaꞌhuaton, canpoa marëꞌ Yosë nontárin.

1 Corintios 1:21

Ina nohuanton, piyapi inahuara yonquinëna quëran co nanitopihuëꞌ Yosë nohuitacaisoꞌ. Quisocristo chimininsoꞌ aꞌchinárai. Aꞌnaquënsoꞌ ina natanpachinara, tëhuapi. Canpoaso nipirinhuëꞌ natëhuatëhuaꞌ, anoyacancantërinpoaꞌ. Ina Yosë nohuantërin.

Efesios 2:18

Quisocristo chiminin niꞌton, yaꞌipinpoaꞌ nanitërëhuaꞌ Tata Yosë nontacasoꞌ. Ispirito Santo catahuarinpoaꞌ niꞌton, ina nontohuatëhuara, noya nataninpoaꞌ.

Efesios 3:12

Ina imarëhua niꞌton, natëtëhuaꞌ, Yosë nontarihuaꞌ. “Anoyacancantërinpoaꞌ niꞌton, noya natanarinpoaꞌ,” taꞌtëhuaꞌ, co tëꞌhuatarihuahuëꞌ. Noya cancantatëhuaꞌ, ina nontarëhuaꞌ.

Efesios 3:20

Tata Yosësoꞌ chini chiníquën nanantaton, yaꞌipi nanitaparin. Huaꞌyanën chachin nani yaꞌcoancantërinpoaꞌ niꞌton, noya catahuarinpoaꞌ. Nani tahuëri achinicancaninpoaꞌ niꞌton, cancanënpoa quëran huarëꞌ Yosë yonquiaꞌahuaꞌ. Ina nontohuatëhuaꞌ, “Catahuaco,” itohuatëhuaꞌ, naꞌcon catahuarinpoaꞌ. Naꞌcon nohuantopirëhuahuëꞌ, naꞌcon naꞌcon inasoꞌ nanitaparin nicacasoꞌ. Co nitotërëhuasohuëntaꞌ nanitaparin.

Filipenses 3:21

Iporasoꞌ nonënpoaꞌ co chinirinhuëꞌ. Yacaniorëhuaꞌ. Chiminacasoꞌ yaꞌhuërin. Nipirinhuëꞌ, Quisocristo oꞌmantahuachin, nonënpoaꞌ anishatarin. Ina pochachin yaꞌnoarihuaꞌ. Nanitaparin niꞌton, yaꞌipi minsërahuaton, ananpitomiatarinpoaꞌ, noya noya acoarinpoaꞌ.

1 Timoteo 2:5

Yosëíchin chinotacasoꞌ yaꞌhuërin. Oshahuanëhuaꞌ niꞌton, inimicotopirëhuahuëꞌ, Quisocristo nanan anoyatërinpoaꞌ. Inasáchin Yosë anohuitërinpoaꞌ. Inasoꞌ Yosë niponahuëꞌ, piyapi chachin nasitimarin.

2 Timoteo 1:12

Ina marëꞌ aparisitopirinacohuëꞌ, co tapanato yaaꞌporahuëꞌ. Quisocristo imamiatarahuë. Ina nohuitato, inasáchin natërahuë. Yaꞌipi nanitaparin. Nani shaꞌhuitërinco nanamën aꞌchinaꞌhuasoꞌ niꞌton, noya aꞌpaiarinco. Oꞌmantaquë huarëꞌ nanamën yaꞌhuëmiatarin, tënahuë.

Hebreos 11:6

Yosë yonquihuatëhuaꞌ, natëtacasoꞌ yaꞌhuërin. “Yosë yaꞌhuárin. Noꞌtëquën nontërinpoaꞌ. Ina nontohuatëhuaꞌ, natanatonpoaꞌ catahuarinpoaꞌ,” topatëhuaꞌ, noya niꞌsarinpoaꞌ. Co ina pochin cancantohuatëhuahuëꞌ, co onporontaꞌ noya niꞌsarinpoahuëꞌ.

Hebreos 13:15

Napoaton iporasoꞌ co huachi maꞌsha tëparihuahuëꞌ Yosë chinotacaso marëꞌ. Nani tahuëri ina chinotatëhuaꞌ, “Ma noyanquëncha Tata Yosë quëmaso paya. Quisocristoíchin anoyacancantërincoi niꞌton, ‘Yosparinquën Sinioro,’ itërainquën,” itahuaꞌ.

Hebreos 2:18

Inantaꞌ sopairi tënihuachina, parisitërin niꞌton, yanonpintërinsoꞌ ninatanin antaꞌ. Napoaton sopai yaminsëhuachinpoaꞌ, ina nanitërin catahuainpoasoꞌ. Catahuarinpoaꞌ ama sopai natëcaso marëhuëꞌ.

Hebreos 2:9

Quisososo nipirinhuëꞌ yonquiaꞌahuaꞌ. Inasoꞌ isoroꞌpaquë oꞌmaton, piyapi chachin nasitimarin. Parisitaton, canpoa marëꞌ chiminin. Napoaton Yosëri chiníquën nanan quëtërin yaꞌipi huaꞌanëntacaso marëꞌ. Inaora nohuanton, Yosë nosoroatonpoaꞌ, huiꞌnin aꞌpatimarinpoaꞌ yaꞌhuërëtinpoaso marëꞌ. Yaꞌipi piyapinpoa marëꞌ chiminin.

Hebreos 5:7

Quisocristo isoroꞌpaquë oꞌmarahuaton, piyapi chachin nasitimarin. Yatëpahuachinara, chiníquën Yosë nontërin. Naꞌnëton, itapon: “Quëma nohuantohuatan Tata, nichaꞌëco, ama tëpaꞌinacosohuëꞌ. Nipirinhuëꞌ, co quëma nohuantohuatanhuëꞌ, maꞌsona yaonpotohuatancontaꞌ noya,” itërin. Noꞌtëquën yanatërin niꞌton, Yosëri natanaton, catahuarin noya natëcasoꞌ.

Hebreos 7:16

Co Nihuiroꞌsaꞌ huënton quëran yaꞌconpiso pochin nininhuëꞌ. Inasoꞌ chiminaponahuëꞌ, nanpiantarahuaton, yaꞌhuëmiatarin. Napoaton chiníquën nanantaton, noya noya yaꞌconin.

Hebreos 7:19

Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.

Hebreos 7:24

Quisocristoso nipirinhuëꞌ nanpiantarahuaton, yaꞌhuëmiatërin niꞌton, canpoa marëꞌ Yosë nontárin. Co incari tërantaꞌ yaꞌhuërëtërinhuëꞌ.

Hebreos 7:8

Isoroꞌpaquë corto huaꞌanoꞌsari diesmo maꞌpatopirinahuëꞌ, inapitantaꞌ piyapiꞌsaꞌ niꞌton, chiminpi antaꞌ. Miriquisoso nipirinhuëꞌ nanpiarin pochin cancantërëhuaꞌ. Yosë quiricanën nontërëhuaꞌ quëran, naporëhuaꞌ.

Hebreos 9:24

Iráca chinotopiso pëiꞌ, piyapiꞌsari ninin. Quisocristosoꞌ, co inaquë yaꞌconinhuëꞌ. Yosë yaꞌhuërinquë chachin pantarahuaton, canpoa marëꞌ Yosë nontárin. “Oshanënaꞌ inquitaꞌhuaso marëꞌ nani chiminahuë,” taꞌton, nontárin.

Judas 1:24

Tata Yosësoꞌ yaꞌipi nanitaparin. Noya aꞌpaiarinquëmaꞌ ama anotërëso pochin tëhuëcamaso marëhuëꞌ. Catahuahuachinpoaꞌ, co sopai minsëarinpoahuëꞌ. Noya noya tapararinpoaꞌ imamiatacaso marëꞌ. Aꞌna tahuëri yaꞌhuërinquë noya niꞌsarinpoaꞌ. Inatohuasoꞌ noya noya. Capa cancantarihuaꞌ. Tata Yosëíchin huaꞌanëntërinpoaꞌ. Ina nohuanton, Quisocristo nichaꞌësarinpoaꞌ. Inasáchin catahuarinpoaꞌ noya chinotacasoꞌ. Ma noyacha Tata Yosëso paya. Iráca quëra huarëꞌ chini chiníquën nanantërin. Noya noya niꞌton, yaꞌipi piyapiꞌsari chinochinaꞌ. Inasáchin natëahuaꞌ. Ama onporontaꞌ naniantahuasohuëꞌ. Amen. Nani huachi. Cotasë