Hebreos 6:12 - Chayahuita (Shahui)

¹² Ama amitomarahuëꞌ, naꞌcon Yosë yonquicoꞌ. Noya natëpisopita nonancoꞌ. Inapitasoꞌ imamiatapi. “Yosë noꞌtëquën nontërinpoaꞌ,” taꞌtonaꞌ, noya natëapi. Maꞌsha onpoaponaraihuëꞌ, noya ahuantapi. Iráca Yosëri shaꞌhuitërinso chachin ninapi.

Hebreos 6:12 ပူးပေါင်းရင်းမြစ်များ

Proverbios 13:4

Chirotëso maꞌsha nohuantopirinhuëꞌ, co sacatërinhuëꞌ niꞌton, co yaꞌhuëtërinhuëꞌ. Sacaton nipachinasoꞌ, noya yaꞌhuëaponaꞌ.

Jeremías 6:16

Naquëranchin Siniorori piyapinënpita itapon: “Paꞌnamaquë ira niosërarinsoꞌ quënanconpatamara, chiniconamaꞌ. Noya niꞌsahuatoma iracaya ira huayonamaꞌ. Canpitanta chihuërëso pochin cancantohuatamaꞌ, nontoco noꞌtën ira aꞌnotërëso pochin nichinquëmaꞌ. Inasáchin paꞌtohuatamaꞌ sano cancantaramaꞌ,” itërin. Canpitaso napoaponahuëꞌ: “Co nohuantëraihuëꞌ ina ira paꞌtaꞌhuaisoꞌ,” toconamaꞌ.

Mateo 22:32

“Casoꞌ Yosëco. Apraan chinotarinco. Isaco, Cacopo, inapitantaꞌ chinotarinaco,” itërin. Cara chachin iráca chiminpirinahuëꞌ, naporin. Nanpipisopitaráchin Yosë chinotapi. Napoaton inapitantaꞌ chiminpirinahuëꞌ, Yosë marëso nanpirápi, itërin Quisosori.

Mateo 25:26

Napotohuachina, co noya niꞌninhuëꞌ. ‘Quëmasoꞌ co noyanquënhuëꞌ. Chiroton, co natërancohuëꞌ. Co noꞌtëquën yonquiranhuëꞌ. “Co sacataponahuëꞌ canaran,” ¿itëranco ti?

Lucas 16:22

Napoin quëran Nasaro chiminin huachi. Chiminpachina, Yosëꞌpaꞌ anquëniroꞌsari quëparin. Apraan pantarinquë chachin pantarin. Ina quëran maꞌhuaontaꞌ chimininpachina, paꞌpitopi.

Lucas 8:15

Aꞌnaquën piyapiꞌsaso nipirinhuëꞌ noyaroꞌpa pochin nipi. Yosë nanamën noya natanpi. Natanahuatonaꞌ, noya cancantatonaꞌ, natëtopi. Noꞌtëquën yonquiatonaꞌ, natëmiatopi. Maꞌsha onpoaponaraihuëꞌ, co aꞌpopihuëꞌ. Yaꞌipi cancanëna quëran imatonaꞌ noya noya nisapi,” tënin.

Romanos 12:11

Ama chirotomarahuëꞌ, noya sacatocoꞌ. Yaꞌipi cancanëma quëran noya yonquiatomaꞌ, Yosë marëꞌ sacatocoꞌ.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 4:12

Cotioroꞌsantaꞌ Apraan pochin natëtohuachinara, huiꞌninpita pochin nipi antaꞌ. Co marca niacotopiso marëꞌ noya cancantopihuëꞌ. Coꞌhuara marca niacochatërasohuëꞌ, Apraansoꞌ natëtërin. Aꞌnapitantaꞌ ina pochin cancantohuachinara, Yosëri noya niꞌsarin.

2 Tesalonicenses 1:4

Yaꞌipi parti Yosë imapisopita shaꞌhuitërai. “Tisaronicaquë yaꞌhuëpisopita noya imasapi. Imapiso marëꞌ naꞌcon aparisitopirinahuëꞌ: ‘Yosë co naniantarinpoahuëꞌ,’ taꞌtonaꞌ, ahuantapi. Co yaaꞌpopihuëꞌ. Maꞌsha onpoaponaraihuëntaꞌ, chiníquën cancantapi,” itërai. Noya natëramaꞌ niꞌton, noya cancantërai.

Hebreos 1:14

Inapitasoꞌ inpriatonënpita pochin niꞌton, Yosëri camairin. Aꞌpaimarin imarëhuasopita catahuainpoaso marëꞌ. Yosë chachin nichaꞌësarinpoaꞌ. Nani ina nitotëramaꞌ.

Hebreos 10:36

Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

Hebreos 11:33

Aꞌnaquën Yosë natëtonaꞌ, nisha nisha piyapiroꞌsaꞌ minsëpi. Aꞌnaquëontaꞌ huaꞌan yaꞌconatonaꞌ, noꞌtëquën huaꞌanëntopi. “Yosë shaꞌhuitërinpoaꞌ niꞌton, catahuarinpoaꞌ,” taꞌtonaꞌ, aꞌnaquën natëpi. Napoaton Yosëri catahuarin. Aꞌnaquënsoꞌ Yosë natëtonaꞌ, paꞌpiniꞌ quëran chaꞌëpi.

Hebreos 12:1

Iráca quëran huarëꞌ naꞌa piyapiꞌsaꞌ parisitaponaraihuëꞌ, imamiatopi. “Yosë catahuarinpoaꞌ,” taꞌtonaꞌ, natëpi. Napoaton inapita yonquiatëhuaꞌ, canpoantaꞌ nóya imahuaꞌ. Niꞌcoꞌ. Quëmapiꞌsaꞌ nicanacaiso marëꞌ taꞌahuachinara, chiníquën taꞌapi. Co mantaꞌ quëpapihuëꞌ. Torosarëáchin taꞌapi. Naporopi aꞌmopisoꞌ co ocoihuachinahuëꞌ, co nanitopihuëꞌ chiníquën taꞌacaisoꞌ. Inapochachin canpoantaꞌ naporopi aꞌmopisoꞌ ocoipiso pochin yaꞌipi oshanënpoaꞌ naniantahuaꞌ. Co noyahuëꞌ yonquirëhuasopita naniantatëhuaꞌ, yaꞌipi cancanënpoa quëran Quisocristo imahuaꞌ. Sacaiꞌ nipirinhuëꞌ, ahuantatëhuaꞌ, noya imahuaꞌ.

Hebreos 13:7

Yaꞌnan aꞌchintërinënquëmasopita yonquicoꞌ. Yosë quiricanën noya aꞌchintërinënquëmaꞌ. Chiminaquë huarëꞌ noya nicatonaꞌ, aꞌnapita catahuapi. Napoaton inapita nonanatomaꞌ, noya natëcoꞌ.

Hebreos 5:11

Iráca ninopisoꞌ naꞌcon yaaꞌchintopiranquëmahuëꞌ. Co natantochináchinhuëꞌ cancantatomaꞌ, co yanatantëramahuëꞌ niꞌton, sacaiꞌ aꞌchintaꞌhuanquëmasoꞌ.

Hebreos 6:15

Itohuachina, Apraani Yosë natërin. Huaꞌquiꞌ co huiꞌnin yaꞌhuëtopirinhuëꞌ, noya cancantaton, ninarárin. “Co Yosë nonpintërincohuëꞌ,” taꞌton, natërin. Napoaton napoin quëran huiꞌnin nasitërin.

Santiago 1:3

Yosë tëniarinpoaꞌ cancanënpoa quëran huarëꞌ natëcaso marëꞌ. Aꞌnaquën maꞌsha onpohuachinara, aꞌnaroáchin Yosë yaaꞌpopi. Canpoaso nipirinhuëꞌ parisitohuatëhuaꞌ, “Yosë co onporontaꞌ naniantarinpoahuëꞌ,” topatëhuaꞌ, catahuarinpoaꞌ chini chiníquën cancantacaso marëꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

1 Juan 2:25

Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

Apocalipsis 13:10

“Mapachinënquëmaꞌ, parisitacasoꞌ yaꞌhuërin. Sahuëniquë yatëpahuachinënquëmaꞌ, ahuantacasoꞌ yaꞌhuërin. Ina yonquiatomaꞌ, chiníquën cancantocoꞌ. ‘Yosë catahuarinpoaꞌ,’ taꞌtomaꞌ, imamiatocoꞌ.”