Hebreos 10:11 - Chayahuita (Shahui)

¹¹ Nani tahuëri corto huaꞌanoꞌsaꞌ sacatápi. Naquëranchin naquëranchin maꞌsharoꞌsaꞌ tëpapirinahuëꞌ, co oshanënaꞌ inquipihuëꞌ.

Hebreos 10:11 ပူးပေါင်းရင်းမြစ်များ

Daniel 9:21

Ina pochin nontasoco, aꞌnara anquëni huaꞌan yanponahuaton huëcapairinco. Iracanta huaꞌnarahuëquë quënanahuëso chachin huëꞌnin. Panca tëhuërënahuasoꞌ Yosë marëꞌ maꞌsha tëpapisoꞌ ahuiquitopi. Naporo ora pochin yaꞌnotahuatonco: “Naniri. ¿Yaꞌhuëaran? Yosë nani yonquirin catahuainquëmasoꞌ. Ina noꞌtëquën ayonquicaꞌhuanquënso marëꞌ oꞌmarahuë.

Daniel 9:27

Aꞌna simana marëꞌ ina copirnosoꞌ, notohuaroꞌ piyapiꞌsarëꞌ anoyatapon. Napoaponahuë ina simana huancanarahuasoꞌ, Yosë marëꞌ maꞌsha ahuiquitacaisoꞌ, acopitapon. Maꞌsha Yosë marëꞌ quëcacaisontaꞌ, inapotapon. Artaro maꞌsha Sinioro marëꞌ ahuiquitopiso notënanquë, paꞌpi co noyahuëꞌ nininso nicatonaꞌ, tapiaponaꞌ. Ina piquëranso napoaponahuëꞌ, Yosëri chachin naponaꞌpi ataꞌhuantapon huachi,” itërinco.

Miqueas 6:6

Canpitaso naporamaꞌ: “Siniorosoꞌ, Yosë. Inápaquë yaꞌhuërinsopitanta huaꞌanëntërin. Ina noya nicainpoaso marëꞌ ¿maꞌta aꞌnotatëhua chinotërëꞌpëhuaya? Toroaꞌhuaroꞌsa aꞌna piꞌipihuaninso oshanënpoa marëꞌ yaꞌipi ahuiquitohuatëhuaꞌ, ¿noya niꞌnëpënpoaꞌ?

Hebreos 10:1

Iráca pënëntërinsoꞌ nanan imapachinara, maꞌsharoꞌsaꞌ tëpapi. Oshanënaꞌ yonquiatonaꞌ, napopi ama Yosëri anaꞌintacaso marëhuëꞌ. Quisocristo chiminacasoꞌ ninoton, Yosëri shaꞌhuitërin maꞌsharoꞌsaꞌ huënainëna aꞌpatacasoꞌ. Quisocristoíchin anoyacancantërinpoaꞌ. Ina chiminin niꞌton, oshanënpoaꞌ inquitërinpoaꞌ. Iráca nani piꞌiquë maꞌsha tëpapirinahuëꞌ, co tëhuënchachin piyapinënpita oshanënaꞌ inquitërinhuëꞌ.

Hebreos 10:4

Maꞌsharoꞌsaꞌ tëpapirinahuëꞌ, ina huënainën quëran co onporontaꞌ oshanënaꞌ inquitërinhuëꞌ.

Hebreos 5:1

Iráca Yosëri aꞌnaya aꞌnaya corto huaꞌan chini chiníquën nanantërinsoꞌ acorin ina marëꞌ sacatacasoꞌ. Inantaꞌ piyapi niponahuëꞌ, aꞌnapita piyapiꞌsa marëꞌ Yosë nontërin. Co noyahuëꞌ nipachinara, chinotopiso pëiquë maꞌsha quëpapi. Inaquë corto huaꞌani tëparin oshanëna marëꞌ. Ama Yosëri anaꞌintacaso marëhuëꞌ inaporin.

Hebreos 7:27

Co inasoꞌ aꞌnapita corto huaꞌanoꞌsa pochinhuëꞌ. Inapitasoꞌ oshahuanatonaꞌ, inahuara oshanëna marëꞌton maꞌsha tëpapi. Ina quëran piyapiꞌsaꞌ oshanëna marëntaꞌ maꞌsha tëpaantapi. Nani tahuëri naporápi. Quisocristoso nipirinhuëꞌ co oshahuanatonhuëꞌ, co maꞌsha tëpacasoꞌ yaꞌhuërinhuëꞌ. Inaora nohuanton, canpoaꞌ yaꞌhuërënamënpoaꞌ chiminin. Aꞌnaroíchin chiminaton, nanitërin yaꞌipi oshanënpoaꞌ inquitinpoasoꞌ.

Hebreos 8:2

Iráca cotioroꞌsaꞌ chinotopiso pëiꞌ nipi Yosë chinotacaiso marëꞌ. Inápaquë yaꞌhuërinso chachin nonanpi. Inaquë corto huaꞌanoꞌsari piyapiꞌsa marëꞌ Yosë nontopi. Quisocristoso nipirinhuëꞌ inápaquë Yosëri acorinquë chachin canpoa marëꞌ ina nontárin. Inaquësoꞌ noya noya catahuarinpoaꞌ.

Hebreos 8:4

Ipora huantaꞌ isoroꞌpaquë yaꞌhuërin naporini, co corto huaꞌan yaꞌcointonhuëꞌ. Cotioroꞌsaꞌ iráca nanan imatonaꞌ, corto huaꞌanoꞌsaꞌ yaꞌhuëtapi maꞌsha tëpacaiso marëꞌ.