Hebreos 11:25 - Chayahuita (Shahui)

²⁵ Yosë piyapinënpita catahuacaso marëꞌ paꞌnin. Ina marëꞌ parisitopirinhuëꞌ, co ina yonquirinhuëꞌ. Yosë natëcasoꞌ naꞌcon naꞌcon nohuantërin. “Co noyahuëꞌ nicatëhuaꞌ, capa cancantopirëhuahuëꞌ, co huaꞌquiya quëranhuëꞌ maꞌsha taꞌhuantarin,” taꞌton, co maꞌsharáchin yonquirinhuëꞌ.

Hebreos 11:25 ပူးပေါင်းရင်းမြစ်များ

Salmos 47:9

Nacionoꞌsa huaꞌanënapita, Yosë piyapinënpitarëꞌ nipayaponaꞌ. Apraan shinpitarëꞌ napoaponaꞌ. Yosë nohuanton isoroꞌpaquë copirnoroꞌsa yaꞌconpi. Inari yaꞌipi huaꞌanëntarin.

Salmos 84:10

Huaranca tahuëri niquë yaꞌhuëpirahuëꞌ, co noya cancantarahuëꞌ. Aꞌna tahuëriíchin tëranta pëinën iꞌiratëquë nipato, noya noya cancantarahuë. Pëinën yaꞌcoananën aꞌpainaꞌpi nicaꞌhuasoꞌ, naꞌcon naꞌcon nohuanchitohuëꞌ. Co noyahuëꞌ nipisopita pëinënquë yaꞌhuëcaꞌhuasoso nipirinhuëꞌ, co nohuantërahuëꞌ.

Mateo 13:21

co cancanëna quëran huarëꞌ natëpihuëꞌ. Co chiníquën cancantatonaraihuëꞌ, co natëmiatopihuëꞌ. Maꞌsha onpohuachinara, aꞌnaroáchin yaaꞌpopi. Imapiso marëꞌ aparisitohuachinara, aꞌpopi huachi.

Lucas 16:25

‘Coꞌchi nanitërahuë paya. Niꞌquëꞌ. Quëmasoꞌ nanpipon, nani maꞌsha yaꞌhuëtopirinquënhuëꞌ, inasáchin yonquiran niꞌton, iporasoꞌ parisitáran. Nasaroso nipirinhuëꞌ nanpipon, parisitápirinhuëꞌ, iporasoꞌ noya yaꞌhuarin huachi.

Hechos 7:34

Piyapinëhuëpita Iquipitoquë yaꞌhuëpirinahuëꞌ, parisitápi niꞌnahuë. Chiníquën aparisitopi niꞌton, tarëtápi, natanahuë. Napoaton nichaꞌësarahuë huachi. Huëquëꞌ inatohuaꞌ aꞌpaꞌinquën nichaꞌëcamaso marëꞌ,” itantarin.

Romanos 5:3

Iporasoꞌ parisitarihuarahuëꞌ, noya cancantarihuaꞌ. “Parisitohuatëhuaꞌ, Yosë catahuarinpoaꞌ imamiatacaso marëꞌ,” taꞌtëhuaꞌ, co sëtarihuahuëꞌ. Chiníquën cancantatëhuaꞌ, noya ahuantarihuaꞌ.

2 Corintios 5:17

Quisocristo imapatëhuaꞌ, Yosë anoyacancantarinpoaꞌ. Nasha cancan yaꞌhuëtarinpoa huachi. Iráca yonquirëhuasopita naniantërëhuaꞌ. Nashamiachin pochin cancantatëhuaꞌ, noya noya yonquiarihua huachi.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

2 Timoteo 1:8

Ama tapanatonhuëꞌ, Sinioro nanamën aꞌchináquëꞌ. Ina aꞌchinahuëso marëꞌ tashinan pëiquë poꞌmorinaco. Ama ina marëntaꞌ tapanquësohuëꞌ. Quëmantaꞌ aꞌchinanso marëꞌ aparisitohuachinënquën, chiníquën cancantëquëꞌ. Napohuatan, Yosë catahuarinquën noya ahuantamasoꞌ.

Hebreos 10:32

Yaꞌnan imaramasoꞌ tahuëriꞌsaꞌ yonquicoꞌ. Quisocristo nanamën aꞌchintohuachinënquëmara, noya natanatomaꞌ, imaramaꞌ. Ina marëꞌ parisitapomarahuëꞌ, co yaaꞌporamahuëꞌ. Noya ahuantëramaꞌ.

Hebreos 11:37

Aꞌnaquëontaꞌ naꞌpiquë tëꞌyaratonaꞌ, tëpapi. Aꞌnaquëontaꞌ sërichoquë yatonatonaꞌ, tëpapi. “Yosë aꞌpocoꞌ, tëpachinënquëmaꞌ,” itopirinahuëꞌ, co yaaꞌpopihuëꞌ. Aꞌnaquëontaꞌ sahuëni quëran tëpapi. Aꞌnaquën co tëpapirinahuëꞌ, imapiso marëꞌ chiníquën aparisitopi. Yatëpahuachinara, taꞌapi. Co huachi yaꞌhuëmia yaꞌhuëpihuëꞌ. Capa aꞌmocaisoꞌ niꞌton, ohuica shaꞌhuëtëꞌ, chipo shaꞌhuëtëꞌ inapita aꞌmopi. Co mantaꞌ yaꞌhuëtopihuëꞌ. Chiníquën parisitopi.

Hebreos 4:9

Napoaton ipora huantaꞌ Yosë nohuantërin asanocancainpoasoꞌ. Yosë anoyacancantohuachinpoaꞌ, sano cancantarihuaꞌ.

Santiago 1:20

Noꞌhuitohuatëhuaꞌ, co nanitarihuahuëꞌ noya nicacasoꞌ. Ina marëꞌ co Yosë noya niꞌsarinpoahuëꞌ.

Santiago 5:5

Isoroꞌpaquë nóya yaꞌhuëramaꞌ. Nani maꞌsha yaꞌhuëtërinquëmaꞌ. Capa cancantacasoáchin yonquiramaꞌ. Nani maꞌsha yaꞌhuëtopirinquëmahuëꞌ, Yosë anaꞌintarinquëmaꞌ. Ohuacaroꞌsaꞌ tëpacaso pochin nipon. Yatëparinsoꞌ co nitotatonahuëꞌ, coshatápirinahuëꞌ, tahuëri nanihuachina, aꞌnanaya huaꞌanëni huëcapairahuaton, tëparin. Inapochachin canpitasoꞌ noya yaꞌhuápiramahuëꞌ, aꞌnanaya ayaroꞌ tahuëri naniarin.

1 Pedro 2:10

Iráca co Yosë piyapinënpita nipiramahuëꞌ, iporasoꞌ nani huëntonënquë ayaꞌconinquëmaꞌ. Iráca co insontaꞌ tëhuënchachin nosororinquëmahuëꞌ. Iporasoꞌ Yosë nosororinquëmaꞌ.

Apocalipsis 18:7

Pita nicacaisoáchin cancantopi. Maꞌsharáchin yonquiatonaꞌ, aꞌnapita nocanpi niꞌton, Yosëri aparisichin. Iporasoꞌ cancanëna quëran yonquirapi. “Quiyasoꞌ nóya yaꞌhuërai. Huaꞌan pochin nicatoi, co mantaꞌ pahuantërincoihuëꞌ. Co quëyoron pochincoihuëꞌ. Co onporontaꞌ sëtaraihuëꞌ,” topirinahuëꞌ.