Hebreos 6:17 - Chayahuita (Shahui)

¹⁷ Yosë co onporontaꞌ nonpintërinpoahuëꞌ. Shaꞌhuitërinpoasoꞌ co onporontaꞌ nishatërinhuëꞌ. Napoaton noya nanan shaꞌhuitohuachinpoaꞌ: “Casoꞌ Yosëco niꞌto, noꞌtëquën nontëranquëmaꞌ. Nichaꞌësaranquëmaꞌ,” itërinpoaꞌ.

Hebreos 6:17 ပူးပေါင်းရင်းမြစ်များ

Génesis 26:28

—Tëhuënchachin quëmasoꞌ, Sinioro catahuamiatërinquën niꞌnai. Napoaton yonquirai quëmarëꞌcoi anoyataꞌhuaisoꞌ. Iso pochin anoyatahuaꞌ:

Salmos 110:4

Yosë chachin nani shaꞌhuitërinquën: “Caso Yosëco niꞌto, noꞌtëquën shaꞌhuitaranquën: Quëmasoꞌ noya noya corto huaꞌan acoaranquën. Miriquiso pochin nisaran. Co onporonta pipiaranhuëꞌ,” itërinquën.

Salmos 33:11

Sinioro maꞌpitaso nicacasoꞌ yonquihuachina, ina tëhuënchinsoꞌ onpopionta yaꞌhuëapon.

Isaías 46:10

Tahuëri caniaritërin quëran huarëꞌ taꞌhuantacaisoꞌ shaꞌhuitërahuë. Aꞌna tahuëri maꞌsona onpocaisoꞌ iráca quëran huarëꞌ shaꞌhuitërahuëꞌ. Maꞌpitasona nicaꞌhuasoꞌ yonquihuatora, ina inachachin nisarin. Maꞌsona nicaꞌhuasoꞌ yonquirahuësopita, nisarahuë.

Isaías 55:11

Inapochachin nonahuësontaꞌ, co topinan caquë huënantarinhuëꞌ. Inasoꞌ, ca nohuantërahuëso nisarin. Maꞌsona camairahuëso nisarin.

Isaías 55:7

Co noyahuëꞌ nipisopita, co noyahuëꞌ nipisoꞌ aꞌpoinaꞌ. Nitapicancanpisopitantaꞌ, co noyahuëꞌ yonquipisoꞌ aꞌpoinaꞌ. Yosë chachin tahuërëtaantatomaꞌ, natëantacoꞌ. Inaso noya niꞌton, oshanëma inquitarinquëmaꞌ.

Malaquías 3:6

Naquëranchin Sinioro israiroꞌsanquëma nontatënquëmaꞌ: “Caso Sinioroco niꞌto, co nishatërahuëꞌ. Napoaton canpitaso Cacopo quëran pipiramasopita, co ataꞌhuantëranquëmahuëꞌ.

Juan 10:10

Ihuatëroꞌsaꞌ co noyahuëꞌ yonquipi. Ihuatacaisoꞌ, tëpatacaisoꞌ, ataꞌhuantacaiso inapita nicacaisoráchin yonquipi. Caso nipirinhuëꞌ oꞌmarahuë imarinacosopita Yosë nohuitacaiso marëꞌ. Noya noya nanpicaiso marëꞌ oꞌmarahuë.

Romanos 11:29

Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

Romanos 8:17

Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

Gálatas 3:29

Quisocristo imapatëhuaꞌ, Apraan shinpitanpoaꞌ ninëhuaꞌ canpoantaꞌ. Apraan shaꞌhuitërinso pochachin naꞌcon catahuarinpoaꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Hebreos 11:7

Iráca Nointaꞌ yaꞌhuëpirinhuëꞌ, aꞌna tahuëri Yosëri itapon: “Co huaꞌqui quëranhuëꞌ maꞌsha onpoaramaꞌ. Co niꞌchinamasohuëꞌ niꞌsaramaꞌ. Naporoꞌ yaꞌipi oshahuanoꞌsaꞌ iiꞌ quëran ataꞌhuantarahuë,” itërin. Coꞌhuara oꞌnayantërasohuëꞌ napotopirinhuëꞌ: “Yosë noꞌtëquën nontërinco,” taꞌton, Noi natëtërin. Shaꞌhuitohuachina, natëton, panca nancha ninin. Ina quëran saꞌin, huiꞌninpitarë chachin chaꞌëpi. Aꞌnapitasoꞌ natanaponaraihuëꞌ, co yanatëpihuëꞌ. Napoaton naꞌinpi. Noiso nipirinhuëꞌ, yaꞌipi cancanën quëran natëtërin. “Noꞌtëquën nontërinco,” topachina, Yosëri noya niꞌnin.

Hebreos 11:9

Aquë paaton, Canaan parti canconin. Inaquë yaꞌhuaponahuëꞌ, nëꞌmëtëꞌ pëiquëráchin yaꞌhuërin. Paꞌsápaton, co yaꞌhuëmiatërinhuëꞌ. Isaco, Cacopo, inapitantaꞌ nëꞌmëtëꞌ pëiroꞌsaquë yaꞌhuëpi. Yosëri nani shaꞌhuitërin. “Iso noꞌpa chachin quëchinquëmaꞌ,” itopirinhuëꞌ, co huaꞌanënchátërapihuëꞌ. “Co Yosë nonpintarinpoahuëꞌ. Aꞌna tahuëri ina nohuanton, huaꞌanëntarihuaꞌ,” taꞌtonaꞌ, Yosë natëpi.

Hebreos 6:12

Ama amitomarahuëꞌ, naꞌcon Yosë yonquicoꞌ. Noya natëpisopita nonancoꞌ. Inapitasoꞌ imamiatapi. “Yosë noꞌtëquën nontërinpoaꞌ,” taꞌtonaꞌ, noya natëapi. Maꞌsha onpoaponaraihuëꞌ, noya ahuantapi. Iráca Yosëri shaꞌhuitërinso chachin ninapi.

Hebreos 6:16

Co piyapi yanatëhuachinpoarahuëꞌ, “Yosë niꞌsárinco, noꞌtëquën nontaranquën,” tënëhuaꞌ. Ina pochin nontohuatëhuaꞌ, natërinënpoaꞌ. “Noꞌtëquën nontërinpoaꞌ,” topi.

Hebreos 6:18

Yosë chachin shaꞌhuitërinpoaꞌ. Naporahuaton “Casoꞌ Yosëco niꞌto, noꞌtëquën nontëranquëmaꞌ,” itomantarinpoaꞌ. Napoaton co onporontaꞌ nonpintarinpoahuëꞌ. Co piꞌpian tërantaꞌ nishataponhuëꞌ, tënëhuaꞌ. Ina yonquiatëhuaꞌ, chiníquën cancantahuaꞌ. Iráca Yosëíchin imarëhuaꞌ catahuainpoaso marëꞌ. “Nichaꞌësarinpoaꞌ,” taꞌtëhuaꞌ, yaꞌipi cancanënpoa quëran imahuaꞌ.

Santiago 1:17

Yosësoꞌ noyasáchin yonquirinpoaꞌ. Noya noya cancantacaso marëꞌ catahuarinpoaꞌ. Inasáchin noya aꞌpintërinpoaꞌ noꞌtëquën yonquicaso marëꞌ. Piꞌi, yoqui, tayora, inapita inari acopirinhuëꞌ, co yaꞌipi tahuëri noya aꞌpininhuëꞌ. Aꞌna tashintaꞌ co mantaꞌ aꞌpininhuëꞌ. Yosëso nipirinhuëꞌ co ina pochin nininhuëꞌ. Nani tahuëriya nosoroatonpoaꞌ, catahuarinpoaꞌ.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Pedro 3:7

Canpitantaꞌ iyaroꞌsaꞌ, saꞌamaꞌ nosoroatomaꞌ noya ichiyaꞌhuëcoꞌ. Co canpita pochin chinipihuëꞌ niꞌton, noya nicatomaꞌ, sanoanan quëran nontocoꞌ. Inapitantaꞌ Quisocristo imapi niꞌton, canpitarëꞌquëma chachin Yosë huëntonënquë yaꞌconpi antaꞌ. Inapitantaꞌ nanpimiatapi. Ina yonquiatomaꞌ, saꞌamaꞌ noya nosorocoꞌ. Inapotohuatamaꞌ, Yosë nontohuatamaꞌ, catahuarinquëmaꞌ.