Hebreos 12:15 - Chayahuita (Shahui)

¹⁵ Yosë inaora nohuanton nosoroatonpoaꞌ, yacatahuarinpoaꞌ. Aꞌnaquëniso nipirinhuëꞌ, co yatahuërëtopihuëꞌ. Inahuara yonquipisoáchin imatonaꞌ, co Yosë yonquicaisoꞌ nohuantopihuëꞌ. Ama inapita pochin cancantocosohuëꞌ. Co Yosëíchin yonquihuatamahuëꞌ, oshaquëran nitapicancanaramaꞌ. Ina quëran pënanin aꞌnaroáchin sëꞌcotëtërinso pochachin aꞌnapitantaꞌ atapicancanaramaꞌ.

Hebreos 12:15 ပူးပေါင်းရင်းမြစ်များ

Éxodo 32:21

Ina quëran Aaron itapon: —¿Maꞌta onpotërinquën isopita niꞌton, mamanshi nicaton napoin aoshahuanan? itërin.

Isaías 5:4

¡Noya nitacaso marëꞌ nanirinso chachin nani acotërahuë! Noꞌtëquën chachin caso cashi cashin opa nitacaisoꞌ ninarahuë. Inapotopirahuëꞌ, áin opasáchin nitërin.

Isaías 5:7

Israiroꞌsaꞌ, Cota huënton israiroꞌsanpoaꞌ, canpoasoꞌ, Sinioro yaꞌipi nanitaparinsoꞌ oparonën pochin ninëhuaꞌ. Napoaton: “Inapitasoꞌ, pënëntërahuësoꞌ natëtona noya nicacaiso yaꞌhuërin,” topirinhuë Siniorosoꞌ. Nitëpacasoráchin tëhuënchinsoꞌ paꞌyatërëhuaꞌ. Noya nicacasoꞌ ninapirinhuëꞌ, maꞌsha nionpotatëhua nitësharárëhuaꞌ.

Jeremías 2:21

Noya noya opa shaꞌnëso pochin canpitaso acoranquëmaꞌ. Huayonatë shaꞌnëso pochin nitëranquëmaꞌ. Inapotopiranquëmahuëꞌ, canpitaso coꞌchachin nishatëramaꞌ. Napoatoma co huachi onpo nohuitochináchinhuëꞌ ninamaꞌ.

Lucas 22:32

Caso nipirinhuëꞌ iyasha, nani Yosë nontërahuë ama aꞌpoancoso marëhuëꞌ. Napoaton co naniantomiatarancohuëꞌ. Noya imaantahuatanco, iyanpita achinicancanquëꞌ, itërin.

1 Corintios 10:12

Aꞌnaya aꞌnayanquëmaꞌ niꞌcona oshahuantamaꞌ. “Casoꞌ noya piyapico. Co onporontaꞌ Yosë aꞌpoarahuëꞌ,” ama tocosohuëꞌ.

1 Corintios 13:8

Ipora quëran huarëꞌ ninosoromiatacasoꞌ yaꞌhuërin. Aꞌnaquën ipora Yosë yonquirinso chachin piyapiꞌsaꞌ shaꞌhuitapirinahuëꞌ, aꞌna tahuërisoꞌ co huachi ina shaꞌhuitacasoꞌ yaꞌhuaponhuëꞌ. Aꞌnaquëontaꞌ nisha nananquë nonpiso pochin nonpi. Aꞌna tahuëriso nipirinhuëꞌ co huachi ina pochin nonacasoꞌ yaꞌhuaponhuëꞌ. Iporasoꞌ aꞌnaquën nitotërin aꞌchinacasoꞌ. Aꞌna tahuëri co huachi maꞌsha anitotacasoꞌ yaꞌhuaponhuëꞌ. Inapitasoꞌ co yaꞌhuëmiatarinhuëꞌ. Nipirinhuëꞌ, ninosorocasosoꞌ yaꞌhuëmiatarin.

1 Corintios 15:33

Ama ina pochin yonquicosohuëꞌ. Niꞌcona aꞌnapita anishacancantochinënquëmaꞌ. “Co noyahuëꞌ nipisopitarëꞌquëmaꞌ nipayahuatamaꞌ, canpitantaꞌ nitapicancanaramaꞌ. Inapita nonanpatamaꞌ, co huachi noyápiachin cancantaramahuëꞌ,” topi iráca. Noꞌtëquën napopi.

1 Corintios 5:6

Iporaso nipirinhuëꞌ “Nóya imarai,” topiramahuëꞌ, co yaꞌipinquëmaꞌ noya ninamahuëꞌ. Co noꞌtëquën yonquiramahuëꞌ. Niꞌcoꞌ. “Pan nipatëra, piꞌpian ahuëpocatërinsoꞌ acohuachina, yaꞌipi sëꞌcotërin,” topi. Nani ina nitotëramaꞌ. Inapochachin aꞌnayanquëma tërantaꞌ co noyahuëꞌ yonquihuatamaꞌ, yaꞌipinquëmaꞌ nitapicancanaramaꞌ.

2 Corintios 13:5

Canpitaso nipirinhuëꞌ nitantiacoꞌ. Canpitaora yonquinëma quëran yonquicoꞌ. Aꞌnaquëmaꞌ co cancanëma quëran huarëꞌ imashatëraramahuëꞌ nimara. Yaꞌipi cancanëma quëran imapatamaꞌ, Quisocristo yaꞌcoancantërinquëmaꞌ. ¿Co ina nitotëramahuëꞌ ti? Aꞌnaquëmaso nipirinhuëꞌ co tëhuënchachin imamaranquëmahuëꞌ.

2 Corintios 6:1

Yosë acorincoi nanamën aꞌchinaꞌhuaiso marëꞌ. Acoatoncoi, catahuarincoi aꞌchintaꞌhuainquëmaso marëꞌ. “Yosë nosoroatonpoaꞌ, yanichaꞌërinpoaꞌ,” itërainquëmaꞌ. Ama topinan quëran natancosohuëꞌ. Imaco huachi.

Gálatas 2:13

Yaꞌhuëhuanoꞌsantaꞌ cotioroꞌsaꞌ nipisopita Pitro nicatonaꞌ, nisha coshatopi. Pirnapintaꞌ Pitrorë chachin nisha coshatërin. Quisocristo nanamën nitotaponaraihuëꞌ, co noꞌtëquën imapihuëꞌ.

Gálatas 5:4

“Noꞌtëquën natëhuatëhuaꞌ, Yosë noya niꞌsarinpoaꞌ,” topatamaꞌ, co Quisocristo imaramahuëꞌ. Yosë inaora nohuanton, nosoropirinquëmahuëꞌ, Quisocristo naniantohuatamaꞌ, co huachi catahuarinquëmahuëꞌ.

Efesios 5:3

Yosë anoyacancantërinquëmaꞌ niꞌton, ama iyaroꞌsaꞌ monshihuancosohuëꞌ. Ama aꞌna quëmapi saꞌin noyapacosohuëꞌ. Ama maꞌsharáchin cancantatomaꞌ, apiracosohuëꞌ. Ama aꞌnapita tëranta ina pochin nipiso shaꞌhuitocosohuëꞌ.

Deuteronomio 32:32

Inahuasoꞌ, oparo nitapirinso pochin nipi. Opasoꞌ cashi cashin nipirinhuëꞌ, inahuasoꞌ, opa máin pochin nipi. Shiꞌërin nitërinso pochin niconpi. Paꞌpi co noyahuëꞌ nipi niꞌton, Sotomaroꞌsaꞌ, Comoraroꞌsaꞌ, inapita pochin cancantopi.

Deuteronomio 4:9

Niꞌcona nani maꞌsha niꞌnamasopita naniantotamaꞌ. Aꞌchintëranquëmasopitanta yonquirácoꞌ. Ipora aꞌchintëranquëmasopita ama naniantatomarahuëꞌ, huiꞌnamapitanta aꞌchintocoꞌ. Shiparimapitanta inapotocoꞌ,” itërin.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

Tito 1:15

Noyápiachin cancantohuatëhuaꞌ, yaꞌipiya noya yonquiarëhuaꞌ. Aꞌnaquënso nipirinhuëꞌ co yaimapihuëꞌ. Taparosáchin yonquipi. Co noyahuëꞌ cancantohuachinara, nisha nisha yonquipi. Noꞌtën nanan nitotaponaraihuëꞌ, co yanatëpihuëꞌ. Napoaton co huachi noꞌtëquën yonquipihuëꞌ. Nitapicancanatonaꞌ, co huachi nanitopihuëꞌ noya yonquicaisoꞌ.

Hebreos 3:12

Canpitantaꞌ iyaroꞌsaꞌ aꞌnayanquëma tërantaꞌ co cancanëma quëran huarëꞌ natëhuatamahuëꞌ, co noya cancantaramahuëꞌ. Niꞌcona Yosë chachin aꞌpotamaꞌ. Inasoꞌ, iporahuantaꞌ nanpiton niꞌsárinpoaꞌ.

Hebreos 4:1

Yosë nani shaꞌhuitërinpoaꞌ. “Ipora huantaꞌ yacatahuaranquëmaꞌ sano cancantacamaso marëꞌ,” itërinpoaꞌ. Noya nanan nani natanëhuaꞌ. Iráca natanpirinahuëꞌ, co natëpihuëꞌ. “Yosë noꞌtëquën nontërinpoaꞌ,” co topihuëꞌ. Topinan quëran natanpi niꞌton, co Yosëri anoyacancantërinhuëꞌ. Niꞌcona canpitantaꞌ topinan quëran natantamaꞌ. Co natëhuatamahuëꞌ, co sano cancantaramahuëꞌ.

Hebreos 4:11

Napoaton naꞌcon yonquiaꞌahuaꞌ Yosë huëntonënquë yaꞌconacaso marëꞌ. Iráca co natëtonahuëꞌ, co imamiatopihuëꞌ. Ama inapita pochin cancantahuasohuëꞌ.

Hebreos 6:11

Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

2 Pedro 2:18

Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

2 Pedro 3:11

Co mantaꞌ yaꞌhuëmiatarinhuëꞌ. Yaꞌipi taꞌhuantarin niꞌton, ¡Yosë pochin cancantatëhuaꞌ, noyasáchin niahuaꞌ!

2 Pedro 3:14

Napoaton iyaroꞌsaꞌ, ina ninatomaꞌ naꞌcon yonquicoꞌ noyasáchin nicacamaso marëꞌ. “Quisocristo nanan anoyatërinpoaꞌ,” taꞌtomaꞌ, noya niniꞌtomaꞌ, yaꞌhuëcoꞌ. Yaꞌipi co noyahuëꞌ yonquiramasopita naniantatomaꞌ, noyápiachin cancantocoꞌ. Ina quëran oꞌmantahuachin, noya niꞌsarinquëmaꞌ.

2 Juan 1:8

Niꞌcona nonpintochinënquëmaꞌ. Nani huaꞌqui Yosë imatomaꞌ, ina marëꞌ sacatopiramahuëꞌ. Inapita pochin cancantohuatamaꞌ, topinan quëran imapomaꞌ. Co Yosëꞌpaꞌ acanaarinquëmahuëꞌ. Nipirinhuëꞌ, yaꞌipi cancanëma quëran imapatamaꞌ, inatohuaꞌ Yosë noya noya nohuitatomaꞌ, yaꞌhuëmiataramaꞌ.