Hebreos 6:11 - Chayahuita (Shahui)

¹¹ Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

Hebreos 6:11 ပူးပေါင်းရင်းမြစ်များ

Isaías 32:17

Noyasáchin nicatonaꞌ, sano yaꞌhuëaponaꞌ. “Sinioro catahuarincoi,” tëcatonaꞌ, noya yaꞌhuëmiataponaꞌ.

Mateo 24:13

Canpitaso nipirinhuëꞌ noya ahuantocoꞌ. Co aꞌpohuatamacohuëꞌ, noya nichaꞌësaranquëma huachi.

Lucas 1:1

Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi.

Romanos 12:8

Aꞌnaquëontaꞌ nitotopi achinicancanacasoꞌ. Nitotohuatamaꞌ, noya cancantatomaꞌ achinicancancoꞌ imamiachinaꞌ. Aꞌnaquëontaꞌ ina nohuanton, coriqui, maꞌsha, inapita yaꞌhuëtopi. Aꞌnapita quëtohuatamaꞌ, ama piyapiꞌsaꞌ noya nicainënquëmaso marëꞌ quëtocosohuëꞌ. Yosë yonquiatomaꞌ, quëtocoꞌ. “Ina nosororinco niꞌton, carintaꞌ nosoroꞌi,” taꞌtomaꞌ, quëtocoꞌ. Aꞌnaquëontaꞌ ina nohuanton chachin, chiníquën nanan yaꞌhuëtopi. Ansianohuë nipon, huaꞌanhuë nipon yaꞌconpatamaꞌ, ama chirotomarahuëꞌ, noya pënëntocoꞌ. Noya noncoꞌ. Aꞌnaquëontaꞌ ina nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Inapita nicapomaꞌ paꞌpatamaꞌ, noya cancantatomaꞌ, catahuacoꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

1 Corintios 13:13

Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

Gálatas 5:5

Nipirinhuëꞌ, ina imapatëhuaꞌ, Ispirito Santo catahuarinpoaꞌ. “Quisocristoíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ, tënëhuaꞌ. Oshanënpoaꞌ inquitatonpoaꞌ, tëhuënchachin noyápiachin cancan quëtarinpoaꞌ. Ina ninarëhuaꞌ.

Gálatas 6:9

Ama Yosë naniantatëhuahuëꞌ, noya niahuaꞌ. Noya nicacasoꞌ ama amiahuasohuëꞌ. Chiníquën cancantohuatëhuaꞌ, Yosë noya niꞌsarinpoaꞌ. Ina marëꞌ tahuëri nanihuachin, acanaarinpoaꞌ.

Filipenses 3:15

Yaꞌipi Yosë imarëhuasopita chinoton pochin cancantohuatëhuaꞌ, ina pochin yonquiarëhuaꞌ. Nisha yonquihuatëhuaꞌ, Yosë anitotarinpoaꞌ. “Catahuaco noꞌtëquën yonquiꞌi,” itohuatëhuaꞌ, anitotarinpoaꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

1 Tesalonicenses 1:5

Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.

1 Tesalonicenses 4:10

Nani huachi imapisopita nosoroaramaꞌ. Yaꞌipi Masitonia parti yaꞌhuëpisopita aquë yaꞌhuëpirinahuëꞌ, Quisocristo imapachinara, nosororamaꞌ. Iporasoꞌ, iyaroꞌsaꞌ, naꞌcon naꞌcon ninosorocoꞌ, tënai.

2 Tesalonicenses 3:13

Naꞌaquëmaꞌ iyaroꞌsaꞌ noya nisaramaꞌ. Ama amiatomaꞌ, nisha cancantocosohuëꞌ. Nani tahuëri noya nicoꞌ.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

2 Pedro 3:14

Napoaton iyaroꞌsaꞌ, ina ninatomaꞌ naꞌcon yonquicoꞌ noyasáchin nicacamaso marëꞌ. “Quisocristo nanan anoyatërinpoaꞌ,” taꞌtomaꞌ, noya niniꞌtomaꞌ, yaꞌhuëcoꞌ. Yaꞌipi co noyahuëꞌ yonquiramasopita naniantatomaꞌ, noyápiachin cancantocoꞌ. Ina quëran oꞌmantahuachin, noya niꞌsarinquëmaꞌ.

1 Juan 3:14

Iráca canpoantaꞌ ina pochin co noyahuëꞌ cancantërëhuaꞌ. Co Yosë nohuitatëhuahuëꞌ, chimipi pochin nipirëhuahuëꞌ, Yosë anoyacancantërinpoaꞌ ina nohuitatëhuaꞌ nanpimiatacaso marëꞌ. Napoaton iporasoꞌ ninosororëhuaꞌ. Ina quëran Yosë huëntonënquë yaꞌconëhuasoꞌ nitotërëhuaꞌ. Co ninosorohuatamahuëꞌ, co Yosë anoyacancantërinquëmahuëꞌ. Chimipi pochin cancantaramaꞌ.

1 Juan 3:19

Tëhuënchachin aꞌnapita nosorohuatëhuaꞌ, noꞌtëquën Yosë nanamën imasarëhuaꞌ. Ina quëran co huachi tëꞌhuatacasoꞌ yaꞌhuëtarinpoahuëꞌ. “Tatanpoa pochin niꞌton, noya niꞌninpoaꞌ,” taꞌtëhuaꞌ, noya cancantarihuaꞌ.

Apocalipsis 2:26

Sopai minsëhuatamaꞌ, aꞌna tahuëri chiníquën nanan quëtaranquëmaꞌ. Ayaroꞌ tahuëriquë huarëꞌ natëhuatamaco, catahuaramaco nisha nisha piyapiꞌsaꞌ huaꞌanëntaꞌhuaso marëꞌ.