Hebreos 1:8 - Chayahuita (Shahui)

⁸ Huiꞌninso nipirinhuëꞌ, noya noya acorin. Ina nontaton, itapon: “Quëmantaꞌ Yosënquën niꞌquëhuarëꞌ, yaꞌipi huaꞌanëntaran. Co onporontaꞌ pipiaranhuëꞌ. Piyapiroꞌsaꞌ noꞌtëquënáchin pënënaran niꞌton, noya nicaponën.

Hebreos 1:8 ပူးပေါင်းရင်းမြစ်များ

2 Samuel 23:3

Israiroꞌsanpoa chinotërëhuasoꞌ, nontërinco. Yápaꞌpoyarinpoaso naporin: ‘Insosona copirno yaꞌconpachin, noyasáchin nicaton camaitapon. Ca tëꞌhuatatonco natëincoso yaꞌhuërin.

Salmos 145:13

Quëma huaꞌanëntërancoisosoꞌ, yaꞌhuëmiatarin. Co onporonta quëmasoꞌ huaꞌan quëran pipiaranhuëꞌ.

Salmos 72:7

Ina huaꞌanëntasoꞌ, sano yaꞌhuëatoi noꞌtëquën yonquiꞌi. Yoqui taꞌhuantomiataquë huarëꞌ, inapo yaꞌhuëchi.

Isaías 45:25

Israiroꞌsasoꞌ cari catahuarahuë niꞌton, noꞌtëquën yonquiaponaꞌ: ‘¡Ma noyacha Sinioro imatëhua naporëhua paya!’ tëcaponaꞌ,” tënin.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Jeremías 38:15

—Natanancosoꞌ shaꞌhuitohuatënquën, atëpataponco. Maꞌsona nicacasoꞌ shaꞌhuitohuatënquëntaꞌ, co natëarancohuëꞌ, itërahuë.

Oseas 1:7

Cota huëntonso napoaponahuëꞌ, nosoroarahuë. Cari chachin inapitasoꞌ, nichaꞌësarahuë. Yosënënaco niꞌto, topinan nichaꞌësarahuë. Co ahuëtatona chaꞌësapihuëꞌ. Sahuëni, pëꞌchinan, cahuarioroꞌsaꞌ, sontaroꞌsa cahuarioquë paꞌpisopita, co inapita nohuantarahuëꞌ,” itaantarin.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Malaquías 3:1

Yosë yaꞌipi nanitapaton shaꞌhuitaantarinquëmaꞌ: “Niꞌcoꞌ. Co huaꞌquiya quëranhuëꞌ, comisionëhuë aꞌpararahuë. Inasoꞌ, pënënatënquëma cancanëma anoyatarinquëmaꞌ. Noya ninarëso pochin nicasëmaꞌ, Sinioro oꞌmacaso marëꞌ napoarin. Ina Sinioro huaꞌqui ninarápiramahuëꞌ, aꞌnanaya chinotëramacoso pëiquë yaꞌconarin. Canpitaroꞌco anoyatërahuëso anitotiinquëmaso marëꞌ aꞌparahuësoꞌ, nani oꞌmacaso naniriarin. Ina canpitasoꞌ, naꞌcon nohuantërama niꞌcamasoꞌ.

Mateo 1:23

“Aꞌna tahuëri nanon inaora cayoapon. Co quëmapiri sëꞌhuapirinhuëꞌ, napoapon. Quëmapiaꞌhuaya huaihuachin, Imanino itapi,” tënin. Yosë chachin oꞌmaton, yacaparinpoaꞌ, tapon naporin. Ina pochin nasitimahuachina, iráca ninopisoꞌ nanirin huachi.

Lucas 1:75

Ina pochin cancantatëhuaꞌ, inasáchin chinotarihuaꞌ. Chiminaquë huarëꞌ nóya nisarihuaꞌ.

Juan 10:30

Caso Tatahuëroꞌco napopináchin cancantërahuë, itërin Quisosori.

Juan 10:33

—Co ina marëꞌ naꞌpiquë yatëparainquënhuëꞌ. Yosë pinoranso marëꞌ napotarainquën. Quëmasoꞌ piyapinquën niponahuëꞌ, “Casoꞌ Yosëco,” toconan. Ina pochin nonan niꞌton, Yosë yayaꞌhuërëtëran, itopi.

Juan 20:28

—¡Quëma mini Sinioronëhuënquën! Natëranquën. Yosënëhuënquën niꞌton, chinotaranquën, itërin Tomasëri.

Romanos 9:5

Shimashonënpitasoꞌ Yosëri chachin huayonin. Ina quëran Cristo isoroꞌpaquë oꞌmahuachina, Israiro sanapi quëran nasitërin. Inasoꞌ Yosë chachin. Yaꞌipiya huaꞌanëntërinpoaꞌ. ¡Ma noyacha inaso paya! tënëhuaꞌ. Amen.

1 Corintios 15:25

Ina nohuanton, Quisocristo chiníquën nanantarin. Yaꞌipi huaꞌanëntarin. Aꞌna tahuëri yaꞌipi inimicoroꞌsaꞌ minsëarin.

Deuteronomio 7:14

Canpitaso aꞌnapita nacionoꞌsa quëran, naꞌcon naꞌcon catahuamiatarinquëmaꞌ. Ina nohuanton sanapinëmanta huaꞌhuanaꞌpiráchin nisarin. Quëmapimanta huiꞌnahuanaꞌpiroꞌsaráchin nisaramaꞌ. Pëꞌtahuanëmapitanta inapochachin nisarin.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

2 Pedro 1:11

Cancanëma quëran huarëꞌ imapatamaꞌ, aꞌna tahuëri huaꞌanëntërinquë quëpantarinquëmaꞌ noya yaꞌhuëmiatacamaso marëꞌ. Sinioro Quisocristo nóya cancantaton, nichaꞌësarinpoaꞌ. Inápaquë paꞌpatëhuaꞌ, co onporontaꞌ pipiarëhuahuëꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.