Hebreos 6:19 - Chayahuita (Shahui)

¹⁹ Niꞌcoꞌ. Nanchaquë paꞌpachinara, aꞌna tahuëri panca ihuan nacapipi. Chiníquën coꞌsacaitërin. Naporoꞌ huaꞌna quëquën nininsoꞌ aꞌsonahuatonaꞌ, tëꞌyaitopi. Acopoiꞌ noꞌpaquë niꞌtoromahuachina, sano yanponin. Co coꞌsacairi tërantaꞌ chiꞌhuincarinhuëꞌ. Inapochachin canpoantaꞌ aꞌna tahuëri maꞌsha onporëhuaꞌ, parisitërëhuaꞌ, sëtërëhuaꞌ, naporëhuaꞌ. Inapohuatëhuaꞌ, Yosë yonquiaꞌahuaꞌ. “Inasoꞌ noꞌtëquën nontërinpoaꞌ. Nichaꞌësarinpoaꞌ. Co onporontaꞌ naniantarinpoahuëꞌ,” topatëhuaꞌ, sano cancantarihuaꞌ. Yosësoꞌ co quënanarihuarahuëꞌ, inápaquë yaꞌhuárin. Ina yonquiatëhuaꞌ, ninarëhuaꞌ.

Hebreos 6:19 ပူးပေါင်းရင်းမြစ်များ

Salmos 42:11

Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Salmos 42:5

Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! “Sinioro catahuaantaponco,” tënahuë. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Salmos 43:5

Parisitápirahuëꞌ, ¡ama huachi sëchisohuëꞌ! ¡Ama huachi napion ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Isaías 28:16

Napoaton Sinioro naporin: “Niꞌquëꞌ. Sionquë aꞌnara naꞌpi acoarahuë. Noyá huayonpinan nisahuaton, paꞌpi paꞌton. Inari pëi achiniarin. Ina, pëi simintonën pochin nisarin. Insosona natëhuachinco, co tëꞌhuarëꞌna yaꞌhuëaponhuëꞌ.

Levítico 16:15

Nani inapotohuachin, chipo israiroꞌsa oshanëna marëꞌ, nininsoꞌ tëpaꞌin. Tëpahuachin, huënainën sënanquë main. Ina huënaiꞌ masahuaton, noya noya patoanaquë quëpapon. Inaquë caposonëhuë aꞌtanamën aipi taꞌsatapon. Ina quëran caposonëhuë aꞌtanamën notënan quërantaꞌ, taꞌsatapon. Toroaꞌhua huënainën quëran napotërinso chachin nitarin.

Zacarías 9:12

Naquëranchin Sinioro taantarin: “Naꞌaquëma nisha nisha parti quëpapirinënquëmahuëꞌ: ‘Sinioro nichaꞌësarinpoaꞌ,’ taꞌtoma ninaramaco. ¡Iporaso tahuëri nanirin niꞌton, Quirosarinquë chachin panantacoꞌ! Inasoꞌ, noyá niacorapiramaso ninanoꞌ. Nisha nisha parti paatoma naꞌcon parisitopiramahuëꞌ, naporama quëran naꞌcon naꞌcon catahuatënquëmaꞌ, noya noya acoantaponquëma huachi.

Mateo 27:51

Naporoꞌ Yosë chinotopiso pëiquë tanontën nëꞌmëtëꞌ patonpisoꞌ noshatërin. Inaora noshataton, catotë huarëꞌ ninin. Inapa quëran noꞌpaquë huarëꞌ noshatomarin. Naporahuaton, panca ocohua paꞌnin. Naꞌpiroꞌsaꞌ inaora nopaatërin.

Hechos 23:6

Cotio huaꞌanoꞌsaꞌ huëꞌpisopita co napopianachin yonquipihuëꞌ. Patoma satosioroꞌsaꞌ, patomasoꞌ, parisioroꞌsaꞌ. Ina yonquiaton, Paonori itantarin: —Casoꞌ iyaroꞌsaꞌ, Parisioco. Shimashonëhuëpitantaꞌ parisioroꞌsa chachin. “Yosë ananpitaantarinpoaꞌ,” tënahuëso marëꞌ isopita shaꞌhuirapirinaco, itërin.

Hechos 27:29

“Naꞌpiquë yaꞌparapihuatëhuaꞌ,” taꞌtonaꞌ, huanconën quëran catapini huaꞌna motoꞌ tëꞌyaitopi ama pacacaso marëhuëꞌ. “¿Onporohuarëcha tahuërirëꞌpoya?” taꞌtonaꞌ, moshatopi.

Hechos 27:40

Napoaton huaꞌna motoꞌ nishitëtatonaꞌ, iꞌquë aꞌpaitopi huachi. Naporo chachin noꞌsoratën iꞌshiritopi. Ina quëran huiꞌnin quëran panca nëꞌmëtëꞌ inapaquë pëꞌtënpi. Ihuan quëpahuachincoira, inotëquë paꞌsarai.

Romanos 4:16

Napoaton Apraaniso natëton: “Yosë noꞌtëquën nontërinco,” topachina, Yosëri itërin: “Oshahuanpiranhuëꞌ, caora nohuanto, nosoroatënquën catahuaranquën. Huiꞌnanpitantaꞌ catahuarahuë,” itërin Yosëri. Co cotioroꞌsaráchin nosororinhuëꞌ. Yaꞌipi Apraan pochin cancantopisopitantaꞌ nosororin. Ina huiꞌninpita pochin ninëhuaꞌ.

Romanos 4:18

“Quëma shiparinpita notohuaroꞌ naꞌasapi,” itërin Yosëri. Huaꞌquiꞌ co aꞌna huiꞌnin tërantaꞌ yaꞌhuëtërinhuëꞌ. Sacaiꞌ natëtacaso nipirinhuëꞌ, Apraan natëtërin. “Yosë nohuanton, oshaquëran huiꞌnahuë yaꞌhuëtarinco. Shihuëpitantaꞌ naꞌasapi,” tënin Apraan.

Romanos 5:4

Noya ahuantohuatëhuaꞌ, chini chiníquën cancantarihuaꞌ niꞌton, Yosë noya niꞌninpoaꞌ. “Co naniantarinpoahuëꞌ,” taꞌtëhuaꞌ, inasáchin ninarihuaꞌ.

1 Corintios 13:13

Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

Efesios 2:6

Iráca Quisocristo paꞌpitopirinahuëꞌ, Yosëri ananpitaantarahuaton, inápaquë quëpantarin. Canpoantaꞌ imarëhuaꞌ niꞌton, inarëꞌquënpoaꞌ nanpiantarëhuaso pochin anoyacancantërinpoaꞌ. Quisocristo yaꞌcoancantërinpoaꞌ niꞌton, ipora chachin inápaquë yaꞌhuarëhuaso pochin Yosë niꞌninpoaꞌ.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 3:1

Quisocristo chiminpachina, Yosëri ananpitaantarin. Canpitantaꞌ imaramaꞌ niꞌton, anoyacancantërinquëmaꞌ noya noya yonquicamaso marëꞌ. Napoaton Quisocristo yonquirinso chachin nohuantocoꞌ. Nani tahuëri yonquirácoꞌ ina pochin cancantacamaso marëꞌ. Inasoꞌ inápaquë yaꞌhuërarin. Yosë inchinan quëran huënsëaton, ina pochachin chini chiníquën nanantarin.

2 Timoteo 2:19

Yosë nanamënso nipirinhuëꞌ yaꞌhuárin, Yosë chachin acorinsoꞌ. Natëricho pëiꞌ achinirinsoꞌ pochin niꞌton, yaꞌhuëmiatarin. Cato quëran chachin ninshitopi. “Yaꞌipi imapisopita Yosëri nohuitërin,” tënin. “Quisocristo imapisopita nóya cancanchinaꞌ. Yaꞌipi co noyahuëꞌ yonquipisopita nanianchinaꞌ,” tënin antaꞌ.

Hebreos 4:16

“Tëhuënchachin nosoroatonpoaꞌ, catahuarinpoaꞌ,” taꞌtëhuaꞌ, apira apira Yosë nontahuaꞌ. Nontohuatëhuaꞌ, oshanënpoaꞌ inquitarinpoaꞌ. Maꞌsha onpohuatëhuaꞌ, ina nontohuatëhuaꞌ, inaora nohuanton, catahuarinpoaꞌ noya ahuantacaso marëꞌ.

Hebreos 9:3

Nëmëtëquë patonpisoꞌ aquëtëꞌ, aꞌna patoanantaꞌ yaꞌhuërin, noya noya patoana itopisoꞌ.

Hebreos 9:7

Noya noya patoanaquëso nipirinhuëꞌ, co yaꞌipi yaꞌconpihuëꞌ. Aꞌnaíchin chini chiníquën nanantërinsoáchin yaꞌconin. Co ina tërantaꞌ nani tahuëri yaꞌconinhuëꞌ. Nani piꞌipiquë aꞌna tahuëriáchin yaꞌconahuaton, maꞌsha huënainën quëparin. Inaora oshanën marëꞌ quëparin. Naporahuaton, piyapiꞌsaꞌ co yonquiatonahuë oshahuanpiso marëntaꞌ quëparin.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.