Hebreos 13:15 - Chayahuita (Shahui)

¹⁵ Napoaton iporasoꞌ co huachi maꞌsha tëparihuahuëꞌ Yosë chinotacaso marëꞌ. Nani tahuëri ina chinotatëhuaꞌ, “Ma noyanquëncha Tata Yosë quëmaso paya. Quisocristoíchin anoyacancantërincoi niꞌton, ‘Yosparinquën Sinioro,’ itërainquën,” itahuaꞌ.

Hebreos 13:15 ပူးပေါင်းရင်းမြစ်များ

Esdras 3:11

“Yosparinquën Sinioro,” itatonaꞌ, Yosë cantanën cantapi: “Sinioroso noya niꞌton, chinotahuaꞌ. Israiroꞌsanpoa nosororinpoasoꞌ, co nitiquiaponhuëꞌ,” topi. Inapoatona capa cancantopi. Capa cancantatona nonca, nonca charapi: “¡Ma noyacha Siniorosoꞌ! ¡Ina catahuarinpoa niꞌton, ina chinotacaso pëi simintonën nani acoarëhuaꞌ!” topi.

Salmos 118:19

Sinioro chinotacaso pëiꞌ iꞌsoatocoꞌ. Yaꞌconato, “Yosparinquën Sinioro,” ichi.

Salmos 119:108

“Yosparinquën Sinioro,” taꞌto chinotaranquën. Ina natanaton, noya cancantëquëꞌ. Naporahuaton shaꞌhuiransopita aꞌchintoco.

Mateo 11:25

Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Lucas 10:21

Naporoꞌ Ispirito Santo nohuanton, Quisoso nóya cancantërin. Noya cancantaton, Yosë nontarin. “Ma noyacha, Tata, yonquiran paya. Quëmasoꞌ chini chiníquën nanantëran. Inápaquë, isoroꞌpaquë, yaꞌipi parti huaꞌanëntaran. Quëma nohuanton, aꞌnaquën nani maꞌsha nitotaponaraihuëꞌ, co nanamën nitotopihuëꞌ. ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ catahuaran. ‘Catahuaco Sinioro co caora nanitërahuëꞌ,’ itohuachinën, quëma nanamën chachin anitotëran. Ina marëꞌ Tata, ‘Yosparinquën,’ itëranquën,” tënin, Yosë nontaton.

Juan 10:9

Casáchin yaꞌcoana pochin ninahuë. Ca quëran yaꞌconpatamaꞌ, chaꞌësaramaꞌ. Ohuicaroꞌsaꞌ pipirahuatonaꞌ, noya coshatopi. Ina quëran yaꞌcoantapi. Inapochachin imarinacosopita noya paꞌsapi.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Romanos 12:1

Yosë naꞌcon nosororinpoaꞌ niꞌton, yaꞌipi cancanëma quëran, iyaroꞌsaꞌ, ina imacoꞌ. Iráca Yosë chinotohuachinara, maꞌsha tëpapi. Canpitaso nipirinhuëꞌ Yosë marëꞌ nanpitomaꞌ, nohuantërinsoráchin nicoꞌ. Ina yonquiatomaꞌ, nani tahuëri noyasáchin nicoꞌ. Ina Yosë nohuantërin. Inapohuatamaꞌ, Yosë noya chinotaramaꞌ.

Romanos 6:19

Iso pochin aꞌchintaranquëmaꞌ noya noya nitotacamaso marëꞌ. Canpitaora co nitotëramahuëꞌ. Iracasoꞌ yaꞌipi nonëma quëran huarëꞌ oshahuanacasoáchin paꞌyatëramaꞌ. Inapohuatamara, paꞌpi nishinahuënꞌ cancantëramaꞌ. Iporasoꞌ noyasáchin nicoꞌ. Inapohuatamaꞌ, noyápiachin cancantaramaꞌ.

Efesios 2:18

Quisocristo chiminin niꞌton, yaꞌipinpoaꞌ nanitërëhuaꞌ Tata Yosë nontacasoꞌ. Ispirito Santo catahuarinpoaꞌ niꞌton, ina nontohuatëhuara, noya nataninpoaꞌ.

Colosenses 1:12

Nani anoyacancantohuachinpoara, huëntonënquë chachin ayaꞌconinpoaꞌ. Huiꞌninpita pochin niꞌsarinpoaꞌ. Iporasoꞌ ina catahuahuachinpoaꞌ, tahuëri pochin cancantarihuaꞌ. Naporahuatëhuaꞌ, yaꞌhuërinquë chachin yaꞌhuëcontarihuaꞌ. Ina marëꞌ noya cancantatëhuaꞌ “Yosparinquën Sinioro,” itarihuaꞌ.

Hebreos 12:28

Huaꞌanëntërinquë chachin ayaꞌconinpoaꞌ. Inápaquë paꞌpatëhuaꞌ, co onporontaꞌ taꞌhuantarihuahuëꞌ. Napoaton: “Yosparinquën Sinioro,” itahuaꞌ. Yaꞌipi cancanënpoa quëran inasáchin chinotahuaꞌ. Noya cancantatëhuaꞌ, natëahuaꞌ noya nicainpoaso marëꞌ. Ipora huantaꞌ Yosësoꞌ noꞌtëquën anaꞌintarin niꞌton, tëꞌhuatacasoꞌ yaꞌhuërin. Pënquë maꞌsha ahuiquitërëso pochin yaꞌipi co noyahuëꞌ nininsopita anaꞌintarin.

Hebreos 7:25

Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

1 Pedro 2:5

Imaramaꞌ niꞌton, canpitantaꞌ noya naꞌpiroꞌsa pochin nisaramaꞌ. Nanpimiataramaꞌ. Yaꞌipi imarëhuasopita Yosë acorinpoaꞌ pëinën pochin nicacaso marëꞌ. Cancanënpoa quëran huarëꞌ ina naꞌcon chinotërëhuaꞌ niꞌton, corto huaꞌanoꞌsa pochin nisarëhuaꞌ. Nani tahuëri ina chinotatëhuaꞌ, “Yosparinquën Sinioro,” itahuaꞌ. Nicatahuacasontaꞌ ama naniantahuasohuëꞌ. Quisocristo catahuarinpoaꞌ ina pochin nicacasoꞌ. Ina marëꞌ Yosë noya niꞌsarinpoaꞌ.

1 Pedro 4:11

Aꞌnaquën Yosë nohuanton, nitotopi pënëntacaisoꞌ. Nitotohuatamaꞌ, Yosë noninso chachin pënëntocoꞌ. Aꞌnaquëontaꞌ Yosë nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Yosë catahuarinquëmaꞌ niꞌton, ina yonquiatomaꞌ, aꞌnapita noya catahuacoꞌ. Maꞌsona tërantaꞌ nipatamaꞌ, yaꞌipi cancanëma quëran nicoꞌ. Piyapiꞌsaꞌ nicatënënquëmaꞌ Yosë noya noya yonquicaiso marëꞌ inapocoꞌ. Yosësoꞌ noya noya ninin. Chini chiníquën nanantërin. Yaꞌipi piyapiꞌsari ina chinochinaꞌ. Quisocristo catahuarinpoaꞌ ina pochin cancantacasoꞌ. Amen.