Hebreos 12:2 - Chayahuita (Shahui)

² Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

Hebreos 12:2 ပူးပေါင်းရင်းမြစ်များ

Salmos 110:1

Yosëri Sinioronëhuë shaꞌhuitërin: “Inchinanëhuë quëran huënsëquëꞌ. Inimiconënpita carinquën minsëchinquën,” itërin.

Isaías 31:1

Iquipitoroꞌsari catahuacaiso marëꞌ paapapisopita, ¡maꞌhuántacha nisapi paya! “Cahuarioroꞌsaꞌ, naꞌa sontaroꞌsa toronanquë paꞌpisopita, notohuaroꞌ cahuarioquë paꞌpisopita sontaroꞌsaꞌ, inapita catahuaponacoi,” topisopitantaꞌ, ¡maꞌhuantacha nisapi paya! Co Siniorori catahuacaiso ninapihuëꞌ. Inasoꞌ noyasáchin ninin niꞌton, Israirori chinotërin. Napoaponahuëꞌ, co ina nontopihuëꞌ. Ina marëꞌ ¡maꞌhuantacha nisapi paya!

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 53:3

Piyapiꞌsari nocanatona aꞌpoaponaꞌ. Co noyahuëꞌ nicatona chiníquën aparisitapi. Aꞌpopi niꞌton, paꞌpi sëtaton parisitapon. Canpoarinta co niꞌchináchinhuëꞌ cancantatëhuaꞌ, nocanëhuaꞌ. Co piꞌpian tëranta noya yonquirapirëhuahuëꞌ.

Isaías 8:17

Cacopo quëran pipipisopita, Siniorori co huachi yacatahuarinhuëꞌ. Cariso napoaporahuëꞌ, inasáchin ninarahuë: ‘Catahuarinco mini,’ tënahuë.

Números 21:9

Napotohuachina, Moisësëso shaꞌpi huaꞌna quëran yaꞌhuan nonanin. Inapotahuaton, naraquë achinpirin. Inso tëranta yaꞌhuanahuachina, aꞌnaroáchin ina nëꞌpëconin. Nëꞌpëhuachina, Sinioro nohuanton noyatërin.

Mateo 16:21

Naporo quëran huarëꞌ chiminacasoꞌ ninoton, caꞌtanoꞌsanënpita shaꞌhuitërin: —Quirosarinquë paꞌpato, naꞌcon parisitaꞌhuasoꞌ yaꞌhuërin. Cotio ansianoꞌsaꞌ, corto huaꞌanoꞌsaꞌ, cotio maistroꞌsaꞌ, inapita co huachi quëꞌyaarinacohuëꞌ. Tëpaarinaco. Chiminaporahuëꞌ, cara tahuëri quëran Yosë ananpitaantarinco, itërin.

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Marcos 15:28

Iráca Yosë quiricanënquë ninorin. “Apiroꞌsapitarëꞌ acorapi,” tënin. Naporinso chachin inapitarëꞌ acopi.]

Marcos 16:19

Nani caꞌtanoꞌsanënpita nontohuachina, inápaquë Sinioro Quisoso panantarin. Yosëri quëpantarahuaton, inchinanën quëran ahuënsërin.

Marcos 9:12

—Noꞌtëquën napopi. “Yosë nanamën ayonquiantacaso marëꞌ huëantapon,” tënin pënëntonaꞌpi. Naporinso chachin. Nani mini huëantapirinhuëꞌ, co nohuitopihuëꞌ. Co yanatanatonahuëꞌ, inahuara yonquinëna quëran noꞌhuipi. Yosë quiricanënquë naporinso chachin nitopi. Cantaꞌ Yosë quëran quëmapico niporahuëꞌ, inapochachin noꞌhuiarinaco. Aparisitarinaco. Yosë quiricanënquë iráca ninorin niꞌton, parisitaꞌhuasoꞌ yaꞌhuërin, itërin Quisosori.

Marcos 9:24

—Tëhuënchachin Sinioro natëpiranquënhuëꞌ. ¡Catahuaco noya noya natëinquën! itaantarin paꞌpini.

Lucas 17:5

Ina quëran caꞌtanoꞌsanënpitari itopi: —Catahuacoi Sinioro, Yosë noya noya natëꞌi, itopi.

Lucas 23:11

Napohuachina, Irotisëri tëhuarin. Sontaronënpitarintaꞌ tëcaripi. Noyápiachin huaꞌan aꞌmorinso pochin aꞌmotahuaton, Piratoquë aꞌpaantarin.

Lucas 24:26

Cristo parisitacasoꞌ yaꞌhuërin. Nani parisitohuachina, naporo huarëꞌ Yosëꞌpaꞌ noya noya acoarin huachi, itërin Quisosori.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 12:24

Noꞌtëquën shaꞌhuitëranquëmaꞌ. Tricoraya pochin ninin. Co shaꞌpatërahuëꞌ, co naꞌarinhuëꞌ. Aꞌnaíchin nisárin. Napoaponahuëꞌ, shaꞌpatëra, chiminin pochin niponahuëꞌ, papotohuachina, naꞌa nitërin.

Juan 12:32

Co huaꞌquiya quëranhuëꞌ inápaquë achinpiarinaco. Ina quëran nisha nisha piyapiꞌsaꞌ imasarinaco, itërin.

Juan 13:3

Quisososo nipirinhuëꞌ yaꞌipi nitotërin. Yosë yaꞌhuërin quëran nani oꞌmarin. Co huaꞌquiya quëranhuëꞌ naquëranchin inatohuaꞌ panantararin. Tata Yosëri chini chiníquën nanan quëtërin yaꞌipiya huaꞌanëntacaso marëꞌ. Inantaꞌ nitotaton, coshatasocoi,

Juan 6:40

“Quëmasoꞌ tëhuënchachin Yosë huiꞌninquën,” itatomaco imapatamaco, Yosë nohuitatomaꞌ nanpimiatarama huachi. Ayaroꞌ tahuëri ananpitaantaranquëmaꞌ. Ina Yosë nohuantërin, itërin Quisosori.

Juan 8:56

Tata Apraan yonquirinco. “Aꞌna tahuëri Yosëri aꞌpaimarinsoꞌ oꞌmararin,” taꞌton, noya cancantërin. Nani niꞌninco niꞌton, noya cancantërin, itërin Quisosori.

Hechos 2:36

Yosë huiꞌnin chachin iyaroꞌsaꞌ, corosëquë apatanantëramaꞌ. Inapotopiramahuëꞌ, Yosëri noya noya niꞌnin. ‘Inasoꞌ Cristo, aꞌpaimarahuësoꞌ. Sinioro niꞌton, natëcasoꞌ yaꞌhuërin,’ tënin. Noꞌtëquën iyaroꞌsaꞌ nani shaꞌhuitëranquëmaꞌ,” itërin.

Hechos 3:15

Quisoso mini ananpirinpoaso nipirinhuëꞌ, atëpatëramaꞌ. Tëpapirinahuëꞌ, Yosëri ananpitaantarin. Quiyasoꞌ niꞌnai.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

Hechos 5:41

Aꞌpahuachinara, pipipi. “Yosë noya niꞌnincoi niꞌtoi, Quisoso marëꞌ parisitërai,” taꞌtonaꞌ, capa cancantopi. Co mantaꞌ sëtopihuëꞌ.

1 Corintios 1:18

Aꞌchinpatëra, “Quisocristo corosëquë chiminin nichaꞌëinpoaso marëꞌ,” itërahuë. Aꞌnaquën natanpachinara, tëhuapi. Naporinsopita chiminpachinaꞌ, parisitomiatapi. Canpoaso nipirinhuëꞌ noya natanëhuaꞌ. Nani Yosë anoyacancantërinpoaꞌ. Yosëíchin nanitaparin nichaꞌëinpoasoꞌ.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.

Efesios 2:16

Naporahuaton, co huachi Yosë inimicotërëhuahuëꞌ. Quisocristo corosëquë chiminaton, nanan anoyatërinpoaꞌ. Catoꞌ huënton pochin nipirëhuahuëꞌ, Quisocristo imapatëhuaꞌ, noya ninicatëhuaꞌ yaꞌhuërëhuaꞌ. Aꞌna huëntoíchin ninëhuaꞌ.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Filipenses 1:6

“Quisocristo imasarahuë huachi,” topatamaꞌ, naporo tahuëri chachin Yosë anoyacancantërinquëmaꞌ. Co naniantarinquëmahuëꞌ, tënahuë. Ipora huantaꞌ catahuarinquëmaꞌ noya noya nicacamaso marëꞌ. Quisocristo oꞌmantaquë huarëꞌ catahuarinquëmaꞌ. Naporoꞌ Quisocristo pochachin cancantaramaꞌ.

Filipenses 3:20

Canpoaso nipirinhuëꞌ, inápaquë yaꞌhuërinsoꞌ naꞌcon naꞌcon yonquiaꞌahuaꞌ. Inatohuaꞌ yaꞌhuëmiatarihuasoꞌ. Sinioro Quisocristo nichaꞌërinpoaꞌ niꞌton, ina ninarëhuaꞌ. Aꞌna tahuëri inápa quëran oꞌmantararin.

2 Timoteo 4:8

Napoaton Yosëꞌpaꞌ acanaarinco. Quisocristo oꞌmantahuachin, coisë pochin nicaton, noꞌtëquën shaꞌhuitarinpoaꞌ. Naporoꞌ noya ninahuëso marëꞌ acanaarinco. Co casáchin acanaarincohuëꞌ. Aꞌnapitantaꞌ Quisocristo nosoroatonaꞌ, “Manóton oꞌmantaꞌin,” topisopitantaꞌ Yosëꞌpaꞌ canaapi.

Hebreos 1:13

Ina quëran huiꞌnin itantarin: “Chiníquën nanantaton, inchinanëhuë quëran huënsëquëꞌ yaꞌipi inimiconënpita carinquën minsëchinquën,” itërin Yosëri. Co inso anquëni tërantaꞌ ina pochin nontërinhuëꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 10:14

Aꞌnaroíchin chiminaponahuëꞌ, anoyacancantërinpoaꞌ. Yaꞌipi imarëhuasopita oshanënpoaꞌ inquitatonpoaꞌ, noyápiachin cancan quëtërinpoaꞌ.

Hebreos 10:33

Imaramaso marëꞌ aꞌninquëchin tëhuarinënquëmaꞌ, noꞌhuirinënquëmaꞌ. Aꞌna tahuëri ahuëpirinënquëmahuëntaꞌ, noya cancantëramaꞌ. Aꞌnapita imapisopitantaꞌ parisitohuachinara, nosoroatomaꞌ, catahuaramaꞌ.

Hebreos 11:36

Aꞌnaquëontaꞌ Yosë imapi niꞌton, tëhuapi, huihuipi, catinaquë tonpopi, tashinan pëiquë poꞌmopi, napotopi.

Hebreos 12:3

Isoroꞌpaquë yaꞌhuapon, oshahuanoꞌsari chiníquën noꞌhuipirinahuëꞌ, ahuantërin. Ina yonquiatëhuaꞌ, ama yaaꞌpoaꞌhuasohuëꞌ. Chiníquën cancantocoꞌ.

Hebreos 13:13

Napoaton canpoantaꞌ aparisitohuachinënpoaꞌ, ahuantahuaꞌ. Iráca pënëntërinso nanan naniantatëhuaꞌ, Quisocristoíchin imahuaꞌ. Ina noꞌhuipiso pochin noꞌhuipirinënpoaontaꞌ, ahuantahuaꞌ.

Hebreos 5:9

Noꞌtëquën natëton, canpoa marëꞌ chiminin. Napoaton nanitërin anoyacancantinpoasoꞌ. Ina natëhuatëhuaꞌ, noya nichaꞌësarinpoaꞌ nanpimiatacaso marëꞌ.

Hebreos 7:19

Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.

Hebreos 8:1

Noꞌtëquën shaꞌhuitaranquëmaꞌ. Quisocristo inápaquë panantarahuaton, Yosë inchinanën quëran chachin huënsërin. Corto huaꞌan chini chiníquën nanantërinso pochin niꞌton, nanan anoyatërinpoaꞌ.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

Santiago 2:1

Quisocristo huaꞌanëntërinpoaꞌ. Inasáchin noya noya ninin. Ina imaramaꞌ niꞌton, ama iyaroꞌsaꞌ aꞌnapita nocancosohuëꞌ. Yaꞌipi piyapiꞌsaꞌ napopináchin nosorocoꞌ.

1 Pedro 1:11

Ispirito Santo nohuanton, iráca Cristo ninopi. “Parisitapon. Ina quëran nanpiantarahuaton, noya noya yaꞌhuapon,” topi ninotonaꞌ. Napoatonaꞌ, yonquiapi. “¿Ma quëmapitaꞌ oꞌmaton, parisitapon? ¿Onporotaꞌ parisitaponsoꞌ?” topi.

1 Pedro 3:18

Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin.

1 Pedro 3:22

Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.

Judas 1:21

Inapotatomaꞌ, nani tahuëri nóya cancantocoꞌ Yosë nosoroꞌinquëmaꞌ. Ina naꞌcon nohuantocoꞌ. Quisocristo yonquiatomaꞌ, oꞌmantacasoꞌ tahuëri ninacoꞌ. Oꞌmantahuachin, nosoroatonpoaꞌ, chimirin quëran nichaꞌësarinpoaꞌ. Yosëꞌpaꞌ nanpimiatarihuaꞌ.

Apocalipsis 1:11

Nontatonco, shaꞌhuitërinco: —Apira nani maꞌsha aꞌnotaranquën, quiricaquë ninshitëquëꞌ. Ina quëran canchisë ninanoroꞌsaquë aꞌpatëquëꞌ imarinacosopita nonchinaꞌ. Ipisoquë, Ismirinaquë, Pircamoquë, Tiatiraquë, Sartisiquë, Piratiripiaquë, Naotisiaquë inaquëpita yaꞌhuëpisopita aꞌpatëquëꞌ nitochinaꞌ, itërinco.

Apocalipsis 1:17

Ina niꞌsahuato, paꞌyanahuë. Chimipi pochin anotërahuë. Nantën pirayan anotopirahuëꞌ, inchinan quëran sëꞌhuarahuatonco, nontërinco. —Ama tëꞌhuatocosohuëꞌ. Casoꞌ iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ.

Apocalipsis 1:8

Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.