Hebreos 6:2 - Chayahuita (Shahui)

² Ina quëran aporihuanacasontaꞌ aꞌchintërainquëmaꞌ. Naporahuaton, “Nani imapachinaꞌ, sëꞌhuamotorahuatomaꞌ, Yosë nontocoꞌ inari catahuacaso marëꞌ,” itërainquëmaꞌ. Ina quëran Yosë ananpitaantainpoaso yaꞌhuërinsontaꞌ aꞌchintërainquëmaꞌ. “Ayaroꞌ tahuëri yaꞌipinpoaꞌ noꞌtëquën shaꞌhuitarinpoaꞌ. Co noyahuëꞌ nipisopita anaꞌintomiatarin,” itërainquëmaꞌ. Yaꞌnan imapomaꞌ, inapitaꞌton anitotërainquëmaꞌ. Inasoꞌ noya nipirinhuëꞌ, co inaíchin yonquicasoꞌ yaꞌhuërinhuëꞌ.

Hebreos 6:2 ပူးပေါင်းရင်းမြစ်များ

Mateo 28:19

Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

Mateo 3:14

Napotopirinhuëꞌ, co nohuantërinhuëꞌ. —¿Maꞌmarëtaꞌ napotiiranco? Co aporintaꞌhuanquënsoꞌ yaꞌhuërinhuëꞌ. Quëma aporintoco tëhuënchinsoꞌ, itërin.

Marcos 16:16

Insosona noya nanan natëhuachinaꞌ, chaꞌësapi. Aporihuanahuatonaꞌ, imapachinaco, chaꞌësapi huachi. Co nanamëhuë natëhuachinahuëꞌ, Yosëri anaꞌintarin.

Marcos 7:4

Mircatoquë paꞌpi quëran yacoshatohuachinara, iꞌquë niopoimiratopi. Naꞌa nisha nisha inachintopisopita yaꞌhuëtopi. Minëroꞌsaꞌ, iꞌsha taꞌpainanoꞌsaꞌ, huaꞌna yonsharoꞌsaꞌ, pëꞌsararoꞌsaꞌ, inapita paꞌmopi.

Marcos 7:8

Inapochachin canpitantaꞌ Yosë pënëninpoasoꞌ naniantahuatomaꞌ, piyapiꞌsaꞌ aꞌchinpisoꞌ natërama huachi, itërin.

Lucas 11:38

Parisioroꞌsasoꞌ yacoshatohuachinara, iꞌshaquë piꞌpian niopoimiratopi. “Inapohuatëhuaꞌ, oshanënpoaꞌ inquiarëhuaꞌ,” topi. Quisososo nipirinhuëꞌ yacoshatohuachina, co ina pochin nininhuëꞌ. Ina marëꞌ pëiꞌ huaꞌanën paꞌyanin. “¿Onpoatontaꞌ topinan coshatarin?” taꞌton, yonquirarin.

Lucas 14:14

Ina quëran noya cancantaran. Inapitasoꞌ co nanitopihuëꞌ amatantaꞌinënquënsoꞌ. Co iꞌhuërëtopirinënquënhuëꞌ, Yosësoꞌ iꞌhuërëtarinquën. Noya ninan niꞌton, ayaroꞌ tahuëri ananpitaantahuachinquën, acanaarinquën huachi, itërin.

Lucas 3:16

Ina natanahuaton, Coanshari itërin: —Aporintëranquëma mini nipirinhuëꞌ, co casoꞌ Cristocohuëꞌ. Ca piquëran inasoꞌ huëꞌsarin. Inaso chini chiníquën nanantërin. Casoꞌ co piꞌpisha tërantaꞌ ina pochin chiníquën nanantërahuëꞌ. Co maquëyancohuëꞌ niꞌton, co sapatën iꞌquiritaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ, pënquë chiníquën anaꞌintarinquëmaꞌ.

Juan 5:29

Natanpachinaco, poꞌoro quëran pipiapi. Noya nipisopita noya noya nanpiantarapi. Co noyahuëꞌ nipisopitaso nipirinhuëꞌ, anaꞌintarahuë,” tënin Quisoso.

Hechos 10:47

—Isopitantaꞌ canpoa pochin Ispirito Santori yaꞌcoancantërin niꞌquëhuarëꞌ aporihuainaꞌ, tënahuë.

Hechos 13:3

Napoaton co coshatatonaraihuëꞌ, inapita marëꞌ chiníquën Yosë nontopi. Nani Yosë nontohuachinara, sëꞌhuamotorahuatonaꞌ, acopi paatonaꞌ aꞌchinacaiso marëꞌ. Ina quëran aꞌpapi.

Hechos 16:15

Quisocristo imarin niꞌton, aporintërin. Pëinënquë yaꞌhuëpisopitarë chachin aporihuanpi. —Cantaꞌ Sinioro imarahuë niꞌton, huëcoꞌ pëinëhuëquë yacapacoi, itërincoi. Naꞌcon shaꞌhuitohuachincoira, inaquë huachi yacaparai.

Hechos 16:33

Tashinan pëiꞌ huaꞌansoꞌ noya natanahuaton, natërin. Tashiꞌ nipirinhuëꞌ, quëparahuaton, nicarotopisoꞌ paꞌmopirin. Napohuachina, Quisoso imapi huachi niꞌton, yaꞌipiya aporintërin.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 2:38

Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

Hechos 2:41

Napotohuachina, naꞌa natëtopi. Naporahuatonaꞌ, iꞌquë aporihuanpi. Naporoꞌ tahuëri cara huaranca pochin piyapiꞌsaꞌ yaꞌconpi. Quisoso imasapi.

Hechos 23:6

Cotio huaꞌanoꞌsaꞌ huëꞌpisopita co napopianachin yonquipihuëꞌ. Patoma satosioroꞌsaꞌ, patomasoꞌ, parisioroꞌsaꞌ. Ina yonquiaton, Paonori itantarin: —Casoꞌ iyaroꞌsaꞌ, Parisioco. Shimashonëhuëpitantaꞌ parisioroꞌsa chachin. “Yosë ananpitaantarinpoaꞌ,” tënahuëso marëꞌ isopita shaꞌhuirapirinaco, itërin.

Hechos 24:15

“Yosë noꞌtëquën nontërinpoaꞌ,” taꞌto natërahuë. “Aꞌna tahuëri yaꞌipi piyapiꞌsaꞌ ananpitaantarahuë. Noya piyapiꞌsaꞌ, co noya piyapiꞌsahuëꞌ, yaꞌipi ananpitaantarahuë,” tënin Yosë. Ina tahuëri casoꞌ ninarahuë. Isopitantaꞌ ina ninarapi.

Hechos 24:21

Naporoꞌ isoíchin napotërahuë. “Yosë ananpitaantarinpoaꞌ tënahuëso marëꞌ ipora shaꞌhuirapirinaco,” itërahuë, tënin Paono.

Hechos 24:25

Yosë shaꞌhuitërinpoaꞌ noya cancantacaso marëꞌ. Ina catahuarinpoaꞌ co noyahuëꞌ yonquirëhuasopita naniantacasoꞌ. Aꞌna tahuëri coisë pochin nicaton, yaꞌipi piyapiꞌsaꞌ natanarin. Co noyahuëꞌ nipisopita anaꞌintarin,” tënin Paono. Napotohuachina, huaꞌan paꞌpi paꞌyanin. —Nani huachi. Iporasoꞌ paquëꞌ. Aꞌna tahuëri yanontaantahuatënquën, amataantaranquën, itërin.

Hechos 26:8

Aꞌna tahuëri Yosë ananpitaantarinpoaꞌ, tënai. ¿Onpoatomataꞌ canpitasoꞌ co ina yanatëramahuë? tënahuë.

Hechos 4:2

Piyapiꞌsaꞌ aꞌchintopiso marëꞌ noꞌhuipi. “Quisoso nanpiantarin niꞌton, nanpiantacasoꞌ yaꞌhuërin,” topiso marëꞌ noꞌhuipi.

Hechos 6:6

Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi.

Romanos 2:16

Ayaroꞌ tahuëri yaꞌipi co noyahuëꞌ yonquirëhuasopita aipitarinpoaꞌ. Poꞌoana quëran maꞌsona tërantaꞌ onporëhuasopita aꞌninquëchin anitotarinpoaꞌ. Naporoꞌ tahuëri Tata Yosë nohuanton, Quisocristo noꞌtëquën shaꞌhuitarinpoaꞌ. Co noyahuëꞌ nipatëhuaꞌ, anaꞌintarinpoaꞌ. Ina nanan yaꞌipi parti shaꞌhuirarahuë.

1 Corintios 10:2

Marë quëran chaꞌërahuatonaꞌ, Moisësë imapi. Chitorontaꞌ quëchitërarin. (Inapochachin iporasoꞌ Quisocristo natërëhuaꞌ niꞌton, aporihuanatëhuaꞌ, imarëhuaꞌ.)

1 Corintios 12:13

Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.

2 Corintios 5:10

Aꞌna tahuëri Quisocristo oꞌmantahuachin, yaꞌipinpoaꞌ coisë pochin shaꞌhuitarinpoaꞌ. Yaꞌipi ninëhuasopita yonquiaton, aꞌnaya aꞌnayanpoaꞌ noꞌtëquën nontarinpoaꞌ. Co noya nipatëhuahuëꞌ, co Yosëꞌpaꞌ acanaarinpoahuëꞌ. Noya nipatëhuaꞌ, acanaarinpoa huachi.

Filipenses 3:21

Iporasoꞌ nonënpoaꞌ co chinirinhuëꞌ. Yacaniorëhuaꞌ. Chiminacasoꞌ yaꞌhuërin. Nipirinhuëꞌ, Quisocristo oꞌmantahuachin, nonënpoaꞌ anishatarin. Ina pochachin yaꞌnoarihuaꞌ. Nanitaparin niꞌton, yaꞌipi minsërahuaton, ananpitomiatarinpoaꞌ, noya noya acoarinpoaꞌ.

Colosenses 2:12

Aporihuanpatëhuaꞌ, Quisocristo pochin ninëhuaꞌ. Chiminpachina, paꞌpitopirinahuëꞌ. Yosë nohuanton, nanpiantarin. Inapochachin canpoantaꞌ co noyahuëꞌ yonquirëhuasopita naniantarihuaꞌ. Ina quëran Quisocristo nanpiantarinso pochin ninëhuaꞌ. “Yosë yaꞌipiya nanitaparin,” topatëhuaꞌ, catahuarinpoaꞌ ina pochin nicacasoꞌ.

2 Timoteo 2:18

Yosë noꞌtëquën aꞌchintopirinpoahuëꞌ, co huachi natëpihuëꞌ. “Yosë nani piyapiꞌsaꞌ ananpitatë pochin nitërin. Co huachi aꞌna tahuëri ananpitaantarinpoahuëꞌ,” toconpi. Napopi niꞌton, co huachi aꞌnaquën imapihuëꞌ.

Hebreos 11:35

Sanapiꞌsantaꞌ huaꞌhuinpita chiminpachina, Yosë natëpi niꞌton, ina nohuanton nanpiantapi huachi. Aꞌnaquënso nipirinhuëꞌ Yosë natëtonaꞌ, chiníquën parisitopi. “Yosë aꞌpocoꞌ tëpachinënquëmaꞌ,” itopirinahuëꞌ, co yaaꞌpopihuëꞌ. “Co onporontaꞌ aꞌpoaraihuëꞌ. Yosë noya noya ananpitaantarincoi,” taꞌtonaꞌ, imapiso marëꞌ chiminpi.

Hebreos 9:10

Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.

2 Pedro 3:7

Inapochachin ipora isoroꞌpaꞌ, piꞌiroꞌtëꞌ, inapita yaꞌhuëpirinahuëꞌ, nani Yosëri chinotërin anaꞌintacasoꞌ: “Aꞌna tahuëri pën quëran ataꞌhuantarahuë,” tënin niꞌton, tahuëri nanihuachin, pën quëran chachin ataꞌhuantarin. Naporoꞌ tahuëri yaꞌipi oshahuanoꞌsaꞌ chiníquën anaꞌintarin. Parisitopiquë aꞌpararin.