Hebreos 11:1 - Chayahuita (Shahui)

¹ “Co Yosë quënanpirëhuahuëꞌ, yaꞌhuárin. Nosoroatonpoaꞌ catahuarinpoaꞌ,” topatëhuaꞌ, tëhuënchachin ina natërëhuaꞌ. Naꞌcon Yosë shaꞌhuitërinpoaꞌ. Co ipora naniyatërarinhuëꞌ. “Oshaquëran naniarin huachi,” taꞌtëhuaꞌ, noya ninarëhuaꞌ.

Hebreos 11:1 ပူးပေါင်းရင်းမြစ်များ

Salmos 27:13

Yaaparisitopirinacohuëꞌ, Sinioro nosorancosoꞌ niantararahuë. Isoroꞌpaquë nanpisoco chachin niantararahuë.

Salmos 42:11

Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Hechos 20:21

Co cotioroꞌsaráchin pënënahuëꞌ. Cricoroꞌsantaꞌ pënënahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Sinioro Quisoso natëco huachi. Inasáchin anoyacancantërinpoasoꞌ,’ itëranquëmaꞌ. Yaꞌipinquëmaꞌ aꞌchintëranquëmaꞌ.

1 Corintios 13:13

Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.

2 Corintios 11:17

Co Sinioro nohuantërinhuëꞌ aꞌnapita nocanacasoꞌ. Nocantohuatëra, huaꞌyantërinso pochin nonëhuaꞌ.

2 Corintios 4:18

Isoroꞌpaquë yaꞌhuërinsopita co naꞌcon naꞌcon yonquirëhuahuëꞌ. Iporasoꞌ parisitarihuarahuëꞌ, co ina marëꞌ sëtarihuahuëꞌ. Yosë naꞌcon naꞌcon yonquiarëhuaꞌ. Ina nohuitacasoáchin cancantarihuaꞌ. Isoroꞌpaquë yaꞌhuërinsopita quënanpirëhuahuëꞌ, co yaꞌhuëmiatarinhuëꞌ. Taꞌhuantarin. Yosë noya yonquirinpoasosoꞌ co quënanpirëhuahuëꞌ, yaꞌhuëmiatarin.

2 Corintios 5:17

Quisocristo imapatëhuaꞌ, Yosë anoyacancantarinpoaꞌ. Nasha cancan yaꞌhuëtarinpoa huachi. Iráca yonquirëhuasopita naniantërëhuaꞌ. Nashamiachin pochin cancantatëhuaꞌ, noya noya yonquiarihua huachi.

2 Corintios 5:7

Co ipora quënanpirëhuahuëꞌ, “Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. “Co onporontaꞌ nonpintarinpoahuëꞌ,” tënëhuaꞌ.

2 Corintios 9:4

Co huaꞌquiya quëranhuëꞌ canpitataquë paꞌsarahuë. Aꞌnaquën Masitoniaquë yaꞌhuëpisopita imasarinaco nimara. Canpitataquë canconpatoi, nani coriqui yontontopinan quënanconarai, topirahuëꞌ. Co yaꞌhuëhuachinhuëꞌ, tapanarahuë. “Corintoquë imapisopitasoꞌ noyaroꞌsaꞌ,” itërahuëso marëꞌ, co coriqui yaꞌhuëhuachinhuëꞌ, tapanaramaꞌ canpitantaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 10:39

Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.

Hebreos 11:13

Apraan, Isaco, Cacopo, inapita chiminaquë huarëꞌ Yosë natëpi. “Nani Yosë shaꞌhuitërinpoaꞌ. Co nonpintarinpoahuëꞌ. Pahuanarin nipirinhuëꞌ, aꞌna tahuëri Yosë nohuanton, yaꞌhuapon,” taꞌtonaꞌ, nóya cancantopi. “Co huaꞌqui isoroꞌpaquë yaꞌhuarihuahuëꞌ. Isëquësoꞌ topinan yacapatërëhuaso pochin ninëhuaꞌ,” topi.

Hebreos 11:27

Yosë natëton, Moisësë Iquipito quëran pipirin. Copirnori noꞌhuipirinhuëꞌ, co tëꞌhuatërinhuëꞌ. “Yosë co quënanaporahuëꞌ, niꞌsárinco,” taꞌton, chiníquën cancantërin. Chiníquën cancantaton, Yosë piyapinënpita catahuarin.

Hebreos 11:7

Iráca Nointaꞌ yaꞌhuëpirinhuëꞌ, aꞌna tahuëri Yosëri itapon: “Co huaꞌqui quëranhuëꞌ maꞌsha onpoaramaꞌ. Co niꞌchinamasohuëꞌ niꞌsaramaꞌ. Naporoꞌ yaꞌipi oshahuanoꞌsaꞌ iiꞌ quëran ataꞌhuantarahuë,” itërin. Coꞌhuara oꞌnayantërasohuëꞌ napotopirinhuëꞌ: “Yosë noꞌtëquën nontërinco,” taꞌton, Noi natëtërin. Shaꞌhuitohuachina, natëton, panca nancha ninin. Ina quëran saꞌin, huiꞌninpitarë chachin chaꞌëpi. Aꞌnapitasoꞌ natanaponaraihuëꞌ, co yanatëpihuëꞌ. Napoaton naꞌinpi. Noiso nipirinhuëꞌ, yaꞌipi cancanën quëran natëtërin. “Noꞌtëquën nontërinco,” topachina, Yosëri noya niꞌnin.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Hebreos 6:12

Ama amitomarahuëꞌ, naꞌcon Yosë yonquicoꞌ. Noya natëpisopita nonancoꞌ. Inapitasoꞌ imamiatapi. “Yosë noꞌtëquën nontërinpoaꞌ,” taꞌtonaꞌ, noya natëapi. Maꞌsha onpoaponaraihuëꞌ, noya ahuantapi. Iráca Yosëri shaꞌhuitërinso chachin ninapi.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.