Hebreos 5:13 - Chayahuita (Shahui)

¹³ Soꞌsoquë huarëꞌ coshatërin. Canpitasoꞌ co noyahuëꞌ yonquiatomaꞌ, canopiaꞌhuaya pochin yonquiconamaꞌ. Co nanitëramahuëꞌ noꞌtëquën yonquicamasoꞌ.

Hebreos 5:13 ပူးပေါင်းရင်းမြစ်များ

Isaías 28:9

Canta yonquiatonaco napopi: “¡Isaiasëntachi yaaꞌchintërinpoaꞌ! ¡Sinioro anitotërincoso aꞌchinchinquëmaꞌ! taꞌton atosárin. Huaꞌhuaroꞌsa quirica nontacaso nitotahuachinara: ‘ta ta tata të të tëtë ti ti titi to to toto,’ tosápi. Inapita pochin cancantatonpoa napotápirinpoahuëꞌ, ¡macari natanapon!” topi.

Mateo 11:25

Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Marcos 10:15

Tëhuënchachin carinquëmaꞌ itaranquëmaꞌ, huaꞌhuaroꞌsaꞌ aꞌnaroáchin yaimarinaco. Coꞌsoꞌ inapita pochin cancantohuatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ, itërin.

Romanos 2:20

Co Yosë nanamën nitotopihuëꞌ niꞌton, yaaꞌchintëramaꞌ. “Yosë noꞌtëquën pënënincoi niꞌton, noya noya nitotërai. Aꞌnapitasoꞌ co quiya pochin nitochátërapihuëꞌ,” tënamaꞌ.

1 Corintios 13:11

Iráca huaꞌhuatarihuaꞌ, huaꞌhuasha pochin nonëhuaꞌ, huaꞌhuasha pochin yonquirëhuaꞌ. Iporaso nipirinhuëꞌ nani mashotërëhuaꞌ. Co huachi huaꞌhuasha pochin nonëhuahuëꞌ. Co huachi huaꞌhuasha pochin ninëhuahuëꞌ.

1 Corintios 14:20

Canpitasoꞌ iyaroꞌsaꞌ chinotonoꞌsa pochin yonquicoꞌ. Ama huaꞌhuaroꞌsa pochin yonquicosohuëꞌ. Napoaponahuëꞌ, huaꞌhuaroꞌsa pochin noyápiachin cancantatomaꞌ, noyasáchin nicoꞌ. Inapitasoꞌ co yonquiyatërapihuëꞌ oshahuanacaisoꞌ.

1 Corintios 3:1

Yaꞌipi Yosë nanamën iyaroꞌsaꞌ yaaꞌchintopiranquëmahuëꞌ, co ipora nanitërahuëꞌ. Ispirito Santo cancanëma quëran huarëꞌ natëramaꞌ naporini, naꞌcon aꞌchinchitënquëmahuëꞌ. Co noyahuëꞌ yonquiramasopita co nanianchátëraramahuëꞌ. Quisocristo imapiramahuëꞌ, huaꞌhuishin pochin cancantëramaꞌ.

2 Corintios 3:9

Iráca pënëntërinsoꞌ nanan noya nipirinhuëꞌ, co natëhuachinahuëꞌ, anaꞌintacasoꞌ yaꞌhuërin. Quisocristo nanamënso nipirinhuëꞌ, noya noya. Ina imapatëhuaꞌ, oshanënpoaꞌ inquitatonpoaꞌ, Yosë noya niꞌsarinpoaꞌ. Napoaton noya noya, tënahuë.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

2 Timoteo 3:16

Yaꞌipi Yosë quiricanënsoꞌ nóya. Yonquirinso chachin Yosëri aninshitërin. Quiricanën quëran aꞌchintërinpoaꞌ. Pënëninpoaꞌ co noyahuëꞌ ninëhuasopita naniantacaso marëꞌ, nóya ayonquirinpoaꞌ. Anitotërinpoaꞌ noꞌtëquën Yosë natëcasoꞌ.

1 Pedro 2:2

Yosë huëntonënquë yaꞌconpatëhuaꞌ, huaꞌhuasha nasha huaipiso pochin ninëhuaꞌ. Niꞌcoꞌ. Canopiaꞌhuaya shoꞌsho apira apira nayarin. Shoꞌshotaton, noya chinirarin. Inapochachin canpitantaꞌ Yosë noninso chachin naꞌcon naꞌcon nohuantocoꞌ. Ina yonquihuatamaꞌ, oshaquëran noya noya nisaramaꞌ. Chiníquën cancantatomaꞌ, noya chaꞌësaramaꞌ. Yosë nanamënáchin achinicancaninpoaꞌ.

2 Juan 1:11

Co Quisocristo natëtonahuëꞌ, co noyahuëꞌ nipi. Ama piꞌpian tërantaꞌ natanacamasoꞌ nohuantocosohuëꞌ. Canpitataquë nisha nanan aꞌchintohuachinquëmaꞌ, aꞌnaquën nonpin nanan imaponaꞌ nimara. Imapachinaꞌ, ina marëꞌ canpitantaꞌ oshahuanaramaꞌ.