Hebreos 2:17 - Chayahuita (Shahui)

¹⁷ Napoaton isoroꞌpaquë oꞌmaton, piyapi chachin nasitimarin. Co piyapi pochin nasitërinhuëꞌ naporini, co catahuainpoasoꞌ nanichitonhuëꞌ. Piyapi pochachin inantaꞌ niꞌton, noyá nohuitërinpoaꞌ. Corto huaꞌan chini chiníquën nanantërinso pochin nicaton, canpoa marëꞌ Yosë nontarin nanan anoyatinpoaso marëꞌ. Nosoroatonpoaꞌ, chiminin oshanënpoaꞌ inquitinpoaso marëꞌ. Inasoꞌ co nonpintërinpoahuëꞌ.

Hebreos 2:17 ပူးပေါင်းရင်းမြစ်များ

Isaías 11:5

Piyapi nani tahuëri aꞌmoanaton paꞌninso pochin, noyasáchin nicaton noꞌtëquënáchin nonsarin.

Daniel 9:24

Quirosarin ninanoꞌ, israiroꞌsaꞌ, inapita Yosëri anaꞌintërinsoꞌ, canchisë shonca simana pahuanarin nanicasoꞌ. Ina nápo simana nanihuachin, nichaꞌësarinquëmaꞌ. Co noyahuëꞌ nicatoma Yosë tëhuëtëramaꞌ, co natantochináchinhuëꞌ cancantatoma oshahuanamaꞌ. Inapopiramahuëꞌ, nichaꞌësarinquëmaꞌ. Ina piquëranso huachi noyasáchin nicatoma yaꞌhuapomaꞌ. Naporo huachi huaꞌnaton niꞌnansopita naniarin. Pënëntonaꞌpiroꞌsanta Yosë nohuanton anitotërinëmasoꞌ, nanipon. Naporo huachi Noya Noya nininsoꞌ, Yosë marëꞌ acoaponaꞌ.

Levítico 16:16

Inapotaton, noya noya patoana tapararin. Israiroꞌsa amirotochináchin niꞌnahuësoꞌ nicatona tapipi niꞌton, tapararin. Co natantochináchinhuëꞌ cancantatona chinitërinaco niꞌton, napoarin. Naporahuaton oshahuanpiso marëꞌ, ina pochin tapacaso yaꞌhuërin. Inapochachin yaꞌipi chinotëramacoso nëꞌmëtë pëi nitamaso yaꞌhuërin. Pëinëhuësoꞌ, israiroꞌsa yaꞌhuëpiso huáncana yaꞌhuërin. Napoaton amirotochináchin niꞌnahuësoꞌ nicatonaꞌ, tapipi.

Romanos 15:17

Quisocristo catahuarinco niꞌton, nóya aꞌchinahuë. Napoaton noya cancantërahuë.

Romanos 5:10

Iráca oshahuanatëhuaꞌ, Yosë inimicotopirëhuahuëꞌ, huiꞌnin chiminin niꞌton, nanan anoyatërinpoaꞌ. Iporasoꞌ noya nipayarëhuaso pochin ninëhuaꞌ niꞌton, noya noya catahuarinpoaꞌ. Nanpiantarin niꞌton, catahuarinpoaꞌ noya chaꞌëcahuaso marëꞌ.

Efesios 2:16

Naporahuaton, co huachi Yosë inimicotërëhuahuëꞌ. Quisocristo corosëquë chiminaton, nanan anoyatërinpoaꞌ. Catoꞌ huënton pochin nipirëhuahuëꞌ, Quisocristo imapatëhuaꞌ, noya ninicatëhuaꞌ yaꞌhuërëhuaꞌ. Aꞌna huëntoíchin ninëhuaꞌ.

Colosenses 1:21

Iráca canpitasoꞌ co Yosë yonquiramahuëꞌ. Co noyahuëꞌ cancantatomaꞌ, Yosë inimicotëramaꞌ. Co noyahuëꞌ ninamaꞌ.

Hebreos 10:21

Chiníquën nanantaton, noya noya corto huaꞌan pochin canpoa marëꞌ Yosë nontárin. Yaꞌipi imarëhuasopita catahuarinpoaꞌ.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

Hebreos 2:14

Piyapinpoaꞌ niꞌton, nonënpoaꞌ yaꞌhuëtërinpoaꞌ. Napoaton Quisocristontaꞌ oꞌmahuachina, piyapi chachin nasitimarin. Inantaꞌ nonën yaꞌhuëtërin. Piyapi chachin niquimaton, chiminin. Canpoasoꞌ sopai natëtëhuaꞌ, oshahuanëhuaꞌ niꞌton, chiminarëhuaꞌ. Quisocristoso nipirinhuëꞌ oshanënpoa marëꞌ chiminin. Canpoa marëꞌ chiminaton, sopai minsërin.

Hebreos 2:16

Co anquëniroꞌsaꞌ catahuacaso marëꞌ oꞌmarinhuëꞌ. Piyapinpoaꞌ catahuarinpoaꞌ chaꞌëcaso marëꞌ. Apraan pochin noya cancantohuatëhuaꞌ, catahuarinpoaꞌ.

Hebreos 3:1

Imaramaꞌ niꞌton, Yosë anoyacancantërinquëmaꞌ. Huëntonënquë ayaꞌconinquëmaꞌ. Napoaton iyaroꞌsaꞌ Quisocristo naꞌcon yonquicoꞌ. Yosëri aꞌpaimarin nanamën aꞌchintinpoaso marëꞌ. Corto huaꞌan chini chiníquën nanantërinso pochin acorin. Ina nohuanton, imarëhuaꞌ.

Hebreos 3:2

Yosëri acohuachina, noꞌtëquën natërin. Iráca Moisësëntaꞌ Yosë natëton, yaꞌipi piyapinënpita catahuarin.

Hebreos 3:5

Moisësësoꞌ inpriatonën pochin ninin. Yosëri acorin cotioroꞌsaꞌ pënënacaso marëꞌ. Maꞌsona tërantaꞌ shaꞌhuitohuachina, inachachin piyapiꞌsaꞌ shaꞌhuitantarin.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

Hebreos 4:15

Inasoꞌ yaꞌipinpoaꞌ noyá nohuitërinpoaꞌ. Sopai yaminsërinpoasontaꞌ nitotërin. Co chiníquën cancantërëhuahuëꞌ niꞌton, sopai shaꞌhuitarinpoaꞌ ama Yosë natëcaso marëhuëꞌ. Quisosontaꞌ isoroꞌpaquë nipon, sopairi naꞌcon yanonpintaton, nisha nisha shaꞌhuitopirinhuëꞌ minsëcaso marëꞌ, co inasoꞌ sopai natërinhuëꞌ.

Hebreos 5:1

Iráca Yosëri aꞌnaya aꞌnaya corto huaꞌan chini chiníquën nanantërinsoꞌ acorin ina marëꞌ sacatacasoꞌ. Inantaꞌ piyapi niponahuëꞌ, aꞌnapita piyapiꞌsa marëꞌ Yosë nontërin. Co noyahuëꞌ nipachinara, chinotopiso pëiquë maꞌsha quëpapi. Inaquë corto huaꞌani tëparin oshanëna marëꞌ. Ama Yosëri anaꞌintacaso marëhuëꞌ inaporin.

Hebreos 5:10

Yosë nohuanton, Quisocristo corto huaꞌan chini chiníquën nanantërinso pochin yaꞌconin. Miriquiso pochin ninin.

Hebreos 5:2

Aꞌnaquën piyapiꞌsaꞌ co aquëtëꞌ nitotatonahuëꞌ, co noyahuëꞌ nipi. Inapita huëꞌpachinara, corto huaꞌani co chiníquën nontërinhuëꞌ. Inantaꞌ piyapi niꞌton, sopairi yaminsërin. Napoaton sanoanan quëran pënënin.

Hebreos 5:5

Quisocristontaꞌ co inaora nohuanton, corto huaꞌan chini chiníquën nanantërinsoꞌ yaꞌconinhuëꞌ. Yosëri noya nicaton, itapon: “Quëmasoꞌ huiꞌnahuë chachinquën. Ipora chachin acoaranquën piyapiꞌsaꞌ anohuitancoso marëꞌ,” itërin. Quiricanënquë chachin naporin.

Hebreos 6:20

Quisosoꞌton nani inápaquë panantarin tapatinpoaso marëꞌ. Inaquë yaꞌhuëmiatarin. Corto huaꞌan chini chiníquën nanantërinso pochin niꞌton, canpoa marëꞌ Yosë nontarin. Miriquiso pochin ninin. Co onporontaꞌ pipiarinhuëꞌ.

Hebreos 7:26

Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

Hebreos 7:28

Iráca Moisësë pënëntërin quëran naꞌa quëmapiꞌsaꞌ corto huaꞌan yaꞌconaꞌpiapi. Inahuantaꞌ co noyahuëꞌ cancantatonaꞌ, oshahuanpi. Ina piquëran Yosësoꞌ huiꞌnin chachin acorin. “Co onporontaꞌ nisha acoaranquënhuëꞌ,” itaton, oshanënpoaꞌ inquitinpoaso marëꞌ acorin. Inasoꞌ noyasáchin ninin. Co onporontaꞌ oshahuanaponhuëꞌ. Napoaton nóya catahuarinpoaꞌ.

Hebreos 8:1

Noꞌtëquën shaꞌhuitaranquëmaꞌ. Quisocristo inápaquë panantarahuaton, Yosë inchinanën quëran chachin huënsërin. Corto huaꞌan chini chiníquën nanantërinso pochin niꞌton, nanan anoyatërinpoaꞌ.

Hebreos 8:3

Iráca corto huaꞌanoꞌsaꞌ maꞌsha tëpapi piyapiꞌsaꞌ oshanëna marëꞌ. Quisocristoso nipirinhuëꞌ inaora nohuanton, chiminin oshanënpoaꞌ inquitinpoaso marëꞌ.

Hebreos 9:11

Iporaso nipirinhuëꞌ, Quisocristo nani oꞌmarin. Corto huaꞌan chini chiníquën nanantërinso pochin nicaton, nóya catahuarinpoaꞌ. Co chinotopiso pëiquë yaꞌconaton, nanan anoyatërinpoahuëꞌ. Co isoroꞌpaquë nipiso pëiquë yaꞌconinhuëꞌ. Co chipo, ohuacaꞌhuaya, inapita tëparinhuëꞌ huënainën macacaso marëꞌ. Inaora huënainën chachin aꞌparin. Chiminaton, oshanënpoaꞌ inquitërinpoaꞌ. Ina quëran Yosë yaꞌhuërinquë chachin panantarin aꞌnaromaráchin nanan anoyatinpoaso marëꞌ. Inaquë noya noya catahuarinpoaꞌ. Canpoa marëꞌ chiminin niꞌton, anoyacancantarinpoaꞌ. Ina imapatëhuaꞌ, nichaꞌësarinpoaꞌ.