Hebreos 7:18 - Chayahuita (Shahui)

¹⁸ Iráca corto huaꞌanoꞌsaꞌ pënëntërinsoꞌ nanan imapirinahuëꞌ, co oshanënaꞌ inquitërinhuëꞌ. Co tëhuënchachin catahuarinhuëꞌ. Napoaton co imacasoꞌ yaꞌhuërinhuëꞌ.

Hebreos 7:18 ပူးပေါင်းရင်းမြစ်များ

Romanos 3:31

Quisocristoíchin anoyacantërinpoaꞌ niꞌton, iráca pënëntërinsoꞌ ¿co huachi paꞌtërinhuë pochin nitërëhua ti? ¡Co naporinhuëꞌ! Ina quëran oshahuanëhuasoꞌ nitotarihuaꞌ. Quisocristo imapatëhuaꞌ, catahuarinpoaꞌ noya natëcasoꞌ.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

Gálatas 3:15

Niꞌcochi iyaroꞌsaꞌ. Iso pochin shaꞌhuichinquëmaꞌ yonquicamaso marëꞌ. Maꞌsha mapatëra, quirica quëtërinënpoꞌ. Quëtohuachinënpora, huaꞌani nininën acorahuaton, huiꞌsharin. Ina quëran co insontaꞌ nanitërinhuëꞌ canpiacasoꞌ. Co aquëtëꞌ ninshitacasoꞌ yaꞌhuërinhuëꞌ. Naporahuaton, co tapicasoꞌ yaꞌhuërinhuëꞌ. Yaꞌnan ninshitërinsoráchin yaꞌhuëmiatarin.

Gálatas 3:17

Iráca Apraanëꞌ anoyataton, itapon: “Aꞌna tahuëri quëma shiparin yaꞌhuëhuachin, yaꞌipi piyapiꞌsaꞌ anoyacancantarin. Caora nohuanto, nichaꞌësarahuë. Noꞌtëquën nontaranquën. Co onporontaꞌ naniantarahuëꞌ,” itërin Yosëri. Ina quëran catapini pasa cara shonca piꞌipi naꞌhuëhuachina, cotioroꞌsaꞌ pënënin nani maꞌsha natëcaiso marëꞌ. Pënënpirinhuëꞌ, Apraanëꞌ iráca anoyatërinsoꞌ co naniantërinhuëꞌ. Yosëri nani shaꞌhuitohuachina, co onporontaꞌ nonpininhuëꞌ.

Gálatas 3:21

Ina pochin niꞌquëhuarëꞌ Moisësë pënëntërin niꞌton, ¿Yosëri Apraan shaꞌhuitërinsoꞌ tapirin ti? Co naporinhuëꞌ. Pënëntërinsoꞌ noya noya nicaton, anoyacancantërinpoaꞌ naporini, ina natërëhuaso marëꞌ Yosë noya niꞌitonpoahuëꞌ.

Gálatas 4:21

Natanco iyaroꞌsaꞌ Moisësë pënëntërinsoꞌ yanatëramasopita. ¿Co yaꞌipi Moisësë ninshitërinsoꞌ natanamahuëꞌ ti?

Gálatas 4:9

Iporasoꞌ Yosë nohuitëramaꞌ. Inantaꞌ huiꞌninpita pochin nicatënquëmaꞌ, noya nohuitërinquëmaꞌ. Nani nichaꞌëpirinquëmahuëꞌ, ¿maꞌmarëcha naquëranchin iráca pënëntërinsoꞌ, aꞌnapita piyapiꞌsaꞌ natëtopisoꞌ, inapita natëtomaꞌ, tëꞌhuachinachin cancantantaramaꞌ? tënahuë. Inapita natëapomarahuëꞌ, co ina marëꞌ noyápiachin cancantëramahuëꞌ.

1 Timoteo 4:8

Nani tahuëriya sacatohuatëhuara, chinipirëhuahuëꞌ, noya noya Yosë imacasoꞌ yonquihuatëhuaꞌ, achinicancaninpoaꞌ. Achinicancanpachinpoaꞌ, noya noya nisarëhuaꞌ, tënahuë. Noya noya imapatëhuaꞌ, isoroꞌpaquë noya nanpiarëhuaꞌ. Aꞌna tahuërintaꞌ Yosëꞌpaꞌ nanpimiatarihuaꞌ.

Hebreos 13:9

Aꞌnaquën nisha aꞌchintohuachinënquëmaꞌ, ama natancosohuëꞌ, nonpintochinënquëmaꞌ. Noꞌtëquën yonquicoꞌ. Nisha nisha nicacasoꞌ pënënpirinënpoahuëꞌ, co ina quëran noya cancantërëhuahuëꞌ. Naꞌa piyapiꞌsaꞌ nisha nisha cosharoꞌ aꞌpoaponaraihuëꞌ, co noya cancantopihuëꞌ. Quisocristoíchin nanitërin anoyacancantinpoasoꞌ. Inaora nohuanton, nosoroatonpoaꞌ, catahuarinpoaꞌ imamiatacasoꞌ.

Hebreos 7:19

Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.