Hebreos 13:20 - Chayahuita (Shahui)

²⁰ Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Hebreos 13:20 ပူးပေါင်းရင်းမြစ်များ

2 Samuel 23:5

Napoaton cá quëran pipipisopitasoꞌ, Yosëri catahuarápon. Nani ina marëꞌ inarëꞌco anoyatomiatërahuë. Inaora chachin nanan yocaton co nonpintarincohuëꞌ. Ina nohuanton yaꞌipi inimicoroꞌsa minsërahuë. Yaꞌipi nohuantërahuësoꞌ natanpatëra, acotërinco. Ina chachin aꞌna tahuërinta nitáponco.

Salmos 23:1

Quëmasoꞌ Sinioro nóya aꞌpairanco. Ohuicaroꞌsa huaꞌanëni aꞌpairinso pochin nitëranco. Co manta pahuantërincohuëꞌ.

Salmos 80:1

Quëmasoꞌ Sinioro, ohuica huaꞌanën pochin ninan. Israiroꞌsacoisoꞌ, ohuicanënpita pochin ninai. Cosi shinpita noya aꞌpaiquëꞌ. Quiropinoꞌsa anquipisoanaquë quëmasoꞌ yaꞌhuëran. Noya nicaton Iprain, Mincamin, Manasisi, inapita huëntonoꞌsa catahuaquëꞌ. Chiníquën nanantaton nichaꞌëcoi.

Éxodo 24:8

Naporoꞌ Moisësësoꞌ, tasonoꞌsaquë huënaiꞌ yaꞌhuërinsoꞌ, manin. Masahuaton, yaꞌipi israiroꞌsa taꞌsatërin. Nani taꞌsatohuachina itapon: —Iso huënaiꞌ paꞌnin niꞌton, Yosë canpoarëꞌ anoyatërinso anitotërinpoaꞌ. Ina marëꞌ nanamën ninshitërahuësoꞌ nani shaꞌhuitëranquëmaꞌ. Ina natëhuatëhuaꞌ, Yosë noya niꞌsarinpoaꞌ, itërin.

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Isaías 55:3

Huëcapairahuatomaco noya natancoꞌ. Natanpatamaco nanpiaramaꞌ. Tapi nosoroato nani shaꞌhuitërahuë. Ina nanicaso marëꞌ canpitaroꞌco anoyatomiatarahuë.

Isaías 61:8

Ina quëran Sinioro taantarin: “Noꞌtëquënáchin nipisopita nosororahuë. Ihuatopisoꞌ, aꞌnaratipita nicatona tëpatopisoꞌ, inapitaso co quëꞌyarahuëꞌ. Ina pochinco niꞌto piyapinëhuëpitasoꞌ, noꞌtëquënáchin acanapo. Inapitarëꞌco anoyatohuato, anoyatërahuëso yaꞌhuëmiatapon.

Isaías 63:11

Napotohuachina inapitasoꞌ, iráca Yosëri shimashonënpita catahuarinsoꞌ yonquipi: “Yosëri iráca Moisësë huayonaton, Niroiꞌ quëran nichaꞌërin. Inapotahuaton nohuantërinsoꞌ nicacaso marëꞌ ispiritonën ayaꞌcoancantërin. Inapotohuachina, inaso huaꞌanënpoa pochin nicaton Iquipito quëran ocoirinpoaꞌ. Iporaso napoaponahuëꞌ, ¿Intohuata pacaton co huachi yacatahuarinpoahuëꞌ?

Ezequiel 34:23

Ca nohuanto piyapinëhuë Tapi itërahuësoꞌ, huënantapon. Inaíchin yaꞌipi ohuicanëhuëpita noya aꞌpaiapon.

Ezequiel 37:24

Piyapinëhuë Tapi itërahuësoari copirnonëna nisarin. Naporahuaton inaíchin ohuicaroꞌsa huaꞌanën pochin nicaton, piyapinëhuëpita aꞌpairarin. Naporo huarëꞌ pënëntërahuësopita, shaꞌhuitërahuësopita, inapita natëponaꞌ.

Ezequiel 37:26

Ama tëꞌhuarëꞌna yaꞌhuëcaiso marëhuëꞌ, inapitaroꞌco anoyatarahuë. Inapitaroꞌco anoyatërahuësoꞌ, yaꞌhuëmiatarin. Ca nohuanton notohuaroꞌ naꞌaponaꞌ. Naporahuaton chinotërinacoso pëiꞌ, inapita yaꞌhuëpiso huáncana acoarahuë.

Zacarías 9:11

Quirosarinquë yaꞌhuëramasopita. Isontaꞌ, Sinioro shaꞌhuitarinquëmaꞌ: “Aꞌnaquën israiroꞌsa nisha nisha nacionquë ipora huanta yaꞌhuëapi. Inapitasoꞌ, poso yaninantë pochin nininquë yaꞌhuëapi niꞌton, cari nichaꞌësarahuë. Iráca shimashonëmapitaroꞌco anoyatërahuë niꞌton, napoarahuë. Inapohuatoira, maꞌsharoꞌsa tëparahuatona huënainën aꞌpatopi,” tënin.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Marcos 14:24

—Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Lucas 22:20

Nani coshatohuachinara, ninëaꞌhua maantarin. —Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Huënainëhuë quëran nichaꞌësaranquëmaꞌ.

Juan 10:11

Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

Juan 10:14

Caso nipirinhuëꞌ noya huaꞌanën pochin ninahuë. Imarinacosopita nohuitërahuë. Cantaꞌ nohuitërinaco.

Hechos 13:30

Inaquë poꞌmopirinahuëꞌ, Yosëri ananpitaantarin.

Hechos 17:31

Aꞌna tahuëri co noyahuëꞌ nipisopita noꞌtëquën anaꞌintarin. Nani Quisoso acorin coisë pochin nicaton, yaꞌipi piyapiꞌsaꞌ noꞌtëquën shaꞌhuitacaso marëꞌ. Inasoꞌ piyapi chachin niꞌton, chiminpirinhuëꞌ, Yosëri ananpitaantarin. Napoaton inasoꞌ, Yosëri acorinsoꞌ, tënëhuaꞌ,” tënin Paono.

Hechos 2:24

Yosëri ananpitaantarin. Chimirin quëran nichaꞌërin. Co chimirini minsërinhuëꞌ.

Hechos 2:32

Iporasoꞌ Quisoso chachin Yosëri ananpitaantarin. Quiyari niꞌnai.

Hechos 3:15

Quisoso mini ananpirinpoaso nipirinhuëꞌ, atëpatëramaꞌ. Tëpapirinahuëꞌ, Yosëri ananpitaantarin. Quiyasoꞌ niꞌnai.

Hechos 4:10

noꞌtëquën shaꞌhuitaranquëmaꞌ, nitotocoꞌ. Yaꞌipi israiroꞌsaꞌ nitochinaꞌ. Quisocristo Nasaritoquë yaꞌhuërinsoꞌ nanan quëtërincoi anoyataꞌhuaisoꞌ. Ina catahuarincoi niꞌton, anoyatërai. Yosëri aꞌpaimapirinhuëꞌ, canpitarisoꞌ corosëquë apatanantëramaꞌ. Tëpapiramahuëꞌ, Yosëri ananpitaantarin. Ina nohuanton iso quëmapi nani noyataton, isëquë huanirarin.

Hechos 5:30

Tëhuënchachin corosëquë patanantatomaꞌ, Quisoso tëpapiramahuëꞌ, shimashonënpoapita chinotërinso Yosëri chachin ananpitaantarin.

Romanos 1:4

Yosë pochachin niꞌton, noyasáchin ninin. Chiminpirinhuëꞌ, Yosëri ananpitaantarin. “Inasoꞌ tëhuënchachin Yosë huiꞌnin. Chini chiníquën nanantarin,” tënëhuaꞌ. Ananpitaantarin niꞌton, nitotërëhuaꞌ. Quisocristo chachin huaꞌanëntërinpoaꞌ niꞌton, “Sinioro” itërëhuaꞌ.

Romanos 10:7

“¿Intaꞌ chimipiroꞌsaꞌ yaꞌhuëpiquë papon ina quëran Cristo quënantacaso marëꞌ?” co taꞌcasoꞌ yaꞌhuërinhuëꞌ. Nani nanpiantarin.

Romanos 15:33

Yosëíchin asanocancaninpoaꞌ. Canpitantaꞌ noya catahuainquëmaꞌ, tënahuë. Amen.

Romanos 16:20

Yosëíchin catahuarinpoaꞌ sano cancantacasoꞌ. Sopai yanonpintopirinquëmahuëꞌ, Yosë catahuarinquëmaꞌ niꞌton, aꞌnaroáchin sopai minsëaramaꞌ. Canpita marëꞌ Yosë nontarahuë. Inaora nohuanton, Sinioro Quisocristo noya catahuainquëmaꞌ, tënahuë.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

1 Corintios 14:33

Yosësoꞌ co nisha nisha ayonquirinpoahuëꞌ. Catahuarinpoaꞌ sano cancantacasoꞌ. Niyontonëhuaquëntaꞌ catahuarinpoaꞌ aꞌnaya aꞌnayanpoaꞌ pënëntatëhuaꞌ noya Yosë chinotacaso marëꞌ. Yaꞌipi Yosë imarëhuasopita nisha nisha niyontonëhuaquë,

1 Corintios 15:15

Co nanpiantarinhuëꞌ naporini, nani nonpinchitënquëmahuëꞌ. Nipirinhuëꞌ, co iyaroꞌsaꞌ nonpin nanan aꞌchintërainquëmahuëꞌ. “Yosëri chachin ananpitaantarin,” itohuatëinquëmara, noꞌtëquën nontërainquëmaꞌ.

1 Corintios 6:14

Yosë nohuanton, Sinioro Quisoso nanpiantarin. Inari chachin chiníquën nanantaton, nonënpoaꞌ ananpitaantarinpoaꞌ.

2 Corintios 13:11

Nani iyaroꞌsaꞌ ninshitëranquëmaꞌ. Noya cancantocoꞌ, tënahuë. Yaꞌipi cancanëma quëran Yosë imacoꞌ. Pënënanquëmasoꞌ noya natëtomaꞌ, niachinicancancoꞌ. Napopináchin yonquicoꞌ. Noya niniꞌtomaꞌ, yaꞌhuëcoꞌ. Inapohuatamaꞌ, Yosë catahuarinquëmaꞌ. Inasáchin nosoroatonpoaꞌ, catahuarinpoaꞌ sano cancantacaso marëꞌ.

2 Corintios 4:14

Tëpapirinacoihuëntaꞌ, Quisocristo imarai niꞌtoi, Yosë ananpitaantarincoi, tënai. Iráca Quisocristo ananpitaantarinsoꞌ pochin quiyantaꞌ ananpitaantarincoi. Yosëꞌpaꞌ quëpantarincoi. Canpitaroꞌcoi chachin yaꞌhuëcontarihua huachi.

Gálatas 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristo acorinco nanamën aꞌchinaꞌhuaso marëꞌ. Co piyapiꞌsaꞌ inahuara nohuanton aꞌparinacohuëꞌ aꞌchinaꞌhuaso marëꞌ. Co inapita acorinacohuëꞌ. Tata Yosë chachin acorinco. Ina nohuanton, Quisocristo nanpiantarin huachi. Nani nanpiantohuachina, ina chachin nanan quëtërinco aꞌchinaꞌhuaso marëꞌ.

Efesios 1:20

Iráca chiníquën nanantaton, Quisocristo ananpitaantaran. Inápaquë quëpantarahuaton, inchinan quëran ahuënsëran niꞌton, chini chiníquën nanantarin,” itërahuë, Yosë nontato.

Filipenses 4:9

Naꞌcon Yosë nanamën shaꞌhuitëranquëmaꞌ, natanamaꞌ. Yaꞌipi aꞌchintëranquëmasoꞌ noya natëcoꞌ. Canpitataquë yaꞌhuapo, noya ninahuë, niꞌnamaco. Ca pochachin noya nicoꞌ. Noya nipatamaꞌ, Yosë noya catahuarinquëmaꞌ. Ina nohuanton, noya niniꞌtomaꞌ, yaꞌhuaramaꞌ. Inasáchin asanocancaninpoaꞌ.

Colosenses 2:12

Aporihuanpatëhuaꞌ, Quisocristo pochin ninëhuaꞌ. Chiminpachina, paꞌpitopirinahuëꞌ. Yosë nohuanton, nanpiantarin. Inapochachin canpoantaꞌ co noyahuëꞌ yonquirëhuasopita naniantarihuaꞌ. Ina quëran Quisocristo nanpiantarinso pochin ninëhuaꞌ. “Yosë yaꞌipiya nanitaparin,” topatëhuaꞌ, catahuarinpoaꞌ ina pochin nicacasoꞌ.

1 Tesalonicenses 1:10

Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

2 Tesalonicenses 3:16

Sinioroíchin asanocancaninpoaꞌ. Ina catahuainquëmaꞌ sano cancantacamaso marëꞌ. Maꞌsona onpopiramahuëntaꞌ, nani tahuëri catahuainquëmaꞌ ama paꞌyanacamaso marëhuëꞌ. Nani tahuëri noya aꞌpainquëmaꞌ.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 9:20

Inapotahuaton: “Nani anoyatërinso Yosë shaꞌhuitërinpoaꞌ natëcaso marëꞌ. Iso huënaiꞌ paꞌnin niꞌton, Yosë canpoarë anoyatërinso anitotërinpoaꞌ,” tënin Moisësë.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

1 Pedro 2:25

Ohuica chihuërinso pochin nicatëhuaꞌ, co Yosë nohuitopirëhuahuëꞌ, iporasoꞌ Quisocristo imarëhuaꞌ. Inasoꞌ ohuicaroꞌsaꞌ huaꞌanën pochin niꞌton, noya aꞌpaiarinpoaꞌ.

1 Pedro 5:4

Quisocristo imarëhuaꞌ niꞌton, yaꞌipinpoaꞌ huaꞌanëntërinpoaꞌ. Aꞌna tahuëri oꞌmantararin. Noya ansianoꞌsaꞌ nipatamaꞌ, naporoꞌ noya canaaramaꞌ. Isoroꞌpaquë canatohuachinara, yancotëꞌ huëron quëran nipisoꞌ quëtopirinahuëꞌ, inasoꞌ aꞌnaroáchin ahuirin. Inapaquëso nipirinhuëꞌ canahuatamaꞌ, yaꞌhuëtomiatarinquëmaꞌ. Noya noya yaꞌhuëcontaramaꞌ.