Hebreos 11:26 - Chayahuita (Shahui)26 Copirno huiꞌnin pochin niꞌton, nohuantërin naporini, Iquipito parti naꞌcon canaitonhuëꞌ, co ina nohuantërinhuëꞌ. Yosë naꞌcon naꞌcon yonquirin. “Aꞌna tahuëri Cristo oꞌmaton, nichaꞌësarinpoaꞌ. Iporasoꞌ ina marëꞌ aparisitopirinacohuëꞌ, Yosëꞌpaꞌ noya noya acanarinco,” taꞌton, noya ahuantërin. အခန်းကိုကြည့်ပါ။ |
Aꞌchinamaso marëꞌ Yosë noya niꞌsarinquëmaꞌ. Inápaquë acanaarinquëmaꞌ. Aꞌnaquën natanpachinënquëmaꞌ, ‘Yosë nanamën chachin aꞌchintarinpoaꞌ,’ taꞌtonaꞌ, noya natanarinënquëmaꞌ. Ina marëꞌ inapitantaꞌ inápaquë canarapi. Tëhuënchachin noya piyapiꞌsaꞌ catahuacasoꞌ yaꞌhuërin. ‘Yosë imarin niꞌton, noya quëmapi inasoꞌ,’ taꞌtomaꞌ, catahuacoꞌ. Ina marëꞌ Yosë acanaarinquëmaꞌ.
Napoaton co chiníquën cancantopirahuëꞌ, co paꞌyanahuëꞌ. Pinopachinacora, co noꞌhuitërahuëꞌ. Maꞌsha pahuantopirincohuëꞌ, co ina yonquirahuëꞌ. Quisocristo imarahuëso marëꞌ aparisitohuachinacora, ahuantërahuë. Sacaiꞌ nipirinhuëꞌ, nóya cancantërahuë. “Co caora nanitohuatërahuëꞌ, naꞌcon naꞌcon catahuarinco,” taꞌto, chini chiníquën cancantërahuë.
Imaramacoso marëꞌ naꞌcon parisitëramasoꞌ nitotërahuë. Co naꞌa maꞌsha yaꞌhuëtopirinquëmahuëꞌ, Yosë nohuitacamasoachin cancantatomaꞌ, sano cancantëramaꞌ. Aꞌna tahuërintaꞌ Yosëꞌpaꞌ paꞌpatamaꞌ, co mantaꞌ pahuantarinquëmahuëꞌ. Iporaso nipirinhuëꞌ aꞌnaquën chiníquën pinorinënquëmaꞌ. ‘Yosë piyapinëncoi quiyasoꞌ,’ topirinahuëꞌ, Satanasë huëntonënquë yaꞌconpi.
Napoaton pënënanquëmaꞌ. Chiníquën nontoco catahuainquëmaꞌ. Niꞌcoꞌ. Oro aꞌpëhuatëra, yaꞌipi nëꞌhuë inquirin. Orosachin quëparitërin, noyasáchin nininsoꞌ. Inapochachin canpitantaꞌ nontoco catahuainquëmaꞌ noya yonquicamaso marëꞌ. Naꞌcon pahuantarinquëmaꞌ Yosë pochin nicacamasoꞌ. Casáchin yonquico Yosë noya niꞌinquëmaꞌ. Yonquihuatamaco, huiríchin aꞌmorëso pochin noya nisaramaꞌ. Somaraya pochin cancantëramaꞌ niꞌton, co tëhuënchachin nohuitëramacohuëꞌ. Nimirioquë acorayatërëso pochin anoyacancanchinquëmaꞌ cancanëma quëran nohuitamacoso marëꞌ.