Hebreos 13:14 - Chayahuita (Shahui)

¹⁴ Co isoroꞌpaquë yaꞌhuëmiatarihuahuëꞌ. Yosë yaꞌhuërinꞌpaꞌ pantacasoꞌ ninarëhuaꞌ. Inatohuaꞌ yaꞌhuëmiatarihuaꞌ.

Hebreos 13:14 ပူးပေါင်းရင်းမြစ်များ

Miqueas 2:10

¡Co isëquëranchin yaꞌhuëápamaso yaꞌhuërinhuëꞌ! ¡Paco huachi! Co canpita iso noꞌpaquë noya chinotápamaso yaꞌhuërinhuëꞌ. Canpitari iso noꞌpaꞌ tapirama niꞌton, ataꞌhuantaꞌhuaso yaꞌhuërin.

1 Corintios 7:29

Niꞌcoꞌ, iyaroꞌsaꞌ. Yosë nohuanton, co huaꞌquiꞌ isoroꞌpaquë yaꞌhuarihuahuëꞌ. Napoaton saꞌahuanpatamaꞌ, ama saꞌamachin yonquicosohuëꞌ. Yosë naꞌcon naꞌcon yonquicoꞌ.

2 Corintios 4:17

Tëhuënchachin iporasoꞌ piꞌpian parisitapirëhuahuëꞌ, co huaꞌquiꞌ isoroꞌpaquë yaꞌhuarihuahuëꞌ. Yosëꞌpaꞌ paꞌpatëhuaꞌ, co onporontaꞌ pipiarëhuahuëꞌ. Imarëhuaso marëꞌ parisitapirëhuahuëꞌ, inapaquësoꞌ noya noya cancantarihuaꞌ. Yosë pochachin cancantarihuaꞌ.

Efesios 2:19

Napoaton iporasoꞌ iyaroꞌsaꞌ, Yosë nohuitëramaꞌ. Co Yosëꞌpaꞌ paꞌshatërapomarahuëꞌ, nani huëntonënquë ayaꞌconinquëmaꞌ. Yaꞌhuëhuanoꞌsa pochin nisaramaꞌ. Co huachi nisharoꞌsa pochin niꞌninquëmahuëꞌ. Yaꞌipinpoaꞌ Quisocristo imarëhuasopita huiꞌninpita pochachin nóya niꞌninpoaꞌ.

Filipenses 3:20

Canpoaso nipirinhuëꞌ, inápaquë yaꞌhuërinsoꞌ naꞌcon naꞌcon yonquiaꞌahuaꞌ. Inatohuaꞌ yaꞌhuëmiatarihuasoꞌ. Sinioro Quisocristo nichaꞌërinpoaꞌ niꞌton, ina ninarëhuaꞌ. Aꞌna tahuëri inápa quëran oꞌmantararin.

Hebreos 10:34

Tashinan pëiquë poꞌmohuachinara, co tëꞌhuatomarahuëꞌ, nicapomaꞌ paꞌnamaꞌ. Paatomaꞌ, catahuaramaꞌ. Canpitantaꞌ imaramaso marëꞌ maꞌshanëmaꞌ osërëtopirinënquëmahuëꞌ, co sëtëramahuëꞌ. “Yosë chachin nohuitërëhuaꞌ. Nasha cancan quëtërinpoaꞌ. Co insontaꞌ nanitërinhuëꞌ inasoꞌ osërëtinpoasoꞌ,” taꞌtomaꞌ, nóya cancantëramaꞌ.

Hebreos 12:22

Canpoaso nipirinhuëꞌ, co ina motopi yaꞌcarirëhuahuëꞌ. Quisocristo imapatëhuaꞌ, nisha motopi yaꞌcarirëhuaꞌ, Sion itopisoꞌ. Yosë chachin nohuitarihuaꞌ. Co ipora quënanpirëhuahuëꞌ, nanpiárin. Aꞌna tahuëri yaꞌhuërinquë chachin pantarihuaꞌ. Nasha Quirosarinquë yaꞌhuëcontarihua huachi. Notohuaroꞌ anquëniroꞌsaꞌ inaquë niyontonpi. Noya cancantatonaꞌ, Yosë chinotapi.

Hebreos 12:27

Aꞌna tahuëri mini yaꞌipi maꞌsha isoroꞌpaquë yaꞌhuërinsopita taꞌhuantarin. Maꞌsha yaꞌhuëmiatërinsoꞌ acohuachinasoꞌ, yaꞌhuëmiatarin.

Hebreos 2:5

Iráca quëran huarëꞌ Yosë yonquihuachinpoara, co nohuantërinhuëꞌ anquëniroꞌsaꞌ huaꞌanëntinpoasoꞌ. Aꞌna tahuëri nasharoꞌpaꞌ nipachin, co inapita huaꞌanëntarinënpoahuëꞌ. Ina shaꞌhuitaranquëmaꞌ.

Hebreos 4:9

Napoaton ipora huantaꞌ Yosë nohuantërin asanocancainpoasoꞌ. Yosë anoyacancantohuachinpoaꞌ, sano cancantarihuaꞌ.

Hebreos 9:11

Iporaso nipirinhuëꞌ, Quisocristo nani oꞌmarin. Corto huaꞌan chini chiníquën nanantërinso pochin nicaton, nóya catahuarinpoaꞌ. Co chinotopiso pëiquë yaꞌconaton, nanan anoyatërinpoahuëꞌ. Co isoroꞌpaquë nipiso pëiquë yaꞌconinhuëꞌ. Co chipo, ohuacaꞌhuaya, inapita tëparinhuëꞌ huënainën macacaso marëꞌ. Inaora huënainën chachin aꞌparin. Chiminaton, oshanënpoaꞌ inquitërinpoaꞌ. Ina quëran Yosë yaꞌhuërinquë chachin panantarin aꞌnaromaráchin nanan anoyatinpoaso marëꞌ. Inaquë noya noya catahuarinpoaꞌ. Canpoa marëꞌ chiminin niꞌton, anoyacancantarinpoaꞌ. Ina imapatëhuaꞌ, nichaꞌësarinpoaꞌ.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

Apocalipsis 3:12

Sopai minsëhuatamaꞌ, Yosë yaꞌhuërinquë chachin pantaramaꞌ. Piyon pëiꞌ achinirinso pochin naꞌcon nohuantaranquëmaꞌ. Napoaton yaꞌhuëmiatontaramaꞌ. Co pipiaramahuëꞌ. Yosë co onporontaꞌ aꞌpoarinquëmahuëꞌ. Nininën chachin acotaranquëmaꞌ. Aꞌna tahuëri panca ninanoꞌ yaꞌhuapon. Inápa quëran oꞌmararin. Nasha Quirosarin itopisoꞌ. Ina nininëontaꞌ acotaranquëmaꞌ. Cantaꞌ Quisosoco oꞌmantahuato, nasha nininëhuë acotaranquëmaꞌ. Co onporontaꞌ aꞌpoaranquëmahuëꞌ.