Hebreos 10:29 - Chayahuita (Shahui)

²⁹ Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 10:29 ပူးပေါင်းရင်းမြစ်များ

Salmos 91:13

Paꞌpiniroꞌsaꞌ, yaꞌhuanoꞌsaꞌ, panca maꞌsharoꞌsaꞌ, inapita huáncana noya paꞌsarëhuaꞌ.

Éxodo 24:8

Naporoꞌ Moisësësoꞌ, tasonoꞌsaquë huënaiꞌ yaꞌhuërinsoꞌ, manin. Masahuaton, yaꞌipi israiroꞌsa taꞌsatërin. Nani taꞌsatohuachina itapon: —Iso huënaiꞌ paꞌnin niꞌton, Yosë canpoarëꞌ anoyatërinso anitotërinpoaꞌ. Ina marëꞌ nanamën ninshitërahuësoꞌ nani shaꞌhuitëranquëmaꞌ. Ina natëhuatëhuaꞌ, Yosë noya niꞌsarinpoaꞌ, itërin.

Isaías 63:10

Israiroꞌsaso napoaponahuëꞌ, co Sinioro yanatëpihuëꞌ. Inasoꞌ noyasáchin nipirinhuëꞌ, noꞌhuipi. Napotopiso marëꞌ inimiconënpita pochin nicaton, ahuërin.

Jeremías 1:5

“Coꞌhuara nasichátërasënquënhuëꞌ, huayonanquën. Naporo chachin acoranquën pënëntacaso marëꞌ. Yaꞌipi nisha nisha piyapiꞌsa nipisopita pënënaran,” itërinco.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Mateo 7:6

Ina quëran itaantarin: “Isontaꞌ aꞌchinchinquëmaꞌ. Niꞌniroꞌsaꞌ, coshiroꞌsaꞌ, inapita co yonquipihuëꞌ. Huirinaꞌpi paꞌton nininsoꞌ co quëtacasoꞌ yaꞌhuërinhuëꞌ. Noꞌpaquë acoramaꞌ naporini, iꞌnachitonahuëꞌ. Ina quëran canpitantaꞌ yaquëtëitënquëmahuëꞌ. Aꞌnaquën piyapiꞌsantaꞌ niꞌniroꞌsa pochin cancantopi niꞌton, Yosë nanamën aꞌchintohuatamaꞌ, chiníquën noꞌhuiarinënquëmaꞌ. Co piꞌpisha tërantaꞌ nohuantohuachinahuëꞌ, tananpitocoꞌ,” itërin.

Marcos 7:2

Quisoso caꞌtanoꞌsanënpita coshatasoiꞌ, quënanquipi. Aꞌnaquën co niopoimirataponaraihuëꞌ coshatapi. Parisioroꞌsasoꞌ coꞌhuara coshachatëraponahuëꞌ, piꞌpian iꞌshaquë niopoimiratopi. Yaꞌipi cotioroꞌsaꞌ ina pochin yonquipi. “Co inapohuatëhuahuëꞌ, oshahuanarihuaꞌ,” tëcatonaꞌ napopi. Shimashonënaꞌ inachintopisoꞌ niꞌton, inapopi.

Lucas 12:10

Aꞌnaquën noꞌhuitonaco, pinorinaco. Ina quëran oshanëna marëꞌ sëtohuachinaꞌ, Yosëri oshanënaꞌ inquitarin. Nipirinhuëꞌ Ispirito Santo pinotonaꞌ oshahuanpisoꞌ, co onporontaꞌ inquitarinhuëꞌ.

Juan 10:36

Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë.

Juan 17:19

Imarinacosopita nosoroato, yaꞌipi cancanëhuë quëran quëmasáchin natëaranquën. Inapitantaꞌ noꞌtëquën yonquiatonaꞌ, nóya natëinënquën.

Hechos 7:51

Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

Romanos 16:20

Yosëíchin catahuarinpoaꞌ sano cancantacasoꞌ. Sopai yanonpintopirinquëmahuëꞌ, Yosë catahuarinquëmaꞌ niꞌton, aꞌnaroáchin sopai minsëaramaꞌ. Canpita marëꞌ Yosë nontarahuë. Inaora nohuanton, Sinioro Quisocristo noya catahuainquëmaꞌ, tënahuë.

1 Corintios 11:27

Ina marëꞌ niyontonpatamaꞌ, ama topinan quëran caꞌcosohuëꞌ. Ama nisha nisha yonquiatomaꞌ, oꞌocosohuëꞌ. Co Sinioro nonën, huënainën inapita noya yonquihuatamahuëꞌ, oshahuanaramaꞌ.

1 Corintios 11:29

Quisoso chimininsoꞌ noꞌtëquën yonquicasoꞌ yaꞌhuërin. Topinan quëran caꞌpatamaꞌ, topinan quëran oꞌopatamaꞌ, naꞌcon oshahuanaramaꞌ. Ina marëꞌ Yosë anaꞌintarinquëmaꞌ.

1 Corintios 15:25

Ina nohuanton, Quisocristo chiníquën nanantarin. Yaꞌipi huaꞌanëntarin. Aꞌna tahuëri yaꞌipi inimicoroꞌsaꞌ minsëarin.

1 Corintios 15:27

“Yosë nohuanton, yaꞌipiya minsëarin huachi,” tënin Yosë quiricanënquë. Napoaton Quisocristo yaꞌipiya huaꞌanëntarin. Tata Yosëíchin co huaꞌanëntarinhuëꞌ. Inari Quisocristo chiníquën nanan quëtërin.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

Efesios 4:30

Co noyahuëꞌ nipatamaꞌ, Ispirito Santo sëtarin. Quisocristo imapatamara, sichoquë marca acotërëso pochin Ispirito Santo ayaꞌcoancantërinquëmaꞌ. Ayaroꞌ tahuëriquë huarëꞌ aꞌpaiarinquëmaꞌ. Naporoꞌ noyá nichaꞌësarinquëmaꞌ. Napoaton ama Ispirito Santo asëtocosohuëꞌ.

Efesios 5:26

Quisocristo chiminin anoyacancantinpoaso marëꞌ. Nanamën natëhuatëhuara, noyápiachin cancan quëtërinpoaꞌ. Iꞌquë amarëso pochin oshanënpoaꞌ inquitërinpoaꞌ.

Hebreos 10:10

Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

Hebreos 12:25

Napoaton Quisocristo nanamën noya natancoꞌ. Ama piꞌpian tërantaꞌ aꞌpocosohuëꞌ. Pënëntërinso nanan shaꞌhuitohuachinara, aꞌnaquën co yanatëtopihuëꞌ niꞌton, aꞌnaroáchin anaꞌintërin. Quisocristo nanamënsoꞌ noya noya niꞌton, ina naniantohuatëhuaꞌ, aquë aquëtëꞌ anaꞌintinpoasoꞌ yaꞌhuërin. Inasoꞌ inápa quëran pënëninpoaꞌ.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

Hebreos 6:4

Ama Quisocristo aꞌpocosohuëꞌ. Ina aꞌpohuatamaꞌ, co nanitërinhuëꞌ anoyacancantinquëmasoꞌ. Aꞌnaquën Quisocristo nanamën nani nitotopi. “Quisocristo nichaꞌësarinpoaꞌ,” taꞌtonaꞌ, imapi. Cosharoꞌ piꞌnirëso pochin piꞌpian nohuitopi. Ispirito Santori chachin catahuarin.

Hebreos 6:6

Quisocristo aꞌpohuachinaꞌ, ¿incaricha anoyacancantërëꞌpoiya? Co huachi nanitapihuëꞌ chaꞌëcaisoꞌ. Yosë huiꞌnin chachin canpoa marëꞌ chiminin. Co ina nohuantohuachinahuëꞌ, naquëranchin corosëquë patanantopiso pochin cancantapi. Ina aꞌpohuachinaꞌ, piyapisari Quisoso tëhuaponaꞌ.

Hebreos 9:13

Cotioroꞌsaꞌ co yaꞌipi Moisësë pënëntërinsoꞌ natëhuachinahuëꞌ, nëꞌhuëtërinso pochin niꞌtonaꞌ, co nanitopihuëꞌ chinotopiso pëiquë yaꞌconacaisoꞌ. Napohuachinara, maꞌsharoꞌsaꞌ, chipo, toroaꞌhuaya, inapita chinotopiso pëiquë quëpapi. Inaquë corto huaꞌani tëparahuaton, huënainën manin. Huënainën masahuaton, ohuacaꞌhuaya huiquitërinsoꞌ yanonën ayontërin. Ayontahuaton, oshahuanaꞌpi taꞌsatërin. Inapotohuachina, nëꞌhuëtërinsoꞌ inquirinso pochin ninin niꞌton, naquëranchin nanitërin chinotopiso pëiquë yaꞌconacasoꞌ.

Hebreos 9:20

Inapotahuaton: “Nani anoyatërinso Yosë shaꞌhuitërinpoaꞌ natëcaso marëꞌ. Iso huënaiꞌ paꞌnin niꞌton, Yosë canpoarë anoyatërinso anitotërinpoaꞌ,” tënin Moisësë.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.