Hebreos 10:22 - Chayahuita (Shahui)

²² Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 10:22 ပူးပေါင်းရင်းမြစ်များ

Salmos 119:145

(-)

Salmos 32:11

Sinioro yonquiatoma capa cancantocoꞌ. Noya piyapitatoma aꞌnapita maꞌshanënanta noya niꞌpatamaꞌ, capa cancantatomaꞌ, “yai,” charácoꞌ.

Salmos 51:10

Nasha cancan Sinioro quëtoco. Cancanëhuë anoyatohuatanco, noyápiachin cancantaantarahuë. Inapotohuatanco noyasáchin yonquiato, natëtochináchin cancantarahuë.

Salmos 73:28

Caso nipirinhuëꞌ, nohuitaꞌhuanquënsoráchin cancantarahuë. Ina pochin cancantohuato, noya noya nisarahuë. Quëma huaꞌanëntatonco paꞌpoyaranco. Napoaton yaꞌipi naporansopita shaꞌhuirápo.

Salmos 84:11

Siniorosoꞌ Yosë niꞌton, paꞌpoyarinpoaꞌ. Aꞌpintatë pochin catahuarinpoa noꞌtëquën yonquicasoꞌ. Noyasáchin nipatëhuaꞌ, nosororinpoaꞌ. Noya nicatonpoaꞌ, noya nininsoꞌ co apiratërinpoahuëꞌ.

Proverbios 23:26

Cancantaton huaꞌhua, nanpirahuëso niꞌquëꞌ. Noya nicatonco nonanco.

Isaías 52:15

Naꞌa nisha nisha piyapiroꞌsa nisha nisha parti yaꞌhuëpisoꞌ, inari oshanën inquitaton noya acoantarin. Napoaton copirnoroꞌsarinta niꞌpachinara, tachianantaponaꞌ. Co incari tëranta shaꞌhuitërinsohuëꞌ niꞌsapi niꞌton, napoaponaꞌ. Co onporonta natanpisohuëꞌ nitotapi niꞌton, napoaponaꞌ,” tënin.

Ezequiel 36:25

Canpitaso mamanshiroꞌsa moshatomaꞌ, nëꞌhuëtërinso pochin ninamaꞌ. Napoatoma co noyahuëꞌ nipiramahuëꞌ. Naporamasoꞌ, inquitaranquëmaꞌ. Nëꞌmëtë nëꞌhuëtërinsoꞌ, noyaiquë pëꞌsarëso pochin nitaranquëmaꞌ.

Levítico 16:4

Nani cato chachin quëpachin, iꞌnanpirarahuaton, amapon. Ina quëran corto huaꞌan aꞌmocaso marëꞌ acopisoꞌ aꞌmosarin huachi. Carsonsicho sariotahuaton, aꞌmocaso nininso aꞌmoanin. Ina aipi sintoronquë nitonporahuaton, nitonpomototërinso yancopon. Yaꞌipi corto huaꞌan aꞌmocaso marëꞌ acopisosoꞌ, rino piꞌshi quëráchin nipi.

Mateo 3:11

Co noyahuëꞌ yonquiramasopita naniantohuatamaꞌ, iꞌquë aporintaranquëmaꞌ. Ca piquëranso nipirinhuëꞌ aꞌna quëmapi huëꞌsarin. Inasoꞌ chini chiníquën nanantërin. Casoꞌ co piꞌpian tërantaꞌ ina pochin chiníquën nanantërahuëꞌ. Co maquëyancohuëꞌ niꞌto, co sapatën quëpacaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ pënquë chiníquën anaꞌintarinquëmaꞌ.

Lucas 1:1

Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi.

Juan 3:5

Napotohuachina, Quisosori itaantapon: —Noꞌtëquën shaꞌhuitaranquën. Iꞌquë amarëso pochin cancanëmaꞌ anoyatacasoꞌ yaꞌhuërin. Yaꞌipi co noyahuëꞌ yonquiramasopita naniantocoꞌ. Ina naniantohuatamaꞌ, Ispirito Santo anoyacancantohuachinquëmaꞌ, nasitaantarëso pochin nisaramaꞌ. Naporo huarëꞌ Yosë huaꞌanëntërinquë yaꞌconaramaꞌ.

Juan 8:9

Ina natanahuatonaꞌ, aꞌnaya aꞌnaya paꞌpi. Mashoroꞌsaꞌton paꞌpi. Ina quëran aꞌnaya aꞌnaya paꞌpi. Yaꞌipiya paꞌpachinara, sanapiíchin huaniárin.

Hechos 22:16

Napoaton ama huaꞌquiquësohuëꞌ. Apiramiáchin huaniquëꞌ. “Quisoso imasarahuë huachi,” taꞌton, aporihuanquëꞌ. Ina nontohuatan, oshanën inquitarinquën,’ itërinco.

Hechos 8:21

Co yaꞌipi cancanën quëran imaranhuëꞌ niꞌton, co Yosë noya niꞌninquënhuëꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

2 Corintios 7:1

Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

Efesios 3:12

Ina imarëhua niꞌton, natëtëhuaꞌ, Yosë nontarihuaꞌ. “Anoyacancantërinpoaꞌ niꞌton, noya natanarinpoaꞌ,” taꞌtëhuaꞌ, co tëꞌhuatarihuahuëꞌ. Noya cancantatëhuaꞌ, ina nontarëhuaꞌ.

Efesios 5:26

Quisocristo chiminin anoyacancantinpoaso marëꞌ. Nanamën natëhuatëhuara, noyápiachin cancan quëtërinpoaꞌ. Iꞌquë amarëso pochin oshanënpoaꞌ inquitërinpoaꞌ.

Efesios 6:5

Patron marëꞌ sacatohuatamaꞌ, noya nicatomaꞌ, natëcoꞌ. Ama nonpintocosohuëꞌ. Quisocristo marëꞌ sacatarëso pochin cancantatomaꞌ, noya sacatocoꞌ.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

Tito 3:5

Co canpoara noya ninëhuaso marëꞌ nichaꞌërinpoahuëꞌ. Inaora nohuanton, Yosë nosoroatonpoaꞌ, nichaꞌërinpoaꞌ. Amatërëso pochin yaꞌipi oshanënpoaꞌ inquitërinpoaꞌ. Oshanënpoaꞌ inquitatonpoaꞌ, anasitaantarëso pochin nasha cancan quëtërinpoaꞌ. Ispirito Santo nohuanton, ina pochin cancantërëhuaꞌ.

Hebreos 10:1

Iráca pënëntërinsoꞌ nanan imapachinara, maꞌsharoꞌsaꞌ tëpapi. Oshanënaꞌ yonquiatonaꞌ, napopi ama Yosëri anaꞌintacaso marëhuëꞌ. Quisocristo chiminacasoꞌ ninoton, Yosëri shaꞌhuitërin maꞌsharoꞌsaꞌ huënainëna aꞌpatacasoꞌ. Quisocristoíchin anoyacancantërinpoaꞌ. Ina chiminin niꞌton, oshanënpoaꞌ inquitërinpoaꞌ. Iráca nani piꞌiquë maꞌsha tëpapirinahuëꞌ, co tëhuënchachin piyapinënpita oshanënaꞌ inquitërinhuëꞌ.

Hebreos 10:19

Napoaton iyaroꞌsaꞌ, iporasoꞌ nanitërëhuaꞌ Yosë chachin nohuitacasoꞌ. Noya noya patoanaquë yaꞌconëso pochin nohuitërëhuaꞌ. Piyapinpoaꞌ nirihuarahuëꞌ, chiníquën cancantatëhuaꞌ, Yosë nontahuaꞌ. Quisoso huënainën paꞌnin niꞌton,

Hebreos 11:28

“Yosë nichaꞌësarinpoaꞌ,” taꞌton, natëtërin. Napoaton piyapiꞌsaꞌ camairin: “Yaꞌipinquëmaꞌ carniroaꞌhua tëpacoꞌ. Huënainën yaꞌcoanaquë pashitocoꞌ ama anquëniri paninan nininsoꞌ tëpacaso marëhuëꞌ,” itërin. Napotohuachina, aꞌnaya aꞌnaya inahuara pëinënaꞌ yaꞌcoanaquë huënaiquë pashitëraꞌpiapi. Napoaton Yosëri catahuarin. Co paninanoꞌsaꞌ chiminpihuëꞌ. Pascoa pitaquë napopi.

Hebreos 12:24

Quisocristo chachin nohuitarihuaꞌ. Inasoꞌ nasha quëran anoyatërinso shaꞌhuitërinpoaꞌ imacaso marëꞌ. Huënainën quëran anoyacancantërinpoaꞌ. Iráca Apiri huënainën paꞌnin. Iini tëpahuachina, huënainën paꞌnin niꞌton, anaꞌintacasoꞌ yaꞌhuërin. Quisocristo chimininsosoꞌ nipirinhuëꞌ, noya noya. Huënainën paꞌnin niꞌton, nanan anoyatërinpoaꞌ.

Hebreos 4:16

“Tëhuënchachin nosoroatonpoaꞌ, catahuarinpoaꞌ,” taꞌtëhuaꞌ, apira apira Yosë nontahuaꞌ. Nontohuatëhuaꞌ, oshanënpoaꞌ inquitarinpoaꞌ. Maꞌsha onpohuatëhuaꞌ, ina nontohuatëhuaꞌ, inaora nohuanton, catahuarinpoaꞌ noya ahuantacaso marëꞌ.

Hebreos 6:11

Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

Hebreos 7:19

Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.

Hebreos 9:10

Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.

Hebreos 9:19

Yaꞌipi piyapiꞌsaꞌ ayontonahuaton, Moisësëri pënënin. Nani maꞌsha shaꞌhuitërin natëcaiso marëꞌ. Nani shaꞌhuitohuachina, ohuacaꞌhua, chipo, inapita tëparahuaton, huënainëna manin. Ina quëran narasëꞌpaꞌ isopo itopisoꞌ masahuaton, quëhuan huaitaquë soꞌquëtahuaton, iꞌsharë chachin taꞌsatërin. Pënëntërinsoꞌ quirica, piyapiꞌsaꞌ, inapita taꞌsatërin.

Santiago 1:6

“Yosë noya catahuarinco. Natëmiatarahuë,” taꞌtëhuaꞌ, Yosë nontahuaꞌ. Ama nisha nisha yonquiaꞌahuasohuëꞌ. “Co catahuarincohuëꞌ nimara,” ama tahuasohuëꞌ. Niꞌcoꞌ. Coꞌsacaiꞌ co sanoirinhuëꞌ. Pancaiquë ihuaitohuachina, niquëran niquëran niohuërërin. Aꞌnaquën piyapiꞌsaꞌ ina pochin yonquionpi. Nisha nisha yonquipi.

Santiago 4:8

Nani tahuëri Yosë yonquihuatamaꞌ, inantaꞌ yonquiarinquëmaꞌ, naꞌcon catahuarinquëmaꞌ. Yaꞌipi co noyahuëꞌ yonquiramasopita naniantatomaꞌ, noya nicoꞌ. Ama huachi nisha nisha yonquicosohuëꞌ. Noyápiachin cancantocoꞌ.

1 Pedro 1:2

Iráca quëra huarëꞌ Tata Yosë nohuitërinquëmaꞌ. Nosoroatënquëmaꞌ, huayoninquëmaꞌ huëntonënquë yaꞌconacamaso marëꞌ. Ispirito Santo anoyacancantërinquëmaꞌ natëcamaso marëꞌ. Quisocristo corosëquë chiminin oshanëmaꞌ inquitiinquëmaso marëꞌ. Yosë nontëramaꞌ niꞌton, oshanëmaꞌ inquitërinquëmaꞌ. Yosë inaora nohuanton, noya catahuainquëmaꞌ. Asanocancainquëmaꞌ.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.